29 C
Phnom Penh

តុលាការ​ខេត្ត​កំពង់ធំ​កោះហៅ​ប្រធាន​បក្ស​កម្លាំង​ជាតិ​ចូល​បំភ្លឺ​ករណី​រង​ការ​ចោទ​ឆបោក​លុយ​ពី​សមាជិក​បក្ស​ភ្លើង​ទៀន

ដោយ ឌឹ ខេមបូឌា ដេលី

បទវិភាគ

សាលាដំបូង​ខេត្ត​កំពង់ធំ កោះហៅ​ប្រធាន​គណបក្ស​កម្លាំង​ជាតិ លោក ស៊ុន ចន្ធី ឱ្យ​ចូល​ខ្លួន​បំភ្លឺ​ដោយ​ផ្ទាល់​នៅ​ថ្ងៃទី​១៤ ខែ​មីនា ខាងមុខ​នេះ ជុំវិញ​ការ​ចោទប្រកាន់​ពី​បទ ឆបោក​លុយ​ចំនួន ១២​លាន ៨​សែន​រៀល (១២ ៨០០​០០០​រៀល) ដែល​ស្មើ​នឹង​ប្រមាណ​ជា ៣​ពាន់​ដុល្លារ​សហរដ្ឋ​អាមេរិក ពី​សមាជិក​គណបក្ស​ភ្លើង​ទៀន​ខេត្ត​កំពង់ធំ ដែល​ជា​អតីត​សហការី​របស់​ខ្លួន។

ព្រះរាជអាជ្ញា​រង​នៃ​អយ្យការ​អម​សាលាដំបូង​ខេត្ត​កំពង់ធំ លោក ផៃ តុងហួរ បាន​ចេញ​ដីកា​កោះ​កាលពី​ថ្ងៃទី​២០ ខែ​កុម្ភៈ ឆ្នាំ​២០២៤ ដែល​ទើប​នឹង​ត្រូវ​បាន​ផ្សព្វផ្សាយ​នៅ​ថ្ងៃទី​៦ មីនា នេះ បញ្ជា​ឱ្យ​ប្រធាន​គណបក្ស​កម្លាំង​ជាតិ លោក ស៊ុន ចន្ធី ត្រូវតែ​ចូល​ខ្លួន​ទៅ​បំភ្លឺ​ជុំវិញ​ករណី​ដែល​ចោទប្រកាន់​ពី​បទ​ឆបោក​នេះ​ជា​កំហិត នៅ​ថ្ងៃទី​១៤ ខែ​មីនា ឆ្នាំ​២០២៤ ខាងមុខ​នេះ តាម​បណ្តឹង​ពី​ដើមបណ្ដឹង​ចំនួន ១០​នាក់ ដែល​បាន​ដាក់​ពាក្យ​ប្តឹង​កាលពី​ដើម​ខែ​កុម្ភៈ ឆ្នាំ​២០២៤ កន្លង​ទៅ​នោះ។

កាលពី​ថ្ងៃទី​១ ខែ​កុម្ភៈ ឆ្នាំ​២០២៤ ប្រធាន​ប្រតិបត្តិ​ខេត្ត​កំពង់ធំ របស់​គណបក្ស​ភ្លើង​ទៀន លោក ស៊ន ស៊ុនហេង និង​ជា​តំណាង​ឱ្យ​ជនរងគ្រោះ ៩​នាក់​ផ្សេង​ទៀត បាន​ដាក់​ពាក្យ​បណ្តឹង​ទៅ​សាលាដំបូង​ខេត្ត​កំពង់ធំ ប្តឹង​ប្រធាន​គណបក្ស​កម្លាំង​ជាតិ លោក ស៊ុន ចន្ធី ពី​បទ​ឆបោក ដោយ​ស្នើ​ឱ្យ​តុលាការ​បង្គាប់​ឱ្យ​ប្រធាន​គណបក្ស​កម្លាំង​ជាតិ​រូប​នេះ​សង​លុយ​ចំនួន ១២​លាន ៨០​សែន​រៀល​ដល់​ពួកគេ​វិញ ព្រមទាំង​សង​ជំងឺចិត្ត​ជុំវិញ​ការ​ចំណាយ​លើ​ការងារ​គណបក្ស​ដែល​ដឹកនាំ​ដោយ​លោក ស៊ុន ចន្ធី កន្លង​មក​ក្នុង​ចំនួន ៥០០០​ដុល្លារ​សហរដ្ឋ​អាមេរិក​ទៀត​ផង។

លោក ស៊ន ស៊ុនហេង បាន​រៀបរាប់​ក្នុង​ពាក្យ​បណ្តឹង​ខាងលើ​ថា មុន​នឹង​ក្លាយ​ជា​ប្រធាន​គណបក្ស​កម្លាំង​ជាតិ លោក ស៊ុន ចន្ធី គឺជា​ប្រធាន​ប្រតិបត្តិ​គណបក្ស​ភ្លើង​ទៀន​ខេត្ត​កំពង់ធំ ហើយ​ក្នុង​ការ​ដឹកនាំ​របស់​គាត់​នៅ​ពេលនោះ លោក ស៊ុន ចន្ធី បាន​ប្រមូល​ថវិកា​ពី​សមាជិក​ចំនួន ១៩​នាក់ ក្នុង​ម្នាក់ៗ​ចំនួន ១​លាន ៦​សែន​រៀល (១៦០០០០០​រៀល) សម្រាប់​ប្រើ​ការ​ឃោសនា​បោះឆ្នោត​ជាតិ​ឆ្នាំ​២០២៣ ក្នុង​នោះ សមាជិក​ខ្លះ​បាន​បង់​លុយ​គ្រប់​ចំនួន ខណៈ​សមាជិក​ខ្លះ​ទៀត​ក៏​បង់​លុយ​បាន​ពាក់កណ្ដាល​ដែរ។

ប្រភព​ដដែល​លើកឡើង​ថា ក្រោយ​ការ​ចូលរួម​ពី​សមាជិក លោក ស៊ុន ចន្ធី ប្រមូល​ថវិកា​បាន​ចំនួន ១២​លាន ៨​សែន​រៀល ប៉ុន្តែ​បុគ្គល​រូប​នេះ​បាន​សន្យា​ថា បើ​គណបក្ស​ភ្លើង​ទៀន​មិន​បាន​ធ្វើការ​ឃោសនា​បោះឆ្នោត​នៅ​ឆ្នាំ​២០២៣ ទេ ខ្លួន​នឹង​ប្រគល់​ប្រាក់​ដែល​សមាជិក​ចូលរួម​ទាំងនេះ​ឱ្យ​ពួកគេ​វិញ ប៉ុន្តែ​ចាប់តាំងពី​លោក ស៊ុន ចន្ធី ប្រកាស​លាឈប់​ពី​ប្រធាន​ប្រតិបត្តិ​គណបក្ស​ភ្លើង​ទៀន មក បុគ្គល​រូប​នេះ​មិន​ដែល​បាន​សង​ថវិកា​ដែល​ប្រមូល​បាន​នោះ​ឱ្យ​សមាជិក​ដែល​បាន​បង់​កាលពី​ពេល​នោះ​នៅឡើយ​ទេ ដូច្នេះ​ដើមបណ្ដឹង​ដែល​ជា​ម្ចាស់​លុយ​ទាំង ១០​នាក់​នេះ ស្នើ​ឱ្យ​តុលាការ​ផ្ដន្ទាទោស​បុគ្គល​រូប​នេះ​តាម​ផ្លូវ​ច្បាប់​ជា​កំហិត។

ទោះជា​យ៉ាងណា​ក៏ដោយ ប្រធាន​គណបក្ស​កម្លាំង​ជាតិ លោក ស៊ុន ចន្ធី សរសេរ​លើ​ទំព័រ​ហ្វេសប៊ុក​របស់​លោក​នៅ​ថ្ងៃទី​៦ មីនា ថា គណបក្ស​ភ្លើង​ទៀន​បាន​រៀបចំ​សេណារីយ៉ូ​ប្តឹង​រូបលោក​ក្នុង​នាម​ជា​ប្រធាន​គណបក្ស​កម្លាំង​ជាតិ នៅ​ពេលនេះ គឺ​ក្នុង​ហេតុផល​នយោបាយ​សុទ្ធសាធ។

ក្នុង​សេចក្តី​ដ៏​ខ្លី​នោះ លោក ស៊ុន ចន្ធី មិន​បាន​បញ្ជាក់​ថា តើ​លោក​ពិត​ជា​បាន​ប្រមូល​លុយ​ដូច​ការ​ចោទប្រកាន់​មែន ឬ​ក៏​អត់​នោះ​ទេ។

ទាក់ទិន​នឹង​បញ្ហា​នេះ ក្រុម​អ្នក​សង្កេតការណ៍​លើកឡើង​ថា គណបក្ស​កម្លាំង​ជាតិ និង​គណបក្ស​ភ្លើង​ទៀន កំពុង​លេង​ល្បែង​ប្រខាំ​គ្នា​ឯង​តាម​ល្បិចកល​នយោបាយ​បំបែក​បំបាក់​ក្រុម​ប្រឆាំង​ពី​បក្ស​កាន់​អំណាច ខណៈ​កម្លាំង​គាំទ្រ​គណបក្ស​ទាំង​ពីរ​ដែល​បែក​ចេញពី​គ្នា​នៅ​ពេលនេះ ក៏​ជា​ការ​ចង់​ឃើញ​ពី​គណបក្ស​ប្រជាជន​កម្ពុជា​ដែរ ហើយ​បក្ស​កាន់​អំណាច​ក៏​ចង់​ឱ្យ​ពួកគេ​បន្ត​ឈ្លោះ​គ្នា​ឥត​ឈប់​រហូត​ទាល់តែ​រលាយ​កម្លាំង​គាំទ្រ​រៀងៗ​ខ្លួន​ផង​ដែរ។

ប្រធាន​គណបក្ស​កម្លាំង​ជាតិ លោក ស៊ុន ចន្ធី គឺជា​អតីត​សមាជិក​អចិន្ត្រៃយ៍​របស់​គណបក្ស​ភ្លើង​ទៀន ដែល​បាន​លាឈប់​ពី​គណបក្ស​ចាស់​មក​បង្កើត​បក្ស​ថ្មី​ដោយ​ខ្លួនឯង បន្ទាប់ពី​គណបក្ស​ភ្លើង​ទៀន ត្រូវ​បាន​រារាំង​មិន​ឱ្យ​ចូលរួម​ការ​បោះឆ្នោត​ជាតិ​កាលពី​ខែ​កក្កដា ឆ្នាំ​២០២៣ កន្លង​ទៅ។

លោក ស៊ុន ចន្ធី ត្រូវ​គេ​ស្គាល់​ថា​ជា​មនុស្ស​ម្នាក់​ដែល​ស្និទ្ធ​នឹង​អតីត​មេដឹកនាំ​បក្ស​ប្រឆាំង​លោក សម រង្ស៊ី និង​ធ្លាប់​បាន​ចូលរួម​ជាមួយ​គណបក្ស​សង្គ្រោះ​ជាតិ តាំងពី​តុលាការ​កំពូល​មិន​ទាន់​ប្រកាស​រំលាយ​មក​ម្ល៉េះ ហើយ​លោក​ក៏​ជា​មនុស្ស​ម្នាក់​ស្ថិត​ក្នុង​ចំណោម​ថ្នាក់​ដឹកនាំ​ជាង ១០០​នាក់​ខាង​គណបក្ស​សង្គ្រោះ​ជាតិ​ដែរ​ដែល​ត្រូវ​បាន​ដក​សិទ្ធិ​មិន​ឲ្យ​ធ្វើ​នយោបាយ ៥​ឆ្នាំ ប៉ុន្តែ​នៅ​ថ្ងៃទី​៨ ខែ​វិច្ឆិកា ឆ្នាំ​២០២១ លោក​ក៏​ទទួល​បាន​សិទ្ធិ​ធ្វើ​នយោបាយ​ឡើងវិញ បន្ទាប់ពី​បាន​ដាក់​ពាក្យ​ស្នើសុំ​ទៅ​រាជរដ្ឋាភិបាល។

ក្រោយ​ទទួល​បាន​សិទ្ធិ​ធ្វើ​នយោបាយ​ឡើងវិញ លោក ស៊ុន ចន្ធី បាន​ដាក់​ពាក្យ​ស្នើសុំ​បង្កើត​គណបក្ស​កម្លាំង​ជាតិ ទៅ​ក្រសួង​មហាផ្ទៃ កាលពី​ថ្ងៃទី​១៩ ខែ​មិថុនា ឆ្នាំ​២០២៣ និង​ត្រូវ​បាន​អនុញ្ញាត​ឱ្យ​បង្កើត​គណបក្ស​នេះ​កាលពី​ថ្ងៃទី​១២ ខែ​តុលា ឆ្នាំ​២០២៣ ខណៈ​លោក ស៊ុន ចន្ធី ក៏​បាន​ដឹកនាំ​គណបក្ស​នេះ និង​ក្លាយ​ជា​ប្រធាន​គណបក្ស​កម្លាំង​ជាតិ ស្រប​ច្បាប់ ក្រោយ​សមាជ​កាលពី​ចុង​ខែ​វិច្ឆិកា ឆ្នាំ​២០២៣ កន្លង​ទៅ​នោះ។

សារព័ត៌មាន The Cambodia Daily នៅ​មិន​ទាន់​អាច​ទាក់ទង​ប្រធាន​គណបក្ស​កម្លាំង​ជាតិ លោក ស៊ុន ចន្ធី សុំ​ការ​បំភ្លឺ​ជុំវិញ​ការ​ចោទប្រកាន់​នេះ​បាន​នៅឡើយ​ទេ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស