38 C
Phnom Penh

ប្រធាន​គណបក្ស​កម្លាំង​ជាតិ​រង​នូវ​ការ​ចោទប្រកាន់​ក្នុង​សំណុំរឿង​ព្រហ្មទណ្ឌ​ចំនួន​ពីរ​ករណី

ដោយ ឌឹ ខេមបូឌា ដេលី

បទវិភាគ

ប្រធាន​គណបក្ស​កម្លាំង​ជាតិ​លោក ស៊ុន ចន្ធី បាន​រង​នូវ​ការ​ចោទប្រកាន់​ក្នុង​សំណុំរឿង​ព្រហ្មទណ្ឌ​ពី​បទ​ឆបោក​ពី​តុលាការ​ខេត្ត​កំពង់ធំ និង​ពី​បទ​ញុះញង់​បង្ក​ឲ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម​ពី​តុលាការ​ក្រុង​ភ្នំពេញ ខណៈ​លោក​ត្រូវ​បាន​ឃុំ​ខ្លួន​ក្នុង​ពន្ធនាគារ​ខេត្ត​ពោធិ៍សាត់ ក្នុង​ពេល​បច្ចុប្បន្ន​នេះ។

សាលាដំបូង​ខេត្ត​កំពង់ធំ បាន​ចេញ​សេចក្តី​ប្រកាស​ព័ត៌មាន​កាលពី​ថ្ងៃទី​១៣ ឧសភា ដែល​ត្រូវ​បាន​ផ្សព្វផ្សាយ​នៅ​ថ្ងៃទី​១៤ ខែ​ឧសភា នេះ​ថា អយ្យការ​អម​សាលាដំបូង​ខេត្ត​កំពង់ធំ បាន​ផ្ទេរ​សំណុំរឿង​ព្រហ្មទណ្ឌ​ពាក់ព័ន្ធ​នឹង​ជន​ត្រូវ​ចោទ​ឈ្មោះ ស៊ុន ចន្ធី ទៅ​សាលាដំបូង និង​អយ្យការ​អម​សាលាដំបូង​រាជធានី​ភ្នំពេញ​វិញ ដើម្បី​បន្ត​ចាត់ការ​ជា​សមត្ថកិច្ច​តាមរយៈ​លិខិត​ចុះ​ថ្ងៃទី​១០ ខែ​ឧសភា ឆ្នាំ​២០២៤ របស់​ក្រសួង​យុត្តិធម៌។

សេចក្តី​ប្រកាស​ព័ត៌មាន​ដដែល​នេះ​រៀបរាប់​ថា កាលពី​ដើម​ខែ​កុម្ភៈ ឆ្នាំ​២០២៤ លោក ស៊ុន ចន្ធី បាន​រង​នូវ​បណ្តឹង​ពី​សមាជិក​គណបក្ស​ភ្លើង​ទៀន ចំនួន ១៩​នាក់ ជុំវិញ​ការ​ប្រមូល​លុយ​សម្រាប់​ធ្វើ​ការ​ឃោសនា​បោះឆ្នោត ក្នុង​នោះ តំណាង​អយ្យការ​អម​សាលាដំបូង​ខេត្ត​កំពង់ធំ បាន​បើក​ការ​ស៊ើបអង្កេត និង​ស្នើ​ឱ្យ​ដាក់​ករណី​នេះ​ក្រោម​ការ​ត្រួតពិនិត្យ​ពី​បទ​ឆបោក​តាម​មាត្រា​៣៧៧ និង​មាត្រា​៣៧៨ នៃ​ក្រមព្រហ្មទណ្ឌ។

ប្រភព​ដដែល​បញ្ជាក់​ថា លុះ​ដល់​ថ្ងៃទី​៩ ខែ​ឧសភា កន្លង​ទៅ​ថ្មីៗ​នេះ ឈ្មោះ ស៊ុន ចន្ធី ក៏​ត្រូវ​បាន​សមត្ថកិច្ច​ចាប់​ខ្លួន​ពាក់ព័ន្ធ​នឹង​បទល្មើស​មួយ​ករណី​ទៀត ដូច្នេះ​ដើម្បី​ធានា​ដល់​ប្រយោជន៍​សាធារណៈ សុវត្ថិភាព​សន្តិសុខ​សង្គម និង​ដំណើរការ​ល្អ ក៏ដូចជា​ភាព​ឆាប់​រហ័ស​នៃ​យុត្តិធម៌ សាលាដំបូង​ខេត្ត​កំពង់ធំ សម្រេច​ផ្ទេរ​សំណុំរឿង​ជន​ត្រូវ​ចោទ​ឈ្មោះ ស៊ុន ចន្ធី ទៅ​ឱ្យ​អយ្យការ​អម​សាលាដំបូង​រាជធានី​ភ្នំពេញ​វិញ។

ការ​ចាប់​ខ្លួន​លោក ស៊ុន ចន្ធី ធ្វើ​ឡើង​បន្ទាប់ពី​លោក​បាន​លើកឡើង​ពី​ការ​ចែក​បណ្ណ​សមធម៌ ឬ​បណ្ណ​ក្រីក្រ​ដែល​មាន​ការ​រើសអើង។ ជាង​នេះ​ទៅ​ទៀត អំឡុង​ពេល​ដែល​លោក​ជួបជុំ​ជាមួយ​អ្នកគាំទ្រ​របស់​លោក​ក្នុង​ប្រទេស​ជប៉ុន កាលពី​ថ្ងៃទី​៥ ខែ​ឧសភា នោះ លោក​ក៏​បាន​រិះគន់​ពី​ការ​អភិវឌ្ឍ​របស់​រដ្ឋាភិបាល​កម្ពុជា​ផង​ដែរ។

បន្ទាប់ពី​ការ​លើកឡើង​បែប​នេះ នៅ​ថ្ងៃទី​៩ ខែ​ឧសភា ឆ្នាំ​២០២៤ លោក​ក៏​ត្រូវ​សមត្ថកិច្ច​កម្ពុជា​ចាប់​ខ្លួន​នៅ​ព្រលាន​យន្តហោះ​អន្តរជាតិ​ភ្នំពេញ​ពោធិ៍ចិនតុង​តែម្តង ក្រោម​បទ​ចោទ ញុះញង់​បង្ក​ឱ្យ​មាន​ភាព​វឹកវរ​ដល់​សន្តិសុខ​សង្គម តាម​ដីកា​របស់​សាលាដំបូង​រាជធានី​ភ្នំពេញ ដែល​បាន​ចាំ​ទទួល​តាំងពី​ថ្ងៃទី​៧ ខែ​ឧសភា មក​ម្ល៉េះ។

ជាង​នេះ​ទៀត កាលពី​ថ្ងៃទី​១ ខែ​កុម្ភៈ ឆ្នាំ​២០២៤ ប្រធាន​ប្រតិបត្តិ​ខេត្ត​កំពង់ធំ របស់​គណបក្ស​ភ្លើង​ទៀន លោក ស៊ន ស៊ុនហេង និង​ជា​តំណាង​ឱ្យ​ជនរងគ្រោះ ៩​នាក់​ផ្សេង​ទៀត ក៏​បាន​ដាក់​ពាក្យ​បណ្តឹង​ទៅ​សាលាដំបូង​ខេត្ត​កំពង់ធំ ប្តឹង​ប្រធាន​គណបក្ស​កម្លាំង​ជាតិ លោក ស៊ុន ចន្ធី ពី​បទ​ឆបោក​ផង​ដែរ។

លោក ស៊ន ស៊ុនហេង បាន​ស្នើ​តុលាការ​បង្គាប់​ឱ្យ​ប្រធាន​គណបក្ស​កម្លាំង​ជាតិ​រូប​នេះ​សង​លុយ​ចំនួន ១២​លាន ៨០​សែន​រៀល​ដល់​ពួកគេ​វិញ ព្រមទាំង​សង​ជំងឺចិត្ត​ជុំវិញ​ការ​ចំណាយ​លើ​ការងារ​គណបក្ស​ដែល​ដឹកនាំ​ដោយ​លោក ស៊ុន ចន្ធី កន្លង​មក​ក្នុង​ចំនួន ៥​ពាន់​ដុល្លារ​អាមេរិក​ផង​ដែរ។

លោក ស៊ន ស៊ុនហេង បាន​រៀបរាប់​ថា មុន​នឹង​ក្លាយ​ជា​ប្រធាន​គណបក្ស​កម្លាំង​ជាតិ លោក ស៊ុន ចន្ធី គឺជា​ប្រធាន​ប្រតិបត្តិ​គណបក្ស​ភ្លើង​ទៀន​ខេត្ត​កំពង់ធំ។ លោក​បន្ត​ថា នៅ​ពេល​នោះ លោក ស៊ុន ចន្ធី បាន​ប្រមូល​ថវិកា​ពី​សមាជិក​ចំនួន ១៩​នាក់ ក្នុង​ម្នាក់ៗ​ចំនួន ១​លាន ៦​សែន​រៀល (១ ៦០០ ០០០​រៀល) សម្រាប់​ប្រើ​ការ​ឃោសនា​បោះឆ្នោត​ជាតិ​ឆ្នាំ​២០២៣ ក្នុង​នោះ សមាជិក​ខ្លះ​បាន​បង់​លុយ​គ្រប់​ចំនួន ខណៈ​សមាជិក​ខ្លះ​ទៀត​បង់​លុយ​បាន​ពាក់កណ្ដាល។

ប្រភព​ដដែល​បញ្ជាក់​ថា ក្រោយ​ការ​ចូលរួម​ពី​សមាជិក លោក ស៊ុន ចន្ធី ប្រមូល​ថវិកា​បាន​ចំនួន ១២​លាន ៨​សែន​រៀល ប៉ុន្តែ​បុគ្គល​រូប​នេះ​បាន​សន្យា​ថា បើ​គណបក្ស​ភ្លើង​ទៀន មិន​បាន​ធ្វើការ​ឃោសនា​បោះឆ្នោត​នៅ​ឆ្នាំ​២០២៣ ទេ ខ្លួន​នឹង​ប្រគល់​ប្រាក់​ដែល​សមាជិក​ចូលរួម​ទាំងនេះ​ឱ្យ​ពួកគេ​វិញ ប៉ុន្តែ​ចាប់តាំងពី​លោក ស៊ុន ចន្ធី ប្រកាស​លាឈប់​ពី​ប្រធាន​ប្រតិបត្តិ​គណបក្ស​ភ្លើង​ទៀន​ខេត្ត​កំពង់ធំ មក លោក​មិន​បាន​សង​ថវិកា​ដែល​ប្រមូល​បាន​នោះ​ឱ្យ​សមាជិក​ដែល​បាន​បង់​កាលពី​ពេល​នោះ​ឡើយ។

តំណាងរាស្ត្រ​គណបក្ស​សង្គ្រោះ​ជាតិ​លោក អ៊ុំ សំអាន ប្រាប់​សារព័ត៌មាន The Cambodia Daily នៅ​ថ្ងៃទី​១៤ ឧសភា នេះ​ថា ការ​ចោទប្រកាន់​លើ​លោក ស៊ុន ចន្ធី នៅ​ពេលនេះ គឺជា​រឿង​នយោបាយ​ប៉ុណ្ណោះ មិនមែន​រឿង​ញុះញង់ ឬ​ជា​រឿង​ឆបោក​អ្វី​នោះ​ទេ។

យ៉ាងណា​ក៏ដោយ ប្រធាន​គណបក្ស​កម្លាំង​ជាតិ លោក ស៊ុន ចន្ធី ធ្លាប់​លើកឡើង​ថា គណបក្ស​ភ្លើង​ទៀន បាន​រៀបចំ​សេណារីយ៉ូ​ប្តឹង​រូប​លោក​ក្នុង​នាម​ជា​ប្រធាន​គណបក្ស​កម្លាំង​ជាតិ នៅ​ពេលនេះ គឺ​ក្នុង​ហេតុផល​នយោបាយ ប៉ុន្តែ​លោក​មិន​បាន​បញ្ជាក់​ថា លោក​បាន​ប្រមូល​លុយ​នោះ​មែន​ឬ​ក៏​អត់​នោះ​ទេ។

លោក ស៊ុន ចន្ធី ត្រូវ​គេ​ស្គាល់​ថា​ជា​មនុស្ស​ម្នាក់​ដែល​ស្និទ្ធ​នឹង​អតីត​មេដឹកនាំ​បក្ស​ប្រឆាំង​លោក សម រង្ស៊ី ប៉ុន្តែ​ក្រោយ​ទទួល​បាន​សិទ្ធិ​ធ្វើ​នយោបាយ​ឡើងវិញ លោក ស៊ុន ចន្ធី បាន​ដាក់​ពាក្យ​ស្នើសុំ​បង្កើត​គណបក្ស​កម្លាំង​ជាតិ ទៅ​ក្រសួង​មហាផ្ទៃ កាលពី​ថ្ងៃទី​១៩ ខែ​មិថុនា ឆ្នាំ​២០២៣។

រហូត​ដល់​ថ្ងៃទី​១២ ខែ​តុលា ឆ្នាំ​២០២៣ គណបក្ស​កម្លាំង​ជាតិ ត្រូវ​បាន​អនុញ្ញាត​ជា​ផ្លូវការ ខណៈ​លោក ស៊ុន ចន្ធី ក៏​បាន​ដឹកនាំ​គណបក្ស​នេះ និង​ក្លាយ​ជា​ប្រធាន​ស្រប​ច្បាប់​ក្រោយ​សមាជ​កាលពី​ចុង​ខែ​វិច្ឆិកា ឆ្នាំ​២០២៣ កន្លង​ទៅ​នោះ​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស