មន្ត្រីសន្តិសុខកំពូលប្រទេសវៀតណាម គឺលោក To Lam ត្រូវបានបញ្ជាក់ថា គឺជាប្រធានាធិបតីថ្មីរបស់ប្រទេសនេះហើយ។
សភាជាតិប្រទេសវៀតណាម នៅថ្ងៃទី២២ ឧសភា បានបញ្ជាក់ថា លោក To Lam ដែលជារដ្ឋមន្ត្រីសន្តិសុខសាធារណៈ ឡើងកាន់តំណែងបន្តវេនពីប្រធានាធិបតីមុនដែលបានចុះចេញពីតំណែងដោយការលាលែងចំពេលវៀតណាម បើកយុទ្ធនាការបោសសម្អាតអំពើពុករលួយ។
លោក To Lam ទទួលបានការគាំទ្រពីសមាជិកសភាវៀតណាម ក្នុងសំឡេង ៤៧២ លើ ៤៧៣សំឡេង។ ការបោះឆ្នោតអនុម័តជាផ្លូវការនេះ ធ្វើឡើងបន្ទាប់ពីគណៈកម្មាធិការមជ្ឈិមនៃបក្សកុម្មុយនីស្តវៀតណាម កាលពីថ្ងៃសៅរ៍ចុងសប្តាហ៍កន្លងទៅ បានផ្តល់អនុសាសន៍ឱ្យរដ្ឋសភាវៀតណាម បោះឆ្នោតជ្រើសតាំងលោក To Lam អាយុ ៦៦ឆ្នាំ ឱ្យក្លាយជាប្រធានាធិបតីថ្មី ក្រោយតំណែងនេះត្រូវបានទុកឱ្យនៅទំនេររយៈពេលប្រមាណជា ២ខែមកហើយ បន្ទាប់ពីលោក Vo Van Thuong លាលែងពីតំណែង។
លោក To Lam បានស្បថចូលកាន់តំណែងក្នុងថ្ងៃតែមួយជាមួយការសន្យាថានឹងស្មោះត្រង់ចំពោះបក្ស រដ្ឋ និងប្រជាជនវៀតណាម ព្រមទាំងសន្យាបន្តដឹកនាំការប្រយុទ្ធប្រឆាំងអំពើពុករលួយ។
លោក To Lam ដែលបច្ចុប្បន្នអាយុ ៦៦ឆ្នាំ ត្រូវបានគេដឹងថាជាអ្នកជំនាញផ្នែកចារកម្ម និងជាមេប៉ូលិសអស់រយៈពេលជាច្រើនទសវត្សមកហើយ តែក្រុមសិទ្ធិមនុស្សអះអាងថា បុគ្គលរូបនេះជាអ្នកនៅពីក្រោយការគាបសង្កត់សិទ្ធិសេរីភាពជាប្រព័ន្ធ ដែលបំពានទាំងច្បាប់ជាតិ និងច្បាប់អន្តរជាតិ។
ប្រវត្តិលោក To Lam
លោក To Lam កើតនៅថ្ងៃទី១០ ខែកក្កដា ឆ្នាំ១៩៥៤ ក្នុងស្រុក Van Giang ខេត្ត Hung Yen ភាគខាងជើងប្រទេសវៀតណាម។ លោកបានចូលរៀននៅសាលាប៉ូលិសវៀតណាម ក្នុងឆ្នាំ១៩៧៤ និងបានចូលរួមជាមួយគណបក្សកុម្មុយនីស្តវៀតណាម នៅថ្ងៃទី២២ ខែសីហា ឆ្នាំ១៩៨១ ហើយបានក្លាយជាសមាជិកផ្លូវការនៃការិយាល័យនយោបាយមជ្ឈិមបក្សកុម្មុយនីស្តវៀតណាម នៅថ្ងៃទី២២ ខែសីហា ឆ្នាំ១៩៨២។
លោកគឺជាសមាជិកម្នាក់នៃគណៈកម្មាធិការមជ្ឈិមនៃគណបក្សកុម្មុយនីស្តវៀតណាម សម្រាប់នីតិកាលទី១១-១២ និងទី១៣។ លោកបានក្លាយជាសមាជិកការិយាល័យនយោបាយក្នុងនីតិកាលទី១២ និងទី១៣ និងជាប្រតិភូសភាវៀតណាម នីតិកាលទី១៤ និងទី១៥។ ក្រោយមក លោកបានចូលបំពេញការងារនៅឯនាយកដ្ឋានគាំពារនយោបាយទី១ និងត្រូវបានដំឡើងតំណែងជានាយករងនៃនាយកដ្ឋានគាំពារនយោបាយទី១ ហើយក្រោយមក ទើបបានក្លាយជានាយកនៃនាយកដ្ឋានគាំពារនយោបាយទី៣ នៃអគ្គនាយកដ្ឋានសន្តិសុខ។
លោកត្រូវបាននាយករដ្ឋមន្ត្រីវៀតណាម តែងតាំងក្នុងឆ្នាំ២០០៩ ឱ្យកាន់តំណែងប្រធាននាយកដ្ឋានសន្តិសុខទី១ និងជាអនុរដ្ឋមន្ត្រីនៃក្រសួងសន្តិសុខសាធារណៈ នៅខែសីហា ឆ្នាំ២០១០។ រហូតដល់ខែមេសា ឆ្នាំ២០១៦ លោកត្រូវបានតែងតាំងជារដ្ឋមន្ត្រីសន្តិសុខសាធារណៈវៀតណាម។
