ក្រុមអ្នកឃ្លាំមើលលើកឡើងថា ពលរដ្ឋខ្មែរមិនមែនត្រឹមតែរងគ្រោះពីការបោកប្រាស់តាមប្រព័ន្ធបច្ចេកវិទ្យា ឬប្រព័ន្ធអនឡាញពីក្រុមឧក្រិដ្ឋជនបរទេស ដែលកំពុងសម្ងំលាក់ខ្លួននៅក្នុងប្រទេសកម្ពុជាប៉ុណ្ណោះទេ ប៉ុន្តែពួកគេក៏កំពុងរងគ្រោះពីសំណាក់រដ្ឋាភិបាលដែលដឹកនាំដោយគណបក្សប្រជាជនកម្ពុជាផងដែរ ទាក់ទងទៅនឹងការផ្សព្វផ្សាយរូបថតលោក ហ៊ុន ម៉ាណែត នៅសហរដ្ឋអាមេរិកកាលពីពេលថ្មីៗនេះ។
អតីតសកម្មជនចលនាមាតាធម្មជាតិ កញ្ញា លឹម គឹមស័រ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីចុងសប្តាហ៍កន្លងទៅថា ការផ្សព្វផ្សាយរូបថតរបស់លោក ហ៊ុន ម៉ាណែត ដែលលោក ហ៊ុន សែន និងសារព័ត៌មានដែលមាននិន្នាការគាំទ្របក្សកាន់អំណាច Fresh News បានអួតថា រូបថតលោក ហ៊ុន ម៉ាណែត ត្រូវបានបង្ហោះលើផ្ទាំងប៉ាណូផ្សាយពាណិជ្ជកម្ម Billboard នៅតំបន់ Time Square ក្នុងទីក្រុងញ៉ូវយ៉ក លើទឹកដីសហរដ្ឋអាមេរិក ពីសំណាក់ក្រុមហ៊ុនផ្សព្វផ្សាយពាណិជ្ជកម្ម Time Square Billboard នោះ គឺជាវីដេអូកាត់តប៉ុណ្ណោះ ព្រោះតែពួកគេមានបំណងបោកប្រាស់ពលរដ្ឋខ្មែរក្នុងចេតនាកេងចំណេញនយោបាយតែប៉ុណ្ណោះ។
កញ្ញា លឹម គឹមស័រ លើកឡើងថា ដើម្បីឱ្យអស់ការសង្ស័យក្នុងរឿងនេះ លោក Devid Soth ត្រូវតែចេញមកបកស្រាយរឿងនេះឱ្យបានច្បាស់លាស់។ កញ្ញាបន្តថា មន្ត្រីរដ្ឋាភិបាលកម្ពុជាក៏ត្រូវបង្ហាញភស្តុតាងដែលខ្លួនបានអះអាងថា លោក Devid Soth ជាបុគ្គលិកសំខាន់របស់ក្រុមហ៊ុន Billboard រហូតអាចសម្របសម្រួលឱ្យប្រធានក្រុមហ៊ុននេះផ្សព្វផ្សាយរូបថតលោក ហ៊ុន ម៉ាណែត ដែរ។ ជាងនេះទៅទៀត កញ្ញាក៏បានទាមទារឲ្យប្រធានក្រុមហ៊ុន Billboard ចេញមុខមកបកស្រាយជុំវិញករណីនេះដែរ។
កញ្ញា លឹម គឹមស័រ បញ្ជាក់ថា ប្រសិនបើលោក Devid Soth និងមន្ត្រីរដ្ឋាភិបាលកម្ពុជា ព្រមទាំងប្រធានក្រុមហ៊ុន Billboard មិនចេញមុខបកស្រាយទេ នោះមានន័យយ៉ាងច្បាស់ថា ការផ្សព្វផ្សាយរូបថតលោក ហ៊ុន ម៉ាណែត និងការអះអាងរបស់មន្ត្រីរដ្ឋាភិបាលកម្ពុជាជុំវិញរឿងនេះកាលពីពេលកន្លងទៅ គឺជាការបោកប្រាស់ប៉ុណ្ណោះ។
អតីតសកម្មជនចលនាមាតាធម្មជាតិរូបនេះគូសបញ្ជាក់ថា រដ្ឋាភិបាលដែលដឹកនាំដោយបក្សកាន់អំណាចសព្វថ្ងៃ កំពុងប្រើប្រព័ន្ធបច្ចេកវិទ្យាបោកប្រាស់ពលរដ្ឋខ្លួនឯងគ្រប់រូបភាព ស្របពេលដែលពលរដ្ឋតិចតួចបំផុតដែលមានការយល់ដឹងស៊ីជម្រៅពីការប្រើប្រាស់បច្ចេកវិទ្យានេះ ក្នុងនោះពលរដ្ឋដែលគ្មានការយល់ដឹងពីប្រព័ន្ធបច្ចេកវិទ្យា នៅតែបន្តចាញ់ការបោកប្រាស់របស់មន្ត្រីរដ្ឋាភិបាលរបស់គណបក្សកាន់អំណាចដដែលសព្វថ្ងៃនេះ។
កញ្ញា លឹម គឹមស័រ សង្កត់ធ្ងន់ថា វាជារឿងគ្រោះថ្នាក់បំផុតសម្រាប់ពលរដ្ឋខ្មែរដែលរដ្ឋាភិបាលរបស់ខ្លួនប្រើប្រាស់ប្រព័ន្ធបច្ចេកវិទ្យា ដើម្បីបោកប្រាស់ពួកគាត់ក្នុងបំណងកេងចំណេញនយោបាយ ស្របពេលដែលក្រុមឧក្រិដ្ឋជនក៏ប្រើឧក្រិដ្ឋកម្មបច្ចេកវិទ្យានេះដើម្បីបោកប្រាស់ពួកគាត់យកទៅលក់ដូរដើម្បីជួញដូរផ្លូវភេទ និងធ្វើការងារបោកប្រាស់តាមបច្ចេកវិទ្យា ឬតាមប្រព័ន្ធអនឡាញ ដូចដែលបានលាតត្រដាងក្នុងរឿង No More Bets ដែលមានប្រមាណ ១សែនករណីដែលជារឿងពិតកើតមានឡើងក្នុងប្រទេសកម្ពុជាសព្វថ្ងៃនេះ។
កាលពីថ្ងៃទី២៣ ខែកញ្ញា ឆ្នាំ២០២៣ លោក ហ៊ុន សែន ដែលជាឪពុករបស់លោក ហ៊ុន ម៉ាណែត បានសរសេរលើទំព័រហ្វេសប៊ុករបស់ខ្លួនថា ផ្ទាំងប៉ាណូនៅចំកណ្តាលទីក្រុងញ៉ូវយ៉ក តំបន់ Times Square បានស្វាគមន៍វត្តមានលោក ហ៊ុន ម៉ាណែត ដែលជានាយករដ្ឋមន្ត្រីថ្មីរបស់កម្ពុជាលើទឹកដីសហរដ្ឋអាមេរិក។
ជាងនេះទៀត ខុទ្ទកាល័យនាយករដ្ឋមន្ត្រីកម្ពុជាបានចេញសេចក្តីប្រកាសព័ត៌មានកាលពីថ្ងៃទី២៥ ខែកញ្ញា ឆ្នាំ២០២៣ ថា ការផ្សាយរូបថតលោក ហ៊ុន ម៉ាណែត លើផ្ទាំងប៉ាណូផ្សព្វផ្សាយពាណិជ្ជកម្ម Billboard នៅ Time Square គឺផ្តើមចេញពីមនោសញ្ចេតនារបស់យុវជនម្នាក់ឈ្មោះ Devid Soth ដែលកំពុងបម្រើការក្នុងក្រុមហ៊ុនផ្សព្វផ្សាយពាណិជ្ជកម្មនោះ។
ប្រភពដដែលបញ្ជាក់ថា លោក Devid Soth គឺជាបុគ្គលសំខាន់ក្នុងក្រុមហ៊ុន រហូតធ្វើឱ្យថៅកែក្រុមហ៊ុនខាងលើនេះផ្តល់នូវការគាំទ្រ ហើយសម្រេចអនុញ្ញាតឱ្យផ្សព្វផ្សាយរូបថតរបស់លោក ហ៊ុន ម៉ាណែត លើផ្ទាំងផ្សាយពាណិជ្ជកម្មរបស់ខ្លួនដោយមិនគិតថ្លៃតែម្តង។
ទាក់ទិននឹងការវែកញែករូបថតលោក ហ៊ុន ម៉ាណែត លើផ្ទាំងប៉ាណូផ្សព្វផ្សាយពាណិជ្ជកម្ម Billboard នេះ គេនៅមិនទាន់ឃើញមន្ត្រីរដ្ឋាភិបាលកម្ពុជា ឬលោក ហ៊ុន សែន ដែលបានបង្ហោះរូបថតនេះ ចេញមុខបំភ្លឺលើករណីនេះនៅឡើយទេ ខណៈវីដេអូប្រៀបធៀបចំនួនពីរជុំវិញការផ្សព្វផ្សាយរូបថតលោក ហ៊ុន ម៉ាណែត នេះ ដែលគេសរសេរថា វីដេអូពិត និងវីដេអូក្លែងក្លាយ ត្រូវបានបង្ហោះព្រោងព្រាតលើបណ្ដាញសង្គមនានានៅពេលនេះ។
ជុំវិញបញ្ហានេះ ក្រុមហ៊ុនផ្សព្វផ្សាយពាណិជ្ជកម្ម Time Square Billboard បានឆ្លើយទៅកាន់សំណួរនានាពាក់ព័ន្ធនឹងការផ្សព្វផ្សាយរូបថតរបស់លោក ហ៊ុន ម៉ាណែត ថា ខ្លួនមិនអនុញ្ញាតឱ្យមានការផ្សព្វផ្សាយដែលពាក់ព័ន្ធនឹងនយោបាយឡើយ ហើយក៏គ្មានគោលការណ៍ផ្សាយពាណិជ្ជកម្មដោយមិនបង់លុយដែរ។ ជាងនេះទៀត ក្រុមហ៊ុនក៏មិនដែលស្គាល់ឈ្មោះ Devid Soth ដែលមន្ត្រីរដ្ឋាភិបាលកម្ពុជាអះអាងថាជាបុគ្គលិកសំខាន់របស់ក្រុមហ៊ុននោះថែមទៀត៕