លោក ហ៊ុន ម៉ាណែត ដែលមហាជនចាត់ទុកជានាយករដ្ឋមន្ត្រីតពូជ ជំរុញឲ្យកម្មករនិយោជិត ឬអ្នកប្រកបរបរសេដ្ឋកិច្ចក្រៅប្រព័ន្ធទាំងអស់ ទៅចូលរួមជាមួយរដ្ឋាភិបាលដើម្បីទទួលអត្ថប្រយោជន៍ផ្សេងៗពីរដ្ឋ និងផ្ដល់ភាពងាយស្រួលដល់រដ្ឋាភិបាលសម្រាប់គ្រប់គ្រងផងដែរ។
ការជំរុញនេះ ធ្វើឡើងក្នុងពិធីជួបសំណេះសំណាលជាមួយកម្មករនិយោជិតជាង ១ម៉ឺននាក់នៅក្រុងតាខ្មៅ ខេត្តកណ្តាល នាថ្ងៃទី១ ខែកញ្ញា ឆ្នាំ២០២៣។
លោក ហ៊ុន ម៉ាណែត អះអាងថា រដ្ឋាភិបាលអាណត្តិទី៧ នេះ នឹងយកចិត្តទុកដាក់អ្នកប្រកបការងារ និងមុខរបរផ្នែកសេដ្ឋកិច្ចក្រៅប្រព័ន្ធតាមរយៈការផ្ដល់ការគាំពារ និងអត្ថប្រយោជន៍ផ្សេងទៀត ដើម្បីជាការតបស្នងនឹងការបោះឆ្នោតគាំទ្រ និងផ្ដល់សេចក្ដីទុកចិត្តលើថ្នាក់ដឹកនាំគណបក្សប្រជាជនកម្ពុជា។ ដូច្នេះ ដើម្បីឲ្យរដ្ឋាភិបាលអាចជួយដល់ពួកគេបាននោះ លោក ហ៊ុន ម៉ាណែត ជំរុញឲ្យពលរដ្ឋដែលជាអ្នកប្រកបការងារ និងមុខរបរផ្នែកសេដ្ឋកិច្ចក្រៅប្រព័ន្ធ ចុះបញ្ជីនៅក្រសួង ប៉ុន្តែប្រសិនបើមិនបានចុះបញ្ជីទេ ពួកគេក៏មិនទទួលបានអត្ថប្រយោជន៍ពីរដ្ឋាភិបាលនោះដែរ។
មួយវិញទៀត ការចុះបញ្ជីនៅក្នុងក្រសួងនេះ វាក៏ផ្ដល់ភាពងាយស្រួលដល់រដ្ឋាភិបាលក្នុងការគ្រប់គ្រងដែរ ដោយសារកន្លងមក លោក ហ៊ុន ម៉ាណែត អះអាងថា រដ្ឋាភិបាលពិបាកក្នុងការគ្រប់គ្រងចំនួនទិន្នន័យអ្នកប្រកបការងារ និងមុខរបរផ្នែកសេដ្ឋកិច្ចក្រៅប្រព័ន្ធ ដែលធ្វើឲ្យការផ្ដល់សេវាគាំពារមិនបានគ្រប់ជ្រុងជ្រោយ ហើយមិនចំគោលដៅ។
លោក ហ៊ុន ម៉ាណែត បញ្ជាទៅរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ឲ្យពិនិត្យមើលការលើកលែងការផាកពិន័យ និងបំណុលទាំងអស់ក្នុងពេលដំណាក់កាលណាមួយ ដើម្បីកុំឲ្យពួកគេព្រួយបារម្ភរឿងជាប់ពិន័យពន្ធនៅពេលមកចុះបញ្ជី។
លើសពីនេះទៅទៀត ត្រូវពិនិត្យលើការលើកទឹកចិត្តផ្នែកពន្ធដារ លើកលែងការពិន័យ និងលើកលែងទោសទណ្ឌផ្សេងៗ ឬក៏បំណុលពន្ធ ជាដើម ទៅតាមលទ្ធភាពដែលអាចធ្វើបាន ជាដើម។
លោក ហ៊ុន ម៉ាណែត អះអាងថា ការតម្រូវឲ្យពលរដ្ឋក្រៅប្រព័ន្ធចុះបញ្ជីនេះ វាមិនមែនជារូបភាពចាំបាច់សម្រាប់ពលរដ្ឋនោះទេ ប៉ុន្តែវាជាការជួយប្រជាជនតាមរយៈជួយសេដ្ឋកិច្ចជាតិឲ្យរឹងមាំ ហើយជឿទុកចិត្តលើរដ្ឋាភិបាល។
រដ្ឋាភិបាលបានបង្កើតគោលនយោបាយជាតិគាំពារសង្គមឆ្នាំ២០១៦ ដល់ឆ្នាំ២០២៥ ដែលផ្ដោតសំខាន់លើសសរស្ដម្ភពីរ គឺប្រព័ន្ធជំនួយសង្គម និងប្រព័ន្ធសន្តិសុខសង្គម។
ប្រព័ន្ធជំនួយសង្គម មានដូចជា ការឆ្លើយតបទៅនឹងគ្រោះអាសន្ន សុខុមាលភាពសម្រាប់ពលរដ្ឋងាយរងគ្រោះ និងការអភិវឌ្ឍមូលធនមនុស្ស។ ចំណែកប្រព័ន្ធសន្តិសុខសង្គម មានប្រាក់សោធន ការថែទាំសុខភាព ហានិភ័យការងារ និងពិការភាព ជាដើម។
ប៉ុន្តែទោះបីជាយ៉ាងនេះ ក្រុមអង្គការសង្គមស៊ីវិលជាតិ និងអន្តរជាតិលើកឡើងកាលពីថ្ងៃទី២១ ខែកក្កដា ឆ្នាំ២០២២ ថា កម្មករសេដ្ឋកិច្ចក្រៅប្រព័ន្ធជិត ៧លាននាក់ នៅមិនទាន់ទទួលបានអត្ថប្រយោជន៍ពីកម្មវិធីមួយនេះនៅឡើយ។
សារព័ត៌មាន The Cambodia Daily មិនទាន់អាចសុំការអត្ថាធិប្បាយពីប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ បាននៅឡើយទេ។
តែយ៉ាងណា កន្លងមក លោក វន់ ពៅ ធ្លាប់បានអះអាងថា សមាគមរបស់លោកមានកម្មករសេដ្ឋកិច្ចក្រៅប្រព័ន្ធប្រមាណ ១ម៉ឺន ៥ពាន់នាក់ ក្នុងនោះមានអ្នករត់ម៉ូតូឌុប អ្នករត់រ៉ឺម៉កទេសចរណ៍ អ្នកលក់ដូរតាមដងផ្លូវ អ្នកបម្រើការងារតាមផ្ទះ អ្នករើសអេតចាយ និងកម្មករអូសរទេះតាមព្រំដែន។
អង្គការពលកម្មអន្តរជាតិហៅកាត់ថា ILO ឲ្យដឹងថា នៅកម្ពុជាអ្នកប្រកបរបរក្រៅប្រព័ន្ធមានចំនួន ៨លាននាក់ ក្នុងចំណោមប្រជាជនសរុប ១៦លាននាក់។ ចំនួន ៨លាននាក់នេះ សម្រាប់ ILO គឺរាប់បញ្ចូលទាំងចំនួនកសិករផងដែរ៕