 តាមការចង់បានរបស់វៀតណាម ជាថ្នូរឲ្យបក្សកុម្មុយនីស្ដវៀតណាម ការពារអំណាចកូនៗរបស់គាត់។){kind=link}
ក្រុមអ្នកវិភាគនយោបាយ សម្ដែងក្តីបារម្ភថា លោក ហ៊ុន សែន អាចនឹងដាក់ប្រទេសកម្ពុជាទាំងមូលទៅក្នុងគម្រោងត្រីកោណអភិវឌ្ឍន៍ (CLV) តាមការចង់បានរបស់វៀតណាម ជាថ្នូរឲ្យបក្សកុម្មុយនីស្ដវៀតណាម ការពារអំណាចកូនៗរបស់គាត់។
ប្រភពដដែលបន្តថា វៀតណាម ធ្លាប់ស្នើសុំឱ្យរដ្ឋាភិបាលត្រកូលហ៊ុនដាក់ប្រទេសកម្ពុជាទាំងមូលក្នុងតំបន់ត្រីកោណនេះតាំងពីអំឡុងឆ្នាំ២០១៨ មកម្ល៉េះ។
អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ ប្រាប់សារព័ត៌មាន The Cambodia Daily នៅថ្ងៃទី២៦ កក្កដា នេះថា គម្រោងរបស់វៀតណាម មិនមែនត្រឹមតែដាក់បញ្ចូលខេត្តខ្មែរខ្លះក្នុងតំបន់ត្រីកោណអភិវឌ្ឍន៍នេះទេ ពួកគេមានបំណងដាក់បញ្ចូលប្រទេសកម្ពុជា ឡាវ និងវៀតណាមខ្លួនឯងទាំងមូល ចូលក្នុងតំបន់កន្ទុយនាគនេះតែម្តង។
លោក គឹម សុខ លើកឡើងថា បើរដ្ឋាភិបាលកម្ពុជាលួចអនុវត្តតាមសំណើរបស់វៀតណាម ដោយព្យាយាមបញ្ចូលខេត្តរបស់ខ្លួនបន្តិចម្តងៗមែន នោះគឺមានន័យថា អាយុជីវិតទឹកដីរបស់ប្រទេសកម្ពុជាកំពុងឈានដល់ដំណាក់កាលចុងក្រោយហើយ ដែលប្តូរមកវិញនូវសហព័ន្ធឥណ្ឌូចិនដែលត្រូវស្ថិតក្រោមការគ្រប់គ្រងរបស់រដ្ឋាភិបាលមេតែមួយទៅថ្ងៃមុខ គឺវៀតណាម នេះឯង។
ប្រធានវេទិកាពលរដ្ឋរូបនេះបញ្ជាក់ថា ការប្រើវិធានការចាប់ខ្លួនអ្នករិះគន់ជុំវិញតំបន់ត្រីកោណនេះ ក៏ជាសញ្ញាមួយបង្ហាញឱ្យឃើញពីការគំរាមដើម្បីកុំឱ្យមានការជំទាស់ចំពោះសហប្រតិបត្តិការក្នុងផែនការនេះដែរ ស្របពេលដែលដំណើរឆ្ពោះទៅរកការដាក់បញ្ចូលប្រទេសទាំងបីក្នុងតំបន់នេះ ក៏កំពុងរំកិលខ្លួនបន្តិចម្តងៗតាមរយៈនៃគម្រោងដាក់បញ្ចូលខេត្តថ្មីៗជាបន្តបន្ទាប់នៅពេលនេះ។
លោក គឹម សុខ អំពាវនាវឱ្យពលរដ្ឋខ្មែរចេញធ្វើបាតុកម្មទាមទារឱ្យរដ្ឋាភិបាលត្រកូលហ៊ុន ដកខ្លួនចេញពីតំបន់ត្រីកោណដ៏គ្រោះថ្នាក់នេះ ព្រោះមានតែធ្វើតាមវិធីនេះតែមួយគត់ ទើបលោក ហ៊ុន សែន ព្រមដកខ្លួនចេញពីសំណើរបស់វៀតណាម។
ការអះអាងនេះ ធ្វើឡើងបន្ទាប់ពីមេដឹកនាំបក្សកាន់អំណាចលោក ហ៊ុន សែន ប្រកាសត្រៀមខ្លួនដាក់ខេត្តព្រះវិហារ មួយខេត្តទៀត ចូលទៅក្នុងតំបន់ត្រីកោណអភិវឌ្ឍន៍ កាលពីពេលថ្មីៗនេះ។
ពាក់ព័ន្ធនឹងបញ្ហាតំបន់ត្រីកោណអភិវឌ្ឍន៍នេះ ក្រៅពីការចាប់ខ្លួនអ្នកដែលហ៊ានជំទាស់តំបន់ត្រីកោណអភិវឌ្ឍន៍ លោក ហ៊ុន សែន ក៏បានបញ្ជាក់កាលពីថ្ងៃទី២៣ ខែកក្កដា ឆ្នាំ២០២៤ ដែរថា លោកនឹងស្នើឱ្យរដ្ឋាភិបាលដែលកំពុងដឹកនាំដោយកូនប្រុសរបស់លោក គឺលោក ហ៊ុន ម៉ាណែត ដាក់ខេត្តព្រះវិហារ មួយទៀតចូលទៅក្នុងតំបន់ត្រីកោណអភិវឌ្ឍន៍នេះ។
លោកថា ការគ្រោងដាក់បញ្ចូលខេត្តព្រះវិហារ ក្នុងតំបន់អភិវឌ្ឍន៍រួមគ្នានេះ គឺដើម្បីជំរុញឲ្យមានការអភិវឌ្ឍខេត្តនេះកាន់តែមានភាពជឿនលឿនដូចខេត្តដទៃទៀតដែរ។
លោក ហ៊ុន សែន បញ្ជាក់ថា ខេត្តខ្មែរក្នុងតំបន់ត្រីកោណនេះកំពុងត្រៀមខ្លួនក្លាយជាប៉ូលសេដ្ឋកិច្ចទី៥ ដូច្នេះបើខេត្តព្រះវិហារ ត្រូវបានដាក់បញ្ចូលជាមួយខេត្តទាំង ៤ នេះ នោះខេត្តមួយនេះក៏នឹងក្លាយជាខេត្តដែលមានសក្ដានុពលសេដ្ឋកិច្ចដែរ។
អតីតតំណាងរាស្ត្រគណបក្សសង្គ្រោះជាតិលោក អ៊ុំ សំអាន សរសេរលើគណនីហ្វេសប៊ុករបស់ខ្លួនកាលពីថ្ងៃទី២៥ កក្កដា នេះថា នៅពេលដែលខេត្តព្រះវិហារ ត្រូវបានដាក់បញ្ចូលទៅក្នុងតំបន់អភិវឌ្ឍន៍ត្រីកោណ កម្ពុជា ឡាវ និងវៀតណាម នោះគឺស្មើនឹងធ្វើឱ្យកម្ពុជាបាត់ខេត្តរបស់ខ្លួនមួយទៀតទៅក្នុងផែនការឈ្លានពានរបស់វៀតណាម ដែរ។
លោក អ៊ុំ សំអាន លើកឡើងថា ការប្រកាសដាក់ខេត្តព្រះវិហារ ចូលទៅក្នុងតំបន់ត្រីកោណ ជាទង្វើបញ្ឈឺពលរដ្ឋខ្មែរដែលមិនឯកភាពឱ្យវៀតណាម ឈ្លានពានទឹកដីរបស់ខ្លួន ប៉ុន្តែទង្វើរបស់លោក ហ៊ុន សែន បែបនេះ ក៏បង្ហាញឱ្យឃើញដែរថា ទៅថ្ងៃអនាគត កម្ពុជាអាចនឹងដាក់ប្រទេសទាំងមូលរបស់ខ្លួនរួមគ្នាជាមួយវៀតណាម និងឡាវ ដើម្បីអភិវឌ្ឍរួមគ្នាដែរ។
មន្ត្រីជាន់ខ្ពស់បក្សប្រឆាំងរូបនេះបញ្ជាក់ថា កម្ពុជានឹងចៀសមិនផុតពីការបាត់បង់ទឹកដីទៅប្រទេសវៀតណាម នាពេលអនាគតដូចការបាត់បង់ទឹកដីកម្ពុជាក្រោមនោះទេ ឱ្យតែគណបក្សប្រជាជនកម្ពុជានៅបន្តដឹកនាំប្រទេសបន្តទៀត។
លោក អ៊ុំ សំអាន បញ្ជាក់ថា ផែនការរបស់មេដឹកនាំវៀតណាម លោក ហូ ជី មិញ ក្នុងដំណើរឆ្ពោះទៅទិសខាងលិចដើម្បីលេបត្របាក់យកកម្ពុជា និងឡាវ ក្នុងបំណងបង្កើតសហព័ន្ធឥណ្ឌូចិន ដែលគ្រប់គ្រងដោយវៀតណាម នឹងបានសម្រេចជាស្ថាពរ ឱ្យតែប្រទេសទាំងបីនេះដាក់បញ្ចូលគ្នាជាសហព័ន្ធតែមួយ។
ជុំវិញការដាក់បញ្ចូលខេត្តខ្មែរក្នុងតំបន់ត្រីកោណអភិវឌ្ឍន៍នេះ ពលរដ្ឋ អ្នកវិភាគ សង្គមស៊ីវិល ក្រុមអ្នកសង្កេតការណ៍ សុទ្ធតែចេញមុខជំទាស់ក្នុងការដាក់ខេត្តទាំង ៤ របស់ខ្មែរចូលក្នុងតំបន់នេះ ក្នុងនោះម្ចាស់គណនីហ្វេសប៊ុកឈ្មោះ សួន ចម្រើន លើកឡើងថា កិច្ចសន្យាតំបន់ត្រីកោណនេះមិនមែន ៥ឆ្នាំ ១០ឆ្នាំ ឬ ២០ឆ្នាំទេ គឺ ៩៩ឆ្នាំ ដូច្នេះតើនរណាខ្លះនឹងរស់នៅដល់ពេលបញ្ចប់កិច្ចសន្យានេះទៅ?
ប្រភពដដែលលើកឡើងថា នៅឆ្នាំ១៦២៣ ស្តេចខ្មែរព្រះបាទជ័យជេដ្ឋាទី២ បានឱ្យវៀតណាម ខ្ចីដីកម្ពុជាក្រោមក្នុងកិច្ចសន្យារយៈពេលតែ ៥ឆ្នាំប៉ុណ្ណោះ ប៉ុន្តែ ២ឆ្នាំក្រោយមក គឺក្នុងឆ្នាំ១៦២៥ ព្រះអង្គក៏បានសុគត ដោយគេសង្ស័យថាអគ្គមហេសីរបស់ព្រះអង្គដែលជាបុត្រីស្តេច ប៉ាវដាយ ដាក់ថ្នាំបំពុល។
ម្ចាស់គណនីហ្វេសប៊ុកដដែលនេះបញ្ជាក់ថា ចាប់តាំងពីពេលនោះមក វៀតណាមបានប្រែក្លាយកិច្ចសន្យាខ្ចីទឹកដីខ្មែរបន្តិចម្ដងៗ រហូតទឹកដីខ្មែរក្រោមក្លាយជាកម្មសិទ្ធិស្របច្បាប់របស់វៀតណាម រហូតមកទល់សព្វថ្ងៃនេះ។
នៅឆ្នាំ១៩៩៩ កម្ពុជា វៀតណាម និងឡាវ បានព្រមព្រៀងគ្នាបង្កើតតំបន់អភិវឌ្ឍន៍ត្រីកោណ (CLV) ដោយផ្តើមពីខេត្តចំនួន៧ គឺកម្ពុជា ដាក់ ២ខេត្ត គឺខេត្តស្ទឹងត្រែង និងខេត្តរតនគិរី ចំណែកឡាវ ដាក់ ២ខេត្ត និងវៀតណាម បានដាក់ចំនួន ៣ខេត្ត។
នៅឆ្នាំ២០០៤ រដ្ឋាភិបាលប្រទេសទាំង៣ រួមគ្នាដាក់ខេត្តរៀងៗខ្លួនបន្ថែមទៀត ក្នុងនោះ កម្ពុជា បានដាក់ ១ខេត្តទៀត គឺខេត្តមណ្ឌលគិរី ហើយក្រោយមកទៀត កម្ពុជាក៏បានដាក់ខេត្តរបស់ខ្លួនមួយទៀត គឺខេត្តក្រចេះ ដែលធ្វើឱ្យតំបន់ត្រីកោណនេះកើនឡើងដល់ ១៣ខេត្ត។
បច្ចុប្បន្ន តំបន់ត្រីកោណអភិវឌ្ឍន៍មានខេត្តចំនួន១៣ ក្នុងនោះខេត្ត ៤ របស់កម្ពុជា មានពលរដ្ឋសរុបជាង ៥០ម៉ឺននាក់ ចំណែកខេត្ត ៤ របស់ឡាវ មានពលរដ្ឋសរុបជាង ៧០ម៉ឺននាក់ ដោយឡែកខេត្ត ៥ របស់វៀតណាម មានប្រជាជនរហូតដល់ទៅជាង ៧លាននាក់៕