នាយករដ្ឋមន្ត្រីបន្តពូជថ្មីរបស់កម្ពុជាលោក ហ៊ុន ម៉ាណែត សម្រេចបញ្ឈប់ការស្នើសុំច្បាប់ដំណើរការអាជីវកម្មតូចតាចនៅរដ្ឋបាលថ្នាក់ក្រុង ស្រុក និងខណ្ឌ បន្ទាប់ពីមន្ត្រីមូលដ្ឋានខេត្តបន្ទាយមានជ័យ ចេញសេចក្តីជូនដំណឹងឱ្យអាជីវករតូចតាចចំនួន ១១វិស័យដាក់ពាក្យសុំច្បាប់អនុញ្ញាតសម្រាប់ដំណើរការអាជីវកម្មរបស់ពួកគេកាលពីពេលថ្មីៗនេះ។
លោក ហ៊ុន ម៉ាណែត កូនប្រុសរបស់មេខ្លោងក្រាញអំណាចផ្ដាច់មុខនៅកម្ពុជា បានចេញអនុក្រឹត្យស្ដីពីការផ្អាកផ្តល់សេវារដ្ឋបាលមួយចំនួនរបស់រដ្ឋបាលក្រុង ស្រុក ខណ្ឌ កាលពីថ្ងៃទី១៣ ខែកញ្ញា ឆ្នាំ២០២៣ ដែលពាក់ព័ន្ធនឹងការបំពេញបែបបទអាជីវកម្មមួយចំនួន ដូចជា អាជីវកម្មស្ថិតក្រោមវិស័យវប្បធម៌ និងវិចិត្រសិល្បៈ វិស័យអប់រំ យុវជន និងកីឡា វិស័យទេសចរណ៍ វិស័យឧស្សាហកម្ម សិប្បកម្ម វិស័យរ៉ែ និងថាមពល វិស័យពាណិជ្ជកម្ម និងវិស័យកសិកម្មផងដែរ។
អនុក្រឹត្យដដែលនេះ បានលើកឡើងនូវប្រភេទអាជីវកម្ម ដូចជាអាជីវកម្មសិល្បៈសូនរូប អាជីវកម្ម កាត់សក់ សម្អាងការ អាជីវកម្មលក់សម្ភារៈកីឡា ភោជនីយដ្ឋាន និងអាហារដ្ឋានក្នុងស្រុក ការផលិតពាង ឥដ្ឋការ៉ូ ការផលិតទៀនធូប ការដំឡើងម៉ាស៊ីនអគ្គិសនី ការជួសជុលគ្រឿងអេឡិចត្រូនិក អាជីវកម្មលាងសម្អាតរថយន្ត ព្រមទាំងអាជីវកម្មលក់ដុំ និងរាយនូវសម្ភារៈកសិកម្ម ជាដើម។
ការចេញអនុក្រឹត្យនេះ ធ្វើឡើងបន្ទាប់ពីមន្ត្រីមូលដ្ឋានរដ្ឋាភិបាលថ្មីរបស់លោក ហ៊ុន ម៉ាណែត បានចេញសេចក្តីជូនដំណឹងតម្រូវឱ្យអាជីវករតូចតាចបំពេញសំណុំបែបបទដាក់ជូនអាជ្ញាធរមូលដ្ឋាន ដើម្បីសុំអនុញ្ញាតដំណើរការអាជីវកម្មរបស់ខ្លួនកាលពីពេលថ្មីៗនេះ។
កាលពីថ្ងៃទី១ ខែកញ្ញា ឆ្នាំ២០២៣ រដ្ឋបាលស្រុកម៉ាឡៃ ខេត្តបន្ទាយមានជ័យ បានចេញសេចក្តីជូនដំណឹងឱ្យអាជីវករតូចតាចចំនួន ១១វិស័យ បំពេញសំណុំបែបបទដាក់ជូនអាជ្ញាធរដែលត្រូវបានផ្សព្វផ្សាយកាលពីពេលថ្មីៗនេះ ដោយបញ្ជាក់ថា ដោយសារតែខ្លួនបានទទួលសិទ្ធិអំណាចពីរាជរដ្ឋាភិបាលក្នុងការគ្រប់គ្រងលើអាជីវកម្មនានា ដូច្នេះម្ចាស់អាជីវកម្មតូចៗទាំងឡាយ ដូចជាអាជីវកម្មកាត់សក់ សម្អាងការ និងអាជីវកម្មលក់សម្ភារៈកីឡា ជាដើម ត្រូវតែបំពេញសំណុំបែបបទដាក់ជូនរដ្ឋបាលស្រុកម៉ាឡៃ ជាកំហិត។
សេចក្តីជូនដំណឹងដដែលបញ្ជាក់ថា ដើម្បីឱ្យការប្រកបអាជីវកម្ម សិប្បកម្ម និងសេវាកម្មមានភាពប្រសើរឡើង ម្ចាស់អាជីវកម្ម សិប្បកម្ម និងសេវាកម្មទាំងអស់ ត្រូវតែនាំគ្នារួសរាន់ទៅសុំច្បាប់អនុញ្ញាតពីការិយាល័យច្រកចេញចូលតែមួយឱ្យបានមុនដំណាច់ខែកញ្ញា ឆ្នាំ២០២៣ នេះ។
ជុំវិញការចេញសេចក្តីជូនដំណឹងរបស់រដ្ឋបាលស្រុកម៉ាឡៃ នេះ តំណាងរាស្ត្រអតីតគណបក្សសង្គ្រោះជាតិលោក អ៊ុំ សំអាន បានសរសេរលើគណនីហ្វេសប៊ុករបស់ខ្លួនកាលពីថ្ងៃទី១២ ខែកញ្ញា នេះថា បន្ទាប់ពីបោះឆ្នោតរួច ដល់ពេលដែលមន្ត្រីរដ្ឋាភិបាលថ្មីគាបសង្កត់ពលរដ្ឋទៀតហើយ ដោយតម្រូវឱ្យម្ចាស់អាជីវកម្មតូចតាចសុំច្បាប់អនុញ្ញាតសម្រាប់ការធ្វើអាជីវកម្ម ដើម្បីងាយស្រួលគ្រប់គ្រងក្នុងការប្រមូលពន្ធ។
លោក អ៊ុំ សំអាន លើកឡើងថា សេដ្ឋកិច្ចរបស់ប្រទេសកម្ពុជាកំពុងតែដុនដាប ការលក់ដូរក៏មិនដាច់ បែរជារដ្ឋាភិបាលថ្មីគាបសង្កត់ពលរដ្ឋដែលប្រកបរបរតូចតាចឱ្យបង់ពន្ធជូនរដ្ឋ ដើម្បីយកលុយទៅចិញ្ចឹមរដ្ឋាភិបាលក្បាលធំដែលមានមន្ត្រីជាន់ខ្ពស់ និងទីប្រឹក្សារាប់ពាន់នាក់ទៅវិញ។
តំណាងរាស្ត្រអតីតគណបក្សសង្គ្រោះជាតិរូបនេះបញ្ជាក់ថា ការយកពន្ធលើអាជីវកម្មធំៗមិនជាបញ្ហានោះទេ ប៉ុន្តែរដ្ឋាភិបាលបែរជាមករឹតកអ្នករកស៊ីតូចតាចទៅវិញ។
លោកបញ្ជាក់ថា រដ្ឋាភិបាលថ្មីរបស់ប្រទេសថៃ បានប្រកាសផ្តល់លុយសុទ្ធឱ្យពលរដ្ឋថៃម្នាក់ៗ ១ម៉ឺនបាត បញ្ចុះថ្លៃសាំង ថ្លៃភ្លើង និងផ្អាកបង់ធនាគាររយៈពេល ៣ឆ្នាំថែមទៀត ចំណែករដ្ឋាភិបាលថ្មីរបស់កម្ពុជាវិញមានតែគាបសង្កត់ពលរដ្ឋយកលុយទៅចិញ្ចឹមមន្ត្រីដែលធ្វើបាបរាស្ត្រប៉ុណ្ណោះ។
ទាក់ទិននឹងបញ្ហានេះ អ្នកផ្តល់ប្រឹក្សាផ្នែកអភិវឌ្ឍន៍ផ្នត់គំនិត និងការស្រាវជ្រាវលោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី១៤ កញ្ញា នេះថា ការសម្រេចលុបការផ្តល់សេវារដ្ឋបាលលើអាជីវកម្មតូចតាច គឺជារឿងត្រឹមត្រូវ ព្រោះថាការធ្លាក់ចុះសេដ្ឋកិច្ចរបស់កម្ពុជាប៉ុន្មានឆ្នាំចុងក្រោយនេះ បានបង្កផលប៉ះពាល់យ៉ាងធ្ងន់ធ្ងរដល់ម្ចាស់អាជីវកម្មទាំងនោះ ដូច្នេះបើមានការតម្រូវឱ្យចុះបញ្ជីអាជីវកម្មចំពោះអ្នកប្រកបមុខរបរតូចតាចទាំងនោះ គឺជារឿងគាបសង្កត់លើសេដ្ឋកិច្ចរបស់ពួកគាត់ប៉ុណ្ណោះ មិនមែនជាការជួយពួកគាត់នោះទេ។
លោក សេក សុជាតិ លើកឡើងថា រដ្ឋាភិបាលមិនត្រឹមតែចេញអនុក្រឹត្យបញ្ឈប់ការផ្តល់សេវារដ្ឋបាលនៅថ្នាក់ក្រុង ស្រុក និងខណ្ឌ ចំពោះអាជីវកម្មទាំងនេះប៉ុណ្ណោះទេ ប៉ុន្តែក៏ត្រូវតាមដាន និងត្រួតពិនិត្យលើការអនុវត្តការងាររបស់មន្ត្រីមូលដ្ឋានទាំងនោះដែរ ព្រោះថាអាជីវករដែលប្រកបមុខរបរតូចតាចតែងរងនូវការគាបសង្កត់ពីមន្ត្រីមូលដ្ឋានទាំងនោះជាប្រចាំ តាមរយៈនៃការប្រព្រឹត្តអំពើពុករលួយ ដោយការជំរិតទារប្រាក់ ជាថ្នូរនឹងការផ្តល់ឱ្យនូវដំណើរការអាជីវកម្មទាំងនោះនាពេលកន្លងមក៕