38 C
Phnom Penh

មនុស្ស​លំដាប់​ទី​ពីរ​ក្នុង​បក្ស​កុម្មុយនីស្ត​ចិន​ទទួល​មរណភាព​ដោយ​ជំងឺ​គាំង​បេះដូង

ដោយ ឌឹ ខេមបូឌា ដេលី

បទវិភាគ

កម្មាភិបាល​ចិន ដែល​ជា​មន្ត្រី​កំពូល​ក្នុង​បក្ស ហើយ​ធ្លាប់​ត្រូវ​គេ​គិត​ថា​អាច​ឡើង​កាន់​តំណែង​ជា​ប្រធានាធិបតី ក្រោយពី​លោក ហូ ជីនតាវ ចូល​និវត្តន៍​កាលពី​ឆ្នាំ​២០១៣ បាន​ទទួល​មរណភាព​កាលពី​ម៉ោង​រំលង​អាធ្រាត្រ​បន្តិច​ចូល​ថ្ងៃ​សុក្រ ទី​២៧ ខែ​តុលា។

បណ្ដាញ​សារព័ត៌មាន​អង់គ្លេស LBC បាន​ចុះផ្សាយ​ថា មរណភាព​របស់​លោក លី ខឺឈាង (Li Keqiang) អតីត​នាយករដ្ឋមន្ត្រី​ចិន អាច​ជា​ការ​ធូរ​ចិត្ត​បន្តិច​ដែរ​របស់​លោក ស៊ី ជីនពីង។

លោក លី ខឺឈាង ស្លាប់​ក្នុង​វ័យ ៦៨​ឆ្នាំ ជា​មនុស្ស​ជំនិត​នឹង​អតីត​ប្រធានាធិបតី ហូ ជីនតាវ ដែល​មិន​សប្បាយ​ចិត្ត​នៅ​ពេល​ដែល​លោក ស៊ី កែ​រដ្ឋធម្មនុញ្ញ​បន្ត​កាន់​តំណែង​ប្រធានាធិបតី​អាណត្តិ​ទី​៣ ដែល​ប្រទេស​នេះ​ពុំ​ធ្លាប់​មាន​ពី​មុន​នោះ។

ចំណែក​ប្រព័ន្ធ​ផ្សព្វផ្សាយ​របស់​រដ្ឋ​ចិន ឱ្យ​ដឹង​ថា អតីត​នាយករដ្ឋមន្ត្រី​ចិន លោក លី ខឺឈាង បាន​ទទួល​មរណភាព​ដោយ​ជំងឺ​គាំង​បេះដូង​ភ្លាមៗ​នៅ​វេលា​ម៉ោង ១២ និង ១០​នាទី​យប់​ឈាន​ចូល​ថ្ងៃ​សុក្រ នេះ ក្នុង​ទីក្រុង​សៀងហៃ។

មរណភាព​របស់​អតីត​មេដឹកនាំ​បក្ស​កុម្មុយនីស្ត​ចិន លំដាប់​ទី​២ រូប​នេះ កើត​ឡើង​នៅ​ប្រមាណ ១០​ខែ​ក្រោយពី​លោក​បាន​ចូល​និវត្តន៍ បន្ទាប់ពី​កាន់​តំណែង​នាយករដ្ឋមន្ត្រី​ចិន បាន ២​អាណត្តិ ចាប់ពី​ឆ្នាំ​២០១៣ ដល់​ឆ្នាំ​២០២៣ តាម​ការ​កំណត់​របស់​រដ្ឋធម្មនុញ្ញ។ នៅ​ពេល​ដែល​លោក លី ខឺឈាង ចូល​និវត្តន៍ ប៉ុន្តែ​លោក ស៊ី ជីនពីង បែរ​ជា​បន្ត​កាន់​តំណែង​ប្រធានាធិបតី​មួយ​អាណត្តិ​ទៀត​ទៅ​វិញ។

យ៉ាងណា មរណភាព​ភ្លាមៗ​នៃ​កម្មាភិបាល​លំដាប់​ទី​២ របស់​ចិន​នេះ បាន​បង្ក​ឲ្យ​មាន​ភាព​ភ្ញាក់ផ្អើល​ក្នុង​ប្រទេស​ចិន។

គេហទំព័រ​រដ្ឋាភិបាល​មួយ​បាន​ប្ដូរ​ពណ៌​មក​ជា​ស​ខ្មៅ ខណៈ​បណ្ដាញ Weibo របស់​ចិន បាន​ប្ដូរ​ប៊ូតុង Like មក​ជា​ប៊ូតុង​ផ្កា ដើម្បី​ជា​ការ​បង្ហាញ​ការ​កាន់​មរណទុក្ខ។

លោក លី ខឺឈាង បាន​បញ្ចប់​ការ​សិក្សា​ផ្នែក​ច្បាប់ និង​សេដ្ឋកិច្ច។ លោក​ក៏​មាន​សមត្ថភាព​និយាយ​ភាសា​អង់គ្លេស​ផង​ដែរ។ លោក​បាន​ទទួល​តំណែង​ជា​នាយករដ្ឋមន្ត្រី​ចិន ក្នុង​វ័យ ៥៧​ឆ្នាំ កាលពី​ថ្ងៃទី​១៥ ខែ​មីនា ឆ្នាំ​២០១៣។ លោក​ក៏​ធ្លាប់​ត្រូវ​បាន​គេ​ចាត់ទុក​ជា​គូប្រជែង​មួយ​ដែរ​ក្នុង​ការ​ស្នង​តំណែង​ជា​មេដឹកនាំ​បក្ស​កុម្មុយនីស្ត​ចិន បន្ទាប់ពី​លោក ហូ ជីនតាវ កាលពី​ឆ្នាំ​២០១៣ ក៏ប៉ុន្តែ​តំណែង​ប្រធានាធិបតី​ចិន ជំនាន់​ទី​៤ នេះ ត្រូវ​បាន​ធ្លាក់​ទៅ​លើ​លោក ស៊ី ជីនពីង រហូត​មក​ដល់​ពេល​បច្ចុប្បន្ន​នេះ​ទៅ​វិញ។

ក្រោយ​ការ​ចូល​និវត្តន៍​របស់​លោក លី ខឺឈាង តាំងពី​ខែ​មីនា ឆ្នាំ​២០២៣ មក តំណែង​នាយករដ្ឋមន្ត្រី​ចិន ត្រូវ​បាន​ជំនួស​ដោយ​លោក លី ខឺឈាំង ដែល​មាន​វ័យ ៦៣​ឆ្នាំ និង​ជា​អតីត​លេខា​បក្ស​កុម្មុយនីស្ត​ចិន ក្រុង​សៀងហៃ។

ក៏ប៉ុន្តែ​អាណត្តិ​របស់​នាយករដ្ឋមន្ត្រី លី ខឺឈាំង គឺ​មាន​រដ្ឋមន្ត្រី ៤​រូប​ហើយ​ត្រូវ​បាន​បណ្ដេញ​ពី​មុខតំណែង​ក្នុង​នោះ​មាន​រដ្ឋមន្ត្រី​ការពារ​ជាតិ Li Shangfu រដ្ឋមន្ត្រី​ការបរទេស លោក Qin Gang។ កម្មាភិបាល​ចិន ២​រូប​នេះ​មុន​ដក​ចេញពី​តំណែង សុទ្ធតែ​បាត់​មុខ​យូរ​ខែ​ពី​មហាជន​ចិន។

ចំណែក​រដ្ឋមន្ត្រី ២​រូប​ទៀត​ដែល​ត្រូវ​បាន​បណ្ដេញ​ពី​តំណែង គឺ​រដ្ឋមន្ត្រី​ក្រសួង​ហិរញ្ញវត្ថុ លោក Liu Kun និង​រដ្ឋមន្ត្រី​ក្រសួង​វិទ្យាសាស្ត្រ និង​បច្ចេកវិទ្យា លោក Wang Zhigang។ សំណុំរឿង​ឈាន​ដល់​ការ​ដក​ហូត​តំណែង​រដ្ឋមន្ត្រី ៣​រូប​នេះ​នៅ​ថ្ងៃទី​២៤ ខែ​តុលា ត្រូវ​បាន​សង្ស័យ​ថា​អាច​មកពី​រឿង​កិបកេង ពុករលួយ និង​បញ្ហា​ទំនាស់​ក្នុង​បក្ស​កុម្មុយនីស្ត​ចិន៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស