26 C
Phnom Penh

ក្រុម​តស៊ូ​មតិ៖ ការ​បង្កើត​ក្រុម​ការងារ​ដោះស្រាយ​បណ្ដឹង​របស់​លោក ហ៊ុន ម៉ាណែត ជា​សញ្ញា​គំរាមកំហែង​អំណាច​តុលាការ

ដោយ ឌឹ ខេមបូឌា ដេលី

បទវិភាគ

ក្រុម​អ្នក​តស៊ូ​មតិ លើកឡើង​ថា ការ​បង្កើត​ក្រុម​ការងារ​ចម្រុះ​ទទួល​ដោះស្រាយ​បណ្ដឹង​គ្រប់​មុខ​សញ្ញា​របស់​លោក ហ៊ុន ម៉ាណែត ជា​សញ្ញា​នៃ​ការ​គំរាមកំហែង​លើ​អំណាច​តុលាការ ដែល​ជា​ស្ថាប័ន​ឯករាជ្យ​ក្នុង​ការ​ធានា​អនុវត្ត​នូវ​ប្រព័ន្ធ​យុត្តិធម៌​របស់​កម្ពុជា​យ៉ាង​ធ្ងន់ធ្ងរ។

អនុប្រធាន​វេទិកា​ពលរដ្ឋ​លោក ម៉ែន ណាត ប្រាប់​សារព័ត៌មាន The Cambodia Daily នៅ​ថ្ងៃទី​១ ធ្នូ នេះ​ថា ការ​បង្កើត​ក្រុម​ការងារ​នេះ គឺជា​ការ​គំរាមកំហែង​ដល់​អំណាច​តុលាការ​ដែល​ជា​ស្ថាប័ន​អនុវត្ត​ច្បាប់​យ៉ាង​ខ្លាំង ព្រោះ​កិច្ចការ​ពាក់ព័ន្ធ​នឹង​រឿង​ក្តី​គ្រប់​ប្រភេទ គឺជា​អំណាច​របស់​តុលាការ​តែ​មួយ​មុខ​គត់។ ជាង​នេះ​ទៀត ក៏​មាន​អាជ្ញាធរ​ជាតិ​ដោះស្រាយ​វិវាទ​ក្រៅ​ប្រព័ន្ធ​តុលាការ​ហើយ​ដែរ ដូច្នេះ​គ្មាន​ការ​ចាំបាច់​ណា​ត្រូវ​បង្កើត​ក្រុម​ការងារ​នេះ​ទៀត​ទេ។

លោក ម៉ែន ណាត លើកឡើង​ថា ប្រសិនបើ​ប្រធាន​តុលាការ​ដែល​កំពុង​ស្ថិត​ក្រោម​អំណាច​ក្រុម​គ្រួសារ​លោក ហ៊ុន សែន នៅ​ពេលនេះ​ជា​មនុស្ស​មាន​ឆន្ទៈ​ការពារ​យុត្តិធម៌​ដោយ​ពិតប្រាកដ​ក៏ដោយ ក៏​គ្មាន​ឥទ្ធិពល​អ្វី​ជំទាស់​នឹង​ក្រុម​ការងារ​នេះ​ដែរ ព្រោះ​ថា​លោក ហ៊ុន ម៉ាណែត បាន​តែងតាំង​មេបញ្ជាការ​រង​ផ្នែក​កងទ័ព​ធ្វើ​ជា​ប្រធាន​ក្រុម​របស់​អង្គភាព​នេះ​ទៅ​ហើយ​នោះ។

អនុប្រធាន​វេទិកា​ពលរដ្ឋ​រូប​នេះ​បញ្ជាក់​ថា ការ​ធ្វើ​បែប​នេះ ក៏​ទំនង​ជា​ផែនការ​នយោបាយ​តាម​បែប​កុម្មុយនីស្ត​ដែល​គេ​ចង់​លុប​បំបាត់​អំណាច​តុលាការ ដោយ​ទុក​ឱ្យ​មាន​តែ​ឈ្មោះ​ប៉ុណ្ណោះ ប៉ុន្តែ​គ្មាន​ការងារ​អ្វី​ទាំងអស់ ដើម្បី​បន្លប់​ប្រជាពលរដ្ឋ​ឱ្យ​លែង​រក​យុត្តិធម៌​តាម​ផ្លូវ​តុលាការ​បន្ត​ទៀត ដោយ​ឱ្យ​ងាក​មក​រក​យុត្តិធម៌​ពី​ក្រុម​ការងារ​ដែល​គេ​បង្កើត​នេះ​វិញ។

លោក​បន្ថែម​ថា ប្រសិនបើ​ការ​អនុវត្ត​បែប​នេះ​ទទួល​បាន​ការ​គាំទ្រ​ពី​ប្រជាពលរដ្ឋ​កាន់តែ​ច្រើន​ទៅៗ នោះ​ផែនការ​ក្តោប​ក្តាប់​អំណាច​ផ្ដាច់មុខ​គ្រួសារ​និយម​របស់​លោក ហ៊ុន សែន ក៏​នឹង​កាន់តែ​បន្ត​យូរ​អង្វែង​ទៅ​ថ្ងៃ​មុខ​ដែរ។

អនុក្រឹត្យ​របស់​លោក ហ៊ុន ម៉ាណែត ដែល​បាន​ចុះហត្ថលេខា​កាលពី​ថ្ងៃទី​២៧ ខែ​កញ្ញា ឆ្នាំ​២០២៣ និង​ត្រូវ​បាន​ផ្សព្វផ្សាយ​នៅ​ថ្ងៃ​នេះ បាន​សម្រេច​បង្កើត​ក្រុម​ការងារ​ចម្រុះ​មួយ​ដើម្បី​ទទួល និង​ដោះស្រាយ​បណ្ដឹង​គ្រប់​មុខ​សញ្ញា​នៅ​ភូមិគ្រឹះ​របស់​លោក ហ៊ុន សែន ក្នុង​ក្រុង​តាខ្មៅ ខេត្ត​កណ្តាល។

លោក ហ៊ុន ម៉ាណែត បាន​សម្រេច​តែងតាំង​លោក ហ៊ីង ប៊ុនហៀង ដែល​ជា​អគ្គ​មេបញ្ជាការ​រង​កងយោធពល​ខេមរភូមិន្ទ​ជា​ប្រធាន​នៃ​ក្រុម​ការងារ​នេះ ដែល​មាន​អនុប្រធាន ៤​នាក់ និង​សមាជិក​ចំនួន ២០​នាក់ ដែល​មាន​ភារកិច្ច​ចាំ​ទទួល​ពាក្យ​បណ្តឹង​តវ៉ា​ផ្សេងៗ ដើម្បី​បញ្ជូន​ទៅ​ជំនាញ​ពាក់ព័ន្ធ ឬ​ធ្វើ​របាយការណ៍​ស្នើសុំ​ការ​ណែនាំ​ពី​មេដឹកនាំ​បក្ស​កាន់​អំណាច​លោក ហ៊ុន សែន ផង​ដែរ​ចំពោះ​បណ្តឹង​តវ៉ា​ដែល​បាន​ដាក់​មក​ទាំងនោះ។

ទាក់ទិន​នឹង​បញ្ហា​នេះ ព្រះមហាក្សត្រ​ខ្មែរ​ក៏​ធ្លាប់​បាន​ចេញ​ព្រះរាជក្រឹត្យ​ស្ដីពី​ការ​បង្កើត​អាជ្ញាធរ​ជាតិ​ដោះស្រាយ​វិវាទ​ក្រៅ​ប្រព័ន្ធ​តុលាការ​តាម​សំណើ​របស់​លោក ហ៊ុន ម៉ាណែត ផង​ដែរ​កាលពី​ថ្ងៃទី​២ ខែ​វិច្ឆិកា ឆ្នាំ​២០២៣ កន្លង​ទៅ ក្នុង​បំណង​បន្ថែម​ប្រព័ន្ធ​ដោះស្រាយ​វិវាទ​នៅ​កម្ពុជា ដើម្បី​លើក​កម្ពស់​គុណភាព ប្រសិទ្ធភាព​ការងារ និង​កាត់បន្ថយ​សំណុំរឿង​នៅ​តាម​សាលា​ជម្រះ​ក្តី។

ការ​បង្កើត​អាជ្ញាធរ​ជាតិ​ដោះស្រាយ​វិវាទ​ក្រៅ​ប្រព័ន្ធ​តុលាការ​នេះ បាន​សម្រេច​តែងតាំង​ឧបនាយករដ្ឋមន្ត្រី​កម្ពុជា​លោក នេត សាវឿន ជា​ប្រធាន ចំណែក​រដ្ឋមន្ត្រី រដ្ឋា​លេខាធិការ និង​តំណាង​ក្រសួង​ស្ថាប័ន​នីមួយៗ ត្រូវ​បាន​តែងតាំង​ជា​អនុប្រធាន​ទាំងអស់។

ជុំវិញ​បញ្ហា​នេះ អ្នក​នាំពាក្យ​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា ធ្លាប់​បាន​ប្រាប់​សារព័ត៌មាន The Cambodia Daily កាលពី​ពេល​ថ្មីៗ​នេះ​ថា សង្គម​ស៊ីវិល និង​មជ្ឈដ្ឋាន​នានា ចង់​ឃើញ​ការ​អនុវត្ត​ច្បាប់​ពី​គ្រប់​ភាគី​ទាំងអស់​ឱ្យ​បាន​ហ្មត់ចត់ ដើម្បី​ធានា​ដល់​ប្រព័ន្ធ​យុត្តិធម៌​របស់​កម្ពុជា និង​ជួយ​កាត់បន្ថយ​ភាព​កកស្ទះ​សំណុំរឿង​ក្នុង​ប្រព័ន្ធ​តុលាការ​ឱ្យ​បាន​កាន់តែ​ច្រើន ដែល​នឹង​ជួយ​ឱ្យ​សំណុំរឿង​របស់​ប្រជាពលរដ្ឋ​ដែល​បាន​អូស​បន្លាយ​កន្លង​មក ទទួល​បាន​យុត្តិធម៌​ឱ្យ​បាន​ឆាប់។

លោក ស៊ឹង សែនករុណា បញ្ជាក់​ថា ការ​បង្កើត​អង្គភាព ឬ​ស្ថាប័ន ឬ​ក្រុម​ការងារ​ដោះស្រាយ​វិវាទ ក្រៅពី​ចំណុច​វិជ្ជមាន ក៏​មាន​ចំណុច​គួរ​ឱ្យ​ប្រុងប្រយ័ត្ន​ដែរ ដែល​ជា​ការ​ព្រួយបារម្ភ​ពី​ការ​រំលោភ​អំណាច​ពី​ស្ថាប័ន​នីតិប្រតិបត្តិ​លើ​ការ​អនុវត្ត​ច្បាប់​របស់​ស្ថាប័ន​តុលាការ ចំពោះ​សំណុំរឿង​ខ្លះ​ដែល​ត្រូវ​ដោះស្រាយ​នោះ។

លោក​បន្ថែម​ថា ផ្ទុយទៅវិញ បើ​ការ​បង្កើត​ស្ថាប័ន​ទាំងនេះ​ដើម្បី​តែ​ល្អ​មើល​វិញ​នោះ គឺ​មិន​ខុស​អ្វី​ពី​ការ​រិះគន់​លើ​ការ​អនុវត្ត​ច្បាប់​ក្នុង​ការ​កាត់​ក្តី​លើ​សំណុំរឿង​តាម​ផ្លូវ​តុលាការ​កន្លង​មក​នោះ​ទេ ហើយ​ថែមទាំង​ធ្វើ​ឱ្យ​ប្រជាពលរដ្ឋ​កាន់តែ​អស់​ជំនឿ​ថែម​ទៀត៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស