លោកនាយករដ្ឋមន្ត្រី ហ៊ុន ម៉ាណែត ចេញដំណើរទៅបំពេញទស្សនកិច្ចផ្លូវការនៅប្រទេសវៀតណាម រយៈពេលពីរថ្ងៃ គឺថ្ងៃទី១១ និងថ្ងៃទី១២ ខែធ្នូ ឆ្នាំ២០២៣ តាមការអញ្ជើញរបស់លោក ផាម មិញជីញ (Pham Minh Chinh) នាយករដ្ឋមន្ត្រីវៀតណាម ដើម្បីជួបប្រជុំទ្វេភាគីលើវិស័យជាច្រើន ដូចជា វិស័យអប់រំ ពាណិជ្ជកម្ម វិនិយោគ ការតភ្ជាប់ ទេសចរណ៍ វប្បធម៌ សន្តិសុខ ការពារជាតិ និងកិច្ចការព្រំដែន។
តាមសេចក្តីប្រកាសព័ត៌មានរបស់ក្រសួងការបរទេស បានឲ្យដឹងថា ក្នុងដំណើរទស្សនកិច្ចផ្លូវការពីរថ្ងៃនៅប្រទេសជិតខាងមួយនេះ ប្រតិភូដែលអមដំណើរប្រមុខរដ្ឋាភិបាល រួមមាន លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា លោកឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីការបរទេស និងសហប្រតិបត្តិការអន្តរជាតិ រដ្ឋមន្ត្រី និងមន្ត្រីសំខាន់ៗនៃរាជរដ្ឋាភិបាល ព្រមទាំងថ្នាក់ដឹកនាំវិស័យឯកជននៃសភាពាណិជ្ជកម្មកម្ពុជា។
សេចក្តីប្រកាសព័ត៌មានដដែលបានលើកឡើងថា លោក ហ៊ុន ម៉ាណែត និងលោកនាយករដ្ឋមន្ត្រី ផាម មិញជីញ នឹងជួបប្រជុំទ្វេភាគីបន្ថែមទៀតនូវកិច្ចសហប្រតិបត្តិការលើវិស័យជាច្រើន ដូចជា អប់រំ ពាណិជ្ជកម្ម វិនិយោគ ការតភ្ជាប់ ទេសចរណ៍ វប្បធម៌ សន្តិសុខ ការពារជាតិ និងកិច្ចការព្រំដែន។
មេដឹកនាំទាំងពីរក៏នឹងពិភាក្សាគ្នាផងដែរអំពីបញ្ហាអនុតំបន់ តំបន់ និងអន្តរជាតិ មុននឹងធ្វើជាសាក្សីក្នុងពិធីចុះហត្ថលេខាលើឯកសារកិច្ចព្រមព្រៀងមួយចំនួន និងធ្វើជាសហអធិបតីក្នុងវេទិកាកម្ពុជា-វៀតណាម ស្ដីពីការជំរុញពាណិជ្ជកម្ម និងវិនិយោគ។
លោក ហ៊ុន ម៉ាណែត ដែលទើបទទួលបានការតែងតាំងជាអនុប្រធានគណបក្សប្រជាជនកម្ពុជា នឹងចូលជួបសម្ដែងការគួរសមជាមួយលោក ង្វៀន ហ៊្វូចុង (Nguyen Phu Trong) អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តវៀតណាម លោក វ៉ វ៉ាន់ធឿង (Vo Van Thuong) ប្រធានរដ្ឋវៀតណាម និងលោក វឿង ឌិញហ្វេ (Vuong Dinh Hue) ប្រធានរដ្ឋសភាវៀតណាម។
ប្រភពដដែលបានលើកឡើងថា លោក ហ៊ុន ម៉ាណែត ក៏អនុញ្ញាតឱ្យលោកស្រី ង្វៀន ធីថាញ់ (Nguyen Thi Thanh) ប្រធានសមាគមមិត្តភាពកម្ពុជា-វៀតណាម ព្រមទាំងថ្នាក់ដឹកនាំសម្ព័ន្ធយុវជនកុម្មុយនីស្តហូជីមិញ ចូលជួបសម្ដែងការគួរសម និងពិភាក្សាការងារផងដែរ។
លោក ហ៊ុន ម៉ាណែត នឹងថ្លែងសុន្ទរកថាគន្លឹះស្ដីពីគោលនយោបាយអភិវឌ្ឍន៍សេដ្ឋកិច្ចរបស់រាជរដ្ឋាភិបាលកម្ពុជា និងទំនាក់ទំនងសេដ្ឋកិច្ចរវាងកម្ពុជា និងវៀតណាម នៅសាកលវិទ្យាល័យពាណិជ្ជកម្មអន្តរជាតិ នៅទីក្រុងហាណូយ។
ឯកអគ្គរដ្ឋទូតវៀតណាម លោក ង្វៀន ហ៊ុយ តាំង បានលើកឡើងក្នុងកិច្ចពិភាក្សាជាមួយនាយករដ្ឋមន្ត្រីបន្តពូជថ្មីរបស់កម្ពុជា លោក ហ៊ុន ម៉ាណែត កាលពីខែតុលា ឆ្នាំ២០២៣ ថា រដ្ឋាភិបាលវៀតណាម នឹងបន្តពង្រីកកិច្ចសហប្រតិបត្តិការនានាដែលមានស្រាប់នៅគ្រប់កម្រិតជាមួយកម្ពុជាទៅថ្ងៃមុខបន្តទៀត។
ឯកអគ្គរដ្ឋទូតវៀតណាម ប្រចាំកម្ពុជារូបនេះបញ្ជាក់ថា កិច្ចសហប្រតិបត្តិការដែលរដ្ឋាភិបាលវៀតណាម ផ្ដោតសំខាន់បំផុតនោះ គឺវិស័យពាណិជ្ជកម្ម វិស័យទេសចរណ៍ វិស័យការពារជាតិ និងសន្តិសុខផងដែរជាមួយនឹងកម្ពុជា ក្នុងនោះ វៀតណាមក៏នឹងបន្តសម្លឹងមើលវិស័យសក្ដានុពលថ្មីៗបន្ថែមទៀត ដើម្បីធ្វើកិច្ចសហប្រតិបត្តិការជាមួយកម្ពុជាបន្ថែមទៀត។
អតីតអ្នកទោសនយោបាយ និងជាមន្ត្រីជាន់ខ្ពស់អតីតគណបក្សសង្គ្រោះជាតិលោក មាជ សុវណ្ណារ៉ា ប្រាប់សារព័ត៌មាន The Cambodia Daily កន្លងមកថា ការធ្វើកិច្ចសហប្រតិបត្តិការជាមួយប្រទេសជិតខាង មិនមែនជារឿងអាក្រក់ទេ ប៉ុន្តែបញ្ហានៅត្រង់ថា តើរដ្ឋាភិបាលកម្ពុជាដែលកំពុងដឹកនាំដោយគណបក្សប្រជាជនកម្ពុជាសព្វថ្ងៃនេះ មានសមត្ថភាពក្នុងការធ្វើកិច្ចសហប្រតិបត្តិការនេះដើម្បីរកផលប្រយោជន៍ឱ្យប្រជាពលរដ្ឋខ្មែរ ឬក៏អត់ប៉ុណ្ណោះ។
លោក មាជ សុវណ្ណារ៉ា លើកឡើងថា បើកិច្ចសហប្រតិបត្តិការទាក់ទងនឹងសេដ្ឋកិច្ចពាណិជ្ជកម្ម កម្ពុជាបានបង្ហូរលុយឱ្យវៀតណាមរាប់ពាន់លានដុល្លារអាមេរិកក្នុងមួយឆ្នាំៗ ព្រោះថាកម្ពុជាបាននាំចូលនូវសម្ភារៈកសិកម្មគ្រប់ប្រភេទទាំងអស់ពីប្រទេសវៀតណាម ដូចជា ពូជស្រូវ ពូជដំណាំ ថ្នាំសម្លាប់សត្វល្អិត ជីគ្រប់ប្រភេទ ប្រភេទកាណូតស្មាច់ ម៉ាស៊ីនបូមទឹក និងសម្ភារៈកសិកម្មជាច្រើនផ្សេងទៀត ដែលមានន័យថា កម្ពុជាបានពឹងផ្អែកទាំងស្រុងទៅលើវៀតណាមរហូតមក។
លោកបន្ថែមថា ប្រទេសកម្ពុជាបានចាត់ទុកវិស័យកសិកម្មជាវិស័យអាទិភាពរបស់ខ្លួន ប៉ុន្តែកម្ពុជាគ្មានផែនការបង្កើតរោងចក្រសម្រាប់ផ្គត់ផ្គង់កសិកម្មដោយខ្លួនឯងទាល់តែសោះ គឺពឹងតែលើវៀតណាមសុទ្ធសាធ ក្នុងនោះ រាល់ពេលដែលចាប់ផ្តើមធ្វើកសិកម្ម កសិករខ្មែរនាំគ្នាសម្រុកទិញសម្ភារៈកសិកម្មពីវៀតណាមរាល់ឆ្នាំ ប៉ុន្តែនៅពេលប្រមូលផល ឈ្មួញវៀតណាមនាំគ្នាសម្រុកមកទិញស្រូវពីពលរដ្ឋខ្មែរអស់ពីប្រទេស ខណៈតម្លៃស្រូវត្រូវឈ្មួញវៀតណាមកំណត់តាមអំពើចិត្ត៕