32 C
Phnom Penh

រដ្ឋសភា​នីតិកាល​ទី​៧ នឹង​បើក​សម័យ​ប្រជុំ​ដំបូង​នៅ​ថ្ងៃទី​២១​សីហា ក្រោម​ព្រះរាជ​អធិបតីភាព​ព្រះមហាក្សត្រ

ដោយ ឌឹ ខេមបូឌា ដេលី

បទវិភាគ

រដ្ឋសភា​នីតិកាល​ទី​៧ នឹង​ប្រារព្ធ​ពិធី​បើក​សម័យ​ប្រជុំ​លើកដំបូង​នៅ​ថ្ងៃទី​២១ ខែ​សីហា ឆ្នាំ​២០២៣ វេលា​ម៉ោង ៨:០០​ព្រឹក ក្រោម​ព្រះរាជ​អធិបតីភាព​ដ៏​ខ្ពង់ខ្ពស់​បំផុត​របស់​ព្រះករុណា ព្រះបាទ​សម្តេច​ព្រះ​បរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា។

យោង​តាម​សេចក្តី​ជូនដំណឹង​របស់​អគ្គលេខាធិការដ្ឋាន​រដ្ឋសភា បាន​ឲ្យ​ដឹង​ថា ក្នុង​ពិធី​ដ៏​មហោឡារិក និង​ជា​ប្រវត្តិសាស្ត្រ​នេះ ឥស្សរជន​ជាន់ខ្ពស់ អង្គទូត​ប្រចាំ​ព្រះរាជាណាចក្រ​កម្ពុជា និង​តំណាង​អង្គការ​ក្រៅ​រដ្ឋាភិបាល​មួយ​ចំនួន ក៏​ត្រូវ​បាន​អញ្ជើញ​ចូលរួម​ជា​កិត្តិយស​ផង​ដែរ។

បន្ទាប់ពី​ពិធី​បើក​សម័យ​ប្រជុំ​ដំបូង​ខាងលើ​នេះ សម័យ​ប្រជុំ​រដ្ឋសភា​លើក​ទី​១ នីតិកាល​ទី​៧ នឹង​ផ្តើម​ការងារ​ក្រោម​អធិបតីភាព​របស់​លោក ហេង សំរិន ព្រឹទ្ធសមាជិក​រដ្ឋសភា ដើម្បី​សម្រេច​អំពី​សុពលភាព​នៃ​អាណត្តិ​របស់​សមាជិក​នីមួយៗ​ក្នុង​ការ​អនុម័ត​បទបញ្ជា​ផ្ទៃក្នុង​នៃ​រដ្ឋសភា​នីតិកាល​ទី​៧។

ប្រភព​ដដែល​លើកឡើង​ថា នៅ​ថ្ងៃ​អង្គារ ទី​២២ ខែ​សីហា ឆ្នាំ​២០២៣ វេលា​ម៉ោង ៨:០០​ព្រឹក សម័យ​ប្រជុំ​រដ្ឋសភា​លើក​ទី​១ នីតិកាល​ទី​៧ នឹង​បន្ត​ដើម្បី​ធ្វើការ​បោះឆ្នោត​ជ្រើសតាំង​ប្រធាន អនុប្រធាន​រដ្ឋសភា ប្រធាន អនុប្រធាន​គណៈកម្មការ​ជំនាញ​ទាំងអស់​នៃ​រដ្ឋសភា និង​ផ្តល់​សេចក្តី​ទុកចិត្ត​ចំពោះ​រាជរដ្ឋាភិបាល។

ព្រះរាជក្រឹត្យ​ចុះ​ថ្ងៃទី​០៧ ខែ​សីហា ឆ្នាំ​២០២៣ ព្រះករុណា​ព្រះបាទ​សម្តេច​ព្រះ បរមនាថ នរោត្តម សីហមុនី ព្រះមហាក្សត្រ​នៃ​រាជាណាចក្រ​កម្ពុជា​បាន​ត្រាស់​បង្គាប់​ចាត់តាំង​លោក ហ៊ុន ម៉ាណែត ជា​នាយករដ្ឋមន្ត្រី​របស់​ប្រទេស​កម្ពុជា ដើម្បី​រៀបចំ​គណៈរដ្ឋមន្ត្រី​សម្រាប់​រាជរដ្ឋាភិបាល​អាណត្តិ​ទី​៧។

លោក ហ៊ុន ម៉ាណែត ត្រូវ​បាន​ព្រះមហាក្សត្រ​ចាត់តាំង​ជា​នាយករដ្ឋមន្ត្រី​កម្ពុជា​នា​ពេលនេះ ធ្វើឡើង​បន្ទាប់ពី​លោក ហ៊ុន សែន ដែល​ជា​ឪពុក បាន​ប្រកាស​លាលែង​ពី​តំណែង​នាយករដ្ឋមន្ត្រី​កាលពី​ថ្ងៃទី​២៦ ខែ​កក្កដា ឆ្នាំ​២០២៣ ដើម្បី​ផ្ទេរ​តំណែង​នេះ​ឲ្យ​កូនប្រុស​ឡើង​កាន់​តំណែង​ជំនួស​វិញ។

តែ​យ៉ាងណា ការ​ទទួល​បាន​តំណែង​នាយករដ្ឋមន្ត្រី​ពី​ឪពុក​របស់​លោក ហ៊ុន ម៉ាណែត នា​ពេលនេះ ត្រូវ​មេដឹកនាំ​បក្ស​ប្រឆាំង និង​អ្នក​ឃ្លាំមើល​សង្គម​ចាត់ទុក​ថា​ជា​ការ​ដឹកនាំ​បែប​ផ្ដាច់ការ និង​ត​ពូជ​ដោយ​គ្រួសារ​ត្រកូល​ហ៊ុន និង​បក្ខពួក ដោយ​មិន​គិត​ផល​ប្រយោជន៍​ពលរដ្ឋ និង​ប្រទេស​ជាតិ ខណៈ​ក្រុម​មេដឹកនាំ និង​មន្ត្រី​បក្ស​កាន់​អំណាច​នៅ​តាម​ក្រសួង​ស្ថាប័ន​រដ្ឋ រួម​ទាំង​ប្រព័ន្ធ​ឃោសនា​របស់​លោក ហ៊ុន សែន បាន​នាំគ្នា​ចេញ​សេចក្ដី​ថ្លែងការណ៍​អបអរ​លោក ហ៊ុន ម៉ាណែត ព្រោងព្រាត៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស