ដោយ៖ ហាស់ សាន
សមាជិករងគ្រោះពីការផ្តល់ប្រាក់កម្ចីដើម្បីទទួលបានការប្រាក់ក្នុងក្រុមហ៊ុន CIC Partner ទាមទារឱ្យអ្នកគ្រប់គ្រងជាន់ខ្ពស់ទាំង ១៣នាក់របស់ក្រុមហ៊ុននេះ សងលុយពួកគេវិញ។
ទោះជាយ៉ាងណាក៏ដោយ ក្រុមអ្នកវិនិយោគដែលដាក់លុយរកស៊ីនៅក្នុងក្រុមហ៊ុននេះអះអាងថា បុរសម្នាក់ដែលគេស្គាល់ថាជាប្រធានក្រុមប្រឹក្សាភិបាលនៃក្រុមហ៊ុនជិត ២០ មានរចនាសម្ព័ន្ធដូចជាសម្បុកពីងពាង និងជាថៅកែហាង ផាកកាហ្វេ (Park Café) គឺលោក គុយ វ៉ាត បានធ្វើឲ្យបាត់លុយរាប់សិបលានដុល្លារ ដែលជាលុយវិនិយោគនៅក្នុងក្រុមហ៊ុន។ ពួកគេនិយាយថា លោក គុយ វ៉ាត នៅមិនទាន់ចេញមុខធ្វើការបកស្រាយអំពីការបាត់លុយទាំងនោះនៅឡើយទេ ហើយថាសមត្ថកិច្ចក៏មិនទាន់បើកការស៊ើបអង្កេតលើបញ្ហាទាំងនេះដែរ។
សមាជិករងគ្រោះពីការឲ្យប្រាក់ខ្ចីដើម្បីទទួលបានការប្រាក់ ទាមទារឱ្យអ្នកគ្រប់គ្រងជាន់ខ្ពស់ក្នុងក្រុមហ៊ុន ខេមបូឌាន អ៊ីនវេស្ទ័រ ឃែបភីថល ផាតនឺ (Cambodian Investor Capital Partner) ហៅកាត់ថា CIC Partner ទាំង ១៣នាក់ ដូចជាលោក គុយ វ៉ាត ដែលជាម្ចាស់ហាង Park Café លោក សោម សម្បត្តិ និងលោក ឃីម សុខហេង ជាដើម សងប្រាក់ទៅពួកគេវិញ បន្ទាប់ពីក្រុមហ៊ុននេះផ្អាកបង់ការប្រាក់ឱ្យពួកគេអស់រយៈពេលជិត ១ឆ្នាំមក។
ពលរដ្ឋជាច្រើននាក់ដែលអះអាងថាខ្លួនជាសមាជិករងគ្រោះពីការផ្តល់ប្រាក់ខ្ចីដើម្បីស៊ីការប្រាក់ខ្ពស់ពីក្រុមហ៊ុនមូលនិធិ CIC Partner បានទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះថា ជនរងគ្រោះដែលបានឱ្យក្រុមហ៊ុនមូលនិធិ CIC Partner ខ្ចីប្រាក់ដើម្បីទទួលបានការប្រាក់មកវិញ កំពុងទាមទារឱ្យក្រុមហ៊ុនដោះស្រាយប្រាក់ដែលពួកគេបានដាក់វិនិយោគទៅក្នុងក្រុមហ៊ុនកន្លងមក ដែលមានទំហំទឹកប្រាក់រាប់ម៉ឺនដុល្លារ រាប់សែនដុល្លារសហរដ្ឋអាមេរិកក្នុងម្នាក់ៗ បន្ទាប់ពីក្រុមហ៊ុននេះឈប់ផ្តល់ការប្រាក់ប្រចាំខែឱ្យពួកគេចាប់តាំងពីខែឧសភា ឆ្នាំ២០២៣ មក។
ជនរងគ្រោះទាំងនោះបានរៀបរាប់ថា ប្រាក់ដែលពួកគេបានផ្តល់ទៅឱ្យក្រុមហ៊ុននេះខ្ចី គឺមានមេក្រុមជាអ្នកប្រមូល ក្នុងនោះក៏មានគ្រូជោគជ័យឈ្មោះ ឃីម សុខហេង និងលោក សោម សម្បត្តិ ដែរ។
ប្រភពដដែលបន្តថា គ្រាន់តែលោក ឃីម សុខហេង ម្នាក់ អាចប្រមូលលុយពីកូនសិស្សដែលជឿជាក់លើគាត់តាមរយៈនៃការបង្រៀនវគ្គជោគជ័យ បានប្រមាណជា ៧លានដុល្លារសហរដ្ឋអាមេរិកឯណោះ ដើម្បីបណ្ដាក់ទុននៅក្នុងក្រុមហ៊ុននេះ ហើយម្ចាស់ប្រាក់ម្នាក់ៗសុទ្ធតែសង្ឃឹមថានឹងទទួលបានការប្រាក់ប្រចាំខែត្រឡប់ទៅវិញ។
ពលរដ្ឋរងគ្រោះទាំងនេះអះអាងថា តាមរយៈសកម្មភាពនានារបស់ក្រុមហ៊ុន CIC Partner នៅពេលនេះ គឺកំពុងអនុវត្តផែនការបោកប្រាស់ប្រាក់ពីម្ចាស់ដើមទុនយ៉ាងពិតប្រាកដ ហើយនេះក៏ជាការបោកប្រាស់ដែលមានលក្ខណៈអន្តរជាតិដែរ ព្រោះថាជនរងគ្រោះដែលផ្តល់ប្រាក់ឱ្យខ្ចីដើម្បីទទួលបានការប្រាក់តាមការឃោសនាពីក្រុមហ៊ុនកន្លងមក មិនមែនមានតែពលរដ្ឋខ្មែរនោះទេ សូម្បីជនបរទេសខ្លះក៏បានផ្តល់ប្រាក់ឲ្យខ្ចីរាប់សិបម៉ឺនដុល្លារសហរដ្ឋអាមេរិកដល់ក្រុមហ៊ុននេះដែរ។
ជនរងគ្រោះដដែលនោះបានបញ្ជាក់ថា តាមការសន្និដ្ឋានក្រោយពេលដែលពួកគេប្រមូលប្រាក់បានគ្រប់ចំនួនរួចរាល់ហើយ ពួកគេប្រហែលជានឹងបើកក្រុមហ៊ុនផ្សេងមួយទៀត ដែលទំនងជាក្រុមហ៊ុនលេងផ្សារភាគហ៊ុន ដើម្បីបង្កើតទៅជាជំនួញផ្ទាល់ខ្លួនសម្រាប់តែក្រុមអ្នកគ្រប់គ្រងជាន់ខ្ពស់ទាំង ១៣នាក់ដែលប្រមូលប្រាក់នេះប៉ុណ្ណោះ។
ពលរដ្ឋរងគ្រោះទាំងនោះអះអាងថា ម្ចាស់គណនីហ្វេសប៊ុកឈ្មោះ ប៉ែន ជីវ័ន្ត (Chivann Pen) ដែលមានឈ្មោះពិតថា យ៉ង់ ប៉ាក់ ដែលរងការចោទប្រកាន់ថាបានបោកប្រាស់កសិករបានប្រាក់ប្រមាណជាង ៩ម៉ឺនដុល្លារកាលពីពេលថ្មីៗនេះ តាមពិត ម្ចាស់គណនីហ្វេសប៊ុករូបនេះក៏ជាជនរងគ្រោះពីការប្រមូលប្រាក់យកទៅវិនិយោគក្នុងក្រុមហ៊ុននេះដើម្បីយកការប្រាក់ដែរ។
ការអះអាងនេះ ធ្វើឡើងបន្ទាប់ពីម្ចាស់គណនីហ្វេសប៊ុកឈ្មោះ ប៉ែន ជីវ័ន្ត (Chivann Pen) ផ្សព្វផ្សាយលើបណ្ដាញសង្គមហ្វេសប៊ុកអំពីការខាតបង់ប្រាក់កាសរបស់ខ្លួនដែលបានឱ្យក្រុមហ៊ុន CIC Partner ខ្ចីកាលពីពេលថ្មីៗនេះ។
កាលពីថ្ងៃទី១៥ ខែមករា ឆ្នាំ២០២៤ ម្ចាស់គណនីហ្វេសប៊ុកឈ្មោះ ប៉ែន ជីវ័ន្ត (Chivann Pen) ឈ្មោះពិត យ៉ង់ ប៉ាក់ បានសរសេរលើគណនីហ្វេសប៊ុករបស់ខ្លួនថា អ្នកវិនិយោគជាង ៥០០នាក់ (៥៤៦នាក់) បានខាតបង់ធ្ងន់ធ្ងរពីការបោះទុនវិនិយោគក្នុងក្រុមហ៊ុន CIC Partner ដែលធ្វើឱ្យពួកគេក្ស័យធនគ្រប់ៗគ្នា ដោយសារតែអ្នកគ្រប់គ្រងជាន់ខ្ពស់ក្នុងក្រុមហ៊ុននេះ បានធ្វើឱ្យបាត់ប្រាក់មូលនិធិក្នុងក្រុមហ៊ុនដោយគ្មានមូលហេតុពិតប្រាកដ និងគ្មានសំណងត្រឹមត្រូវទៅដល់ម្ចាស់ដើមទុនទាំងនោះ។
ម្ចាស់គណនីហ្វេសប៊ុកដដែលនេះបញ្ជាក់ថា ការបាត់ប្រាក់នេះ គឺដោយសារតែអតីតប្រធានអង្គការតម្លាភាព លោក ព្រាប កុល គប់គិតជាមួយលោក គុយ វ៉ាត ដែលជាម្ចាស់ហាង Park Café និងជាប្រធានក្រុមប្រឹក្សាភិបាលក្រុមហ៊ុននេះ រួមជាមួយសមាជិកក្រុមប្រឹក្សាភិបាលជាង ១០នាក់ផ្សេងទៀត បានលួចប្រាក់ជិត ១០០លានដុល្លារអាមេរិក (៨០លានដុល្លារអាមេរិក) កាលពីពេលកន្លងទៅនោះ ទើបធ្វើឱ្យក្រុមហ៊ុននេះគ្មានប្រាក់បង់ទាំងដើមទាំងការប្រាក់ដល់សមាជិកចូលរួមរហូតមកដល់ពេលនេះ។
បន្ទាប់ពីមានការលើកឡើងរបស់លោក យ៉ង់ ប៉ាក់ និងទទួលរងនូវការប្តឹងផ្តល់ពីលោក ព្រាប កុល រហូតដល់ការចាប់ខ្លួន សារព័ត៌មានដែលស្និទ្ធនឹងរដ្ឋាភិបាល Fresh News ក៏បានចុះផ្សាយពីបណ្តឹងរបស់ក្រុមកសិករមួយចំនួនដែរ ដែលពួកគេបានអះអាងថា លោក យ៉ង់ ប៉ាក់ បានចេញមូលប្បទានបត្រឥតមានសាច់ប្រាក់ (សែកស្អុយ) ក្នុងទំហំទឹកប្រាក់សរុបជាង ៩ម៉ឺនដុល្លារសហរដ្ឋអាមេរិក (៩០២ ៣៤,០១ដុល្លារ) ជុំវិញការទិញលក់អង្កាម កាលពីអំឡុងឆ្នាំ២០២៣ កន្លងទៅ ប៉ុន្តែករណីប្តឹងផ្តល់នេះបានស្ងប់ស្ងាត់ទៅវិញនៅពេលនេះ។
ក្រុមហ៊ុន ខេមបូឌាន អ៊ីនវេស្ទ័រ ឃែបភីថល ផាតនឺ (Cambodian Investor Capital Partner) ឬហៅកាត់ថា CIC Partner មានក្រុមប្រឹក្សាភិបាលចំនួន ១៣នាក់ ដែលផ្តើមបង្កើតឡើងដំបូង ដូចជា៖
- លោក គុយ វ៉ាត ជាប្រធានក្រុមប្រឹក្សាភិបាល
- លោក ហ៊ុន មុនីវណ្ណ លោក ម៉ៅ សាវិន លោក ឃីម សុខហេង លោក សោម សម្បត្តិ និងមនុស្សមួយចំនួនទៀតជាសមាជិកក្រុមប្រឹក្សាភិបាល។
បន្ទាប់ពីមានពលរដ្ឋចុះឈ្មោះចូលជាសមាជិក និងឲ្យខ្ចីប្រាក់ជាបន្តបន្ទាប់ ក្រុមហ៊ុននេះក៏បានប្រតិបត្តិការបង់ការប្រាក់ឱ្យសមាជិកទាំងនោះជាបន្តបន្ទាប់ដែរ។ លុះដល់អំឡុងខែឧសភា ឆ្នាំ២០២៣ ស្រាប់តែក្រុមហ៊ុននេះប្រកាសថា ខ្លួនអស់ទុនបង់ការប្រាក់ដល់សមាជិកទាំងនោះតែម្តង។
ភ្លាមៗក្រោយក្រុមហ៊ុនប្រកាសអស់ទុនឈប់បង់ការប្រាក់ ប្រធានក្រុមប្រឹក្សាភិបាល CIC Partner លោក គុយ វ៉ាត ក៏បានប្រកាសលាលែងតំណែងភ្លាមៗដែរ ហើយរហូតដល់ខែមិថុនា ឆ្នាំ២០២៣ ក្រុមហ៊ុននេះបានសម្រេចបញ្ឈប់បង់ការប្រាក់ឱ្យសមាជិកជាម្ចាស់ប្រាក់ទាំងស្រុងតាំងពីពេលនោះមក។
បន្ទាប់ពីលោក គុយ វ៉ាត លាលែងតំណែងជាប្រធានក្រុមហ៊ុនព្រោះតែគ្មានទុនបង់ការប្រាក់ឱ្យអ្នកដាក់ទុនវិនិយោគ សមាជិកក្រុមប្រឹក្សាភិបាលដទៃទៀតក៏បានជ្រើសរើសលោក ឡែម ចាន់សំរេច ឡើងកាន់កិច្ចការជានាយកប្រតិបត្តិ និងជ្រើសរើសលោក សុខ ពិសិដ្ឋ ជាប្រធានគណៈកម្មាធិការស្ដារក្រុមហ៊ុន និងមូលនិធិក្នុងក្រុមហ៊ុននេះ ដើម្បីរកវិធីសាស្ត្រដោះស្រាយបញ្ហារកប្រាក់សងសមាជិករងគ្រោះទាំងនោះវិញ ខណៈដែលលោក សុខ ពិសិដ្ឋ និងលោក ឡែម ចាន់សំរេច ក៏ជាជនរងគ្រោះក្នុងការដាក់ដើមទុនវិនិយោគក្នុងក្រុមហ៊ុនដែរនោះ។
ក្រោយជ្រើសរើសប្រធានគណៈកម្មាធិការស្ដារក្រុមហ៊ុន និងមូលនិធិរបស់ក្រុមហ៊ុន CIC Partner ភ្លាមៗនោះ លោក សុខ ពិសិដ្ឋ បានប្រកាសជំហរទៅកាន់សមាជិករងគ្រោះអំពីការផ្តល់ប្រាក់ខ្ចីឱ្យក្រុមហ៊ុននេះក្នុងបណ្ដាញទំនាក់ទំនងតេឡេក្រាមថា ខាងក្រុមហ៊ុនកំពុងតែរកវិធីដោះស្រាយជូនសមាជិករងគ្រោះហើយនៅពេលនេះ ដោយផ្តល់ជាដីឡូត៍ឱ្យអ្នកទាំងនោះ ដែលពួកគេអាចយកដីនោះទៅលក់ដោះដូរយកជាប្រាក់ដើម្បីយកទៅសងបំណុលដែលខ្លួនបានប្រមូលយកទៅបណ្ដាក់ទុនក្នុងក្រុមហ៊ុននេះ។
ការអះអាងពីប្រធានក្រុមប្រឹក្សាភិបាលក្រុមហ៊ុន CIC Partner នេះ ធ្វើឡើងបន្ទាប់ពីម្ចាស់ប្រាក់ដើមជាជនរងគ្រោះជាច្រើននាក់ បានដាក់លិខិតមួយទៅក្រុមហ៊ុន CIC Partner កាលពីថ្ងៃទី៨ ខែវិច្ឆិកា ឆ្នាំ២០២៣ ដោយទាមទារឱ្យក្រុមហ៊ុនដោះស្រាយជាបន្ទាន់ចំពោះម្ចាស់ប្រាក់ដែលរងគ្រោះពីការផ្តល់ប្រាក់ឱ្យក្រុមហ៊ុននេះខ្ចី បន្ទាប់ពីក្រុមហ៊ុនមិនបានបង់ការប្រាក់តាមកិច្ចសន្យារបស់ខ្លួនអស់ជាច្រើនខែ។
ប្រភពដដែលលើកឡើងថា ប្រាក់ដើមដែលពួកគេបានដាក់ឱ្យក្រុមហ៊ុនខ្ចីកន្លងមក គឺសុទ្ធតែជាប្រាក់សាច់ញាតិ មិត្តភក្ដិ និងលុយដែលពួកគេយកប្លង់ដីទៅបញ្ចាំនៅធនាគារ ដើម្បីបានលុយមកដាក់វិនិយោគក្នុងក្រុមហ៊ុនប៉ុណ្ណោះ។ ដូច្នេះ ពួកគេត្រូវតែសងត្រឡប់ទៅម្ចាស់បំណុលទាំងនោះវិញតាមកាលកំណត់ ខណៈក្រុមហ៊ុនបានខកខានបង់ការប្រាក់ដល់ម្ចាស់ដើមទុនទាំងនោះតាំងពីខែមិថុនា ឆ្នាំ២០២៣ មកនោះ។
ម្ចាស់ប្រាក់ដែលជាជនរងគ្រោះ បានដាក់លក្ខខណ្ឌថា បើក្រុមហ៊ុនគ្មានប្រាក់សងត្រឡប់មកវិញទេ ក្រុមហ៊ុនត្រូវតែដោះដូរជាទ្រព្យសម្បត្តិណាមួយដែលមានតម្លៃស្មើ ដើម្បីឱ្យពួកគេយកទៅលក់ទូទាត់សងទៅធនាគារវិញ ព្រោះថាការធ្វើបែបនេះ ក៏ជាកាតព្វកិច្ចរបស់ក្រុមហ៊ុនដែលត្រូវទទួលខុសត្រូវដែរ។
ក្រោយផ្ទុះការតវ៉ា និងបែកធ្លាយរឿងរ៉ាវមិនបង់ការប្រាក់តាមកិច្ចសន្យាដល់ម្ចាស់ប្រាក់ឲ្យខ្ចីរាប់រយនាក់ ក្រុមហ៊ុន CIC Partner បានចេញសេចក្តីជូនដំណឹងមួយកាលពីថ្ងៃទី២៩ ខែមករា ឆ្នាំ២០២៤ ថា ស្ថិតក្នុងបរិបទមិនប្រាកដប្រជា និងផុយស្រួយនេះ ក្រុមហ៊ុនសូមបដិសេធ និងមិនទទួលខុសត្រូវចំពោះហេតុការណ៍ណាមួយដែលកើតឡើងជាយថាហេតុ រួមទាំងហានិភ័យដែលផ្សារភ្ជាប់នឹងបាតដៃទី៣ ដែលព្យាយាមរារាំងក្នុងការស្វែងរកដំណោះស្រាយសងប្រាក់ដល់ម្ចាស់ដើមទុនឡើយ។
សារព័ត៌មាន The Cambodia Daily នៅមិនទាន់អាចសុំការបំភ្លឺពីលោក គុយ វ៉ាត អតីតប្រធានក្រុមប្រឹក្សាភិបាល និងជាអ្នកទទួលខុសត្រូវរបស់ក្រុមហ៊ុន CIC Partner បាននៅឡើយទេ។
ទោះជាយ៉ាងណាក៏ដោយ មន្ត្រីជាន់ខ្ពស់នៃក្រសួងពាណិជ្ជកម្ម បានទម្លាយនូវឯកសារចុះបញ្ជីក្រុមហ៊ុនរបស់លោក គុយ វ៉ាត ជាច្រើនប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះថា លោក គុយ វ៉ាត រកស៊ីខាងធ្វើការឈរឈ្មោះបង្កើតក្រុមហ៊ុនជាច្រើនក្រៅពីលោកមានឈ្មោះល្បីខាងការបង្កើតក្រុមហ៊ុន Park Café និងក្រុមហ៊ុន CIC Partner។
បុរសរូបនេះបានឈរឈ្មោះជាប្រធានក្រុមប្រឹក្សាភិបាលរបស់ក្រុមហ៊ុន THEAN LONG (CAMBODIA) INVESTMENT GROUP CO., LTD ដែលបានចុះបញ្ជីនៅក្រសួងពាណិជ្ជកម្ម មានទីតាំងនៅផ្ទះលេខ M៣៥ ផ្លូវលេខ៣៣៧ ភូមិ១ សង្កាត់បឹងកក់ ខណ្ឌទួលគោក រាជធានីភ្នំពេញ។ ក្រៅពីឈ្មោះ គុយ វ៉ាត ជានាយកក្រុមហ៊ុននេះ គឺមានឈ្មោះ Chen Jincheng ជាប្រធានក្រុមប្រឹក្សាភិបាល ហុង អ៊ុយ, Chhin Kang, Hong Qingshui ជានាយកផងដែរ។
អាសយដ្ឋាននៃក្រុមហ៊ុនដែលលោក គុយ វ៉ាត ឈរឈ្មោះបង្កើតនេះត្រូវបានប្រើប្រាស់សម្រាប់បង្កើតក្រុមហ៊ុនចំនួន ១៥ផ្សេងទៀតដែលចុះបញ្ជីនៅក្រសួងពាណិជ្ជកម្មក្នុងថ្ងៃ-ខែ-ឆ្នាំផ្សេងៗគ្នា។ ក្រុមហ៊ុនទាំង ១៥ នោះ គឺមាន៖
- ក្រុមហ៊ុន ZILLENNIUM លោក គុយ វ៉ាត ជាប្រធាន
- ក្រុមហ៊ុន MARKMA MINING AND ENERGY CONSULTANTS
- ក្រុមហ៊ុន Z VALLEY CO.,LTD លោក គុយ វ៉ាត ជាប្រធាន និង ភូ ស៊ីប៉ូវ ជានាយក
- ក្រុមហ៊ុន UNITED PARK លោក គុយ វ៉ាត ជាប្រធានផង ជានាយកផង
- ក្រុមហ៊ុន CAMBODIA FLAGE PHNOM PENH DERIVATIVE
- ក្រុមហ៊ុន CAMBODIAN INVESTORS CAPITAL PARTNERS PLC ដែលហៅកាត់ថា CIC Partner មានឈ្មោះ គុយ វ៉ាត ជាប្រធាន ហើយ ហុង លាងអ៊ី និង លី លាង ជានាយក
- ក្រុមហ៊ុន UNITED PIZZA
- ក្រុមហ៊ុន CAMBODIAN INVESTORS CORPORATION
- ក្រុមហ៊ុន ATECH GROUP ហុង អ៊ុយ ជាប្រធាន ហើយ អ៊ាង សឹ, គុយ វ៉ាត និង លី លាង ជានាយក
- ក្រុមហ៊ុន V TRUST-KEIAI SOLUTIONS
- ក្រុមហ៊ុន GOLDEN TREE
- ក្រុមហ៊ុន PHNOM PENH SECURITIES
- ក្រុមហ៊ុន PHNOM PENH DERIVATIVE EXCHANGE
- ក្រុមហ៊ុន PARK CAFE FOOD AND BEVERAGE
- និងក្រុមហ៊ុន UNITED FOOD។
ក្រៅពីក្រុមហ៊ុនទាំង ១៥ ដែលបានរៀបរាប់ជាហូរហែមកនេះ លោក គុយ វ៉ាត ក៏បានបង្កើតក្រុមហ៊ុនបួនផ្សេងទៀតក្នុងអាសយដ្ឋានតែមួយដែរ ដែលស្ថិតនៅលើផ្លូវទេពផន សង្កាត់ទឹកល្អក់២ ខណ្ឌទួលគោក រាជធានីភ្នំពេញ។
ក្រុមហ៊ុនទាំងបួននេះមាន៖
- ក្រុមហ៊ុន CAMBODIAN REALTY AFFILIATES លោក គុយ វ៉ាត ជាប្រធាន ហើយ អ៊ំ រាជនី ជានាយក
- ក្រុមហ៊ុន TAIWAN KAMHWA CRUSHING INTERNATIONAL លោក គុយ វ៉ាត និង Zou Jinling ជាប្រធាន
- និងក្រុមហ៊ុន V TRUST PROPERTY។
នៅប្រទេសកម្ពុជា គេឃើញមានក្រុមហ៊ុនរកស៊ីបោកប្រាស់យកប្រាក់ពីពលរដ្ឋខ្មែរប្រភេទនេះកើតមានច្រើនណាស់ ទាំងនៅជនបទ និងនៅតាមទីក្រុង ដោយពួកគេឃោសនាថា ក្រុមហ៊ុននឹងផ្តល់ការប្រាក់ខ្ពស់ជារៀងរាល់ខែ ប្រសិនបើពលរដ្ឋណាយកប្រាក់ទៅដាក់ទុននៅក្នុងក្រុមហ៊ុនរបស់ពួកគេនោះ។
តាមរយៈនៃការសង្កេតក្រោយពេលដាក់ប្រាក់ដើមទុនចូលក្នុងក្រុមហ៊ុនរយៈពេល ២ ទៅ ៣ខែដំបូង ម្ចាស់ប្រាក់ទុនទាំងនោះតែងតែទទួលបានការប្រាក់យ៉ាងទៀងទាត់ ក្នុងនោះមានម្ចាស់ប្រាក់ខ្លះបានដាក់ប្រាក់ថែមទៀតរហូតដល់រាប់សិបម៉ឺនដុល្លារសហរដ្ឋអាមេរិក និងណែនាំឱ្យសាច់ញាតិ មិត្តភក្ដិ ព្រមទាំងខ្ចីប្រាក់ធនាគារទៅដាក់ក្នុងក្រុមហ៊ុននោះថែមទៀត ប៉ុន្តែនៅខែទី៥ ឬខែទី៦ ខាងក្រុមហ៊ុនមិនបានផ្តល់ការប្រាក់ឱ្យម្ចាស់ទុនទៀតនោះទេ ខណៈម្ចាស់ទុនទៅតវ៉ាយកប្រាក់របស់ខ្លួនត្រឡប់មកវិញ ភាគីខាងក្រុមហ៊ុនចេះតែដោះសារហូតដល់ប្រាក់ដើមទាំងនោះបាត់បង់ទាំងស្រុងតែម្តង។
ក្រុមហ៊ុនប្រភេទនេះបានធ្វើប្រតិបត្តិការឆបោកពីពលរដ្ឋស្ទើរទូទាំងប្រទេសកម្ពុជាទៅហើយសព្វថ្ងៃនេះ ប៉ុន្តែគេមិនដែលឃើញរាជរដ្ឋាភិបាលមានវិធានការច្បាប់ណាមួយទៅលើក្រុមហ៊ុនទាំងនោះទេ ខណៈក្រុមហ៊ុនទាំងនោះអះអាងថា ខ្លួនជាក្រុមហ៊ុនស្របច្បាប់ដែលមានអាជ្ញាប័ណ្ណប្រកបអាជីវកម្មត្រឹមត្រូវពីរដ្ឋាភិបាលថែមទៀត។ ជាក់ស្តែង ដូចជាក្រុមហ៊ុន Cambodian Investor Capital Partner ដែលកំពុងប្រតិបត្តិការឆបោកប្រជាពលរដ្ឋនៅពេលនេះ ជាដើម។
ជុំវិញបញ្ហានេះ អ្នកផ្តល់ប្រឹក្សាផ្នែកអភិវឌ្ឍន៍ផ្នត់គំនិត និងការស្រាវជ្រាវលោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៦ កុម្ភៈ នេះថា កន្លងមកមានក្រុមហ៊ុនជាច្រើនដែលប្រកបមុខរបរដូចក្រុមហ៊ុន CIC Partner នេះ គឺប្រមូលលុយពីសមាជិកចូលរួមដោយផ្តល់ការប្រាក់ខ្ពស់ត្រឡប់ទៅវិញ ប៉ុន្តែពួកគេផ្តល់ការប្រាក់ឱ្យសមាជិកដែលចូលរួមបានប្រមាណជា ៣ ទៅ ៤ខែប៉ុណ្ណោះ បន្ទាប់មក ក្រុមហ៊ុនទាំងនោះក៏រលាយបាត់ស្រមោលតែម្តង។
លោក សេក សុជាតិ លើកឡើងថា ការដែលក្រុមហ៊ុន CIC Partner មិនផ្តល់ការប្រាក់ទៅសមាជិកចូលរួមបន្ទាប់ពីខ្លួនបានប្រមូលប្រាក់ដើមទុនពីពួកគេរួចរាល់ដូចពេលនេះ ហើយត្រូវរងនូវការចោទប្រកាន់ពីជនរងគ្រោះទាំងនោះថារកស៊ីឆបោក ក៏មិនខុសអ្វីដែរ ព្រោះថាក្រុមហ៊ុនត្រូវតែអនុវត្តទៅតាមកិច្ចសន្យាឱ្យបានត្រឹមត្រូវជាមួយសមាជិកដែលបានផ្តល់ប្រាក់ឱ្យខ្លួនខ្ចីទាំងអស់ត្រឡប់ទៅវិញ។
អ្នកផ្តល់ប្រឹក្សាផ្នែកអភិវឌ្ឍន៍ផ្នត់គំនិតរូបនេះរៀបរាប់ថា តាមការស្រាវជ្រាវរបស់លោកកន្លងមក ភាគច្រើនក្រុមហ៊ុនដែលប្រកបមុខរបរដោយការប្រមូលលុយពីសមាជិកចូលរួម និងផ្តល់ការប្រាក់ខ្ពស់ត្រឡប់ទៅវិញ គ្រាន់តែជាវិធីបោកប្រាស់ក្នុងការប្រមូលលុយដើម្បីបង្កើតជំនួញផ្សេងមួយទៀតដែលស្ថាបនិកក្រុមហ៊ុននេះបានគ្រោងទុកប៉ុណ្ណោះ ព្រោះថាពួកគេមិនចាំបាច់ចំណាយលុយផ្ទាល់ខ្លួនដើម្បីបើកក្រុមហ៊ុនដែលពួកគេបានគ្រោងទុកនោះទេ។
លោក សេក សុជាតិ ត្អូញត្អែរថា ដោយសារតែការលោភលន់ និងការកេងប្រវ័ញ្ចរបស់អ្នកជំនួញដែលគ្មានសីលធម៌ ស្របពេលដែលច្បាប់នៅមានចន្លោះប្រហោង និងការអនុវត្តច្បាប់នៅមានកម្រិត ក្រុមអ្នកជំនួញទុច្ចរិតតែងតែបន្លំខ្លួនធ្វើជាអ្នកជំនួញស្មោះត្រង់ ឬធ្វើជាចចកពាក់ស្បែកចៀម ដើម្បីចូលមកបន្លំបោកប្រាស់ពលរដ្ឋស្លូតត្រង់ និងក្រីក្រជាបន្តបន្ទាប់ ខណៈពលរដ្ឋរងគ្រោះក៏មិនដឹងទៅពឹងស្ថាប័នណាឱ្យជួយរកយុត្តិធម៌ដែរ ស្របពេលដែលក្រុមឈ្មួញទុច្ចរិតទាំងនោះប្រើល្បិចកលគ្រប់បែបយ៉ាងដើម្បីគេចចេញពីសំណាញ់ច្បាប់ និងរស់នៅសេរីក្រៅច្បាប់រហូតមក។ ម្យ៉ាងទៀត ឈ្មួញ ឬអាជីវករទុច្ចរិតខ្លះ ហ៊ានរកស៊ីបែបនេះក៏ព្រោះតែមានសំអាងលើអ្នកមានអំណាចចាំការពារដែរ។
អ្នកស្រាវជ្រាវដើម្បីការអភិវឌ្ឍផ្នត់គំនិតរូបនេះ អំពាវនាវឱ្យរាជរដ្ឋាភិបាលរឹតបន្តឹងការអនុវត្តច្បាប់ទៅលើក្រុមហ៊ុនដែលធ្វើប្រតិបត្តិការក្នុងទម្រង់ដូចរាយការណ៍មកនេះ ដើម្បីទប់ស្កាត់ការបោកប្រាស់ពលរដ្ឋស្លូតត្រង់បន្តទៀត ព្រោះរយៈពេលកន្លងមករហូតដល់ពេលនេះ គេនៅមិនទាន់ឃើញក្រុមឈ្មួញទុច្ចរិតដែលប្រតិបត្តិការឆបោកក្នុងទម្រង់នេះ ត្រូវបានសមត្ថកិច្ចចាប់ខ្លួនយកមកផ្ដន្ទាទោសម្តងណានៅឡើយទេ ខណៈការបោកប្រាស់ប្រភេទនេះកើតមានឥតឈប់ឈរនៅទូទាំងប្រទេសកម្ពុជា ដែលគេមើលឃើញថា រដ្ឋាភិបាលកំពុងក្លាយជាឧបករណ៍ប្រើប្រាស់សម្រាប់ក្រុមឧក្រិដ្ឋជនទាំងនោះទៅវិញ។
គួរកត់សម្គាល់ថា សកម្មភាពរកស៊ីរបៀបដូចដែលរៀបរាប់កន្លងមកនេះ មានសណ្ឋានជារបៀបបោកបញ្ឆោត ភាសាអង់គ្លេសហៅថា Ponzi scheme ដែលមានឫសគល់ចេញពីបុរសជនជាតិអ៊ីតាលី ម្នាក់ឈ្មោះ Charles Ponzi នាឆ្នាំ១៩២០។ មុខរបរបោកប្រាស់បែបនេះ ធ្វើទៅបានក៏ព្រោះតែមានមនុស្សលោភលន់ចង់បានផលប្រយោជន៍ច្រើន និងឆាប់រហ័សផងដែរ ហើយមិនសូវយល់អំពីរបៀបប្រតិបត្តិការក្នុងមុខរបរ Ponzi នេះ។
នៅសហរដ្ឋអាមេរិក អាជ្ញាធរមានសមត្ថកិច្ចបានផ្ដន្ទាទោសមនុស្សរកស៊ីទុច្ចរិតបោកប្រាស់ដូច្នេះច្រើននាក់ណាស់ហើយ រួមទាំងគ្រួសារខ្មែរ-អាមេរិកាំងផងដែរ។ តាមអត្ថន័យក្នុងគេហទំព័រវិនិយោគតាមច្បាប់ Investopia និងការិយាល័យអ្នកច្បាប់ Zamansky LLC អ្នកផ្តើមរបររកស៊ី Ponzi ដាក់ទុនខ្លួនតិចតួច រួចដើរប្រមូលមនុស្សឲ្យចូលរួមដាក់ទុន ដោយសន្យាថានឹងផ្តល់ផលប្រយោជន៍លើសគេ ដូចជា ការប្រាក់ខ្ពស់ ផលចំណេញច្រើន ជាដើម។ល។ ជួនកាល គេយកសាច់ញាតិរបស់គេដាក់ទុននាំមុខ ដើម្បីបង្ហាញអ្នកដទៃឲ្យមានការទាក់ចិត្តចង់ដាក់ទុនរកស៊ីដែរ។ គេបង់ការប្រាក់ខ្ពស់លើដើមទុនយ៉ាងទៀងទាត់ប៉ុន្មានខែដំបូង។
ម្ចាស់ដើមទុនចូលរួមសប្បាយចិត្តណាស់ ព្រោះឃើញបានផលដូចការសន្យាមែន។ តាមការពិត វិធីបង់ការប្រាក់លើប្រាក់ដើមទុន គឺគេគ្រាន់តែបង្វិលប្រាក់ក្នុងក្រុមហ៊ុននោះយកប្រាក់ពីអ្នកចូលរួមក្រោយៗ ទៅបង់ឲ្យអ្នកចូលរួមមុនៗតែប៉ុណ្ណោះ ពោលគឺបង្វិលយកពីមួយទៅឲ្យមួយទៀត រួមទាំងឲ្យខ្លួនឯងផ្ទាល់ជាអ្នកគ្រប់គ្រង ដោយមិនបានយកទុនទាំងនោះទៅបណ្ដាក់ក្នុងគម្រោងវិនិយោគណាមួយ ដើម្បីរកផលចំណេញឲ្យសមាជិកនោះឡើយ។ គេហៅម្យ៉ាងទៀតថា ជាវិធីរកស៊ីយកប្រាក់ពីអ្នកដទៃទៅចែកចាយគ្នាធ្វើសេដ្ឋី។
Ponzi scheme រស់រានទៅមុខបាន អាចបង់ការប្រាក់ខ្ពស់ធ្លាប់បង់កន្លងទៅប៉ុន្មានខែដល់សមាជិក អាស្រ័យនៅលើការរើសសមាជិកចូលថ្មីថែមទៀតបានតែប៉ុណ្ណោះ បើគ្មានសមាជិកចូលថ្មីថែមទៀតទេ ធនធានក្នុងដើមទុនពីមុនក៏ស្រកស្រុត ហើយនឹងរលាយបាត់អស់តែម្តង។
អ្នកច្បាប់អាមេរិកាំងរំឭកសាធារណជន អតិថិជនថា បើក្រុមហ៊ុនណាសន្យាក្នុងមុខរបរថាផ្តល់ផលច្រើនលើសគេ សូមឲ្យប្រយ័ត្ន ពិចារណា ហើយស៊ើបសួរតាមដានសិន។ មួយវិញទៀត អ្នកប្រកបមុខរបរបែបនេះ ត្រូវមានសញ្ញាប័ត្រខាងជំនាញរបស់ខ្លួន។ បើគ្មានទេ មានតែអាជ្ញាប័ណ្ណបើកក្រុមហ៊ុន សូមកុំប្រញាប់ជឿពេក៕