តំណាងរាស្ត្រអតីតគណបក្សសង្គ្រោះជាតិ ចោទថាការដឹកនាំរបស់លោក ហ៊ុន ម៉ាណែត គឺផ្ដាច់ការមិនខុសពីការដឹកនាំរបស់លោក ហ៊ុន សែន ដែលជាឪពុករបស់គាត់នោះទេ ព្រោះក្រោយឡើងកាន់អំណាចបានជិត ១០០ថ្ងៃ បានប្រើអំណាចចាប់ខ្លួនអ្នករិះគន់រដ្ឋាភិបាលរបស់គាត់បណ្តើរៗហើយ។
មន្ត្រីជាន់ខ្ពស់អតីតគណបក្សប្រឆាំងលោក អ៊ុំ សំអាន សរសេរលើគណនីហ្វេសប៊ុករបស់ខ្លួននៅថ្ងៃទី២៧ វិច្ឆិកា ថា ស្លឹកឈើគឺជ្រុះមិនឆ្ងាយពីគល់ឡើយ។
លោក អ៊ុំ សំអាន ថាលោក កង សារ៉ន ដែលបានរិះគន់ពីបញ្ហាជនអន្តោប្រវេសន៍វៀតណាមខុសច្បាប់នៅប្រទេសកម្ពុជា ត្រូវបានអាជ្ញាធរខេត្តបន្ទាយមានជ័យ ចាប់ខ្លួនហើយ បន្ទាប់ពីតុលាការបានកាត់ទោសគាត់ឱ្យជាប់គុក ៣ឆ្នាំក្រោមបទចោទ «ញុះញង់»។
លោក អ៊ុំ សំអាន លើកឡើងថា ពលរដ្ឋខ្មែរណាដែលហ៊ាននិយាយប៉ះពាល់ជនជាតិវៀតណាមខុសច្បាប់ គឺត្រូវតែជាប់គុក ព្រោះថាលោក ហ៊ុន សែន ដែលជាឪពុករបស់លោក ហ៊ុន ម៉ាណែត បានឡើងកាន់អំណាចជានាយករដ្ឋមន្ត្រីខ្មែរ ក៏ដោយសារមេដឹកនាំវៀតណាមលើកបន្តុបដែរ ដូច្នេះហើយ រដ្ឋាភិបាលរបស់លោក ហ៊ុន ម៉ាណែត ត្រូវតែចាប់ខ្លួនអ្នករិះគន់ជាដាច់ខាតចំពោះពលរដ្ឋខ្មែររូបណាដែលហ៊ានរិះគន់វៀតណាម ដែលជាចៅហ្វាយឪពុករបស់គាត់។
មន្ត្រីជាន់ខ្ពស់អតីតគណបក្សសង្គ្រោះជាតិរូបនេះបញ្ជាក់ថា ស្លឹកឈើពិតជាជ្រុះមិនឆ្ងាយពីគល់មែន លោក ហ៊ុន ម៉ាណែត ចាប់ផ្តើមបង្ហាញពីការដឹកនាំផ្ដាច់ការដូចលោក ហ៊ុន សែន ហើយនៅពេលនេះ គឺចាប់ផ្តើមអនុវត្តវិធានការអំណាចត្រកូលហ៊ុនចាប់ដាក់គុកចំពោះសកម្មជនសង្គម មន្ត្រីបក្សប្រឆាំង និងអ្នករិះគន់រដ្ឋាភិបាលរបស់គាត់ ដែលហ៊ានរិះគន់ជនអន្តោប្រវេសន៍វៀតណាមខុសច្បាប់នៅប្រទេសកម្ពុជានៅពេលនេះ។
លោក កង សារ៉ន ដែលមានម្តាយជរាអាយុ ១០២ឆ្នាំ និងកូនស្រីពិការគថ្លង់ម្នាក់ រស់នៅឃុំពង្រ ស្រុកម៉ាឡៃ ខេត្តបន្ទាយមានជ័យ ត្រូវបានសមត្ថកិច្ចខេត្តបន្ទាយមានជ័យ ចាប់ខ្លួនហើយកាលពីថ្ងៃទី២៦ ខែវិច្ឆិកា ឆ្នាំ២០២៣ បន្ទាប់ពីរូបលោករិះគន់ជនជាតិវៀតណាមដែលចូលមករស់នៅទឹកដីខ្មែរដោយខុសច្បាប់ ជាពិសេសនៅតាមដងទន្លេសាបកន្លងមកតាមដីកាបង្គាប់ពីតុលាការខេត្តបន្ទាយមានជ័យ ដែលចោទប្រកាន់រូបលោកថាបានបង្កការញុះញង់ឱ្យមានភាពវឹកវរដល់សន្តិសុខសង្គម និងកាត់ទោសឱ្យរូបលោកជាប់ពន្ធនាគារដល់ទៅ ៣ឆ្នាំថែមទៀត។
ក្នុងវីដេអូដែលត្រូវបានផ្សព្វផ្សាយលើបណ្ដាញសង្គមហ្វេសប៊ុក កាលពីថ្ងៃអាទិត្យ ទី២៦ វិច្ឆិកា អំឡុងពេលដែលសមត្ថកិច្ចដាក់កម្លាំងចាប់ខ្លួនលោក កង សារ៉ន ជនរងគ្រោះរូបនោះបានគំរាមធ្វើអត្តឃាតដោយប្រើកាំបិតបម្រុងនឹងអារកខ្លួនឯង ប៉ុន្តែត្រូវសមត្ថកិច្ចឃាត់ទាន់ពេល។
ក្នុងវីដេអូនោះ លោក កង សារ៉ន រៀបរាប់ថា សមត្ថកិច្ចខេត្តបន្ទាយមានជ័យ មិនដែលដោះស្រាយបញ្ហាឱ្យរូបគាត់ និងពលរដ្ឋជិត ៣០គ្រួសារ (២៨គ្រួសារ) ក្នុងឃុំពង្រ ស្រុកម៉ាឡៃ ខេត្តបន្ទាយមានជ័យ ដែលរងគ្រោះរឿងដីធ្លីជាង ១៣ហិកតារកន្លងមកទេ ប៉ុន្តែនៅពេលដែលគាត់រិះគន់រឿងជនអន្តោប្រវេសន៍វៀតណាមខុសច្បាប់ ស្រាប់តែអាជ្ញាធរទាំងនេះមកចាប់ខ្លួនលោកទៅវិញ។
កាលពីថ្ងៃទី២៣ ខែវិច្ឆិកា ឆ្នាំ២០២៣ លោក កង សារ៉ន បានរៀបរាប់ថា បន្ទាប់ពីរូបលោករិះគន់ជនជាតិវៀតណាមដែលចូលមករស់នៅទឹកដីខ្មែរដោយខុសច្បាប់ ជាពិសេសនៅតាមដងទន្លេសាបកន្លងមក ស្រាប់តែមានពាក្យបណ្ដឹងប្តឹងរូបលោកតែម្តង ក្នុងនោះ តុលាការក៏បានចោទប្រកាន់រូបលោកថាបានបង្កការញុះញង់ឱ្យមានភាពវឹកវរដល់សន្តិសុខសង្គម និងកាត់ទោសឱ្យរូបលោកជាប់ពន្ធនាគារដល់ទៅ ៣ឆ្នាំផងដែរ។
លោក កង សារ៉ន លើកឡើងថា កាលពីថ្ងៃទី២២ ខែវិច្ឆិកា សមត្ថកិច្ចឃុំពង្រ បាននាំគ្នាមកព័ទ្ធផ្ទះរបស់លោក ក្នុងបំណងចាប់ខ្លួនលោក ប៉ុន្តែពួកគេបានដកកម្លាំងត្រឡប់ទៅវិញដោយមិនដឹងពីមូលហេតុពិតប្រាកដ។
ទាក់ទិននឹងការចាប់ខ្លួនអ្នកដែលរិះគន់ពាក់ព័ន្ធនឹងជនជាតិវៀតណាម នេះ គេសង្កេតឃើញថា សកម្មជនសង្គម សកម្មជននយោបាយ មន្ត្រីបក្សប្រឆាំង ក៏ធ្លាប់ត្រូវបានសមត្ថកិច្ចក្រោមបង្គាប់បក្សកាន់អំណាចលោក ហ៊ុន សែន ចាប់ខ្លួនដាក់ពន្ធនាគារជាបន្តបន្ទាប់ដែរ ដូចជាសកម្មជនសង្គមលោក ធែល ធីលែន ដែលត្រូវបានចាប់ខ្លួនកាលពីអំឡុងឆ្នាំ២០២២ បន្ទាប់ពីបានប្រឆាំងនឹងការផ្តល់ប័ណ្ណស្នាក់នៅអចិន្ត្រៃយ៍ដល់ជនជាតិវៀតណាម។
ចំណែកឯមន្ត្រីជាន់ខ្ពស់គណបក្សកម្លាំងជាតិ លោក រ៉ុង ឈុន ក៏ត្រូវបានសមត្ថកិច្ចចាប់ខ្លួនដាក់ពន្ធនាគារដែរ កាលពីចុងឆ្នាំ២០២០ បន្ទាប់ពីគាត់រិះគន់រឿងព្រំដែនរវាងប្រទេសកម្ពុជា និងវៀតណាម ខណៈលោក សួង សុភ័ណ្ឌ ក៏ត្រូវបានសមត្ថកិច្ចចាប់ខ្លួនដាក់ពន្ធនាគារទាក់ទិននឹងករណីនេះ ប៉ុន្តែក្រោយចេញពីពន្ធនាគារ លោក សួង សុភ័ណ្ឌ ក៏សម្រេចចុះចូលជាមួយបក្សកាន់អំណាច ដោយឡែកតែលោក រ៉ុង ឈុន ដែលនៅតែបន្តជំហរប្រឆាំងដដែល។
ទោះយ៉ាងណាក៏ដោយ លោក រ៉ុង ឈុន នៅតែត្រូវដាក់ឱ្យស្ថិតក្រោមការឃ្លាំមើលរបស់តុលាការដដែលសព្វថ្ងៃនេះ ទោះបីជាលោកមិនត្រូវបានឃុំខ្លួនក្នុងពន្ធនាគារក៏ដោយ។
ជុំវិញបញ្ហានេះ ទិន្នន័យសង្គមស៊ីវិល បង្ហាញថា រាជរដ្ឋាភិបាល និងបុគ្គលមានអំណាចមួយចំនួន តែងតែប្រើប្រាស់យុទ្ធសាស្ត្របណ្ដឹងតាមផ្លូវតុលាការគ្រប់រូបភាព ដើម្បីបំបាត់សំឡេងក្រុមអ្នករិះគន់ និងបំបាក់ទឹកចិត្តក្រុមអ្នកអនុវត្តសិទ្ធិសេរីភាពមូលដ្ឋានដែលមានចែងក្នុងរដ្ឋធម្មនុញ្ញ ហើយដោយសារតែបញ្ហានេះ ទើបបានជាធ្វើឱ្យនីតិរដ្ឋនៅព្រះរាជាណាចក្រកម្ពុជាធ្លាក់ចុះយ៉ាងធ្ងន់ធ្ងរ។
អ្នកវិភាគនយោបាយនិងសង្គម បណ្ឌិត ឡៅ ម៉ុងហៃ រិះគន់កាលពីពេលកន្លងទៅថា រដ្ឋាភិបាលបានធ្វើកំណែទម្រង់ប្រព័ន្ធយុត្តិធម៌ ព្រមទាំងផ្នែកឯទៀតនៃប្រព័ន្ធគ្រប់គ្រងរដ្ឋតាំងពីបង្កើតរដ្ឋធម្មនុញ្ញឆ្នាំ១៩៩៣ មកម្ល៉េះ ប៉ុន្តែការកែទម្រង់នេះធ្វើបានត្រឹមតែសម្បកក្រៅប៉ុណ្ណោះ ព្រោះថាប្រព័ន្ធយុត្តិធម៌ដែលគ្រប់គ្រងដោយរដ្ឋាភិបាលក្រោមការដឹកនាំរបស់គណបក្សប្រជាជនកម្ពុជា នៅតែមិនអាចធានាយុត្តិធម៌ជូនពលរដ្ឋទន់ខ្សោយបាននៅឡើយរហូតដល់ពេលនេះ៕