31 C
Phnom Penh

រដ្ឋមន្ត្រី​មហាផ្ទៃ​បញ្ជា​ឱ្យ​អាជ្ញាធរ​ខេត្ត​ជាប់​ព្រំដែន​គ្រប់​ខេត្ត​បិទ​ច្រក​របៀង​ខុស​ច្បាប់​ទាំងអស់​ជា​បន្ទាន់

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ត​ពូជ​នៃ​ក្រសួង​មហាផ្ទៃ លោក ស សុខា បញ្ជា​ឱ្យ​អាជ្ញាធរ​ខេត្ត​ជាប់​ព្រំដែន​ជាមួយ​ប្រទេស​ជិតខាង​គ្រប់​ខេត្ត បិទ​ច្រក​របៀង​ខុស​ច្បាប់​ទាំងអស់​នៅ​ពេលនេះ​ជាបន្ទាន់ ដើម្បី​ឱ្យ​ក្រសួង​មហាផ្ទៃ​សិក្សា​ឡើងវិញ​អំពី​នីតិវិធី​ក្នុង​ការ​បង្កើត​ច្រក​ទ្វារ​ព្រំដែន​ផ្លូវការ​សម្រាប់​ខេត្ត​ទាំងនោះ។

លោក ស សុខា ព្រមាន​ថា ក្នុង​ករណី​ច្រក​ទ្វារ​ព្រំដែន​ណា​មួយ​កើតមាន​បញ្ហា​មិន​ប្រក្រតី​បណ្តាល​មកពី​ការ​អនុវត្ត​តួនាទី​ភារកិច្ច​មិន​បាន​ត្រឹមត្រូវ​តាម​គោលការណ៍​ច្បាប់ និង​លិខិត​បទដ្ឋាន​គតិយុត្តិ​ដែល​បាន​កំណត់ ក្រសួង​មហាផ្ទៃ​នឹង​ចាត់​វិធានការ​តាម​ផ្លូវ​ច្បាប់​ជា​ធរមាន​ដោយ​គ្មាន​ករណី​លើកលែង​ដាច់ខាត។

រដ្ឋមន្ត្រី​ត​ពូជ​នៃ​ក្រសួង​មហាផ្ទៃ លោក ស សុខា បាន​ចេញ​សេចក្តី​ណែនាំ​កាលពី​ថ្ងៃទី​៣ ខែ​តុលា ឆ្នាំ​២០២៣ នេះ​ថា ក្រសួង​មហាផ្ទៃ​បាន​កត់សម្គាល់​ឃើញ​ពី​ភាព​ខ្វះ​ចន្លោះ និង​ភាព​មិន​ប្រក្រតី​មួយ​ចំនួន​ដែល​កើត​ចេញពី​ការ​ធ្វេសប្រហែស​ក្នុង​ការ​អនុវត្ត​តួនាទី​ភារកិច្ច​របស់​អាជ្ញាធរ​មាន​សមត្ថកិច្ច​នៅ​តាម​បណ្តា​ខេត្ត​ជាប់​ព្រំដែន​នា​ពេល​កន្លង​មក ដូច្នេះ​ក្រសួង​សម្រេច​ដាក់​ចេញ​នូវ​វិធានការ​មួយ​ចំនួន ដើម្បី​ពង្រឹង​សន្តិសុខ​សណ្ដាប់ធ្នាប់​សាធារណៈ និង​របៀប​រៀបរយ​ក្នុង​ខេត្ត​តាម​បណ្ដោយ​ខ្សែបន្ទាត់​ព្រំដែន​ឱ្យ​បាន​ល្អ​ប្រសើរ។

លោក ស សុខា បាន​លើកឡើង​ក្នុង​សេចក្តី​ណែនាំ​ខាងលើ​ថា អាជ្ញាធរ​ខេត្ត​ត្រូវតែ​បិទ​ច្រក​របៀង​ខុស​ច្បាប់​ទាំងអស់ មុន​នឹង​ក្រសួង​មហាផ្ទៃ​បង្កើត​ច្រក​ទ្វារ​ព្រំដែន​ផ្លូវការ និង​ត្រូវ​ត្រួតពិនិត្យ​អ្នក​ដំណើរ ទំនិញ និង​មធ្យោបាយ​ចេញ​ចូល​ឆ្លងកាត់​ព្រំដែន​ផង​ដែរ ដើម្បី​បង្ការ ទប់ស្កាត់ និង​បង្ក្រាប​រាល់​បទល្មើស​ឆ្លងដែន​គ្រប់​ប្រភេទ។ លើស​ពី​នេះ ត្រូវ​បញ្ឈប់​នូវ​ការ​ចេញ​ឯកសារ​ឆ្លងដែន​មិន​ប្រក្រតី និង​ការ​យក​កម្រៃ​ក្រៅ​ផ្លូវការ​ពី​ពលករ និង​ពលរដ្ឋ​ទាំងអស់។

រដ្ឋមន្ត្រី​ក្រសួង​មហាផ្ទៃ​រូប​នេះ​ណែនាំ​ឱ្យ​អាជ្ញាធរ​ខេត្ត​ជាប់​ព្រំដែន​ទាំងអស់ ចាត់​វិធានការ​ផ្លូវ​ច្បាប់​ឲ្យ​បាន​ម៉ឺងម៉ាត់​ក្នុង​ការ​បង្ក្រាប​សកម្មភាព​មេខ្យល់ និង​អ្នក​សមគំនិត ដែល​អូស​ទាញ​ពលរដ្ឋ​ឱ្យ​ឆ្លងដែន​ខុស​ច្បាប់​តាម​គ្រប់​រូបភាព ដើម្បី​ចៀសវាង​ការ​ជួញដូរ​មនុស្ស ការ​កេងប្រវ័ញ្ច​កម្លាំង​ពលកម្ម និង​ការ​ប្រព្រឹត្ត​បទល្មើស​ផ្សេងៗ​ផង​ដែរ។

លោក ស សុខា បញ្ជាក់​ថា ក្រសួង​មហាផ្ទៃ​នឹង​ចាត់​ក្រុម​ការងារ​ជំនាញ​ដឹកនាំ​ដោយ​អគ្គនាយកដ្ឋាន​រដ្ឋបាល ដោយ​មាន​ការ​ចូលរួម​ពី​តំណាង​អគ្គស្នងការដ្ឋាន​នគរបាល​ជាតិ និង​អគ្គនាយកដ្ឋាន​អន្តោប្រវេសន៍ ដើម្បី​ចុះ​តាមដាន ត្រួតពិនិត្យ និង​វាយតម្លៃ​លើ​ការ​បំពេញ​តួនាទី​ភារកិច្ច​នៅ​តាម​បណ្តា​ច្រក​ទ្វារ​ព្រំដែន​ទាំងអស់ ក្នុង​បំណង​លើក​កម្ពស់ និង​ពង្រឹង​ប្រសិទ្ធភាព​ការងារ។

ការ​អះអាង​នេះ ធ្វើឡើង​ស្រប​ពេល​ដែល​ភាព​មិន​ប្រក្រតី​នានា​តែងតែ​កើតឡើង​នៅ​តាម​ច្រក​ព្រំដែន​របស់​កម្ពុជា​ជាមួយ​ប្រទេស​ជិតខាង​ជា​បន្តបន្ទាប់​នា​ពេល​កន្លងមក។

អ្នក​ប្រឹក្សា​យោបល់​ផ្នែក​អភិវឌ្ឍន៍​ផ្នត់គំនិត និង​ការ​ស្រាវជ្រាវ លោក សេក សុជាតិ ប្រាប់​សារព័ត៌មាន The Cambodia Daily នៅ​ថ្ងៃទី​៤ តុលា នេះ​ថា ការ​ដាក់​ចេញ​នូវ​វិធានការ​នេះ គឺជា​រឿង​ល្អ ប៉ុន្តែ​បញ្ហា​គឺ​ស្ថិត​នៅ​ត្រង់​ថា មន្ត្រី​ថ្នាក់​ក្រោម​ទទួល​យក​ទៅ​អនុវត្ត ឬ​ក៏​អត់​ប៉ុណ្ណោះ ហើយ​បើ​ពួកគេ​មិន​អនុវត្ត តើ​ក្រសួង​មាន​វិធានការ​ដាក់​ពិន័យ ឬ​ទោស​ទណ្ឌ​ដែរ​ទេ នេះ​ទើប​ជា​បញ្ហា​ដែល​ត្រូវ​បារម្ភ​ចំពោះ​វិធានការ​ខាងលើ​នេះ។

លោក សេក សុជាតិ លើកឡើង​ថា កន្លងមក រាល់​ពេល​រដ្ឋាភិបាល​ដាក់​ចេញ​វិធានការ​រឹត​បន្តឹង​លើ​ករណី​ណា​មួយ ក៏​ជា​ឱកាស​របស់​មន្ត្រី​មូលដ្ឋាន​ប្រព្រឹត្ត​អំពើពុករលួយ​កាន់តែ​ខ្លាំង​ដែរ ព្រោះ​ថា​អាជ្ញាធរ​បាន​យក​វិធានការ​ទាំងនោះ​ទៅ​ប្រើ​ក្នុង​អំពើពុករលួយ​របស់​ពួកគេ ដើម្បី​ទារ​ប្រាក់​ពី​ជន​រងគ្រោះ​ឱ្យ​បាន​កាន់តែ​ច្រើន ខណៈ​ការ​ស៊ើបអង្កេត ឬ​ការ​ដាក់​ពិន័យ​លើ​មន្ត្រី​បែប​នេះ​មាន​តែ​បន្តិចបន្តួច​ប៉ុណ្ណោះ​នា​ពេល​កន្លងមក។

អ្នក​ប្រឹក្សា​យោបល់​ផ្នែក​អភិវឌ្ឍន៍​ផ្នត់គំនិត​រូប​នេះ​បញ្ជាក់​ថា ការ​កាន់​តួនាទី​រយៈពេល​យូរ​រហូត​ដុះ​ស្នឹម​របស់​មន្ត្រី​ទាំងនោះ ក៏​ជា​ហេតុផល​មួយ​ដែល​នាំ​ឱ្យ​ការ​អនុវត្ត​ច្បាប់​គ្មាន​ប្រសិទ្ធភាព និង​បណ្តាល​ឱ្យ​កើតមាន​អំពើពុករលួយ​ជា​ប្រព័ន្ធ​ដែរ ដូច្នេះ​មន្ត្រី​ដែល​ប្រចាំការ​តាម​ច្រក​ព្រំដែន គួរតែ​ត្រូវ​បាន​ផ្លាស់ប្ដូរ​រាល់ ៣​ខែ ឬ ៦​ខែ​ម្តង ក្នុង​នោះ​រាល់​ការ​ផ្លាស់​ចេញ ក៏​ត្រូវ​ធ្វើការ​ស៊ើបអង្កេត​ចំពោះ​ការ​អនុវត្ត​ការងារ​របស់​ពួកគេ​ដែរ ដើម្បី​ធានា​ភាព​ស្អាតស្អំ ហើយ​ក៏​ជា​កត្តា​ជំរុញ​ឱ្យ​មាន​ការ​អនុវត្ត​ការងារ​មាន​ប្រសិទ្ធភាព​បន្ត​ទៀត។

កម្ពុជា​មាន​ព្រំដែន​ជាមួយ​ប្រទេស​ឡាវ វៀតណាម និង​ប្រទេស​ថៃ ក្នុង​នោះ​មាន​ខេត្ត​ចំនួន​៩ ជាប់​ជាមួយ​ប្រទេស​វៀតណាម ដូចជា​ខេត្ត​កណ្តាល ខេត្ត​តាកែវ ព្រៃវែង ស្វាយរៀង កំពង់ចាម ក្រចេះ មណ្ឌលគិរី រតនគិរី និង​ខេត្ត​កំពត ចំណែក​ខេត្ត ៣ ផ្សេង​ទៀត គឺ​ជាប់​ជាមួយ​ប្រទេស​ឡាវ ដូចជា​ខេត្ត​ព្រះវិហារ ស្ទឹងត្រែង និង​ខេត្ត​រតនគិរី។ ដោយឡែក​ខេត្ត​ចំនួន ៧ ទៀត គឺ​ជាប់​ជាមួយ​នឹង​ប្រទេស​ថៃ ដូចជា​ខេត្ត​ព្រះវិហារ ឧត្ដរមានជ័យ បន្ទាយមានជ័យ បាត់ដំបង ប៉ៃលិន ពោធិ៍សាត់ និង​ខេត្ត​កោះកុង។

បណ្តា​ខេត្ត​ដែល​ជាប់​ជាមួយ​ប្រទេស​ឡាវ វៀតណាម និង​ប្រទេស​ថៃ គឺ​មាន​ច្រក​ទ្វារ​អន្តរជាតិ ច្រក​របៀង​ស្រប​ច្បាប់ និង​ច្រក​របៀង​មិន​ស្រប​ច្បាប់​ទាំងអស់ ក្នុង​នោះ​កាលពី​អំឡុង​ឆ្នាំ​២០១៧ ត្រូវ​គេ​រក​ឃើញ​ថា គ្រាន់តែ​ច្រក​របៀង​ខុស​ច្បាប់​ក្នុង​ខេត្ត​បន្ទាយមានជ័យ ជាប់​ព្រំដែន​ថៃ មាន​រហូត​ដល់​ទៅ ៤៣​កន្លែង​ឯណោះ ខណៈ​ខេត្ត​នេះ​ជាប់​នឹង​ទឹកដី​ថៃ មាន​ចម្ងាយ​ប្រមាណ​តែ ១០០​គីឡូម៉ែត្រ​ប៉ុណ្ណោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស