សាលាដំបូងរាជធានីភ្នំពេញ សម្រេចកាត់ទោសអនុប្រធានគណបក្សភ្លើងទៀន លោក ថាច់ សេដ្ឋា ឲ្យជាប់ពន្ធនាគារចំនួន ៣ឆ្នាំ ពីបទ «ញុះញង់បង្កឲ្យមានភាពវឹកវរក្នុងសង្គម» ខណៈសំណុំរឿងសែកស្អុយ តុលាការកាត់ទោសលោកឲ្យជាប់ពន្ធនាគារ ១ឆ្នាំកន្លះ។
ចៅក្រមជំនុំជម្រះសាលាដំបូងរាជធានីភ្នំពេញ អ្នកស្រី ឈុន ដាវី នៅថ្ងៃទី១៨ ខែតុលា នេះ បានប្រកាសសាលក្រមដោយផ្ដន្ទាទោសអនុប្រធានគណបក្សភ្លើងទៀន លោក ថាច់ សេដ្ឋា ដាក់ពន្ធនាគាររយៈពេល ៣ឆ្នាំ និងពិន័យប្រាក់ចំនួន ៤លានរៀល ពីបទញុះញង់បង្កឲ្យមានភាពវឹកវរក្នុងសង្គម និងបទញុះញង់ឲ្យមានការរើសអើង។
ប្រាប់អ្នកសារព័ត៌មាននៅខាងមុខសាលាដំបូងរាជធានីភ្នំពេញ ភរិយារបស់លោក ថាច់ សេដ្ឋា គឺលោកស្រី ថាច់ សុខបូរ៉ានី ចាត់ទុកការសម្រេចរបស់តុលាការថាជារឿងអយុត្តិធម៌សម្រាប់ស្វាមីរបស់គាត់ ទាំងដែលបច្ចុប្បន្នលោក ថាច់ សេដ្ឋា កំពុងមានជំងឺជាប់ខ្លួនផងដែរ។
អ្នកវិភាគនយោបាយ លោក គឹម សុខ ប្រាប់ The Cambodia Daily ថា ការកាត់ទោសឲ្យលោក ថាច់ សេដ្ឋា ជាប់គុក ៣ឆ្នាំ គឺជាឧក្រិដ្ឋកម្មនយោបាយជាប្រព័ន្ធរបស់របបដឹកនាំសង្គមនៃក្រុមលោក ហ៊ុន ម៉ាណែត។ រឿងបែបនេះគ្មានគោលដៅយុត្តិធម៌ទេ ប៉ុន្តែជាវិធីបំបិទកម្លាំងសង្គមប្រជាធិបតេយ្យ ដើម្បីតែក្ដោបអំណាចគ្រួសារហ៊ុន។
លោកនិយាយថា វាជារឿងដែលមេដឹកនាំមានសតិប្រក្រតីមិនអាចធ្វើបាន ព្រោះលោក ហ៊ុន សែន និងលោក ហ៊ុន ម៉ាណែត សុទ្ធតែអួតក្អេងក្អាងអំពីប្រជាប្រិយភាពដ៏ខ្ពស់របស់ខ្លួន ប៉ុន្តែបែរជាមិនហ៊ានប្រកួតប្រជែង ហើយប្រឹងកាឡៃសំណុំរឿងចាប់គូប្រជែងដាក់គុក ព្រោះតែចៅក្រមជាមន្ត្រីរបស់បក្សកាន់អំណាច។
លោក គឹម សុខ អះអាងថា អំពើឧក្រិដ្ឋកម្មនយោបាយរបស់ពួកអ្នកដឹកនាំប្រទេស កាលណាប្រព្រឹត្តជាប្រព័ន្ធ កម្ចាត់មិនរើសមុខ ប្រើគុក និងការបំភ្លៃច្បាប់ជាមូលដ្ឋានបែបនេះ ក៏អាចជាដំណាក់កាលនៃការផ្ដាំផ្ញើសម្រាប់និន្នាការដួលរលំអំណាចផងដែរ។
ក្រៅពីសំណុំរឿង «ញុះញង់» លោក ថាច់ សេដ្ឋា ក៏ត្រូវបានតុលាការក្រុងភ្នំពេញកាលពីថ្ងៃទី២១ ខែកញ្ញា កន្លងទៅ កាត់ទោសឲ្យពន្ធនាគារ ១ឆ្នាំកន្លះ និងក្នុងសំណុំរឿងសែកអត់សាច់ប្រាក់ចំនួន ៥ កាលពីឆ្នាំ២០១៩។ លើសពីនេះ តុលាការបានបង្គាប់ឲ្យលោក ថាច់ សេដ្ឋា បង់ប្រាក់ពិន័យចំនួន ៨លានរៀល ដោយក្នុងនោះ ទឹកប្រាក់ចំនួន ៣លានរៀលបង់ចូលរដ្ឋ និងចំនួន ៥លានរៀលបង់សងជំងឺចិត្តដល់ក្រុមហ៊ុនបញ្ចាំ រិនឆាយ ផនសប (Rin Chhay Pawn Shop)។
ក្រោយពីសមត្ថកិច្ចចាប់ខ្លួនកាលពីខែមករា ករណីចេញសែកគ្មានសាច់ប្រាក់ លោក ថាច់ សេដ្ឋា ក៏ត្រូវបានតុលាការចោទប្រកាន់ពីបទ «ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់ឲ្យមានការរើសអើង» បន្ទាប់ពីលោកនិយាយពីប្រវត្តិសាស្ត្រនៃថ្ងៃ ៧មករា និងអំពីដើមកំណើតនៃការបង្កើតគណបក្សប្រជាជនកម្ពុជា ដែលគណបក្សនេះត្រូវបានបង្កើតឡើងដោយវៀតណាម នោះ៕