បេក្ខជនខ្មែរ-អាមេរិកាំងមួយរូបទៀតហើយបានចូលប្រឡូកក្នុងឆាកនយោបាយអាមេរិកាំងថ្នាក់ក្រុង ដើម្បីឈរឈ្មោះឲ្យពលរដ្ឋជ្រើសរើសជាអភិបាលក្រុងមួយនៅក្នុងរដ្ឋប៉ែកខាងកើតសហរដ្ឋអាមេរិក។
លោក អ៊ួង សុផាឌី ជាបេក្ខជនមួយរូបដែលនឹងប្រកួតជាមួយបេក្ខជនអាមេរិកាំង ៥រូបផ្សេងទៀតនៅថ្ងៃទី៧ ខែវិច្ឆិកា មុនដាច់ឆ្នាំ២០២៣ នេះ។ បើបានទទួលជោគជ័យ លោកជាពលរដ្ឋអាមេរិកាំងដើមកំណើតខ្មែរទី១ ដែលនឹងគ្រប់គ្រងទីក្រុង Laurel រដ្ឋ Maryland ដែលមានពលរដ្ឋចម្រុះជាតិសាសន៍ប្រមាណជិត ៥ម៉ឺននាក់។
ក្នុងនាមជាអតីតជនភៀសខ្លួនពីប្រទេសកម្ពុជានាដើមទសវត្ស១៩៨០ លោក អ៊ួង សុផាឌី បានរៀបរាប់ប្រាប់ពលរដ្ឋខ្មែរ-អាមេរិកាំងប្រមាណ ៤០នាក់ទៀតនៅចំពោះព្រះភ័ក្ត្រព្រះសង្ឃគង់នៅវត្តពុទ្ធិការាម កាលពីថ្ងៃអាទិត្យ ទី២០ ខែសីហា អំពីជីវិតឆ្លងកាត់ការលំបាកមុនចាកចេញពីមាតុភូមិទៅកាន់ទឹកដីថ្មីនៃសហរដ្ឋអាមេរិក ដើម្បីកសាងជីវិតតាំងពីផ្តើមរៀនភាសា រហូតរៀនបានសញ្ញាបត្រវិស្វកម្មស៊ីវិលផ្នែកសំណង់។
លោកបន្តថា បន្ទាប់ពីបានរៀបចំជីវិតប្រកបដោយជោគជ័យអស់រយៈពេលជាង ៤០ឆ្នាំ លោកចង់ធ្វើវិភាគទានបរិច្ចាគអ្វីដែលលោកមាន ដើម្បីសងគុណសហគមន៍ដែលលោករស់នៅនោះវិញ មុននឹងចូលនិវត្តន៍។
លោក អ៊ួង សុផាឌី ថ្លែងដោយក្តីសង្ឃឹមយ៉ាងមោះមុតថា លោកនឹងឈ្នះឆ្នោតដើម្បីដឹកនាំទីក្រុងនោះ ពីព្រោះលោកជាមនុស្សថ្មី មានបទពិសោធន៍យល់ដឹងអំពីសេចក្តីត្រូវការចាំបាច់នៅក្នុងទីក្រុង និងសហគមន៍របស់លោក។
គម្រោងទី១ របស់លោក គឺបង្កើនថវិកាដល់ស្ថាប័នប្រតិបត្តិច្បាប់ law enforcement ដើម្បីរក្សាសន្តិសុខ និងសុវត្ថិភាពជូនពលរដ្ឋគ្រប់ៗគ្នា។
លោក អ៊ួង សុផាឌី បញ្ជាក់ថា រឿងចាញ់ឈ្នះក្នុងការប្រកួតប្រជែងស្មើភាពគ្នារកសន្លឹកឆ្នោតគាំទ្រពីពលរដ្ឋជារឿងធម្មតាក្នុងលទ្ធិប្រជាធិបតេយ្យ ប៉ុន្តែលោកចង់បង្ហាញឲ្យជាតិសាសន៍ដទៃដឹងថា ជនភៀសខ្លួនខ្មែរដូចរូបលោក និងគ្រួសារលោកក៏មានសេចក្តីក្លាហានដែរ ឲ្យតែមានជំនឿមុតមាំ ការប្ដេជ្ញាចិត្តឥតងាករេ និងការគាំទ្រពីគ្រួសារ៕