28 C
Phnom Penh

អ្នកកាសែត​កត់ត្រា​ថា គន្លឹះ​៤​ចំណុច​យ៉ាងតិច​ចេញពី​ជំនួប​កំពូល​រវាង​លោក បៃដិន និង​លោក ស៊ី ជីនពីង

ដោយ ឌឹ ខេមបូឌា ដេលី

បទវិភាគ

ក្រោយពី​ទន្ទឹង​រង់ចាំ​ជាច្រើន​ខែ​ព្រោះ​តែ​លោក ស៊ី ជីនពីង មិន​បាន​ទៅ​ចូលរួម​ប្រជុំ​នៃ​ប្រទេស​សេដ្ឋកិច្ច​ជឿនលឿន G-20 កាលពី​ខែ​កញ្ញា ដែល​ធ្វើឡើង​នៅ​លើ​ទឹកដី​នៃ​ប្រទេស​ឥណ្ឌា កាលពី​ថ្ងៃទី​១៥ វិច្ឆិកា លោក ចូ បៃដិន បាន​សម្រេច​បំណង​របស់​លោក​ដែល​ចង់​ជួប​លោក ស៊ី ដោយ​ផ្ទាល់។

ជំនួប​កំពូល​នេះ ធ្វើឡើង​នៅ​លើ​ទឹកដី​អាមេរិក នៅ​ភូមិគ្រឹះ Filoli នៅ​ក្រុង San Francisco សហរដ្ឋ​អាមេរិក។ នេះ​ជា​ជំនួប​ផ្ទាល់​លើក​ទី​២ បន្ទាប់ពី​លោក បៃដិន ក្លាយ​ជា​ប្រធានាធិបតី​សហរដ្ឋ​អាមេរិក។ បើ​តាម​ការ​ចុះផ្សាយ​របស់​កាសែត The Guardian នៅ​ថ្ងៃទី​១៦ វិច្ឆិកា នេះ។

អ្នក​សារព័ត៌មាន​បាន​កត់ត្រា​នូវ​ប្រសាសន៍​របស់​លោក ចូ បៃដិន ដែល​ថ្លែង​ក្នុង​សន្និសីទ​សារព័ត៌មាន។ គន្លឹះ​ដ៏​សំខាន់​យ៉ាងតិច ៤​ចំណុច​ដែល​លោក បៃដិន បាន​ថ្លែង​ប្រាប់​អ្នក​សារព័ត៌មាន​ដែល​មាន​ដូចនេះ៖

ទី​១ – លោក បៃដិន ស្វាគមន៍​លោក ស៊ី ដែល​សម្រេច​មក​ចូលរួម​វេទិកា​នៃ​កិច្ចសហការ​សេដ្ឋកិច្ច​អាស៊ី​ប៉ាស៊ីហ្វិក ហើយ​យល់ព្រម​ជួប​រូបលោក ប៉ុន្តែ​លោក បៃដិន បាន​បង្ហើប​ថា លោក ស៊ី គាបសង្កត់​លោក​ឱ្យ​បញ្ឈប់​ការ​ដាក់​ទណ្ឌកម្ម​ទៅ​លើ​ក្រុមហ៊ុន​ចិន និង​មន្ត្រី​ជាន់ខ្ពស់​របស់​ចិន ហើយ​ស្នើ​ឱ្យ​សហរដ្ឋ​អាមេរិក​ពង្រីក​ទំហំ​ពាណិជ្ជកម្ម​ឡើងវិញ។

យ៉ាងណា លោក បៃដិន មិន​បាន​និយាយ​ថា លោក​បាន​យល់ស្រប​តាម​ការ​ស្នើសុំ​របស់​លោក ស៊ី នៅឡើយ​ទេ តែ​លោក បៃដិន ទទួលស្គាល់​ចិន​ជា​ប្រទេស​សេដ្ឋកិច្ច​ដ៏​ធំ​នៅ​លើ​ពិភពលោក។

តាម​លោក បៃដិន លោក ស៊ី បាន​លើកឡើង​ថា ការ​គោរព​គ្នា​ទៅវិញ​ទៅមក ការ​រួម​រស់​ដោយ​សន្តិ​សហ​វិជ្ជមាន និង​កិច្ច​សហប្រតិបត្តិការ​ឈ្នះ​ឈ្នះ​ដែល​មាន​រវាង​ចិន និង​អាមេរិក​រយៈពេល ៥០​ឆ្នាំ​មក​ហើយ។ បើ​ប្រទេស​ទាំង​ពីរ​ប្រកាន់ខ្ជាប់​នូវ​ការ​គោរព​គ្នា​ទៅវិញ​ទៅមក ការ​រួម​រស់​ដោយ​សន្តិ​សហ​វិជ្ជមាន និង​ធ្វើ​កិច្ច​សហប្រតិបត្តិការ​ឈ្នះ​ឈ្នះ វា​នឹង​អាច​គ្រប់គ្រង​បាន​នូវ​ការ​ខ្វែង​គំនិត ហើយ​អាច​រក​ឃើញ​នូវ​ការ​ដោះស្រាយ​ដ៏​ត្រឹមត្រូវ​សម្រាប់​ការ​រួម​រស់នៅ​ជាមួយ​គ្នា​រវាង​ប្រទេស​ធំ​ទាំង​ពីរ។

ទី​២ – ជុំវិញ​សង្គ្រាម​អ៊ីស្រាអែល​វាយ​សងសឹក​លើ​ពួក​ហាម៉ាស-ប៉ាឡេស្ទីន​នៅ​តំបន់​ហ្កាហ្សា លោក បៃដិន បាន​ស្នើ​លោក ស៊ី ជា​មេដឹកនាំ​ចិន ត្រូវ​ប្រើ​ឥទ្ធិពល​របស់​ខ្លួន​ទៅ​លើ​ប្រទេស​អ៊ីរ៉ង់ ដែល​លោក បៃដិន ថា​អ៊ីរ៉ង់ គឺជា​អ្នក​នៅ​ពីក្រោយ​ពួក​សកម្ម​ប្រយុទ្ធ​នៅ​ក្នុង​តំបន់​មជ្ឈិមបូព៌ា។ លោក​បាន​ប្រាប់​លោក ស៊ី ថា អ៊ីរ៉ង់​កំពុងតែ​ទាញ​សង្គ្រាម​អ៊ីស្រាអែល និង​ពួក​ហាម៉ាស​កាន់តែ​រីក​រាលដាល ដែល​លោក​ព្រមាន​ថា វា​អាច​ក្លាយ​ជា​សង្គ្រាម​ដ៏​ធំ​ក្នុង​តំបន់​មជ្ឈិមបូព៌ា។ ជាមួយ​គ្នា​នេះ លោក បៃដិន បាន​ស្នើ​ឱ្យ​ទៅ​លោក ស៊ី ថា ចិន​ត្រូវតែ​ជួយ​បញ្ចប់​សង្គ្រាម​រុស្ស៊ី​ឈ្លានពាន​អ៊ុយក្រែន ជាជាង​គាំទ្រ​ប្រទេស​ដែល​រំលោភ​ច្បាប់​អន្តរជាតិ​នេះ។

ទី​៣– តាម​លោក បៃដិន លោក ស៊ី និយាយ​ថា​ចិន​នឹង​កាត់បន្ថយ​ការ​ផលិត​ស្បៀង​កញ្ចប់ ឬ​កំប៉ុង​ដែល​ផ្ទុក​សារធាតុ​ម្យ៉ាង​អាច​ប៉ះពាល់​សុខភាព​អ្នក​បរិភោគ ហើយ​សន្យា​ជួយ​ទប់ស្កាត់ និង​បោស​សម្អាត​ការ​ជួញដូរ​គ្រឿងញៀន​ដែល​ហូរ​ចូល​ដែនដី​អាមេរិក។ លោក បៃដិន បាន​សរសើរ​លោក ស៊ី ដែល​បាន​ប្ដេជ្ញា​តាម​ការ​ស្នើ​របស់​លោក។

ទី​៤– ចំពោះ​ករណី​ដែន​កោះ​តៃវ៉ាន់ លោក បៃដិន និង​លោក ស៊ី បាន​ពិភាក្សា​គ្នា​ដោយ​មិន​មាន​កម្ដៅ​ក្នុង​ខ្លួន​ដូច​ឆ្នាំ​ទៅ​មិញ​ទៀត​នោះ​ទេ នៅ​ខណៈ​ដែល​លោក បៃដិន នៅតែ​ទទួលយក​សំណើ​របស់​លោក ស៊ី ដែល​ទទូច​ឲ្យ​សហរដ្ឋ​អាមេរិក​គោរព​ឲ្យ​បាន​ខ្ជាប់ខ្ជួន​នូវ​គោលនយោបាយ​ចិន​តែ​មួយ។ លោក បៃដិន បាន​ថ្លែង​ថា លោក​មិន​បាន​ធ្វើការ​កែប្រែ​ចំណុច​នេះ​ទេ។

តាម​លោក បៃដិន លោក ស៊ី ក៏​ស្នើ​ឲ្យ​សហរដ្ឋ​អាមេរិក​កុំ​ជ្រៀតជ្រែក​ចូល​កិច្ចការ​ផ្ទៃក្នុង​របស់​ចិន​ដែរ។ ជាមួយ​គ្នា​នេះ មេដឹកនាំ​ទាំង​ពីរ​បាន​ពិភាក្សា​គ្នា​ផង​ដែរ​អំពី​កោះ​តៃវ៉ាន់ ដែល​ត្រូវ​រៀបចំ​បោះឆ្នោត​ជ្រើសរើស​ប្រធានាធិបតី​នៅ​ឆ្នាំ​ក្រោយ​នេះ។ លោក បៃដិន បាន​ស្នើ​ឲ្យ​ចិន ក៏​កុំ​ជ្រៀតជ្រែក​ការ​បោះឆ្នោត​នៅ​កោះ​តៃវ៉ាន់​ផង​ដែរ។

ប៉ុន្តែ​លោក បៃដិន នៅតែ​ប្រាប់​លោក ស៊ី ថា សហរដ្ឋ​អាមេរិក​នៅតែ​បញ្ជូន​អាវុធ​ទៅ​ឲ្យ​តៃវ៉ាន់ បើ​តៃវ៉ាន់​នៅតែ​ធ្លាក់​ក្នុង​ការ​គំរាមកំហែង​ពី​ចិន ដែល​ចង់​ឈ្លានពាន​ដែន​កោះ​មួយ​នេះ។ កន្លង​មក សហរដ្ឋ​អាមេរិក គឺ​គ្រប់​រដ្ឋការ​ទាំងអស់ សច្ចា​ជួយ​កោះ​តៃវ៉ាន់ ព្រោះ​ដែន​កោះ​នេះ​ជា​រដ្ឋ​ប្រជាធិបតេយ្យ​មួយ​ដ៏​សំខាន់​នៅ​តំបន់​អាស៊ី​ប៉ាស៊ីហ្វិក។

សម្រាប់​លោក ស៊ី បាន​ថ្លែង​ថា លោក​នៅតែ​ចង់​ឃើញ​តៃវ៉ាន់ ក្លាយ​ជា​ដែនដី​បង្រួបបង្រួម​ជាមួយ​នឹង​ទីក្រុង​ប៉េកាំង។

ត្រង់​ចំណុច​នេះ លោក បៃដិន បាន​ប្រាប់​អ្នកកាសែត​ថា លោក​ជំទាស់​ដាច់ខាត​មិន​ឲ្យ​ចិន លើក​ទ័ព​វាយ​ចូល​កោះ​តៃវ៉ាន់​នោះ​ទេ។ ចំពោះ​ករណី​កោះ​តៃវ៉ាន់​នេះ និង​ករណី​ផ្សេងៗ​ទៀត បើ​តាម​លោក បៃដិន គឺ​ប្រទេស​ទាំង​ពីរ​សន្យា​ជាមួយ​គ្នា ដោយ​ធ្វើ​ទំនាក់ទំនង​តាម​ខ្សែ​ទូរសព្ទ​រវាង​រដ្ឋមន្ត្រី​ការពារ​ជាតិ​នៃ​ប្រទេស​ទាំង​ពីរ ក្នុង​គោលដៅ​ទប់ស្កាត់​ការ​ផ្ទុះ​ប្រដាប់​អាវុធ​ប៉ះទង្គិច​គ្នា។

ក្នុង​អំឡុង​ពេល​ជំនួប​នៅ​កោះ​បាលី កាលពី​ឆ្នាំ​មុន ភាគី​អាមេរិក​បាន​បង្ហាញ​ការ​សន្យា​ថា​មិន​ស្វែងរក​ការ​ផ្លាស់ប្ដូរ​ប្រព័ន្ធ​របប​ដឹកនាំ​នៅ​ប្រទេស​ចិន គឺ​មិន​ស្វែងរក​ការ​បង្ក​សង្គ្រាម​ត្រជាក់​ថ្មី​ឡើយ។

ក្រោយពី​ជួប​ពិភាក្សា​គ្នា​ដោយ​ប្រើ​ពេល​ដល់​ទៅ ៤​ម៉ោង លោក បៃដិន បាន​រៀបចំ​ពិធី​ជប់លៀង​អាហារ​ថ្ងៃ​ត្រង់​ជូន​លោក ស៊ី។

អ្នក​សង្កេតការណ៍​កត់ត្រា​ថា​ជា​ជំនួប​ប្រវត្តិសាស្ត្រ​ជា​ថ្មី​ទៀត​រវាង​មេដឹកនាំ​ប្រទេស​មហាអំណាច​ដ៏​ធំ​ពីរ​នេះ ធ្វើឡើង​ខណៈ​ពិភពលោក​ចេះ​តែ​ជួប​វិបត្តិ ដែល​គេ​អាច​រាប់​ទាំង​វិបត្តិ​នៃ​ការ​ផ្ទុះ​ជំងឺ​កូវីដ-១៩ ហើយ​វិបត្តិ​នៃ​ការ​ផ្ទុះ​សង្គ្រាម​រុស្ស៊ី​ឈ្លានពាន​អ៊ុយក្រែន និង​សង្គ្រាម​របស់​អ៊ីស្រាអែល​វាយ​សងសឹក​លើ​ពួក​ហាម៉ាស-ប៉ាឡេស្ទីន ដែល​សង្គ្រាម​ទាំង​ពីរ​នេះ​មិន​ទាន់​រក​ពេល​បិទ​បញ្ចប់​នៅឡើយ​ទេ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស