កូរ៉េខាងជើង បាញ់មីស៊ីលផ្លោងអន្តរទ្វីបបាលិស្ទិច ICBM ដ៏ទំនើបចុងក្រោយបំផុត នៅព្រឹកថ្ងៃចន្ទ ទី១៨ ខែធ្នូ នេះ ដោយបាញ់ចេញពីតំបន់មួយក្នុងទីក្រុងព្យុងយ៉ាង។
ក្រសួងការពារជាតិប្រទេសកូរ៉េខាងត្បូង និងជប៉ុន បានប្រកាសថា គ្រាប់មីស៊ីលផ្លោងអន្តរទ្វីបបាលិស្ទិចរបស់កូរ៉េខាងជើង រត់បានចម្ងាយ ១ពាន់គីឡូម៉ែត្រក្នុងរយៈពេល ៧២នាទី មុននឹងធ្លាក់នៅភាគខាងលិចកោះហុកកៃដូ របស់ជប៉ុន។
ក្រសួងការពារជាតិជប៉ុន សន្និដ្ឋានថា មីស៊ីលផ្លោងអន្តរទ្វីបបាលិស្ទិចរបស់កូរ៉េខាងជើង អាចហោះចម្ងាយ ១៥០០០គីឡូម៉ែត្រ ដែលវាអាចទៅដល់ទឹកដីសហរដ្ឋអាមេរិកគ្រប់រដ្ឋទាំងអស់ដោយងាយបំផុត។
ការបាញ់មីស៊ីលផ្លោង ICBM នេះ តែជាង ១២ម៉ោងប៉ុណ្ណោះបន្ទាប់ពីរដ្ឋកុម្មុយនីស្តមួយនេះបានបាញ់មីស៊ីលបាលិស្ទិចរយៈខ្លីកាលពីយប់អាទិត្យ ទី១៧ ធ្នូ។ នេះបើតាមការចុះផ្សាយរបស់សារព័ត៌មាននៃគេហទំព័រសារព័ត៌មាន The Times of Israel នៅចន្ទ ទី១៨ ខែធ្នូ។
កូរ៉េខាងជើង បានបាញ់មីស៊ីលផ្លោងអន្តរទ្វីបបាលិស្ទិច ICBM ពីរដងហើយកាលពីខែមេសា និងខែកក្កដា ឆ្នាំ២០២៣ នេះ។
ទោះទីក្រុងព្យុងយ៉ាង នៅមិនទាន់ចេញមុខមកបញ្ជាក់ពីប្រភេទមីស៊ីលដែលខ្លួនបាញ់នៅថ្ងៃនេះ ប៉ុន្តែកូរ៉េខាងត្បូង ជឿថា មីស៊ីលដែលកូរ៉េខាងជើងបាញ់សាកល្បងនៅថ្ងៃនេះ ជាប្រភេទមីស៊ីលផ្លោងអន្តរទ្វីបបាលិស្ទិច ICBM ដ៏ទំនើបបំផុត។
ស្របពេលជាមួយគ្នានេះ ជប៉ុន កូរ៉េខាងត្បូង និងសហរដ្ឋអាមេរិក បានថ្កោលទោសកូរ៉េខាងជើងភ្លាមៗដែលបាញ់មីស៊ីលផ្លោងអន្តរទ្វីបនេះ ព្រោះតែវារំលោភសេចក្តីសម្រេចចិត្តរបស់ក្រុមប្រឹក្សាសន្តិសុខរបស់អង្គការសហប្រជាជាតិ ដែលហាមប្រទេសផ្ដាច់ការមួយនេះសាកល្បងអាវុធប្រភេទនេះ។
ប្រធានាធិបតីកូរ៉េខាងត្បូង លោក យុន សុខយូល ភ្លាមៗបានបញ្ជាឲ្យមានការឆ្លើយតបទៅនឹងសកម្មភាពញុះញង់របស់កូរ៉េខាងជើង។ ចំណែកនាយករដ្ឋមន្ត្រីជប៉ុន ថ្កោលទោសដោយហៅការរំលោភរបស់កូរ៉េខាងជើង ថាជាការគំរាមកំហែងសន្តិភាព និងបង្កអស្ថិរភាពក្នុងតំបន់។
កូរ៉េខាងជើងបានបាញ់មីស៊ីលបាលិស្ទិចរយៈចម្ងាយឆ្ងាយជាថ្មីទៀតនេះ បន្ទាប់ពីសេតវិមានព្រមានថា ការវាយប្រហារដោយអាវុធនុយក្លេអ៊ែររបស់កូរ៉េខាងជើង លើសហរដ្ឋអាមេរិក និងសម្ព័ន្ធមិត្តរបស់សហរដ្ឋអាមេរិក គឺជាថ្ងៃអវសាននៃរបបផ្ដាច់ការនៅក្រុងព្យុងយ៉ាង។
កូរ៉េខាងជើងបានបាញ់មីស៊ីល ICBM មួយថ្ងៃបន្ទាប់ពីនាវាមុជទឹករបស់សហរដ្ឋអាមេរិកមួយគ្រឿងទៀតបានទៅដល់សមុទ្រកូរ៉េខាងត្បូង។
តាមអ្នកជំនាញយោធា និងចារកម្មរបស់កូរ៉េខាងត្បូង ខណៈនេះកូរ៉េខាងជើងកំពុងសម្រុកអភិវឌ្ឍកម្មវិធីផលិតមីស៊ីលបាលិស្ទិច ក្រោយប្រកាសខ្លួនថាជាប្រទេសមហាអំណាចនុយក្លេអ៊ែរ។
កាលពីថ្ងៃសុក្រសប្ដាហ៍មុន សហរដ្ឋអាមេរិក និងកូរ៉េខាងត្បូង បានព្រមព្រៀងគ្នាថា នឹងប្រើប្រាស់អាវុធដែលមានសមត្ថភាពបំពាក់ក្បាលគ្រាប់នុយក្លេអ៊ែរនៅក្នុងការធ្វើសមយុទ្ធរួមនៅខែកក្កដា នៅឆ្នាំក្រោយ ដែលនាំឱ្យក្រុងព្យុងយ៉ាង ប្រតិកម្មជាខ្លាំង ហើយក៏ឈានដល់ការបាញ់មីស៊ីលផ្លោង ICBM។
ស្របពេលកូរ៉េខាងត្បូង ជប៉ុន និងសហរដ្ឋអាមេរិក ថ្កោលទោសកូរ៉េខាងជើង រដ្ឋមន្ត្រីការបរទេសចិន លោក វ៉ាង យី បង្ហាញការគាំទ្ររបបព្យុងយ៉ាង ដោយមិននិយាយដល់ការបាញ់មីស៊ីលរបស់កូរ៉េខាងជើង ឡើយ។
លោក វ៉ាង យី ប្រាប់លោក Pak Myong Ho អនុរដ្ឋមន្ត្រីកូរ៉េខាងជើង នៅទីក្រុងប៉េកាំង ថា នៅក្នុងកាលៈទេសៈដែលពិភពលោកកំពុងជួបវិបត្តិនេះ ចិននៅតែបន្តគាំទ្រក្រុងព្យុងយ៉ាង ជានិច្ច។
ក្រុមអ្នកជំនាញសហរដ្ឋអាមេរិក និងកូរ៉េខាងត្បូង សង្ស័យថា កូរ៉េខាងជើងអាចនឹងបាញ់សាកល្បងគ្រាប់បែកនុយក្លេអ៊ែរមួយគ្រាប់ទៀត ដែលអាចធ្វើឡើងនៅចុងខែធ្នូ ឬនៅថ្ងៃទី១ មករា ជាថ្ងៃបុណ្យឆ្លងឆ្នាំសកលចូលឆ្នាំ២០២៤។ តែសហរដ្ឋអាមេរិក ព្រមានថា បើកូរ៉េខាងជើង បាញ់គ្រាប់នុយក្លេអ៊ែរ គឺរបបក្រុងព្យុងយ៉ាង កាន់តែទៅរកក្ដីវិនាសហើយ៕