28 C
Phnom Penh

រដ្ឋបាល​ក្រុង​សំពៅលូន​ថា​វៀតណាម​បោះតង់​ក្នុង​សាលា​និង​វត្ត ដើម្បី​រក​អដ្ឋិ​ទាហាន​ស្លាប់​ក្នុង​ស្រុក​ខ្មែរ

ដោយ ឌឹ ខេមបូឌា ដេលី

បទវិភាគ

រដ្ឋបាល​ក្រុង​សំពៅលូន ខេត្ត​កណ្ដាល អះអាង​ថា ទ័ព​វៀតណាម ដែល​បាន​បោះតង់​ក្នុង​បរិវេណ​សាលា​បឋមសិក្សា​កោះទៀវ និង​វត្ត​កោះទៀវ ស្ថិត​នៅ​ក្នុង​ភូមិ​កោះទៀវ សង្កាត់​សំពៅលូន គឺ​ដើម្បី​រក​អដ្ឋិ ឬ​ឆ្អឹង​សព​ទាហាន​យៀកណាម ដែល​គ្រោង​នឹង​បញ្ចប់​សកម្មភាព​នៅ​ថ្ងៃទី​២០ ខែ​កក្កដា ឆ្នាំ​២០២៤ ខាងមុខ​នេះ។

យោង​តាម​សេចក្ដី​បំភ្លឺ​ព័ត៌មាន​ពី​រដ្ឋបាល​ក្រុង​សំពៅលូន ចេញ​ផ្សាយ​ថ្ងៃទី​៤ មីនា គេ​បាន​បញ្ជាក់​ថា ទាហាន​វៀតណាម ដែល​ចូល​មក​តំបន់​នោះ គឺ​មាន​ការ​ព្រមព្រៀង​គ្នា​តាម​ការ​អនុវត្ត​កំណត់ហេតុ​កិច្ច​សហប្រតិបត្តិការ​ស្ដីពី​ផែនការ​បន្ត​ស្រាវជ្រាវ រុករក ជីក​លើក​អដ្ឋិ​កងទ័ព​ស្ម័គ្រចិត្ត និង​ជំនាញការ​វៀតណាម ជំហាន​ទី​២៣ រដូវ​ប្រាំង​ឆ្នាំ​២០២៣-២០២៤ រវាង​គណៈប្រតិភូ​គណៈកម្មាធិការ​ថ្នាក់​ជាតិ​វៀតណាម និង​គណៈប្រតិភូ​គណៈកម្មាធិការ​កម្ពុជា។ ការ​ឯកភាព​គ្នា​នេះ បាន​ចុះហត្ថលេខា​តាំងពី​ថ្ងៃទី​១១ ខែ​តុលា ឆ្នាំ​២០២៣។

ប្រភព​ដដែល​អះអាង​ថា ការ​បកស្រាយ​នេះ ធ្វើឡើង​ក្រោយពី​អាជ្ញាធរ​ពិនិត្យ​ឃើញ​មាន​ការ​ចែកចាយ​ព័ត៌មាន​លើ​បណ្ដាញ​សង្គម​ថា មាន​កងទ័ព​វៀតណាម បាន​បោះតង់​នៅ​ខេត្ត​កណ្ដាល ក្នុង​បរិវេណ​សាលា​បឋមសិក្សា​កោះទៀវ និង​វត្ត​កោះទៀវ នៅ​ភូមិ​កោះទៀវ សង្កាត់​សំពៅលូន។

បើ​តាម​រដ្ឋបាល​ក្រុង​សំពៅលូន ការ​ជីក​លើក​អដ្ឋិ​នេះ​ចាប់ផ្តើម​ពី​ថ្ងៃទី​១៩ ខែ​កុម្ភៈ ឆ្នាំ​២០២៤ ដល់​ថ្ងៃទី​២០ ខែ​កក្កដា ឆ្នាំ​២០២៤។ ក្រោយពី​ការ​បំពេញ​ភារកិច្ច​បញ្ចប់ ក្រុម K90 វៀតណាម នឹង​ចាកចេញ​ពី​ភូមិសាស្ត្រ​ទឹកដី​កម្ពុជា ត្រឡប់​ចូល​ប្រទេស​វៀតណាម​វិញ​តាម​ច្រក​ទ្វារ​អន្តរជាតិ​ជ្រៃធំ ដូច្នេះ​រដ្ឋបាល​ក្រុង​សំពៅលូន បាន​អំពាវនាវ​ទៅ​មហាជន​កុំ​ឱ្យ​មាន​ការ​ភាន់ច្រឡំ។

រដ្ឋបាល​ក្រុង​សំពៅលូន បាន​បញ្ជាក់​ថា កងកម្លាំង​តំបន់​ប្រតិបត្តិការ​សឹក​រង​កណ្តាល យោធា​ភូមិភាគ​ពិសេស បាន​សហការ​ជាមួយ​ក្រុម K90 ភាគី​វៀតណាម ចុះ​ស្រាវជ្រាវ រុករក ជីក​លើក​អដ្ឋិ​កងទ័ព​ស្ម័គ្រចិត្ត និង​ជំនាញការ​វៀតណាម ដែល​បាន​បាត់បង់​ជីវិត​ក្នុង​សម័យ​សង្គ្រាម​កន្លង​មក​នៅ​ភូមិសាស្ត្រ​ក្រុង​សំពៅពូន។

កាលពី​ថ្ងៃទី​៣ ខែ​មីនា ឆ្នាំ​២០២៤ ម្ចាស់​គណនេយ្យ​ហ្វេសប៊ុក​ឈ្មោះ Prince Sisowath Sithiden បាន​បង្ហោះ​សារ​ដោយ​ភ្ជាប់​ជាមួយ​រូបថត​ជនជាតិ​វៀតណាម បោះតង់​ដោយ​ចោទ​ជា​សំណួរ​ថា ជា​ដំបូង លោក​សូម​អភ័យទោស​ដល់​ថ្នាក់ដឹកនាំ​គ្រប់​ជាន់ថ្នាក់​នៅ​ឃុំ​សំពៅពូន បើ​សិន​លោក​និយាយ​ទៅ​មាន​ការ​លើសលួស​ខ្វះខាត​ដោយ​ប្រការ​ណា​មួយ ដោយ​ហេតុ​លោក​នៅ​ឆ្ងាយ និង​មិន​ដឹង​សួរ​អ្នក​ណា។

ប្រភព​ដដែល​លើកឡើង​ថា លោក​មាន​សំណួរ​ចង់​សួរ​ថា តើ​ទាហាន​វៀតណាម​មក​បោះតង់​ក្នុង​បរិវេណ​សាលា និង​វត្ត​កោះទៀវ តើ​ភូមិ​ឃុំ​ដឹង​ឮ​ទេ? ហើយ​មក​ក្នុង​គោលបំណង​អ្វី? លោក​មាន​សំណួរ​តែ​ប៉ុណ្ណឹង​ទេ បើ​ខុស​ឆ្គង សូម​ថ្នាក់​ដឹកនាំ​យោគយល់​ដោយ​ក្តី​អនុគ្រោះ។

ប្រធាន​ក្រុម​បច្ចេកទេស​ជីក​រុករក​អដ្ឋិ​ទាហាន​កងទ័ព​វៀតណាម K72 ខេត្ត​ប៊ិញភឿក យោធភូមិភាគ​ទី​៧ នៃ​កងទ័ព​ប្រជាជន​វៀតណាម លោក​វរសេនីយ៍ឯក ង្វៀន ង៉ុកអាញ់ បាន​រាយការណ៍​កន្លង​មក​ថា សរុប​ក្នុង​រយៈពេល ២០​ឆ្នាំ​កន្លង​មក ចាប់ពី​ឆ្នាំ​២០០៣ ដល់​ឆ្នាំ​២០២៣ ក្រុម​ការងារ​បច្ចេកទេស K70 និង K72 ជីក​គាស់​យក​បាន​ចំនួន ១១៥២​អដ្ឋិ​រួច​មក​ហើយ ចំពោះ​ចំនួន​អដ្ឋិ​ដែល​នៅ​សេសសល់​មួយ​ចំនួន​ទៀត កំពុង​ធ្វើការ​ស្រាវជ្រាវ​ដើម្បី​ជីក​គាស់​លើក និង​ធ្វើ​មាតុភូមិ​និវត្តន៍​ជា​បន្ត​ទៅ​ទៀត​នៅ​ពេល​ខាងមុខ។

ប្រតិបត្តិ​ការរុករក​អដ្ឋិ​ទាហាន​កងទ័ព​វៀតណាម ត្រូវ​បាន​ធ្វើ​ឡើង​ជា​រៀងរាល់​រដូវ​ប្រាំង តាំងពី​ឆ្នាំ​២០០០ តាម​កិច្ចព្រមព្រៀង​រវាង​ប្រទេស​កម្ពុជា និង​ប្រទេស​វៀតណាម។ ភាគី​វៀតណាម ជឿ​ថា​មាន​ទាហាន​របស់​ខ្លួន​ចំនួន​ប្រមាណ​ជាង ២​ម៉ឺន​នាក់​បាន​បាត់បង់​ជីវិត​ក្នុង​សង្គ្រាម​នៅ​ក្នុង​ប្រទេស​កម្ពុជា ពិសេស​ក្នុង​ពេល​កងទ័ព​វៀតណាម វាយ​លុកលុយ​ឈ្លានពាន ហើយ​ផ្ដួល​រំលំ​របប​ខ្មែរក្រហម​រហូត​បាន​ជ័យជម្នះ​ថ្ងៃទី​៧ ខែ​មករា ឆ្នាំ​១៩៧៩៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស