ប្រទេសវៀតណាម នៅតែបន្តរំលឹកនូវកិច្ចសហប្រតិបត្តិការជាប្រវត្តិសាស្ត្រ ដែលនាំឱ្យប្រទេសទាំងពីរជិតខាងនឹងគ្នា ក្លាយជាមិត្តភាពដ៏រឹងមាំពីជំនាន់មួយទៅជំនាន់មួយ ខណៈខ្លួនបន្តលើកឡើងអំពីផលប៉ះពាល់បរិស្ថានដែលបង្កឡើងដោយទឹកសមុទ្រចូលព្រែកជីកហ្វូណនតេជោ អាចធ្លាយចូលទឹកទន្លេមេគង្គ ដែលវៀតណាម នៅខ្សែទឹកខាងក្រោម។
នៅក្នុងសេចក្ដីថ្លែងការណ៍មួយរបស់អ្នកនាំពាក្យក្រសួងការបរទេសវៀតណាម អ្នកស្រី Pham Thu Hang បានលើកឡើងជាថ្មីម្ដងទៀតអំពីគម្រោងព្រែកជីកហ្វូណនតេជោ ដោយទាមទារឱ្យកម្ពុជាបន្តសហការជិតស្និទ្ធជាមួយគណៈកម្មការទន្លេមេគង្គ ដើម្បីធ្វើការវាយតម្លៃពេញលេញអំពីផលប៉ះពាល់បរិស្ថានដែលកើតចេញពីព្រែកជីកមួយនេះ។ នេះបើយោងតាមការចុះផ្សាយរបស់សារព័ត៌មានវៀតណាម VN Express កាលពីថ្ងៃទី៥ ឧសភា។
យោងតាមប្រភពនៃសារព័ត៌មាននេះ អ្នកនាំពាក្យក្រសួងការបរទេសវៀតណាម បានទាមទារឱ្យកម្ពុជាបន្តសហការជាមួយវៀតណាម ឱ្យជិតស្និទ្ធ រួមទាំងជាមួយប្រទេសនៃតំបន់ទន្លេមេគង្គ ដោយចែកចាយព័ត៌មាន និងធ្វើការវាយតម្លៃពេញលេញអំពីផលប៉ះពាល់ទៅលើធនធានទឹក និងប្រព័ន្ធអេកូបរិស្ថាននៃអនុតំបន់មេគង្គ ជាមួយនឹងវិធានការគ្រប់គ្រងមួយសមរម្យ ដើម្បីធានាផលប្រយោជន៍ដល់ប្រទេសទាំងអស់នៃដងទន្លេមេគង្គ។ ជាមួយគ្នានេះ ធានាឱ្យបាននូវការគ្រប់គ្រងទឹកទន្លេមេគង្គមានជានិរន្តន៍ និងជួយដល់ការការពារបរិស្ថាននៃអាងទន្លេមេគង្គ ប៉ុន្តែត្រូវការចុះសម្រុងគ្នា និងសាមគ្គីគ្នាទាំងអស់នៃប្រទេសអនុតំបន់ទន្លេមេគង្គដែលជាគំរូសម្រាប់មនុស្សជំនាន់ក្រោយ។
ជាមួយនឹងការចោទសួររបស់អ្នកសារព័ត៌មាន អ្នកនាំពាក្យក្រសួងការបរទេសវៀតណាម អ្នកស្រី Pham Thu Hang បានលើកឡើងថា វៀតណាមតែងតែផ្ដល់តម្លៃខ្ពស់ដល់ប្រទេសជិតខាងណាដែលល្អ ក្នុងការជួយពង្រឹងចំណងមិត្តភាពជាប្រពៃណី សំដៅបន្តកិច្ចសហការស៊ីជម្រៅ ទូលំទូលាយ និងមានស្ថិរភាពល្អយូរអង្វែង ពាក់ព័ន្ធនឹងគោលនយោបាយការបរទេសរបស់ប្រទេសនោះ ដែលក្នុងនោះមានប្រទេសកម្ពុជាមួយដែរ។
អ្នកស្រីបន្តថា សម្រាប់វៀតណាម ពិតណាស់ប្រាថ្នាចង់ឱ្យទំនាក់ទំនងទ្វេភាគីជាមួយកម្ពុជាបន្តកាន់តែស៊ីជម្រៅ ហើយប្រែក្លាយជាប្រទេសជិតខាងនឹងគ្នាដោយជួយធ្វើឱ្យមានផលប្រយោជន៍ដល់ប្រជាជននៃប្រទេសទាំងពីរ។
ជាមួយគ្នានេះ អ្នកស្រីបន្តថា វៀតណាមតែងតែគោរពអត្ថប្រយោជន៍ស្របច្បាប់នៃប្រទេសកម្ពុជា ដែលបានមកពីធនធានទន្លេមេគង្គ ស្របតាមកិច្ចព្រមព្រៀងមេគង្គឆ្នាំ១៩៩៥ ដែលមានចែងដោយគណៈកម្មការទន្លេមេគង្គ។
អ្នកស្រីអ្នកនាំពាក្យក្រសួងការបរទេសវៀតណាម បញ្ជាក់ថា មេដឹកនាំ បក្ស និងរដ្ឋនៃប្រទេសទាំងពីរ បានអះអាងយ៉ាងរឹងមាំថា សាមគ្គីភាពជាប្រពៃណីជាប្រវត្តិសាស្ត្ររវាងវៀតណាម និងកម្ពុជា ជាកត្តាសំខាន់ណាស់ ជាធនធានដ៏ធំធេង សំដៅពង្រឹងបុព្វហេតុអតីតកាល ក្នុងការរំដោះជាតិ និងការពារភាពឯករាជ ធ្វើឱ្យមានការស្ថាបនាប្រទេសកម្ពុជាមានការរីកចម្រើនរហូតមកដល់ពេលនេះ។ ដូច្នេះ វៀតណាមតែងតែគាំទ្រសមិទ្ធផលប្រទេសកម្ពុជា ដែលមានតាំងពីអតីតកាល និងរហូតមកដល់បច្ចុប្បន្ននេះ។
ចំណែក Le Anh Tuan ជាសាស្ត្រាចារ្យបាឋកថានៃមហាវិទ្យាល័យបរិស្ថាន និងធនធានធម្មជាតិនៃសាកលវិទ្យាល័យ Can Tho នៃប្រទេសវៀតណាម និយាយថា ការបង្កើតព្រែកជីកហ្វូណនតេជោវាពិតណាស់នឹងបង្កឱ្យមានផលប៉ះពាល់ដល់ធនធានខ្សែទឹកខាងក្រោមនៃទន្លេមេគង្គ។
តែនៅឯសន្និសីទមួយស្ដីពីគម្រោងព្រែកជីកហ្វូណនតេជោ ដែលធ្វើឡើងក្នុងបរិវេណនៃសាកលវិទ្យាល័យ Can Tho លោកសាស្ត្រាចារ្យ Le Anh Tuan បែរជាលើកឡើងថា គម្រោងព្រែកជីកនេះអាចផ្ដល់ផលប្រយោជន៍ដល់មនុស្ស ១លាន ៦សែននាក់នៅក្នុងប្រទេសកម្ពុជា ព្រោះវានឹងបង្កើតបានជាអាងទឹកដ៏ធំក្នុងការជួយអភិវឌ្ឍសេដ្ឋកិច្ច និងធ្វើឱ្យមានកំណើននៃការដឹកភស្តុភារពាណិជ្ជកម្មនៃប្រទេសកម្ពុជាទៀតផង។
ជាមួយគ្នានេះ លោកសាស្ត្រាចារ្យថ្លែងថា ប្រសិនបើយើងគិតឱ្យបានម៉ត់ចត់វិញ ទឹករបស់ព្រែកជីកនេះនឹងត្រូវការបំពេញគោលបំណងនៃការអភិវឌ្ឍ និងឧស្សាហកម្មក្នុងតំបន់ តែវាអាចហូរធ្លាក់ដល់ដៃទន្លេតូចពីររបស់វៀតណាម គឺទន្លេ Tien និងទន្លេ Hau។ ដៃទន្លេពីរនេះ វាបានតភ្ជាប់ពីទន្លេមេគង្គ។
កាលពីថ្ងៃទី១៩ ខែឧសភា ឆ្នាំ២០២៣ គណៈរដ្ឋមន្ត្រីប្រទេសកម្ពុជា បានសម្រេចអនុម័តលើគម្រោងព្រែកជីកនេះ ដោយចាត់ទុកថាជាខ្សែទឹកដ៏សំខាន់សម្រាប់គមនាគមន៍ដឹកជញ្ជូន ហើយក្រោយពីសិក្សារយៈពេល ២៦ខែចប់សព្វគ្រប់ គឺដំណើរការស្ថាបនានឹងចាប់ផ្ដើម។
ព្រែកជីកហ្វូណនតេជោ មានប្រវែង ១៨០គីឡូម៉ែត្រ តភ្ជាប់ពីឈូងសមុទ្រថៃ មកដល់ទន្លេមេគង្គនៃប្រទេសកម្ពុជា។ វាត្រូវចំណាយថវិកាសាងសង់ដល់ទៅ ១៧០០លានដុល្លារអាមេរិក ហើយក្រុមហ៊ុនសាងសង់មកពីប្រទេសចិន គឺក្រុមហ៊ុន ផ្លូវ ថ្នល់ និងស្ពាន CRBC។ ព្រែកជីកនេះនឹងចាប់ផ្ដើមដាក់ឱ្យដំណើរការនៅឆ្នាំ២០២៨។
អ្នកសង្កេតការណ៍ក្នុងតំបន់បានហៅគម្រោងព្រែកជីកហ្វូណនតេជោ ថាជាកត្តាចម្រូងចម្រាសភូមិសាស្ត្រនយោបាយ ទោះជាវានឹងផ្ដល់ផលប្រយោជន៍ដល់ប្រទេសកម្ពុជាក៏ដោយ ព្រោះគេថាកម្ចីរបស់ចិនពាន់លានដុល្លារ ត្រូវតែបម្រើផលប្រយោជន៍ឱ្យចិន ទាំងសេដ្ឋកិច្ច ពាណិជ្ជកម្ម នយោបាយនិងឥទ្ធិពលយោធាប្រទេសចិន៕