មេដឹកនាំខ្មែរក្រាញអំណាចដែលល្បីល្បាញខាងលក់ដីរដ្ឋ និងបំផ្លាញព្រៃឈើ លោក ហ៊ុន សែន បានសម្រេចកាត់ឆ្វៀលដីសាធារណៈរបស់រដ្ឋក្នុងស្រុកស្ទឹងហាវ ខេត្តព្រះសីហនុ ជិត ៨០០ហិកតារឱ្យទៅក្រុមហ៊ុនឯកជនឈ្មោះ C99 International Investment (Cambodia) Co.,Ltd សម្រាប់ធ្វើការអភិវឌ្ឍជាសណ្ឋាគារ និងរដ្ឋបាលខេត្តព្រះសីហនុ ធ្វើជាកម្មសិទ្ធិ។
លោក ហ៊ុន សែន ដែលជាប់ឈ្មោះជាមេដឹកនាំរំលោភដីរដ្ឋឱ្យទៅបក្ខពួក និងសាច់ញាតិខ្លួនឯង បានចេញអនុក្រឹត្យកាលពីថ្ងៃទី២៣ ខែមិថុនា ឆ្នាំ២០២៣ និងត្រូវបានផ្សព្វផ្សាយនៅថ្ងៃទី៣១ តុលា នេះ បានសម្រេចធ្វើអនុប្បយោគដីសាធារណៈរបស់រដ្ឋទំហំ ៧៩៩ហិកតារស្ថិតនៅឃុំទំនប់រលក ស្រុកស្ទឹងហាវ ខេត្តព្រះសីហនុ ជាដីឯកជនរបស់រដ្ឋ ដល់ក្រុមហ៊ុនឯកជនឈ្មោះ C99 International Investment (Cambodia) Co., Ltd សម្រាប់ធ្វើការអភិវឌ្ឍ ក្នុងនោះផ្ទៃដី ២០ភាគរយ ត្រូវប្រគល់ទៅឱ្យរដ្ឋបាលខេត្តព្រះសីហនុ កាន់កាប់ជាកម្មសិទ្ធិផងដែរ។
មេដឹកនាំដែលជាប់ឈ្មោះអាក្រក់ក្នុងការបំផ្លាញទ្រព្យសម្បត្តិជាតិលោក ហ៊ុន សែន អះអាងក្នុងអនុក្រឹត្យរបស់ខ្លួនថា ផ្ទៃដីទំហំ ៧៩៩ហិកតារ ត្រូវបែងចែកជាពីរផ្នែក គឺទំហំដី ៦៣៩ហិកតារ និង ២០អា ដែលស្មើនឹង ៨០% ត្រូវផ្ដល់ជាកម្មសិទ្ធិជូនក្រុមហ៊ុន C99 International Investment (Cambodia) Co.,Ltd សម្រាប់ធ្វើការអភិវឌ្ឍជាសណ្ឋាគារ វីឡាទំនើប អគារស្នាក់នៅ រួមមានផ្សារទំនើប ភោជនីយដ្ឋាន មជ្ឈមណ្ឌលពាណិជ្ជកម្ម តំបន់សេវាកម្មនានា និងឃ្លាំងដាក់សម្ភារៈ។
មេដឹកនាំដែលបំផ្លាញទ្រព្យសម្បត្តិជាតិបន្តពូជលោក ហ៊ុន សែន បញ្ជាក់ថា ចំណែកផ្ទៃដីទំហំ ១៥៩ហិកតារ និង ៨០អាទៀតដែលស្មើនឹង ២០% នៃផ្ទៃដីសរុបខាងលើនេះ ត្រូវប្រគល់ជូនរដ្ឋបាលខេត្តព្រះសីហនុ ជាកម្មសិទ្ធិ ដូច្នេះរដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី ក្រសួងសេដ្ឋកិច្ច និងហិរញ្ញវត្ថុ ក្រសួងដែនដី ក្រសួងមហាផ្ទៃ ត្រូវតែអនុវត្តតាមខ្លឹមសាររបស់អនុក្រឹត្យនេះតទៅ។
ការកាត់ឆ្វៀលដីសាធារណៈរបស់រដ្ឋទៅជាកម្មសិទ្ធិឯកជននេះ បានធ្វើជាហូរហែដែលគេមើលឃើញថា តំបន់អភិរក្សនានាកំពុងរងនូវការបំផ្លាញទាំងបរិស្ថាន និងព្រៃឈើពីសំណាក់ក្រុមហ៊ុនឯកជនដែលទទួលបានសិទ្ធិកាន់កាប់ដីសាធារណៈរបស់រដ្ឋទាំងនោះរហូតមក។
ការកាត់ឆ្វៀលដីរដ្ឋឱ្យទៅជាកម្មសិទ្ធិក្រុមហ៊ុនឯកជននេះ មិនមែនជាលើកទី១ ទេ ហើយក៏មិនមែនជាលើកចុងក្រោយដែរសម្រាប់រដ្ឋាភិបាលដែលដឹកនាំដោយក្រុមគ្រួសារត្រកូលហ៊ុន។ ជាក់ស្តែង កាលពីថ្ងៃទី៣០ ខែវិច្ឆិកា ឆ្នាំ២០២២ លោក ហ៊ុន សែន បានចុះហត្ថលេខាលើអនុក្រឹត្យមួយដោយកំណត់ដីសាធារណៈរបស់រដ្ឋជិត ១លានហិកតារនៅក្នុងតំបន់ការពារធម្មជាតិក្នុងខេត្តចំនួន ១៥ ដើម្បីត្រៀមធ្វើអនុប្បយោគ និងបែងចែកជាកម្មសិទ្ធិឱ្យទៅក្រុមហ៊ុនឯកជននានា ដើម្បីធ្វើការអភិវឌ្ឍ ខណៈខេត្តដែលមិនជាប់ក្នុងអនុក្រឹត្យនេះ ក៏ត្រូវរងនូវការបែងចែកឱ្យទៅក្រុមហ៊ុនឯកជនកាន់កាប់ធ្វើជាកម្មសិទ្ធិជាបន្តបន្ទាប់ផងដែរ។
ទាក់ទិននឹងការកាត់ឆ្វៀលដីក្នុងខេត្តព្រះសីហនុ នេះ កាលពីថ្ងៃទី៦ ខែមីនា ឆ្នាំ២០២៣ លោក ហ៊ុន សែន បានកាត់ឆ្វៀលដីចេញពីដែនគម្របព្រៃឈើឆ្នាំ២០០២ ជាង ១ម៉ឺនម៉ែត្រក្រឡា (១ហិកតារ ២១អា ៦១សង់ទីអា) ប្រគល់ជាកម្មសិទ្ធិឯកជនឱ្យទៅលោក ស្រ៊ី ថាមរុង្គ រដ្ឋមន្ត្រីប្រតិភូអមនាយករដ្ឋមន្ត្រីនៃរដ្ឋាភិបាលថ្មីរបស់លោក ហ៊ុន ម៉ាណែត ផងដែរ។
ជាងនេះទៀត កាលពីថ្ងៃទី៣១ ខែមីនា ឆ្នាំ២០២៣ លោក ហ៊ុន សែន បានសម្រេចផ្ដល់ដីឧទ្យានជាតិសមុទ្រកោះរ៉ុង ជាង ២០០ហិកតារ (២៤២ហិកតារ) ឱ្យទៅក្រុមហ៊ុនកូនប្រុសពៅរបស់លោក យឹម ឆៃលី ដែលជាដន្លងរបស់ខ្លួន ធ្វើជាកម្មសិទ្ធិ ព្រមទាំងទទួលបានសិទ្ធិជួលដីឧទ្យានជាតិមួយនេះទំហំជាង ៤០០ហិកតារ (៤៨៩ហិកតារ) ថែមទៀត។
ជុំវិញការផ្តល់ដីនៅតំបន់ការពារឱ្យទៅជាកម្មសិទ្ធិរបស់ក្រុមហ៊ុនឯកជន និងអ្នកមានទ្រព្យធន ត្រូវគេមើលឃើញថា មន្ត្រីជាន់ខ្ពស់ និងឧកញ៉ាជាច្រើនដែលជិតស្និទ្ធនឹងលោក ហ៊ុន សែន រួមទាំងសាច់ញាតិ និងកូនៗបង្កើតរបស់គាត់ សុទ្ធតែបានទទួលដីទាំងនេះជាច្រើនរយហិកតារធ្វើជាកម្មសិទ្ធិ ខណៈព្រៃឈើនៅតំបន់ដែលលោក ហ៊ុន សែន សម្បទានទាំងនោះត្រូវរងនូវការកាប់បំផ្លាញ និងគ្រប់គ្រងដោយគ្មានតម្លាភាពទាំងអស់។
ក្រៅពីកាត់ដីសាធារណៈរបស់រដ្ឋឱ្យទៅបក្ខពួក និងសែស្រឡាយខ្លួនឯង និងក្រុមហ៊ុនឯកជនដែលជាបក្ខពួករបស់ខ្លួន លោក ហ៊ុន សែន ក៏បានផ្តល់ដីក្នុងតំបន់ការពារនានាឱ្យទៅក្រុមហ៊ុនបរទេសផងដែរ ដូចជា ក្រុមហ៊ុន Union Development Group (UDG) របស់ចិន ដែលទទួលបានដីសម្បទានជាង ៣ម៉ឺនហិកតារ (៣៦០០០ហិកតារ) ផងដែរសម្រាប់ជួលរយៈពេល ៩៩ឆ្នាំក្នុងតំបន់ឧទ្យានជាតិបុទុមសាគរ ខេត្តកោះកុង កាលពីឆ្នាំ២០០៨ កន្លងទៅ។
កាលពីថ្ងៃទី២៨ ខែតុលា ឆ្នាំ២០២៣ អង្គការសមាគមធាងត្នោត បានចេញរបាយការណ៍របស់ខ្លួនជុំវិញអនុក្រឹត្យរបស់រដ្ឋាភិបាលកម្ពុជាដែលបានកាត់ដីសាធារណៈរបស់រដ្ឋឱ្យទៅក្រុមហ៊ុនឯកជនថា ការចេញអនុក្រឹត្យដើម្បីបំប្លែងដីសាធារណៈរបស់រដ្ឋទៅដីឯកជនរបស់រដ្ឋ និងប្រគល់ឱ្យបុគ្គលឯកជន និងស្ថាប័ននានា ហាក់ដូចជាស្ថិតក្នុងភាពមិនច្បាស់លាស់នៅឡើយ។
អង្គការសមាគមធាងត្នោត បញ្ជាក់ថា ការកាត់ដីសាធារណៈរបស់រដ្ឋឱ្យទៅក្រុមហ៊ុនឯកជននាពេលកន្លងមក គឺធ្វើឡើងដោយខ្វះតម្លាភាព និងមិនបានផ្តល់ហេតុផលឱ្យសាធារណជនបានដឹងឡើយ ក្នុងនោះច្បាប់ភូមិបាល និងច្បាប់ស្ដីពីការគ្រប់គ្រង ការប្រើប្រាស់ និងចាត់ចែងលើទ្រព្យសម្បត្តិរដ្ឋ បានចែងថា ទ្រព្យសម្បត្តិសាធារណៈរបស់រដ្ឋពុំអាចផ្តល់ជាកម្មវត្ថុនៃការលក់ដូរ ប្រទានកម្ម ឬសម្បទានបានឡើយ។
ទាក់ទិននឹងបញ្ហានេះ នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព ធ្លាប់បានទាមទារឱ្យអាជ្ញាធរកម្ពុជាពន្យល់ និងផ្សព្វផ្សាយឱ្យបានច្បាស់លាស់ពីការកាត់ដីក្នុងតំបន់ការពារ និងការធ្វើអនុប្បយោគនៅតាមតំបន់ផ្សេងៗដែលខ្លួនបានប្រគល់ឱ្យក្រុមហ៊ុនឯកជន ដើម្បីឱ្យមានតម្លាភាពក្នុងការទទួលខុសត្រូវលើការងាររបស់ខ្លួន ប៉ុន្តែរដ្ឋាភិបាលនៅតែបន្តបែងចែកដីរដ្ឋឱ្យក្រុមហ៊ុនស្ថាប័ន និងបុគ្គលឯកជនដោយលាក់បាំងដដែលសព្វថ្ងៃនេះ៕