 ដែលបង្ហាញពីរូបភាពបះបោរនៅក្នុងប្រទេសមួយចំនួន គឺជាការរៀបចំរបស់រដ្ឋាភិបាលដើម្បីចាប់ខ្លួនសកម្មជនសង្គម និងសកម្មជននយោបាយដែលប្រឆាំងមែនទែននឹងគម្រោងអភិវឌ្ឍន៍ត្រីកោណ (CLV DTA)។){kind=link}
ក្រុមអ្នកតាមដានស្ថានការណ៍កម្ពុជា ចាត់ទុកសកម្មភាពប្រឆាំងគម្រោងត្រីកោណអភិវឌ្ឍន៍ (CLV) ដែលបង្ហាញពីរូបភាពបះបោរនៅក្នុងប្រទេសមួយចំនួន គឺជាការរៀបចំរបស់រដ្ឋាភិបាលដើម្បីចាប់ខ្លួនសកម្មជនសង្គម និងសកម្មជននយោបាយដែលប្រឆាំងមែនទែននឹងគម្រោងអភិវឌ្ឍន៍ត្រីកោណ (CLV DTA)។
អតីតមន្ត្រីជាន់ខ្ពស់សមាគមការពារសិទ្ធិមនុស្សអាដហុក លោក ស៊ឹង សែនករុណា សរសេរលើគណនីហ្វេសប៊ុករបស់ខ្លួននៅថ្ងៃទី១៩ សីហា នេះថា រដ្ឋាភិបាលបានបង្កើតក្រុមយុវជនមិនមានអត្តសញ្ញាណជាក់លាក់មួយចំនួន ឬបាតដៃទី៣ ឲ្យទៅប្រមូលផ្ដុំនៅមុខព្រះបរមរាជវាំង ដើម្បីធ្វើសកម្មភាពបះបោរ ជាកុបកម្មហិង្សា ដោយមានអាវុធដែលជារូបភាពផ្តួលរំលំរដ្ឋអំណាច។
លោកថា ការប្រើល្បិចបែបនេះ គឺដើម្បីទម្លាក់កំហុសលើអ្នកបាតុកម្មប្រឆាំងគម្រោង CLV ហើយចុងក្រោយ ពួកគេបានកេងចំណេញក្រោមរូបភាពថា រដ្ឋាភិបាលបានចាត់វិធានការទប់ស្កាត់ការបះបោរទាន់ពេលដើម្បីសន្តិសុខរបស់ប្រជាពលរដ្ឋ ប៉ុន្តែតាមពិត គឺជាល្បិចដែលពួកគេបង្កើតឡើងទាំងអស់។
លោក ស៊ឹង សែនករុណា លើកឡើងថា ល្បិចកលបែបនេះគេហៅថាបង្កើតព្រឹត្តិការណ៍ដើម្បីលុបបំបាត់ព្រឹត្តិការណ៍ និងដើម្បីលាបពណ៌លើសកម្មជនយុវជនសង្គម និងសកម្មជននយោបាយពិតប្រាកដ ដើម្បីចាប់ពួកគេដាក់គុកឱ្យបានកាន់តែច្រើនបន្ថែមទៀត។
អតីតមន្ត្រីជាន់ខ្ពស់អង្គការក្រៅរដ្ឋាភិបាលរូបនេះ បញ្ជាក់ថា ល្បិចកលនេះក៏ដើម្បីលុបបំបាត់ឆន្ទៈប្រជាពលរដ្ឋពិតប្រាកដដែលតវ៉ាទាមទារឱ្យរដ្ឋាភិបាលដកខ្លួនចេញពីតំបន់ត្រីកោណអភិវឌ្ឍន៍ពិតប្រាកដដែរ ក្នុងនោះក៏ជាឱកាសដែលពួកគេអាចចាប់សកម្មជននយោបាយដែលស្រឡាញ់ប្រជាធិបតេយ្យមិនព្រមចុះចូលជាមួយពួកគេបន្ថែមទៀតដែរ។
កាលពីថ្ងៃទី១៨ ខែសីហា ឆ្នាំ២០២៤ អគ្គស្នងការដ្ឋាននគរបាលជាតិ បានចាប់ខ្លួនមនុស្សចំនួន ៣១នាក់ ដោយចោទថាពួកគេបានអនុវត្តផែនការកុបកម្មរបស់ក្រុមប្រឆាំងជ្រុលនិយម ដែលមានបំណងធ្វើបាតុកម្មផ្តួលរំលំរាជរដ្ឋាភិបាល ក្រោមឧបាយកលទុច្ចរិតរបស់ពួកប្រឆាំងជ្រុលនិយមទាំងក្នុង និងក្រៅប្រទេស។
អគ្គស្នងការដ្ឋាននគរបាលជាតិ ប្ដេជ្ញាបង្ការទប់ស្កាត់នឹងការប្រឆាំងអំពើវិទ្ធង្សនាបង្កអសន្តិសុខ ឈានទៅផ្តួលរំលំរាជរដ្ឋាភិបាលស្របច្បាប់ដែលប្រសូតចេញពីឆន្ទៈរាស្ត្រ និងប្រកាសប្ដេជ្ញាមិនចូលរួមក្នុងសកម្មភាពបំផ្លិចបំផ្លាញជាតិជាមួយពួកក្រុមជ្រុលនិយមអគតិទាំងនេះដាច់ខាត។
ជុំវិញបញ្ហានេះ មន្ត្រីជាន់ខ្ពស់គណបក្សសង្គ្រោះជាតិ លោក ហ៊ីង សុខសាន្ត សរសេរលើគណនីហ្វេសប៊ុករបស់ខ្លួនដោយភ្ជាប់នឹងវីដេអូដែលសមត្ថកិច្ចចាប់បញ្ជូនខ្លួនយុវជនទាំងនោះនៅថ្ងៃទី១៩ សីហា នេះថា សម្ដែងចប់ បើកលុយ។
លោក ហ៊ីង សុខសាន្ត បញ្ជាក់ថា បើមានអ្នកសម្ដែង ក៏ត្រូវតែមានអ្នកទស្សនាដែរ ប៉ុន្តែការសម្ដែងនេះហាក់ដូចជាមិនខ្វល់នឹងអ្នកទស្សនាថាពួកគេជឿ ឬក៏អត់នោះទេ។
យុវជនដែលសមត្ថកិច្ចចាប់ខ្លួនទាំងប៉ុន្មាននាក់នេះ មិនត្រូវបានគេស្គាល់អត្តសញ្ញាណជាក់លាក់ទេ ព្រោះកន្លងមកគេក៏មិនដែលឃើញយុវជនទាំងនេះចេញមុខធ្វើកិច្ចការសង្គមដូចយុវជនចលនាមាតាធម្មជាតិ សមាគមសម្ព័ន្ធនិស្សិតបញ្ញវន្តខ្មែរ និងសកម្មជនកិច្ចព្រមព្រៀងសន្តិភាពទីក្រុងប៉ារីស នោះដែរ។
កាលពីថ្ងៃទី១៨ ខែសីហា ឆ្នាំ២០២៤ សមត្ថកិច្ចក៏បានបិទទីស្នាក់ការសមាគមសម្ព័ន្ធនិស្សិតបញ្ញវន្តខ្មែរក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ និងឃាត់ខ្លួនសមាជិកសមាគមនេះចំនួន ៤នាក់ដែរ ដូចជា ប្រធានស្ដីទីសមាគមសម្ព័ន្ធនិស្សិតបញ្ញវន្តខ្មែរ លោក ធី ថន។ ក្រៅពីការចាប់ខ្លួនសកម្មជនសមាគមសម្ព័ន្ធនិស្សិតបញ្ញវន្តខ្មែរ សកម្មជនផ្សេងទៀតក៏ត្រូវសមត្ថកិច្ចចាប់ខ្លួនដែរ ដូចជា សកម្មជនបក្សភ្លើងទៀន ចំនួន ៣នាក់នៅខេត្តប៉ៃលិន ដោយមិនបញ្ជាក់អំពីមូលហេតុ។
ជុំវិញបញ្ហានេះ គណបក្សឆន្ទៈខ្មែរ និងគណបក្សភ្លើងទៀន បានចេញសេចក្តីថ្លែងការណ៍រួមគ្នាកាលពីថ្ងៃទី១៨ សីហា ថា ការចាប់ខ្លួនសកម្មជនរបស់ខ្លួន គឺជាការរំលោភបំពានសិទ្ធិបុគ្គលយ៉ាងធ្ងន់ធ្ងរដែលផ្ទុយពីច្បាប់ និងរដ្ឋធម្មនុញ្ញនៃកម្ពុជា។
ជាងនេះទៀត សកម្មជនគណបក្សប្រជាធិបតេយ្យមូលដ្ឋាន ក៏ត្រូវសមត្ថកិច្ចចាប់ដែរ ខណៈគណបក្សនេះក៏បានចេញសេចក្តីថ្លែងការណ៍ ដោយចាត់ទុកទង្វើរបស់សមត្ថកិច្ចបែបនេះ គឺមិនគោរពតាមនីតិវិធីច្បាប់ ព្រោះការចាប់ខ្លួនសកម្មជនរបស់ខ្លួនរូបនោះមិនបានបញ្ជាក់ពីមូលហេតុ និងគ្មានដីកាតុលាការ។
ដោយឡែកក្រុមយុវជនចំនួន ១៧នាក់ដែលមកពីខេត្តផ្សេងៗ កាលពីយប់ថ្ងៃទី១៧ ខែសីហា ក្នុងគោលបំណងចូលរួមកម្មវិធីសិក្ខាសាលានៅថ្ងៃទី១៨ ខែសីហា ជាមួយអង្គការកម្មវិធីអភិវឌ្ឍន៍ធនធានយុវជន ហៅកាត់ថា YRDP ក៏ត្រូវអាជ្ញាធរខណ្ឌច្បារអំពៅ ឃាត់ខ្លួនសួរនាំពីគម្រោងធ្វើបាតុកម្មនៅថ្ងៃទី១៨ ខែសីហា នេះដែរ ប៉ុន្តែក្រោយឃាត់ខ្លួន និងសួរនាំ អាជ្ញាធរក៏សម្រេចដោះលែងពួកគេវិញ ដោយបង្ខំឱ្យធ្វើកិច្ចសន្យាផ្ដិតស្នាមមេដៃបញ្ជាក់ថា ពួកគេមិនមែនទៅភ្នំពេញដើម្បីចូលរួមបាតុកម្មប្រឆាំងនឹងគម្រោងអភិវឌ្ឍន៍ CLV នោះទេ។
ជាងនេះទៀត សកម្មជនព្រៃឡង់ ចំនួន ២នាក់ទៀតក៏ត្រូវសមត្ថកិច្ចឃាត់ខ្លួនយកទៅសួរនាំដែរ ដូចជា កញ្ញា ឆេន លក្ខិណា និងកញ្ញា ឆោម ស្រីផា រួមទាំងឪពុករបស់កញ្ញាផងដែរ គឺលោក ម៉ៅ ញ៉ក់ ប៉ុន្តែក្រោយសួរនាំ សមត្ថកិច្ចខេត្តស្ទឹងត្រែង ក៏បានដោះលែងឱ្យពួកគេមានសេរីភាពឡើងវិញក្រោយពីបង្ខំឱ្យពួកគេធ្វើកិច្ចសន្យាឈប់បង្ហោះសារមិនគាំទ្រគម្រោងអភិវឌ្ឍន៍ CLV។
ជុំវិញបញ្ហានេះ កាលពីថ្ងៃទី១៨ ខែសីហា ឆ្នាំ២០២៤ អ្នករិះគន់រដ្ឋាភិបាលកម្ពុជា និងជាអ្នកប្រឆាំងគម្រោងអភិវឌ្ឍន៍ត្រីកោណ លោក ហៃ វណ្ណា បានសរសេរលើគណនីហ្វេសប៊ុករបស់ខ្លួនថា សមត្ថកិច្ចកម្ពុជាបានចាប់ខ្លួនប្អូនរបស់លោកឈ្មោះ ហៃ វណ្ណនិត នៅច្រកព្រំដែនប៉ោយប៉ែត កាលពីថ្ងៃទី១៦ ខែសីហា ហើយរហូតមកដល់ពេលនេះ លោកមិនទាន់ទទួលបានដំណឹងពីប្អូនប្រុសរបស់លោកនៅឡើយទេ។
ទាក់ទិននឹងបញ្ហានេះ កាលពីថ្ងៃទី២៣ ខែកក្កដា ឆ្នាំ២០២៤ លោក ហ៊ុន សែន ធ្លាប់គំរាមលោក ហៃ វណ្ណា ថា ទោះបីជាលោក ហៃ វណ្ណា កំពុងរស់នៅប្រទេសជប៉ុន ក៏ដោយ ក៏លោកមានក្រុមគ្រួសារកំពុងរស់នៅក្នុងស្រុកខ្មែរដែរ ដូច្នេះកុំព្រហើនឱ្យសោះ។ ជាងនេះទៀត លោក ហ៊ុន សែន ក៏បានបញ្ជាឲ្យអាជ្ញាធរស្វែងរកក្រុមគ្រួសាររបស់លោក ហៃ វណ្ណា និងអ្នកប្រឆាំងគម្រោងអភិវឌ្ឍន៍ត្រីកោណនៅក្រៅប្រទេសផ្សេងទៀតដែរ។
ជុំវិញការគំរាមសាច់ញាតិរបស់អ្នកប្រឆាំងគម្រោងអភិវឌ្ឍន៍ត្រីកោណនៅក្រៅស្រុកនេះ សាច់ញាតិរបស់សកម្មជនចលនាយុវជនប្រចាំប្រទេសកូរ៉េខាងត្បូង ម្នាក់ ដែលមានឈ្មោះថា អាចារ្យ ហ្វី ក៏រងនូវការគំរាមកំហែងដែរ។
ប៉ុន្មានថ្ងៃចុងក្រោយនេះ សមត្ថកិច្ចបានដាក់ពង្រាយកម្លាំងពេញទីក្រុងភ្នំពេញ ដើម្បីទប់ស្កាត់ការធ្វើបាតុកម្ម ប៉ុន្តែសកម្មភាពនេះបានបង្កទៅជាការកកស្ទះដល់ការធ្វើដំណើររបស់ប្រជាពលរដ្ឋយ៉ាងធ្ងន់ធ្ងរទៅវិញ។
ទាក់ទងនឹងការរៀបចំឲ្យមានក្រុមយុវជនបះបោរដើម្បីថតរូបផ្សព្វផ្សាយក្នុងគោលបំណងឲ្យយុវជនសកម្មជនឯទៀតយល់ច្រឡំថាជាការបះបោរមែនទែន រួចចោទប្រកាន់តាមចាប់គ្នាដាក់គុកនោះ វាមិនខុសពីល្បិចកលបក្សកុម្មុយនីស្តប្រើក្នុងឆ្នាំ១៩៧៩ នោះទេ។ គេបង្កើតចលនាប្រឆាំងក្លែងក្លាយដើម្បីចាប់ក្រុមប្រឆាំងមែនទែននៅក្នុងស្រុក ផ្តាច់ខ្សែរយៈជាមួយនឹងចលនាតស៊ូខ្មែរស្នេហាជាតិនៅជាយដែនខ្មែរ-ថៃ៕