 អំពាវនាវឱ្យសាលាឧទ្ធរណ៍ខេត្តត្បូងឃ្មុំ ទម្លាក់ចោលបទចោទនានាជុំវិញសំណុំរឿងសកម្មជនការពារព្រៃឈើ លោក ឆន ផល្លា ដែលសាលាឧទ្ធរណ៍នឹងបើកសវនាការនៅថ្ងៃទី៣ ខែកក្កដា បន្ទាប់ពីលោកត្រូវបានឃុំខ្លួនក្នុងពន្ធនាគារចាប់តាំងពីឆ្នាំ២០២១ មក។){kind=link}
មន្ត្រីជាន់ខ្ពស់ទទួលបន្ទុកឃ្លាំមើលសិទ្ធិមនុស្សអាដហុក (Adhoc) អំពាវនាវឱ្យសាលាឧទ្ធរណ៍ខេត្តត្បូងឃ្មុំ ទម្លាក់ចោលបទចោទនានាជុំវិញសំណុំរឿងសកម្មជនការពារព្រៃឈើ លោក ឆន ផល្លា ដែលសាលាឧទ្ធរណ៍នឹងបើកសវនាការនៅថ្ងៃទី៣ ខែកក្កដា បន្ទាប់ពីលោកត្រូវបានឃុំខ្លួនក្នុងពន្ធនាគារចាប់តាំងពីឆ្នាំ២០២១ មក។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី៣០ មិថុនា នេះថា សមាគមការពារសិទ្ធិមនុស្សអាដហុកបានផ្តល់ជូននូវមេធាវីទៅតាមនីតិវិធីផ្លូវច្បាប់ ដើម្បីជួយការពារក្តីឱ្យលោក ឆន ផល្លា រហូតមក។ ជាងនេះទៀត សមាគមអាដហុក បានធ្វើរបាយការណ៍ជូនដល់ស្ថាប័នពាក់ព័ន្ធ ព្រមទាំងឯកសារនានា ក៏ដូចជាភស្តុតាងជាច្រើនទៀតផងដែរទៅកាន់គណៈកម្មាធិការសិទ្ធិមនុស្សកម្ពុជា និងក្រសួងយុត្តិធម៌ ដើម្បីស្វែងរកយុត្តិធម៌ជូនលោក ឆន ផល្លា ប៉ុន្តែរហូតមកដល់ពេលនេះ មិនទាន់មានការឆ្លើយតបណាមួយពីក្រសួងយុត្តិធម៌ លើសំណុំរឿងរបស់សកម្មជនការពារព្រៃឈើរូបនេះនៅឡើយទេ។
លោក ស៊ឹង សែនករុណា សំណូមពរឱ្យសាលាដំបូងខេត្តរតនគិរី និងសាលាឧទ្ធរណ៍ខេត្តត្បូងឃ្មុំ ព្រមទាំងក្រសួងយុត្តិធម៌ ជួយពិនិត្យលើសំណុំរឿងលោក ឆន ផល្លា ឡើងវិញ ព្រោះថាសមាគមអាដហុកបានរកឃើញនូវភាពមិនប្រក្រតីជាច្រើនជុំវិញការចោទប្រកាន់របស់សាលាដំបូងខេត្តរតនគិរី ដែលធ្វើឱ្យប៉ះពាល់ដល់ប្រព័ន្ធយុត្តិធម៌របស់កម្ពុជាយ៉ាងធ្ងន់ធ្ងរ។
អ្នកនាំពាក្យសមាគមការពារសិទ្ធិមនុស្សអាដហុករូបនេះអំពាវនាវឱ្យស្ថាប័នពាក់ព័ន្ធជួយផ្តល់យុត្តិធម៌ដល់លោក ឆន ផល្លា ឱ្យគាត់ទទួលបានសេរីភាពឡើងវិញ ដើម្បីឱ្យលោកមានឱកាសជួបជុំគ្រួសាររបស់លោក និងដើម្បីបន្តការងារការពារព្រៃឈើដែលនៅសេសសល់បន្តទៀត។
សាលាឧទ្ធរណ៍ខេត្តត្បូងឃ្មុំ នឹងបើកសវនាការលើករណីសកម្មជនការពារព្រៃឈើ លោក ឆន ផល្លា នៅថ្ងៃទី៣ ខែកក្កដា ឆ្នាំ២០២៣ ខាងមុខនេះ បន្ទាប់ពីលោកបានដាក់ពាក្យបណ្ដឹងទៅសាលាឧទ្ធរណ៍ដើម្បីរកយុត្តិធម៌កាលពីឆ្នាំ២០២២ កន្លងទៅ។
លោក ឆន ផល្លា គឺជាសកម្មជនដីធ្លី និងព្រៃឈើនៅឃុំសេដា ស្រុកលំផាត់ ខេត្តរតនគិរី ត្រូវបានមន្ត្រីនគរបាលស្រុកលំផាត់ ចាប់ខ្លួនកាលពីថ្ងៃទី២០ ខែកញ្ញា ឆ្នាំ២០២១ នៅប៉ុស្តិ៍នគរបាលរដ្ឋបាលឃុំសេដា អំឡុងពេលដែលលោកទៅពិនិត្យមើលឈ្មោះបោះឆ្នោតតាមការណែនាំរបស់មន្ត្រីនគរបាលទាំងនោះ ដោយមិនបានបង្ហាញដីកាចាប់ខ្លួនអ្វីទាំងអស់។
បន្ទាប់ពីសមត្ថកិច្ចចាប់ឃុំខ្លួន កាលពីថ្ងៃទី២០ ខែកញ្ញា ឆ្នាំ២០២១ តុលាការខេត្តរតនគិរី បានសម្រេចផ្ដន្ទាទោសលោកដាក់ពន្ធនាគាររយៈពេល ៥ឆ្នាំ ពីបទ «កាប់គាស់ រុករានឆ្ការដុត និងឈូសឆាយដីព្រៃធ្វើជាកម្មសិទ្ធិ» ផ្អែកតាមមាត្រា៩៧ នៃច្បាប់ស្ដីពីព្រៃឈើ ប៉ុន្តែត្រូវលោកប្តឹងជំទាស់ទៅសាលាឧទ្ធរណ៍ខេត្តត្បូងឃ្មុំ វិញ។
រហូតដល់ថ្ងៃទី១៣ ខែកក្កដា ឆ្នាំ២០២២ សាលាឧទ្ធរណ៍ខេត្តត្បូងឃ្មុំ បានបដិសេធសាលក្រមរបស់សាលាដំបូងខេត្តរតនគិរី ដែលបានផ្ដន្ទាទោសលោកពីបទកាប់គាស់ រុករានឆ្ការដុត និងឈូសឆាយដីព្រៃធ្វើជាកម្មសិទ្ធិនោះ ប៉ុន្តែមុនសាលាឧទ្ធរណ៍ខេត្តត្បូងឃ្មុំ បដិសេធសាលក្រមរបស់សាលាដំបូងខេត្តរតនគិរី លោក ឆន ផល្លា ត្រូវបានសាលាដំបូងខេត្តរតនគិរី ចោទប្រកាន់លោកមួយករណីទៀត ព្រមទាំងប្រកាសសាលក្រមភ្លាមៗដោយសម្រេចផ្ដន្ទាទោសដាក់ពន្ធនាគាររយៈពេល ៦ឆ្នាំនៅខែកក្កដា ឆ្នាំ២០២២ ដដែលនោះ ដែលជាមូលហេតុធ្វើឱ្យលោកត្រូវបន្តការឃុំខ្លួនក្នុងពន្ធនាគាររហូតដល់ពេលនេះ។
លោក ឆន ផល្លា បានចូលរួមការពារព្រៃឈើតាំងពីឆ្នាំ២០១៦ មក ហើយនៅអំឡុងឆ្នាំ២០១៧ លោកបានដាក់ពាក្យប្តឹងចំនួន ៨ករណីទៅតុលាការប្រឆាំងនឹងមន្ត្រីមូលដ្ឋាន ដែលពាក់ព័ន្ធនឹងបទល្មើសព្រៃឈើ និងការទន្ទ្រានដីសហគមន៍ ប៉ុន្តែគ្មានបណ្ដឹងណាមួយរបស់លោកត្រូវបានអាជ្ញាធរយកទៅដោះស្រាយនោះឡើយ៕