សាជីវកម្មហិរញ្ញវត្ថុអន្តរជាតិប្រកាសបើកការស៊ើបអង្កេតលើធនាគារអេស៊ីលីដា (ACLEDA Bank) និងមីក្រូហិរញ្ញវត្ថុចំនួន ៦ ទៀតនៅកម្ពុជា ដែលនាំឲ្យមានបំណុលវ័ណ្ឌកបណ្ដាលមកពីការផ្ដល់កម្ចីបែបកេងប្រវ័ញ្ចលើប្រជាពលរដ្ឋនៅក្នុងប្រទេសកម្ពុជា។
សេចក្ដីប្រកាសរបស់អង្គការសម្ព័ន្ធខ្មែរជំរឿន និងការពារសិទ្ធិមនុស្ស (លីកាដូ) និងអង្គការសមធម៌កម្ពុជា (EC) ចេញផ្សាយនៅថ្ងៃទី២ ខែសីហា ឆ្នាំ២០២៣ ឲ្យដឹងថា ការិយាល័យភាពអនុលោមទីប្រឹក្សា ដោះស្រាយវិវាទ (ស៊ីអេអូ) នៃសាជីវកម្មហិរញ្ញវត្ថុអន្តរជាតិ (IFC) នឹងបើកការស៊ើបអង្កេតអំពីអនុលោមភាពនៃស្ថាប័នផ្ដល់កម្ចីមីក្រូហិរញ្ញវត្ថុចំនួន ៦ នៅកម្ពុជា និងអន្តរការី ៤ ពាក់ព័ន្ធនឹងផលប៉ះពាល់ដែលបណ្ដាលមកពីបំណុលវ័ណ្ឌក និងការផ្ដល់កម្ចីបែបកេងប្រវ័ញ្ច។
ការចេញសេចក្ដីប្រកាសព័ត៌មានរបស់អង្គការក្រៅរដ្ឋាភិបាល ធ្វើឡើងបន្ទាប់សាជីវកម្មហិរញ្ញវត្ថុអន្តរជាតិ (International Finance Corporation) ឬ IFC កាលពីថ្ងៃទី១ ខែសីហា នេះ បានប្រកាសបើកការស៊ើបអង្កេតលើគ្រឹះស្ថានមីក្រូហិរញ្ញវត្ថុទាំង ៦ នៅកម្ពុជា ក្នុងនោះមានធនាគារអេស៊ីលីដា គ្រឹះស្ថានមីក្រូហិរញ្ញវត្ថុអម្រឹត គ្រឹះស្ថានមីក្រូហិរញ្ញវត្ថុប្រាសាក់ ធនាគារហត្ថា ធនាគារអិលអូអិលស៊ី និងធនាគារស្ថាបនា ជាដើម។
ក្រៅពីគ្រឹះស្ថានទាំង ៦ ខាងលើនេះ ក៏មានវិនិយោគិន ឬមូលនិធិចំនួន ៤ ទៀតដូចជា ឥណទានពង្រឹងមីក្រូហិរញ្ញវត្ថុ មូលនិធិគំនិតផ្ដួចផ្ដើមមីក្រូហិរញ្ញវត្ថុដើម្បីបំណុលអាស៊ី ក្រុមហ៊ុន Advans S.A និងក្រុមហ៊ុន North Haven Thai Private Equity Fund L.P ក៏ស្ថិតក្នុងការស៊ើបអង្កេតនេះដែរ។
នាយិកាអង្គការលីកាដូ លោកស្រី ណាលី ពីឡូក ប្រាប់សារព័ត៌មានក្នុងស្រុកថា ជារឿងគួរឲ្យរីករាយដែលគណៈគ្រប់គ្រងរបស់ IFC បរាជ័យក្នុងការរារាំងដំណើរការនេះ ហើយបានទុកឱកាសឲ្យ CAO បន្តធ្វើការងារខ្លួនទៅមុខដោយឯករាជ្យ។ វាជារឿងគួរឲ្យខឹងណាស់ដែលគណៈគ្រប់គ្រងបានជំទាស់ និងបានពន្យារពេលស៊ើបអង្កេតរបស់ CAO។
ការិយាល័យអនុលោមទីប្រឹក្សាដោះស្រាយវិវាទហៅកាត់ថា CAO ដែលមាននាទីឃ្លាំមើល IFC បានសម្រេចឲ្យមានការស៊ើបអង្កេតលើគ្រឹះស្ថានហិរញ្ញវត្ថុទាំងនេះកាលពីថ្ងៃទី១៣ ខែមិថុនា ប៉ុន្តែការស៊ើបអង្កេតត្រូវបានពន្យារពេល ដោយសារតែគណៈគ្រប់គ្រងស្ថាប័ន IFC បានស្នើទៅកាន់ក្រុមប្រឹក្សាភិបាលឲ្យពិនិត្យលើការសម្រេចមួយនេះបន្តទៀត។ IFC គឺជាសមាជិករបស់ធនាគារពិភពលោក (World Bank Group) ហើយកន្លងមក IFC មិនធ្លាប់អនុវត្តគោលការណ៍ពិនិត្យឡើងវិញបែបនេះពីមុនមកទេ។
សាជីវកម្មហិរញ្ញវត្ថុអន្តរជាតិសម្រេចបើកការស៊ើបអង្កេតនេះ បន្ទាប់ពីអង្គការលីកាដូ និងអង្គការសមធម៌កម្ពុជា ធ្វើជាតំណាងឲ្យប្រជាពលរដ្ឋរងគ្រោះដើម្បីដាក់បណ្ដឹងទៅសាជីវកម្មហិរញ្ញវត្ថុអន្តរជាតិ និងបានចោទគ្រឹះស្ថានមីក្រូហិរញ្ញវត្ថុចំនួន ៦ ថាបានបង្កមហន្តរាយដល់អ្នកខ្ចី។
អង្គការក្រៅរដ្ឋាភិបាលដាក់បណ្ដឹងឲ្យសាជីវកម្មហិរញ្ញវត្ថុអន្តរជាតិ (International Finance Corporation ឬ IFC) ជាស្ថាប័នមួយនេះដែលជាអ្នកផ្តល់មូលនិធិដល់ស្ថាប័នមីក្រូហិរញ្ញវត្ថុនៅកម្ពុជាទាំង ៦ នៅកម្ពុជា។
កាលពីឆ្នាំ២០២១ អង្គការលីកាដូ រកឃើញថា វិស័យមីក្រូហិរញ្ញវត្ថុនៅកម្ពុជាកំពុងធ្វើឲ្យមានការរំលោភសិទ្ធិមនុស្សនៅក្នុងភូមិជាច្រើន។ អង្គការលីកាដូឲ្យដឹងទៀតថា ពលរដ្ឋដែលជាកូនបំណុលទាំងនោះបានបង្ខំចិត្តខ្ចីប្រាក់ពីអ្នកចងការឯកជន កាត់បន្ថយអាហារបរិភោគ លក់ទ្រព្យសម្បត្តិ លក់ដី ពលកម្មកុមារ កុមារបោះបង់ការសិក្សា ភាពតានតឹងនៅក្នុងគ្រួសារ បញ្ហាដំណេក និងការធ្វើចំណាកស្រុកដោយសារបញ្ហាបំណុល៕