ក្នុងឱកាសអបអរទិវាសេរីភាពសារព័ត៌មានពិភពលោកលើកទី៣១ នាយករដ្ឋមន្ត្រី ហ៊ុន ម៉ាណែត ជំរុញក្រសួងព័ត៌មាន ឱ្យបន្តយកចិត្តទុកដាក់ក្នុងការរៀបចំធម្មនុញ្ញវិជ្ជាជីវៈសារព័ត៌មាន ដើម្បីឈានទៅកំណត់នីតិវិធីប្រតិបត្តិការស្តង់ដារស្ដីពីក្រមសីលធម៌អ្នកសារព័ត៌មាននៅប្រទេសកម្ពុជា។
ក្នុងសារលិខិតសម្រាប់ទិវាសេរីភាពសារព័ត៌មាន ថ្ងៃទី៣ ខែឧសភា លោកនាយករដ្ឋមន្ត្រី ហ៊ុន ម៉ាណែត បានលើកឡើងថា ក្នុងយុទ្ធនាការរៀបចំសណ្ដាប់ធ្នាប់សារព័ត៌មានផ្អែកលើអភិក្រម “ថ្មី ពិត លឿន និងទូលំទូលាយ ប្រកបដោយជំនឿទុកចិត្ត និងវិជ្ជាជីវៈ ដើម្បីផ្សារភ្ជាប់គ្រប់មជ្ឈដ្ឋាន” នៃក្រសួងព័ត៌មាន លោកសូមវាយតម្លៃខ្ពស់ចំពោះការផ្ដួចផ្ដើមរៀបចំធម្មនុញ្ញវិជ្ជាជីវៈសារព័ត៌មានដែលជាការកំណត់និយាម បទបញ្ញត្តិជាស្តង់ដារប្រតិបត្តិ ស្ដីពីក្រមសីលធម៌អ្នកសារព័ត៌មាន ដើម្បីដាក់ចេញនូវវិធានការទប់ស្កាត់ និងលុបបំបាត់ការបំពានក្រមសីលធម៌ និងវិជ្ជាជីវៈសារព័ត៌មាននៃអង្គភាព និងអ្នកសារព័ត៌មានមួយចំនួន។
លោក ហ៊ុន ម៉ាណែត បានផ្តល់អនុសាសន៍ដល់ក្រសួងព័ត៌មាន ឱ្យពង្រឹងលើកកម្ពស់សមត្ថភាពអ្នកសារព័ត៌មាន ការបន្តពិនិត្យច្បាប់ពាក់ព័ន្ធនានា រៀបចំកំណត់គោលការណ៍ណែនាំស្ដីពីការផលិតមាតិកា និងការផ្សព្វផ្សាយពីអ្នកកាសែតដល់ប្រជាពលរដ្ឋ ដើម្បីលុបបំបាត់ភាពអនាធិបតេយ្យលើបណ្ដាញសង្គម និងរៀបចំមូលនិធិគាំទ្រដំណើរការកសាង និងអភិវឌ្ឍសមត្ថភាពនៃសមាជិកសមាគមអ្នកសារព័ត៌មាន។
ទិវាសេរីភាពសារព័ត៌មានពិភពលោកលើកទី៣១ ធ្វើឡើងក្រោមប្រធានបទ «សារព័ត៌មានសម្រាប់ផែនដី៖ សារព័ត៌មានក្នុងស្ថានភាពនៃវិបត្តិបរិស្ថាន» ដែលបង្ហាញពីសារសំខាន់នៃតួនាទីសារព័ត៌មាន និងសេរីភាពនៃការបញ្ចេញមតិក្នុងបរិបទនៃវិបត្តិបរិស្ថានសកលនាពេលបច្ចុប្បន្ន។
លោក ហ៊ុន ម៉ាណែត បានថ្លែងថា ជាការកត់សម្គាល់ លំហសេរីភាពសារព័ត៌មាននៅប្រទេសកម្ពុជាកាន់តែរីកចម្រើនធំធាត់ប្រកបដោយសុខភាពល្អ និងឆ្ពោះទៅរកការរៀបចំបាននូវសណ្ដាប់ធ្នាប់ល្អប្រសើរ។ ស្ថានភាពសេរីភាពនៃការបញ្ចេញមតិ នៅតែស្ថិតក្នុងបរិយាកាសអំណោយផល ព្រោះថាអ្នកសារព័ត៌មានអាចរាយការណ៍ដោយសេរី ដោយឈរលើមូលដ្ឋានក្រមសីលធម៌ និងវិជ្ជាជីវៈសារព័ត៌មាន។
រដ្ឋមន្ត្រីក្រសួងព័ត៌មាន លោក នេត្រ ភក្ត្រា បានលើកឡើងថា ធម្មនុញ្ញវិជ្ជាជីវៈសារព័ត៌មាននេះ គឺជាក្រមខ្ពស់បំផុត និងជាក្រមស្តង់ដារប្រតិបត្តិរួម (SOP) សម្រាប់វិស័យសារព័ត៌មាននៅប្រទេសកម្ពុជា ហើយបច្ចុប្បន្ន ពុំទាន់មានក្រមសីលធម៌វិជ្ជាជីវៈណាមួយសម្រាប់ដាក់ឱ្យអនុវត្តនោះឡើយ ពោលគឺមានតែក្រមសីលធម៌វិជ្ជាជីវៈសម្រាប់សមាគមនីមួយៗតែប៉ុណ្ណោះ។
ប្រភពដដែលបានលើកឡើងថា ៣០ឆ្នាំមកហើយដែលក្រសួងបានផ្តល់ឱកាសឱ្យសមាគមអ្នកសារព័ត៌មាន រួមគ្នាបង្កើតក្រមសីលធម៌រួមមួយ តែរហូតមកដល់ពេលនេះ នៅតែមិនទទួលបានជោគជ័យ។
ភារធារីស្ថានទូតស៊ុយអែតប្រចាំកម្ពុជា អ្នកស្រី ខាំមីឡា អនតូសុន (Camilla Ottosson) លើកឡើងក្នុងទិវាសេរីភាពសារព័ត៌មានក្រោមប្រធានបទ សារព័ត៌មានសម្រាប់ភពផែនដី នៅថ្ងៃទី២ ខែឧសភា ឆ្នាំ២០២៤ បានអំពាវនាវឱ្យរាជរដ្ឋាភិបាលកម្ពុជា ការពារអ្នកសារព័ត៌មានឯករាជ្យ ដើម្បីបញ្ចៀសនូវការបៀតបៀន ឬការប្រឆាំងដោយបទឧក្រិដ្ឋ ជាពិសេសគឺការពារទៅលើស្ត្រីជាអ្នកសារព័ត៌មានដើម្បីរួមគ្នាដោះស្រាយពីវិបត្តិបរិស្ថានដែលកំពុងធ្វើឱ្យមានការបម្រែបម្រួលអាកាសធាតុលើភពដែនដីក្នុងពេលបច្ចុប្បន្ននេះ។
យ៉ាងណាក៏ដោយ ស្ថានភាពសេរីភាពសារព័ត៌មាននៅកម្ពុជាសព្វថ្ងៃនេះ ត្រូវគេមើលឃើញថា កំពុងរងនូវការគាបសង្កត់ពីរដ្ឋាភិបាលយ៉ាងធ្ងន់ធ្ងរ ជាពិសេសការធ្វើទុក្ខបុកម្នេញទៅលើសារព័ត៌មានដែលបានរកឃើញពីការកាប់បំផ្លាញព្រៃឈើដែលមានការគប់គិតរវាងមន្ត្រីរដ្ឋាភិបាលកម្ពុជា និងឈ្មួញរកស៊ីឈើខុសច្បាប់ ក្នុងនោះ សកម្មជនបរិស្ថាននានាដែលបានផ្សព្វផ្សាយពីការបំផ្លាញបរិស្ថានក្នុងតំបន់ការពារនានា ក៏ត្រូវរងនូវការចាប់ខ្លួនឃុំដែរសព្វថ្ងៃនេះ។
សមាគមសម្ព័ន្ធអ្នកសារព័ត៌មានកម្ពុជា ខេមបូចា បានរកឃើញថា អ្នកសារព័ត៌មានជាង ៤០នាក់ (៤៤នាក់) និងស្ថាប័នសារព័ត៌មានឯករាជ្យមួយចំនួនទៀត ប្រឈមមុខនឹងការយាយីគ្រប់ទម្រង់ក្នុងឆ្នាំ២០២៣ កន្លងទៅ ក្នុងនោះមាន ១៣ករណីដែលជាការប្រើប្រាស់ចំណាត់ការផ្លូវច្បាប់ប្រឆាំងអ្នកសារព័ត៌មាន បន្ទាប់ពីពួកគេបានចុះផ្សាយពីការបំផ្លិចបំផ្លាញបរិស្ថាន ដូចជា ការកាប់បំផ្លាញព្រៃឈើ និងបញ្ហារសើបជាច្រើនដទៃទៀត ជាដើម។
អង្គការអ្នកសារព័ត៌មានគ្មានព្រំដែន (Reporters Without Borders) បានដាក់ចំណាត់ថ្នាក់សេរីភាពសារព័ត៌មាននៅកម្ពុជាសម្រាប់ឆ្នាំ២០២៣ ស្ថិតក្នុងលំដាប់លេខរៀងទី១៤៧ ក្នុងចំណោមប្រទេស១៨០ ដែលចំណាត់ថ្នាក់នេះបង្ហាញអំពីសេរីភាពសារព័ត៌មាននៅកម្ពុជា នៅតែមិនអាចងើបចេញពីចំណាត់ថ្នាក់ដ៏អាក្រក់ ដោយសារតែគេរកឃើញថា មានការកើនឡើងនៃការធ្វើទុក្ខបុកម្នេញពីរាជរដ្ឋាភិបាលលើប្រព័ន្ធផ្សព្វផ្សាយឯករាជ្យ៕