លោក To Lam ក៏ជាអនុប្រធានគណៈកម្មាធិការដឹកនាំប្រយុទ្ធប្រឆាំងនឹងអំពើពុករលួយ ដែលស្ថិតក្រោមការដឹកនាំរបស់អគ្គលេខាធិការបក្សកុម្មុយនីស្តវៀតណាម លោក Nguyen Phu Trong។
លោក Lam គឺជាមនុស្សម្នាក់ដែលនៅក្រោយការស៊ើបអង្កេតលើអ្នកនយោបាយធំៗក្នុងប្រទេសវៀតណាម ក្នុងនោះរួមមានលោក Vo Van Thuong ផងដែរ។
ជារួមទៅ លោក To Lam បានចំណាយពេលជាង ៤០ឆ្នាំនៅក្នុងវិស័យសន្តិសុខសាធារណៈ មុននឹងក្លាយទៅជារដ្ឋមន្ត្រីសន្តិសុខសាធារណៈនៅក្នុងឆ្នាំ២០១៦។ ការឡើងកាន់តំណែងរបស់លោក ស្ថិតក្នុងពេលដែលមជ្ឈិមបក្សកុម្មុយនីស្តវៀតណាម បានបាត់បង់សមាជិក ៦នាក់ក្នុងចំណោមសមាជិកអចិន្ត្រៃយ៍ចំនួន ១៨នាក់ ដោយមូលហេតុនៃការដកហូតអំណាច ចុះចេញពីអំណាចដោយការចោទប្រកាន់ ខណៈយុទ្ធនាការនៃការបោសសម្អាតអំពើពុករលួយ។
លោក To Lam ត្រូវបានគេយល់ឃើញថាជាអ្នកនៅពីក្រោយការស៊ើបអង្កេតរកមុខអ្នកនយោបាយល្បីៗដែលប្រព្រឹត្តអំពើពុករលួយ។
ប្រទេសវៀតណាម មិនដល់មួយឆ្នាំនោះទេ មានប្រធានាធិបតី ២រូបបានលាលែងពីតំណែង។ តំណែងប្រធានាធិបតីវៀតណាម ជាតំណែងដ៏ធំមួយក្នុងតំណែងចំនួន៤ និងមានឱកាសជាងគេក្នុងការក្លាយជាប្រធានបក្សកុម្មុយនីស្តវៀតណាម ដែលជាតំណែងកំពូលបំផុតក្នុងប្រទេសសង្គមនិយមមួយនៅអាស៊ីអាគ្នេយ៍។
ប្រធាន ឬអគ្គលេខាបក្សកុម្មុយនីស្តវៀតណាម គឺលោក Nguyen Phu Trong ដែលបានកាន់អំណាច ៣អាណត្តិមកហើយ គិតពីឆ្នាំ២០២១ មក។ បច្ចុប្បន្ន លោក ង្វៀង ភូ ទ្រង់ មានអាយុ ៨០ឆ្នាំហើយ។ លោកនឹងមិនបន្តតំណែងនេះនៅអាណត្តិទី៤ ឆ្នាំ២០២៦ ទៀតនោះទេ។
សម្រាប់កៅអីរដ្ឋមន្ត្រីសន្តិសុខសាធារណៈដែលទំនេរ គឺលោក Tran Quoc To ជាអ្នកបន្ដវេន។
ប្រទេសវៀតណាម ដែលមានអ្នកនយោបាយលាលែងពីតំណែងជាបន្តបន្ទាប់ ត្រូវបានវាយតម្លៃថា អាចប៉ះពាល់ដល់ការវិនិយោគនៅក្នុងប្រទេសដែលបន្ថែមពីលើហានិភ័យនៃការវិនិយោគ ដោយថ្មីៗនេះមានឧកញ៉ាមួយរូបត្រូវបានកាត់ទោសប្រហារជីវិតដោយបទសូកប៉ាន់។
ប្រទេសវៀតណាម ល្បីថាជាប្រទេសក្នុងខ្សែច្រវាក់ផ្គត់ផ្គង់សកលដ៏ធំមួយដែរ ជាប្រទេសដែលមានការវិនិយោគខ្ពស់ក្រោយពីសហរដ្ឋអាមេរិកកាត់បន្ថយរោងចក្រជាច្រើននៅប្រទេសចិន។ ប្រទេសនេះកំពុងជំរុញការផលិតសម្ភារៈ High-tech ដូចជាទូរសព្ទឆ្លាតវៃ និងកុំព្យូទ័រ ដែលគេរំពឹងថាអាចនឹងចូលរួមជាខ្លាអាស៊ីទី៥ ដែលរួមមាន ហុងកុង សិង្ហបុរី កូរ៉េខាងត្បូង និងតៃវ៉ាន់ ដែលប្រទេសសេដ្ឋកិច្ចបួននេះមានកំណើនខ្ពស់ និងមានការលូតលាស់ខ្លាំងនូវឧស្សាហកម្មរោងចក្រ៕