 មានសភាពស្ងប់ស្ងាត់ បន្ទាប់ពីប្រជាពលរដ្ឋខ្មែរផ្ទុះការតវ៉ាឱ្យរដ្ឋាភិបាលដកខេត្តខ្មែរចេញពីតំបន់អភិវឌ្ឍន៍រួមគ្នាជាមួយវៀតណាម។){kind=link}
មន្ត្រីជាន់ខ្ពស់ក្នុងជួររដ្ឋាភិបាលលោក ហ៊ុន ម៉ាណែត ទម្លាយថា ពលរដ្ឋវៀតណាមដែលរស់នៅក្នុងតំបន់ត្រីកោណអភិវឌ្ឍន៍ (CLV) មានសភាពស្ងប់ស្ងាត់ បន្ទាប់ពីប្រជាពលរដ្ឋខ្មែរផ្ទុះការតវ៉ាឱ្យរដ្ឋាភិបាលដកខេត្តខ្មែរចេញពីតំបន់អភិវឌ្ឍន៍រួមគ្នាជាមួយវៀតណាម។
មន្ត្រីជាន់ខ្ពស់ក្នុងជួររដ្ឋាភិបាលរបស់គណបក្សប្រជាជនកម្ពុជា បានទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី២ សីហា នេះថា នៅពេលដែលពួកគេអមដំណើរលោក ហ៊ុន ម៉ាណែត ទៅខេត្តក្រចេះ និងខេត្តមណ្ឌលគិរី កាលពីពេលថ្មីៗនេះ ពលរដ្ឋដែលរស់នៅក្នុងខេត្តតំបន់ត្រីកោណ ជាពិសេសខេត្តរតនគិរី អះអាងថា ជនជាតិវៀតណាម ដែលចូលទៅរស់នៅក្នុងខេត្តទាំងនេះ មិនហ៊ានចេញមកទីសាធារណៈដូចមុនទេ។
ប្រភពដដែលលើកឡើងថា ប្រជាពលរដ្ឋរស់នៅក្នុងខេត្តរតនគិរី អះអាងថា សព្វថ្ងៃនេះ ខេត្តរបស់ពួកគេមានជនជាតិវៀតណាម ប្រមាណជា ៥០% ដែលចូលមករស់នៅអចិន្ត្រៃយ៍ផង និងចូលមកដើម្បីរកស៊ីផង ប៉ុន្តែអំឡុងពេលផ្ទុះការតវ៉ាឱ្យដកខេត្តទាំង ៤ នេះ ចេញពីជាតំបន់ត្រីកោណ ពលរដ្ឋវៀតណាមទាំងនោះនាំគ្នាសម្ងំក្នុងផ្ទះមិនហ៊ានចេញមកខាងក្រៅឡើយ។
មន្ត្រីរដ្ឋាភិបាលរូបនេះបញ្ជាក់ថា ពលរដ្ឋទាំងនោះបន្តថា កម្មករវៀតណាម ដែលធ្វើការក្នុងតំបន់ដីសម្បទានរបស់ក្រុមហ៊ុនវៀតណាម ក៏ត្រូវបានថៅកែក្រុមហ៊ុនឱ្យផ្អាកចេញពីបរិវេណចម្ការរបស់ពួកគេដែរ ចំណែកនៅតាមទីប្រជុំជន ក៏គេមិនឃើញជនជាតិវៀតណាម ចេញមកលក់ដូរ ឬដើរទិញអីវ៉ាន់តាមផ្សារដូចពេលមុនដែរ។
មន្ត្រីរដ្ឋាភិបាលដដែលនេះបញ្ជាក់ថា ប្រភពពលរដ្ឋទាំងនោះប្រាប់ថា ពលរដ្ឋវៀតណាមភាគច្រើនបានចូលទៅរស់នៅក្នុងខេត្តទាំងនោះជាយូរមកហើយ មានអ្នកខ្លះរស់នៅបានជាង ២០ឆ្នាំហើយ ចំណែកអ្នកខ្លះទៀតចូលទៅរស់នៅតាំងពីឆ្នាំ១៩៩៩ គឺចាប់តាំងពីខេត្តទាំងនេះដាក់អភិវឌ្ឍរួមមក ហើយពួកគេបានរស់នៅបង្កើតជាគ្រួសារតកូនតចៅលើទឹកដីខ្មែររហូតដល់សព្វថ្ងៃនេះ។
របាយការណ៍អង្គការសម្ព័ន្ធខ្មែរជំរឿន និងការពារសិទ្ធិមនុស្ស (លីកាដូ) បានចេញផ្សាយកាលពីចុងឆ្នាំ២០២៣ ជុំវិញដីសម្បទានក្នុងខេត្តទាំង ៤ ក្នុងតំបន់ត្រីកោណអភិវឌ្ឍន៍ថា ក្រុមហ៊ុនវៀតណាម ទទួលបានដីសម្បទានសេដ្ឋកិច្ចពីរដ្ឋាភិបាលកម្ពុជាជាង ២០ម៉ឺនហិកតា (២៤៥៣០៤ហិកតា) នៅតំបន់អភិវឌ្ឍន៍ត្រីកោណ កម្ពុជា វៀតណាម និងឡាវ ក្រោមកិច្ចសន្យារយៈពេល ៩៩ឆ្នាំ។
របាយការណ៍ដដែលបង្ហាញថា ដីសម្បទានសេដ្ឋកិច្ច ១ហិកតា ជាមធ្យមត្រូវការកម្មករ ៣នាក់ ដូច្នេះគេរកឃើញថា ដីសម្បទានសេដ្ឋកិច្ចរបស់ក្រុមហ៊ុនវៀតណាម ជាង ២០ម៉ឺនហិកតានៅតំបន់អភិវឌ្ឍន៍ត្រីកោណនេះ គឺត្រូវការកម្មករជាង ៧០ម៉ឺននាក់ (៧៣៥៩១២នាក់)។
អង្គការលីកាដូ បញ្ជាក់ថា នៅទូទាំងប្រទេសកម្ពុជា ក្រុមហ៊ុនវៀតណាម ទទួលបានដីសម្បទានសេដ្ឋកិច្ចចំនួន ៥៥កន្លែង ដែលមានផ្ទៃដីសរុបជាង ៣៦ម៉ឺនហិកតា (៣៦២៥១៥ហិកតា)៕