35 C
Phnom Penh

លោក ហ៊ុន សែន គាស់​រឿង​ដោះដូរ​ភូមិ​លោក ហេង សំរិន ដើម្បី​ទប់​ចរន្ត​ពលរដ្ឋ​ដែល​បកអាក្រាត​រឿង​បាត់បង់​ទឹកដី​ខ្មែរ​តាម​ព្រំដែន

ដោយ ឌឹ ខេមបូឌា ដេលី

បទវិភាគ

ក្រុម​អ្នក​ឃ្លាំមើល​លើកឡើង​ថា ការ​ដែល​លោក ហ៊ុន សែន គាស់​រឿង​ដោះដូរ​ភូមិ​លោក ហេង សំរិន ប្រធាន​រដ្ឋសភា ឲ្យ​វៀតណាម​នៅ​មុន​បោះឆ្នោត គឺ​ដើម្បី​ទប់​ចរន្ត​ពលរដ្ឋ​ខ្មែរ​ដែល​បកអាក្រាត​ឧក្រិដ្ឋកម្ម​នយោបាយ​របស់​គាត់​ដែល​គប់គិត​ជាមួយ​មេដឹកនាំ​វៀតណាម រហូត​ដល់​កាត់​កោះ ផ្ទៃសមុទ្រ ដីគោក​ខ្មែរ​អស់​រាប់​ម៉ឺន​គីឡូម៉ែត្រ​ការ៉េ ឲ្យ​វៀតណាម​ត្រួតត្រា។

ការ​លើកឡើង​នេះ បន្ទាប់ពី​បុរស​ខ្លាំង​ក្រាញ​អំណាច​ត​ពូជ​នៅ​កម្ពុជា លោក ហ៊ុន សែន បាន​យក​វីដេអូ​ឃ្លីប​ប្រមាណ ២២​នាទី​ដែល​លោក​ថ្លែង​បកស្រាយ​រឿង​ដោះដូរ​ដី​ភូមិ​លោក ហេង សំរិន ឲ្យ​ទៅ​វៀតណាម កាលពី​ថ្ងៃទី​១៦ ខែ​សីហា ឆ្នាំ​២០២០ យក​មក​ផ្សាយ​ឡើងវិញ​ក្រោម​ហេតុផល​ថា ដើម្បី​កុំ​ឲ្យ​ប្រជាពលរដ្ឋ​ភ័ន្តច្រឡំ។

លោក ហ៊ុន សែន យក​វីដេអូ​ឃ្លីប​ជាង ២២​នាទី​មក​ផុស​ឡើងវិញ​នេះ បន្ទាប់ពី​អ្នក​ប្រើប្រាស់​បណ្ដាញ​សង្គម និង​មន្ត្រី​បក្ស​ប្រឆាំង​បាន​នាំគ្នា​ចែករំលែក​វីដេអូ​ឃ្លីប​ជិត ១​នាទី​ដែល​លោក ហ៊ុន សែន និយាយ​រឿង​កាត់​ដី​ភូមិ​លោក ហេង សំរិន ឲ្យ​ទៅ​ភាគី​វៀតណាម​គ្រប់គ្រង​នា​ពេល​កន្លងមក​ថា​ជា​រឿង​ត្រឹមត្រូវ។

បុរស​ខ្លាំង​កាន់​អំណាច​ជិត ៤០​ឆ្នាំ​នៅ​កម្ពុជា លោក ហ៊ុន សែន ថា​ការ​យក​វីដេអូ​ឆ្នាំ​២០២០ មក​ផុស​ឡើងវិញ​នេះ ដើម្បី​ឆ្លើយតប​ទៅ​នឹង​ក្រុម​ញុះញង់​ដែល​លោក​ចោទ​ថា​បាន​កាត់​ត​វីដេអូ​លោក​និយាយ ហើយ​ធ្វើ​ឲ្យ​បាត់​អត្ថន័យ​ដើម​ដែល​នាំ​ឲ្យ​សាធារណជន​មាន​ការ​ភ័ន្តច្រឡំ។

លោក ហ៊ុន សែន បន្ត​ថា ការ​ដោះដូរ​ដី​កម្ពុជា​ទៅ​ឲ្យ​វៀតណាម​គ្រប់គ្រង​នោះ វា​មិនមែន​ជា​អំពើ​ក្បត់​ជាតិ​ឡើយ ដោយសារ​ការ​ដោះដូរ​នេះ​មាន​ការ​ព្រមព្រៀង​រវាង​រដ្ឋាភិបាល​កម្ពុជា និង​វៀតណាម។ លើស​ពី​នេះ ការ​ដោះដូរ​ដី​ភូមិ​លោក ហេង សំរិន ទៅ​ឲ្យ​វៀតណាម​គ្រប់គ្រង លោក ហ៊ុន សែន ថា​បាន​ធ្វើ​ឲ្យ​កម្ពុជា​ទទួល​បាន​ដី​ជាង ២​ពាន់​ហិកតារ​ពី​វៀតណាម ទៅវិញ​ទេ។

ចំពោះ​រឿង​ដោះដូរ​ដី​នេះ លោក ហ៊ុន សែន ថា​បើ​ពលរដ្ឋ​ចង់​បន្ទោស កុំ​បន្ទោស​លោក គួរ​ទៅ​បន្ទោស​ប្រទេស​បារាំង ដែល​បាន​គូស​ផែនទី ព្រោះ​រឿង​ដែល​រដ្ឋាភិបាល​កម្ពុជា​ប្រគល់​ភូមិ​លោក ហេង សំរិន ឲ្យ​វៀតណាម​គ្រប់គ្រង គឺ​ធ្វើ​តាម​ផែនទី​តម្កល់​នៅ​អង្គការ​សហប្រជាជាតិ​ដែល​បារាំង​ជា​អ្នក​គូស។

អ្នកវិភាគ​នយោបាយ និង​ជា​ប្រធាន​វេទិកា​ពលរដ្ឋ លោក គឹម សុខ យល់​ថា លោក ហ៊ុន សែន គាស់​រឿង​នេះ​នៅ​មុន​បោះឆ្នោត​ដើម្បី​ទប់​ចរន្ត​ពលរដ្ឋ​ខ្មែរ​ដែល​បកអាក្រាត​ឧក្រិដ្ឋកម្ម​នយោបាយ​របស់​គាត់ ដែល​គប់គិត​ជាមួយ​មេដឹកនាំ​វៀតណាម រហូត​ដល់​កាត់​កោះ ផ្ទៃសមុទ្រ ដីគោក​ខ្មែរ​អស់​រាប់​ម៉ឺន​គីឡូម៉ែត្រ​ការ៉េ​ឲ្យ​វៀតណាម​ត្រួតត្រា។

លោក​ថា រយៈពេល ៣០​ឆ្នាំ​មក​នេះ ពលរដ្ឋ​ខ្មែរ​ដឹង​ច្បាស់​ណាស់​ថា​គាត់​ជា​អ្នក​ដឹកនាំ​កាត់​ដី​ខ្មែរ​ឲ្យ​វៀតណាម និង​បង្ហូរ​ជនជាតិ​វៀតណាម​ខុស​ច្បាប់​រាប់​ម៉ឺន​គ្រួសារ​មក​រស់នៅ​លើ​ទឹកដី​កម្ពុជា។

លោក គឹម សុខ បន្ត​លើកឡើង​ទៀត​ថា ប្រជាជន​ខ្មែរ​មិន​ចូលចិត្ត​រស់នៅ​ក្បែរ​ជនជាតិ​វៀតណាម ដែល​ចូលចិត្ត​ឡូឡា​រញ៉េវរញ៉ាវ​បង្ក​រឿង​គ្មាន​លុះ​ថ្ងៃ​នោះ​ទេ។ តំបន់​ណា​ដែល​មាន​ជនជាតិ​វៀតណាម​រស់នៅ​ច្រើន ប្រជាជន​ខ្មែរ​តែងតែ​ផ្លាស់​ទី​ចេញ ហើយ​ខុស​ពី​ប្រជាជន​ខ្មែរ​ដែល​មិន​ចេះ​ឈ្លានពាន​ប្រទេស​ជិតខាង ប្រជាជន​វៀតណាម​មាន​វប្បធម៌​ជា​អ្នក​ទន្ទ្រាន​ឈ្លានពាន​គ្រប់​ពេលវេលា។

លោក​ថា នេះ​បញ្ជាក់​ច្បាស់​ថា គឺ​ប្រជាជន​វៀតណាម​ដែល​ទន្ទ្រាន​មក​រស់នៅ​លើ​ដី​ខ្មែរ បង្កើត​ជា​ភូមិ​ច្រើន​នៅ​ក្នុង​ទឹកដី​ខ្មែរ​តាម​ព្រំដែន មិនមែន​ប្រជាជន​ខ្មែរ​រស់នៅ​លើ​ដី​វៀតណាម​ដូច​លោក ហ៊ុន សែន និយាយ​មិន​យល់​វប្បធម៌ និង​ភូមិសាស្ត្រ​នោះ​ឡើយ។

លោក​បន្ត​ថា លោក ហ៊ុន សែន កំពុង​បោកប្រាស់​ប្រជាពលរដ្ឋ​ខ្មែរ។ គាត់​ថា​វៀតណាម​ត្រូវ​កាត់​ដី​វៀតណាម ឲ្យ​ភាគី​ខ្មែរ​ជាង ២​ពាន់​ហិកតារ​ជា​ការ​ដោះដូរ តែ​មិន​បាន​បង្ហាញ​ថា ដី​វៀតណាម​នៅ​តំបន់​ណា​ដែល​កាត់​ឲ្យ​ខ្មែរ​នោះ​ទេ គឺ​មាន​តែ​ឃើញ​កាត់​ភូមិ​ខ្មែរ​ច្បាស់ៗ​ឲ្យ​វៀតណាម។ វា​ជា​ល្បែង​របស់​លោក ហ៊ុន សែន កាត់​ដី​ខ្មែរ​ឲ្យ​វៀតណាម​សុទ្ធសាធ។

កាលពី​ដើម​ខែ​វិច្ឆិកា ឆ្នាំ​២០១៨ រដ្ឋសភា​បាន​អនុម័ត​យល់ព្រម​លើ​ការ​បោះ​បង្គោល​ព្រំដែន​ជាមួយ​វៀតណាម ដែល​រដ្ឋាភិបាល​បោះ​បាន ៨៤% ក្រោម​សំឡេង​គាំទ្រ ១១០​លើ​១១០ នៃ​សមាជិក​សភា​របស់​គណបក្ស​កាន់​អំណាច​ទាំងអស់​ដែល​មាន​វត្តមាន​ក្នុង​កិច្ចប្រជុំ។

សភា​អះអាង​ថា ការ​អនុម័ត​យល់ព្រម​នេះ​យោង​ទៅ​លើ​សន្ធិសញ្ញា​បំពេញ​បន្ថែម​ឆ្នាំ​១៩៨៥ និង​សន្ធិសញ្ញា​បំពេញ​បន្ថែម​ឆ្នាំ​២០០៥ រវាង​ព្រះរាជាណាចក្រ​កម្ពុជា និង​សាធារណរដ្ឋ​សង្គម​និយម​វៀតណាម និង​ត្រូវ​បាន​ប្រកាស​ជា​ការ​ប្រញាប់។

កម្ពុជា-វៀតណាម មាន​ព្រំប្រទល់​ដី​គោក​ជាប់​គ្នា​ប្រវែង ១២៧០​គីឡូម៉ែត្រ ហើយ​មក​ដល់​ពេលនេះ​នៅ​សល់ ១៦% ទៀត​ដែល​កម្ពុជា​មិន​ទាន់​ឯកភាព​ជាមួយ​វៀតណាម​ឲ្យ​បោះ​បញ្ចប់ ដោយ​រង់ចាំ​ភាគី​បារាំង​គូស​ចម្លង​ផែនទី​មាត្រដ្ឋាន​ពី​ខ្នាត ១​លើ​១០០​ពាន់ ទៅ​ជា​ខ្នាត ១​លើ​៥០​ពាន់​វិញ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស