តំណាងរាស្ត្រអតីតគណបក្សសង្គ្រោះជាតិ លើកឡើងថា នាយករដ្ឋមន្ត្រីខ្មែរដែលកើតចេញពីការបោះឆ្នោតក្លែងក្លាយបន្តអំណាចពីឪពុកលោក ហ៊ុន ម៉ាណែត កំពុងរៀបចំការគ្រប់គ្រងអំណាចជាប្រព័ន្ធក្នុងរង្វង់គ្រួសាររបស់ខ្លួនឱ្យកាន់តែចាក់ជ្រៅ និងមានអំណាចកាន់តែរឹងមាំបន្ថែមទៀតក្នុងការក្តោបក្តាប់ទឹកដីខ្មែរដោយផ្ដាច់មុខ។
លោក អ៊ុំ សំអាន បានសរសេរលើទំព័រហ្វេសប៊ុករបស់លោកនៅថ្ងៃទី១៦ កុម្ភៈ នេះថា លោក ហ៊ុន ម៉ាណែត ដែលជាបងកាន់តំណែងក្នុងជួររដ្ឋាភិបាលជានាយករដ្ឋមន្ត្រី និងក្នុងគណបក្សប្រជាជនកម្ពុជា គឺជាអនុប្រធានបក្ស ចំណែកលោក ហ៊ុន ម៉ានិត ជាប្អូនត្រូវបានតែងតាំងជាមេបញ្ជាការរងកងទ័ពជើងគោកនៅក្នុងជួររដ្ឋាភិបាល និងជាសមាជិកគណៈកម្មាធិការកណ្តាលក្នុងជួរគណបក្សប្រជាជនកម្ពុជា។ រីឯលោក ហ៊ុន ម៉ានី ដែលជាត្រូវជាប្អូនប្រុសរបស់លោក ហ៊ុន ម៉ាណែត ម្នាក់ទៀតដែរនោះ ត្រូវបានតែងតាំងជារដ្ឋមន្ត្រីក្រសួងមុខងារសាធារណៈ និងប្រធានគណៈកម្មការទី៧ នៃរដ្ឋសភាក្នុងជួររដ្ឋាភិបាល ប៉ុន្តែបានស្នើសុំតែងតាំងជាឧបនាយករដ្ឋមន្ត្រីបន្ថែមទៀត ខណៈតំណែងក្នុងជួរគណបក្ស គឺជាសមាជិកគណៈកម្មាធិការកណ្តាលដែលមានតួនាទីជាប្រធានសហភាពសហព័ន្ធយុវជនកម្ពុជា (ស.ស.យ.ក)។
លោក អ៊ុំ សំអាន អះអាងថា ត្រកូលហ៊ុននឹងមានអំណាចកាន់តែរឹងមាំទាំងនៅក្នុងបក្ស និងក្នុងជួររដ្ឋាភិបាលរបស់ប្រទេសកម្ពុជា។
តំណាងរាស្ត្របក្សប្រឆាំងរូបនេះបញ្ជាក់ថា ការរក្សាអំណាចប្រមូលផ្ដុំក្នុងដៃត្រកូលហ៊ុនដូច្នេះ គឺមានន័យថា ប្រទេសកម្ពុជាក៏នឹងលែងជាកម្មសិទ្ធិរបស់ប្រជារាស្ត្រខ្មែរដូចមានចែងក្នុងរដ្ឋធម្មនុញ្ញទៀតដែរ ហើយក៏មិនមែនជាកម្មសិទ្ធិរបស់គណបក្សប្រជាជនកម្ពុជាដែរ ប៉ុន្តែប្រទេសក្រីក្រដ៏តូចកម្សត់មួយនេះ កំពុងក្លាយជាកម្មសិទ្ធិផ្ដាច់មុខរបស់គ្រួសារត្រកូលហ៊ុនតែមួយគត់ ចំណែកវាសនារបស់ពលរដ្ឋខ្មែរទាំងមូលដែលស្ថិតក្រោមការគ្រប់គ្រងរបស់វង្សត្រកូលមួយនេះ ក៏ដូចគ្នាទៅនឹងការគ្រប់គ្រងក្រោមរបបខ្មែរក្រហមដូច្នោះដែរ។
ការអះអាងនេះ ធ្វើឡើងស្របពេលដែលគេមើលឃើញថា ក្រុមគ្រួសារត្រកូលហ៊ុនរបស់លោក ហ៊ុន សែន កំពុងចងក្រងអំណាចកាន់តែជ្រៅទៅៗក្នុងការក្តោបក្តាប់ប្រទេសកម្ពុជាទាំងមូលធ្វើជាកម្មសិទ្ធិផ្ដាច់មុខរបស់ខ្លួនសព្វថ្ងៃនេះ។
មាត្រា១ នៃរដ្ឋធម្មនុញ្ញចែងថា កម្ពុជាជាព្រះរាជាណាចក្រដែលប្រតិបត្តិតាមលទ្ធិប្រជាធិបតេយ្យ សេរីពហុបក្ស ប៉ុន្តែកម្ពុជាដែលស្ថិតក្រោមការត្រួតត្រាអស់រយៈពេលជាង ៤០ឆ្នាំរបស់លោក ហ៊ុន សែន ត្រូវគេមើលឃើញថា ដែនដីសុវណ្ណភូមិមួយនេះកំពុងធ្លាក់ទៅក្នុងការគ្រប់គ្រងតាមបែបគ្រួសារនិយមដូចប្រទេសកុម្មុយនីស្តផ្ដាច់ការទៅហើយ។
ជុំវិញបញ្ហានេះ ទិន្នន័យសង្គមស៊ីវិលបង្ហាញថា ក្រុមគ្រួសារលោក ហ៊ុន សែន សព្វថ្ងៃនេះបានបែងចែកគ្នាកាន់តួនាទីធំៗក្នុងជួររដ្ឋាភិបាល និងនៅក្នុងគណបក្សប្រជាជនកម្ពុជាពេញដៃ ក្នុងនោះ លោក ហ៊ុន សែន កាន់តំណែងជាប្រធានគណបក្សផង ជាប្រធានឧត្ដមក្រុមប្រឹក្សាព្រះមហាក្សត្រផង នឹងគ្រោងធ្វើជាប្រធានព្រឹទ្ធសភាផង។
សមាគមអ្នកសារព័ត៌មានកម្ពុជា ខេមបូចា បានលាតត្រដាងក្នុងរបាយការណ៍ស៊ើបអង្កេតរបស់ខ្លួនកាលពីពេលកន្លងទៅថា ពួកគេបានរកឃើញសែស្រឡាយបក្ខពួករបស់លោក ហ៊ុន សែន ជាច្រើននាក់តាមរយៈបញ្ជីឈ្មោះបេក្ខជនតំណាងរាស្ត្ររបស់គណបក្សប្រជាជនកម្ពុជាដែលមានរហូតដល់ទៅជិត ១ភាគ៤ ដែលត្រូវបានដាក់ឱ្យឈរឈ្មោះជាបេក្ខជនតំណាងរាស្ត្រសម្រាប់ចូលទៅកាន់រដ្ឋាភិបាលថ្មីអាណត្តិទី៧ នេះ។
ក្រុមអ្នកសង្កេតការណ៍លើកឡើងថា កម្ពុជានៅពេលនេះប្រៀបដូចជាក្រុមហ៊ុនឯកជនមួយរបស់គ្រួសារអ្នកមានអំណាចអ៊ីចឹងដែរ ព្រោះពួកគេបានដោះដូរ និងតែងតាំងកូនៗរបស់ពួកគេឱ្យជំនួសតំណែងខ្លួនតាមអំពើចិត្ត ខណៈម្ចាស់ប្រទេសត្រូវរស់នៅក្រោមការគាបសង្កត់ និងរងនូវការភ័យខ្លាច និងភាពអត់ឃ្លានគ្រប់ពេលវេលា៕