26 C
Phnom Penh

នាយករដ្ឋមន្ត្រី​ត​ពី​ឪពុក​កំណត់​យក​ថ្ងៃទី​៥ សីហា ជា​ថ្ងៃ​បើក​ការដ្ឋាន​សាងសង់​ព្រែកជីក​ហ្វូណន​តេជោ

ដោយ ឌឹ ខេមបូឌា ដេលី

បទវិភាគ

នាយករដ្ឋមន្ត្រី​ត​ពូជ​ថ្មី​កម្ពុជា​លោក ហ៊ុន ម៉ាណែត កំណត់​យក​ថ្ងៃទី​៥ ខែ​សីហា ឆ្នាំ​២០២៤ ជា​ថ្ងៃ​បើក​ការដ្ឋាន​សាងសង់​ព្រែកជីក​ហ្វូណន​ជា​ផ្លូវការ ក្នុង​នោះ លោក​ក៏​អំពាវនាវ​ឱ្យ​ពលរដ្ឋ​ដែល​រស់នៅ​តាម​តម្រាយ​នៃ​គម្រោង​ព្រែកជីក​នេះ ចូលរួម​ធ្វើ​សម្បទាន​ដី​ផ្ទាល់ ដើម្បី​ជួយ​ដល់​ការ​សាងសង់​ព្រែក។

លោក ហ៊ុន ម៉ាណែត បាន​លើកឡើង​នៅ​ក្នុង​ពិធី​សម្ពោធ​កំពង់ផែ​ក្នុង​ខេត្ត​កំពត នៅ​ថ្ងៃទី​០៦ ខែ​មិថុនា ឆ្នាំ​២០២៤ នេះ​ថា មាន​ពលរដ្ឋ​ចំនួន ១៥០​គ្រួសារ​ដែល​រង​នូវ​ផល​ប៉ះពាល់​ពី​ការ​សាងសង់​ព្រែក​នេះ ប៉ុន្តែ​ពលរដ្ឋ​ទាំងនោះ​បាន​ផ្តល់​ដី​របស់​ពួកគាត់​ដល់​រដ្ឋាភិបាល ជា​ថ្នូរ​សុំ​ឱ្យ​រដ្ឋាភិបាល​សាងសង់​ផ្លូវ​បេតុង​ជូន​ពួកគាត់​វិញ ខណៈ​ផ្លូវ​សព្វថ្ងៃ​នេះ​គឺជា​ផ្លូវ​រទេះ​ប៉ុណ្ណោះ។

លោក ហ៊ុន ម៉ាណែត លើកឡើង​ថា បើ​គ្មាន​ការ​ចូលរួម​ពី​ពលរដ្ឋ​ទេ នោះ​រដ្ឋាភិបាល​ក៏​មិន​អាច​សាងសង់​ផ្លូវ​បេតុង​សម្រាប់​ពលរដ្ឋ​ដែល​រស់នៅ​តាម​តម្រាយ​ព្រែកជីក​នេះ​ដែរ។

លោក​បន្ថែម បើ​គ្មាន​ផ្លូវ​បេតុង​នេះ​ទេ ពលរដ្ឋ​ក៏​គ្មាន​ផ្លូវ​ល្អ​សម្រាប់​ដើរ ហើយ​សេដ្ឋកិច្ច​នៅ​មូលដ្ឋាន​របស់​គាត់​ក៏​មិន​ល្អ ខណៈ​កសិផល​របស់​គាត់​ក៏​លក់​មិន​បាន​ថ្លៃ​ថែម​ទៀត ព្រោះ​គ្មាន​ផ្លូវ​ដឹកជញ្ជូន។

នាយករដ្ឋមន្ត្រី​កម្ពុជា​រូប​នេះ​បញ្ជាក់​ថា ការ​សាងសង់​ព្រែកជីក​នេះ​គឺ​ត្រូវការ​ការ​លះបង់​ខ្លះ​របស់​ពលរដ្ឋ ប៉ុន្តែ​នៅ​ពេល​ដែល​ព្រែក​នេះ​សាងសង់​រួចរាល់ ដី​នៅ​តំបន់​នោះ​នឹង​ឡើង​ថ្លៃ ហើយ​នឹង​មាន​ការ​សាងសង់​កំពង់ផែ និង​រោងចក្រ​ព្រោងព្រាត ដែល​អាច​ផ្តល់​ការងារ​ឱ្យ​ពលរដ្ឋ​នៅ​តំបន់​នោះ​កាន់​តែ​ច្រើន។

ជាង​នេះ​ទៀត ពលរដ្ឋ​នឹង​មាន​ទឹក​ប្រើប្រាស់​ខួប​ប្រាំង​ខួប​វស្សា​ថែម​ទៀត ត្បិត​ការ​ពង្រីក​ហេដ្ឋារចនាសម្ព័ន្ធ​នានា​ជុំវិញ​ព្រែក​នេះ នឹង​ត្រូវ​បាន​សាងសង់ ដូច្នេះ​ការ​លះបង់​របស់​ពលរដ្ឋ​នឹង​ទទួល​បាន​ផល​ប្រយោជន៍​រួម​គ្នា​ទៅ​ថ្ងៃ​ក្រោយ​ជាមិនខាន។

ទោះជា​យ៉ាងណា​ក៏ដោយ មន្ត្រី​ជាន់ខ្ពស់​ក្នុង​ជួរ​រដ្ឋាភិបាល​កម្ពុជា​ម្នាក់​បាន​ប្រាប់​សារព័ត៌មាន The Cambodia Daily ក្នុង​លក្ខខណ្ឌ​មិន​បញ្ចេញ​ឈ្មោះ​នៅ​ថ្ងៃទី​៦ មិថុនា នេះ​ថា ផ្អែក​តាម​ការ​រៀបរាប់​របស់​លោក ហ៊ុន ម៉ាណែត ពលរដ្ឋ​ដែល​រស់នៅ​តំបន់​ព្រែកជីក​នេះ មិន​ទទួល​បាន​អ្វី​ទាំងអស់ សូម្បីតែ​ដី​របស់​ពួកគេ​ដែល​រង​ផល​ប៉ះពាល់​ពី​ការ​សាងសង់​ព្រែកជីក​នេះ ក៏​មិន​ទទួល​បាន​ការ​ដោះស្រាយ​ជា​សំណង​សមរម្យ​ដែរ។

ប្រភព​ដដែល​លើកឡើង​ថា ការ​រៀបរាប់​របស់​លោក ហ៊ុន ម៉ាណែត ពី​ដី​នៅ​តំបន់​នោះ​ឡើង​ថ្លៃ ការ​ទទួល​បាន​ផ្លូវ​បេតុង​សម្រាប់​ពលរដ្ឋ ១៥០​គ្រួសារ និង​មាន​ទឹក​ប្រើប្រាស់ រួម​ទាំង​ធ្វើ​ឱ្យ​កសិផល​មាន​ទីផ្សារ គឺ​មិន​ស័ក្តិសម​នឹង​ព្រែកជីក​មួយ​ដែល​រដ្ឋាភិបាល​ប្រកាស​ថា​ជា​គម្រោង​របស់​ជាតិ ដែល​នឹង​នាំ​មក​នូវ​ផល​ប្រយោជន៍​ដ៏​មហាសាល​សម្រាប់​ពលរដ្ឋ​ខ្មែរ​នោះ​ទេ។

មន្ត្រី​រដ្ឋាភិបាល​កម្ពុជា​រូប​នោះ​បញ្ជាក់​ថា រដ្ឋាភិបាល​មិន​ទាន់​បាន​បញ្ជាក់​នៅឡើយ​ទេ​ថា ពលរដ្ឋ​ដែល​ប្រើប្រាស់​ទឹក​ពី​ព្រែកជីក​នេះ នឹង​ត្រូវ​បង់​លុយ​ឱ្យ​ក្រុមហ៊ុន​ចិន ឬ​ក៏​អត់​នោះ។ ជាង​នេះ​ទៀត តើ​ព្រែក​នេះ​នឹង​បើក​ឱ្យ​ពលរដ្ឋ​ប្រើប្រាស់​ក្នុង​លក្ខខណ្ឌ​បែប​ណា​នោះ ក៏​មិន​ទាន់​ដឹង​ដែរ។

ទាក់ទិន​នឹង​បញ្ហា​នេះ មន្ត្រី​ជាន់ខ្ពស់​នៃ​ក្រសួង​សេដ្ឋកិច្ច និង​ហិរញ្ញវត្ថុ ក៏​ធ្លាប់​ទម្លាយ​ប្រាប់​សារព័ត៌មាន The Cambodia Daily ក្នុង​លក្ខខណ្ឌ​មិន​បញ្ចេញ​ឈ្មោះ​កាលពី​ពេល​កន្លង​ទៅ​ដែរ​ថា ព្រែកជីក​នេះ​គ្មាន​ចំណេញ​អ្វី​ដល់​ប្រទេស​កម្ពុជា​នោះ​ទេ ហើយ​ក៏​មិន​មាន​ផល​ចំណេញ​អ្វី​ដល់​ពលរដ្ឋ​ខ្មែរ​នោះ​ដែរ តែ​អាច​ចំណេញ​ត្រឹមតែ​បុគ្គល​មួយ​ចំនួន​ដែល​ពាក់ព័ន្ធ​នឹង​ការ​ធ្វើ​ពាណិជ្ជកម្ម​ជាមួយ​ក្រុមហ៊ុន​ចិន ប៉ុណ្ណោះ។

ប្រភព​ដដែល​បញ្ជាក់​ថា ក្រោយ​ព្រែកជីក​នេះ​ចាប់ផ្តើម​ដំណើរការ សំណង់​នានា​ដូចជា បុរី ផ្ទះល្វែង និង​ខុនដូ ជាដើម ក៏​នឹង​ត្រូវ​បាន​សាងសង់​នៅ​តាម​សងខាង​ព្រែកជីក​នេះ​ដែរ ប៉ុន្តែ​សំណង់​ទាំងនោះ​ច្បាស់​ជា​មិន​មែន​ជា​របស់​ក្រុមហ៊ុន​ខ្មែរ​ទេ គឺជា​របស់​ក្រុមហ៊ុន​ចិន ទាំងអស់ ដូច្នេះ​ប្រយោជន៍​ធំ​គឺ​នៅតែ​ចិន ជា​អ្នក​ទទួល​បាន​ពី​ព្រែកជីក​នេះ​ដដែល ខណៈ​កម្ពុជា​មាន​តែ​ហិនហោច​ទ្រព្យសម្បត្តិ​ជាតិ​ខ្លួនឯង​ប៉ុណ្ណោះ។

ក្រុមហ៊ុន​សាជីវកម្ម​ស្ពាន និង​ថ្នល់ (CBRC) គ្រោង​នឹង​ជីក​គម្រោង​សាងសង់​ព្រែកជីក​ហ្វូណន ដោយ​ភ្ជាប់​ទឹកសាប​ពី​ទន្លេបាសាក់ ខេត្ត​កណ្តាល ទៅ​ទឹកប្រៃ​នៅ​ខេត្ត​កែប ដែល​មាន​ទទឹង​ក្បាល​ព្រែក​ខាងលើ​ប្រវែង​ពី ១០០​ម៉ែត្រ និង​រួម​ស្ដួច​ខាងក្រោម​ទៅ​កាន់​សមុទ្រ​ត្រឹម ៨០​ម៉ែត្រ រួម​ទាំង​មាន​ជម្រៅ​ទឹក​ប្រវែង ៥,៤​ម៉ែត្រ មាន​សន្ទះ​បិទ​បើក​ទឹក​ចំនួន​៣ និង​ស្ពាន​ឆ្លងកាត់​ចំនួន ១១​ស្ពាន​ផង​ដែរ។

តាម​កិច្ចព្រមព្រៀង​រវាង​រាជរដ្ឋាភិបាល និង​ក្រុមហ៊ុន​ចិន ព្រែកជីក​ហ្វូណន នឹង​ត្រូវ​ស្ថាបនា​តាម​បែប​ផែន Build-Operate-Transfer (BOT) ដែល​មាន​ន័យ​ថា សង់​ហើយ ម្ចាស់​ទុន​គ្រប់គ្រង កាន់កាប់ ចាត់ចែង (ធ្វើ​ប្រតិបត្តិការ) ប្រមូល​ចំណូល​រហូត​ចប់​កិច្ចសន្យា​រយៈពេល ៥០​ឆ្នាំ ទើប​ប្រគល់​ឱ្យ​ម្ចាស់​ប្រទេស​គ្រប់គ្រង​តាម​ក្រោយ។

បើ​យោង​តាម​កិច្ចព្រមព្រៀង​នេះ ពលរដ្ឋ​ខ្មែរ​នឹង​ត្រូវ​រង់ចាំ ៥០​ឆ្នាំ​ក្រោយ ទើប​ទទួល​បាន​ផល​ប្រយោជន៍​ពី​ព្រែកជីក​នេះ ប៉ុន្តែ ៥០​ឆ្នាំ​ដំបូង គេ​មិន​ដឹង​ថា តើ​ចិន​នឹង​ប្រមូល​ផល​ប្រយោជន៍​អ្វី​ខ្លះ​ពី​ខ្មែរ​ទេ ព្រោះ​រាល់​ប្រតិបត្តិការ​ទាំងអស់​ដែល​ជាប់​ពាក់ព័ន្ធ​នឹង​ព្រែក​នេះ សូម្បីតែ​ខ្មែរ​ខ្លួនឯង ក៏​ត្រូវ​បង់​ពន្ធ​ឱ្យ​ក្រុមហ៊ុន​ចិន​ដែរ៕

អត្ថបទ​គួរ​អាន៖

១- សេចក្តី​រាយការណ៍​ស៊ីជម្រៅ​ស្តីអំពី ផល​ខាត និង​ផល​ចំណេញ​ពី​ព្រែកជីក​ហ្វូណន​តេជោ (ភាគ​១)

២- សេចក្តី​រាយការណ៍​ស៊ីជម្រៅ​ស្តីអំពី ផល​ខាត និង​ផល​ចំណេញ​ពី​ព្រែកជីក​ហ្វូណន​តេជោ (ភាគ​២)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស