ស្ថានបេសកកម្មអចិន្ត្រៃយ៍កម្ពុជា ចោទប្រកាន់នូវការលើកឡើងរបស់ឧត្តមស្នងការទទួលបន្ទុកសិទ្ធិមនុស្សរបស់អង្គការសហប្រជាជាតិ (អ.ស.ប) លោក Volker Turk ដែលជំរុញឲ្យរដ្ឋាភិបាលចាត់វិធានការឱ្យបានឆាប់រហ័ស ដើម្បីបើកបរិយាកាសអំណោយផលសម្រាប់ការបោះឆ្នោតជាតិនៅកម្ពុជានាខែកក្កដា ខាងមុខ ថាជាការធ្វើនយោបាយូបនីយកម្មលើកម្ពុជា ឬជាការធ្វើឲ្យទៅជារឿងនយោបាយ និងជាការលើកឡើងតែមួយជ្រុង។
ស្ថានបេសកកម្មអចិន្ត្រៃយ៍កម្ពុជាប្រចាំអង្គការសហប្រជាជាតិ បានចេញសេចក្តីប្រកាសព័ត៌មានកាលពីថ្ងៃទី១៨ ខែមិថុនា ឆ្នាំ២០២៣ នេះថា កម្ពុជាប្ដេជ្ញាឥតងាករេចំពោះការអនុវត្តលទ្ធិប្រជាធិបតេយ្យសេរីពហុបក្ស និងការលើកកម្ពស់សិទ្ធិមនុស្ស ហើយភស្តុតាងដែលមិនអាចប្រកែកបាននោះ គឺមានអង្គការក្រៅរដ្ឋាភិបាលនៅកម្ពុជាដែលកំពុងដំណើរការដោយសេរី និងបើកចំហដល់ទៅ ៦ពាន់ស្ថាប័ន ប្រព័ន្ធផ្សព្វផ្សាយជិត ២ពាន់ស្ថាប័ន និងគណបក្សដែលបានចូលរួមការបោះឆ្នោតនាពេលខាងមុខចំនួនដល់ទៅ ១៨គណបក្សថែមទៀត។
ប្រភពដដែលអះអាងថា ដើម្បីរៀបចំការបោះឆ្នោតមួយប្រកបដោយសេរី ត្រឹមត្រូវ និងយុត្តិធម៌ គណៈកម្មាធិការជាតិរៀបចំការបោះឆ្នោតបានប្រើប្រាស់ស្តង់ដារតែមួយសម្រាប់គណបក្សនយោបាយទាំងអស់ ចំណែកឯគណបក្សភ្លើងទៀនមិនមែនជាគណបក្សតែមួយទេដែលខកខានមិនបានចូលរួមការបោះឆ្នោត ហើយការអាក់ខាននេះក៏មិនបានធ្វើឲ្យប៉ះពាល់ដល់លទ្ធិប្រជាធិបតេយ្យរបស់កម្ពុជានោះដែរ។
ស្ថានបេសកកម្មអចិន្ត្រៃយ៍កម្ពុជា បញ្ជាក់ថា សម្ព័ន្ធភាពជាមួយគណបក្សនយោបាយ សហជីព ឬអង្គភាពដែលពួនជ្រកក្រោមស្លាកណាមួយនោះ ពុំបានផ្តល់ឲ្យបុគ្គលណាម្នាក់បំពានច្បាប់ដោយរួចទោសឡើយ ក្នុងនោះការធ្វើវិសោធនកម្មច្បាប់បោះឆ្នោតនៅមុនការបោះឆ្នោតខាងមុខនេះ គឺដើម្បីឆ្លុះបញ្ចាំងនូវការទទួលខុសត្រូវរបស់អ្នកដឹកនាំថ្នាក់ជាតិ និងថ្នាក់ក្រោមជាតិ ដែលត្រូវតែបំពេញកាតព្វកិច្ចជាពលរដ្ឋខ្មែរគំរូក្នុងការទៅបោះឆ្នោតមុននឹងពួកគេឈរឲ្យគេបោះឆ្នោត។
កាលពីថ្ងៃទី១៦ ខែមិថុនា ឆ្នាំ២០២៣ ឧត្តមស្នងការទទួលបន្ទុកសិទ្ធិមនុស្សរបស់អង្គការសហប្រជាជាតិ លោក Volker Turk បានលើកឡើងថា លោកមានការព្រួយបារម្ភយ៉ាងខ្លាំងចំពោះការកាត់បន្ថយលំហពលរដ្ឋមុនពេលការបោះឆ្នោតជាតិនៅកម្ពុជា ក្នុងឆ្នាំ២០២៣ នេះ។ ជាងនេះទៀត ការព្រមានធ្វើវិសោធនកម្មច្បាប់បោះឆ្នោតនៅពេលនេះ នឹងក្លាយជាការរឹតត្បិតលើសិទ្ធិសេរីភាពនៃការបញ្ចេញមតិ និងការរំលោភសិទ្ធិរបស់ប្រជាពលរដ្ឋទាំងអស់ក្នុងការឈរឈ្មោះបោះឆ្នោត ដែលធានាដោយរដ្ឋធម្មនុញ្ញនៃប្រទេសកម្ពុជា និងឧបករណ៍សិទ្ធិមនុស្សអន្តរជាតិដទៃទៀត។
លោក Volker Turk អះអាងថា មុនការបោះឆ្នោត ត្រូវតែមានបរិយាកាសបើកចំហ និងពហុនិយម ដែលធានាសិទ្ធិសេរីភាពនៃការបញ្ចេញមតិ និងការបញ្ចេញមតិដោយសេរី ប៉ុន្តែអ្នកការពារសិទ្ធិមនុស្ស សហជីព និងសកម្មជននយោបាយ ត្រូវបានគេរាយការណ៍ថាប្រឈមមុខនឹងការដាក់ទណ្ឌកម្មផ្លូវច្បាប់ចំពោះការអនុវត្តសិទ្ធិរបស់ពួកគេ ដោយការប្រើសេរីភាពនៃការបញ្ចេញមតិ និងការជួបប្រជុំដោយសន្តិវិធី ជាដើម។
លោក Volker Turk ជំរុញឲ្យរដ្ឋាភិបាលកម្ពុជាផ្លាស់ប្ដូរដំណើរការរបស់ខ្លួន ព្រោះថាកិច្ចព្រមព្រៀងសន្តិភាពទីក្រុងប៉ារីស និងសន្ធិសញ្ញាសិទ្ធិមនុស្សអន្តរជាតិ គឺជាអ្នកធានានូវសន្តិភាព វិបុលភាព និងអនាគតដ៏ល្អប្រសើរសម្រាប់ប្រទេសកម្ពុជា ហើយការបើកឲ្យសង្គមស៊ីវិលធ្វើកិច្ចការដោយរស់រវើកក្នុងការពិភាក្សាដោយចំហ និងការគោរពសិទ្ធិមនុស្ស គឺជាសិទ្ធិដែលត្រូវបានការពារដោយឧបករណ៍សិទ្ធិមនុស្សអន្តរជាតិ រួមទាំងកតិកាសញ្ញាអន្តរជាតិស្ដីពីសិទ្ធិពលរដ្ឋ និងសិទ្ធិនយោបាយ ដែលបានផ្តល់សច្ចាប័នដោយប្រទេសកម្ពុជាក្នុងឆ្នាំ១៩៩២ កន្លងទៅ។
ទាក់ទិននឹងបញ្ហានេះ អនុប្រធានប្រចាំតំបន់អាស៊ីរបស់អង្គការឃ្លាំមើលសិទ្ធិមនុស្សអន្តរជាតិ Human Rights Watch លោក ហ្វីល រ៉ូបឺសុន កាលពីពាក់កណ្តាលខែឧសភា បានចាត់ទុកការបោះឆ្នោតជាតិនៅកម្ពុជាដែលគ្មានគណបក្សប្រឆាំងចូលរួមនៅខែកក្កដា ឆ្នាំ២០២៣ ខាងមុខនេះ ថាគ្រាន់តែជាការបោះឆ្នោតកំប្លុកកំប្លែងដែលលោក ហ៊ុន សែន កំពុងទាញប្រទេសកម្ពុជាឱ្យធ្លាក់ទៅក្នុងការដឹកនាំដូចប្រទេសកុម្មុយនីស្តកូរ៉េខាងជើងប៉ុណ្ណោះ។
ដំណើរការនៃការបោះឆ្នោតជាតិអាណត្តិទី៧ នឹងប្រព្រឹត្តទៅនៅអាទិត្យ ទី២៣ ខែកក្កដា ឆ្នាំ២០២៣ ខាងមុខ ប៉ុន្តែការបោះឆ្នោតនេះមិនមានការចូលរួមសង្កេតការណ៍ពីសហគមន៍អន្តរជាតិទេ ដោយសារតែពួកគេចាត់ទុកថាជាការបោះឆ្នោតមិនប្រកបដោយសេរី ត្រឹមត្រូវ និងយុត្តិធម៌ ព្រមទាំងគ្មានតម្លាភាព៕