នៅសល់តែប៉ុន្មានសប្ដាហ៍ទៀតប៉ុន្មានប៉ុណ្ណោះ ដំណើរការបោះឆ្នោតជ្រើសរើសប្រធានាធិបតីអាណត្តិថ្មីនៅសហរដ្ឋអាមេរិក នឹងចាប់ផ្ដើម។
នៅលើទឹកដីបិតាប្រជាធិបតេយ្យពិភពលោក ប៉ូលនយោបាយមានតែពីរប៉ុណ្ណោះ គឺបក្សប្រជាធិបតេយ្យ និងបក្សសាធារណរដ្ឋ ដែលត្រូវដណ្ដើមតំណែងសេតវិមាន និងសមាជិកសភា សមាជិកព្រឹទ្ធសភា នៅក្នុងថ្ងៃបោះឆ្នោតប្រធានាធិបតីនៅថ្ងៃអង្គារ ទី៥ ខែវិច្ឆិកា ឆ្នាំ២០២៤។
មុនដំបូង ការប្រកួតប្រជែងក្នុងបក្សជាមុនសិនដែលជាការជម្រុះបេក្ខជន។ បេក្ខជនដែលមានការគាំទ្រច្រើនចេញពីអ្នកគាំទ្របក្ស ទើបអាចក្លាយជាបេក្ខជនសម្រាំង តែត្រូវឆ្លងកាត់ការអនុម័តពីប្រតិភូរបស់បក្ស។ បក្សមានសិទ្ធតែងតាំង ហើយក៏មានសិទ្ធិដកហូតបេក្ខជនប្រធានាធិបតីដែរ តែលើកលែងប្រធានាធិបតីកំពុងកាន់អំណាច គឺជាបេក្ខជនស្វ័យប្រវត្តិរបស់បក្ស។
នៅប្រទេសមហាអំណាចនេះ ការឃោសនាស្វែងរកសំឡេងគាំទ្រ ចាប់ផ្ដើមតាំងពីដើមឆ្នាំរហូតដល់ថ្ងៃបោះឆ្នោត។ បក្សសាធារណរដ្ឋ ក្នុងអាណត្តិនេះ ជាបក្សជំទាស់។ លោក ដូណាល់ ត្រាំ គឺជាបេក្ខជនប្រធានាធិបតីដែលត្រូវបានបក្សសាធារណរដ្ឋ អនុម័តជាផ្លូវការកាលពីខែមុននេះ ក្រោយពីបេក្ខជន ៣រូបទៀតមិនមានសំឡេងគ្រប់គ្រាន់លើសលោក។
តែនៅថ្ងៃនេះ បក្សប្រជាធិបតេយ្យ កំពុងដំណើរការមហាសន្និបាតបក្សដែលមានរយៈពេល ៤ថ្ងៃ ហើយត្រូវបិទបញ្ចប់នៅថ្ងៃទី២២ សីហា។ បេក្ខជនប្រធានាធិបតីបានទៅលើអ្នកស្រី Kamala Harris អនុប្រធានាធិបតីក្នុងអាណត្តិរបស់លោកប្រធានាធិបតី ចូ បៃដិន។
អ្នកស្រី Harris បានឡើងឈរលេខរៀងទី១ នៃបេក្ខជនតំណែងប្រធានាធិបតីជំនួសលោក បៃដិន ដែលបានលាចេញពីបេក្ខភាពប្រធានាធិបតី ករណីសុខភាព និងវ័យចាស់ខ្លាំង ដែលលោកមានអាយុជិត ៨២ឆ្នាំ។
អ្នកស្រី Harris អាយុ ៥៩ឆ្នាំ បានទទួលការយល់ព្រមឱ្យក្លាយជាបេក្ខជនប្រធានាធិបតីជាផ្លូវការនៅក្នុងការអនុម័តពីប្រតិភូរបស់បក្សប្រជាធិបតេយ្យ។ អ្នកស្រី Harris បានជ្រើសរើសបេក្ខជនអនុប្រធានាធិបតីរបស់អ្នកស្រី គឺលោក Tim Walz អភិបាលរដ្ឋ Minnesota ដែលលោក Tim Walzក៏ត្រូវឆ្លងកាត់អនុម័តពីសមាជិកបក្សប្រជាធិបតេយ្យផងដែរ។
សមាជជាតិបក្សប្រជាធិបតេយ្យ កំពុងកាន់អំណាច ធ្វើឡើងនៅទីក្រុង Chicago។ សមាជបក្សប្រជាធិបតេយ្យ ក៏បានបើកឱ្យអ្នកគាំទ្រចូលរួមផងដែរ។
អ្នកសង្កេតការណ៍ចាប់អារម្មណ៍ខ្លាំង គឺសេចក្ដីថ្លែងការណ៍របស់ថ្នាក់ដឹកនាំកំពូលៗរបស់បក្ស ជាពិសេសសេចក្ដីថ្លែងការណ៍របស់លោក ចូ បៃដិន ជាប្រធានាធិបតីដែលត្រូវចាកចេញពីសេតវិមាននៅថ្ងៃទី២០ ខែមករា ឆ្នាំ២០២៥ ជាថ្ងៃចូលកាន់តំណែងប្រធានាធិបតីថ្មីជាបេក្ខជនឈ្នះនៅក្នុងការបោះឆ្នោតនាខែវិច្ឆិកា។
នៅពេលទៅដល់ទីក្រុង Chicago ដើម្បីបើកសមាជរបស់គណបក្សប្រជាធិបតេយ្យ លោកប្រធានាធិបតី ចូ បៃដិន ស្នើដល់ក្រុមអ្នកប្រជាធិបតេយ្យឱ្យរួបរួមគ្នាគាំទ្រអនុប្រធានាធិបតី អ្នកស្រី Kamala Harris ដើម្បីផ្តួលគូប្រជែង គឺលោក Donald Trump បេក្ខជនរបស់គណបក្សសាធារណរដ្ឋ។
ក្រុមអ្នកគាំទ្របក្សប្រជាធិបតេយ្យ បានជួបជុំគ្នាក្នុងសមាជជាតិរបស់ពួកគេនៅឯទីលាន United Center នៃទីក្រុង Chicago ខណៈដែលវត្តមានរបស់លោក បៃដិន ជានិមិត្តរូបតំណាងឱ្យការផ្ទេរប្រជាប្រិយភាពទៅឱ្យអ្នកស្រី Harris បន្ទាប់ពីលោកសម្រេចចិត្តបោះបង់ការប្រកួតប្រជែងតំណែងប្រធានាធិបតីនៅអាណត្តិទី២ ក្នុងការបោះឆ្នោតដែលនៅសល់ប៉ុន្មានសប្ដាហ៍ខាងមុខ។
លោក បៃដិន លើកយកករណីក្នុងប្រព័ន្ធតុលាការរបស់លោក Trump ដែលលោកថាជាការគំរាមកំហែងដល់លទ្ធិប្រជាធិបតេយ្យ និងប្រព័ន្ធយុត្តិធម៌សហរដ្ឋអាមេរិក។ លោក បៃដិន បានអំពាវនាវឱ្យពលរដ្ឋអាមេរិកបោះឆ្នោតជូនអ្នកស្រី Harris ដែលមានជំនាញជារដ្ឋអាជ្ញា ជាជាងបេក្ខជនសាធារណរដ្ឋ លោក ដូណាល់ ត្រាំ ដើម្បីភាពរស់រៀនឡើងវិញនៃប្រព័ន្ធយុត្តិធម៌ និងការពង្រឹងប្រជាធិបតេយ្យនៅសហរដ្ឋអាមេរិក។ ជាមួយគ្នានេះ លោក បៃដិន ក៏ថ្លែងអំពីសមិទ្ធផលក្រោមការដឹកនាំរបស់លោក និងអ្នកស្រី Harris ផងដែរ។
បរិយាកាសក្នុងមហាសន្និបាតបក្សប្រជាធិបតេយ្យ ពោរពេញទៅដោយក្តីសង្ឃឹមថានឹងមានជោគជ័យជាថ្មីជាមួយបេក្ខនារីប្រធានាធិបតី អ្នកស្រី Kamala Harris។
អ្នកស្រី Kamala Harris បានឡើងថ្លែងទៅកាន់មហាសន្និបាត។
ក្នុងសេចក្ដីថ្លែងការណ៍ដ៏ខ្លី អ្នកស្រីបានថ្លែងពីការការចងចាំជាគុណូបការៈរបស់លោក ចូ បៃដិន ដែលអ្នកស្រីថាជាប្រធានាធិបតីដ៏អស្ចារ្យនៃប្រជាជនអាមេរិក។
ក្នុងវេទិកាសមាជជាតិបក្សប្រជាធិបតេយ្យ ក៏មានវត្តមានអតីតប្រធានាធិបតី មានដូចជា លោក បារ៉ាក់ អូបាម៉ា និងលោក ប៊ីល ឃ្លិនតុន។ អតីតប្រធានាធិបតីទាំងពីរ ឡើងថ្លែងសេចក្ដីថ្លែងការណ៍ដែលជាការកំណត់យុទ្ធសាស្ត្រនយោបាយរបស់បក្សប្រជាធិបតេយ្យ បើអ្នកស្រី Harris ឈ្នះឆ្នោតអាណត្តិថ្មីទៀត។
ការស្ទង់មតិថ្នាក់ជាតិមួយកាលពីពេលថ្មីៗដែលស្រង់មកចុះផ្សាយដោយសារព័ត៌មាន The Economist បង្ហាញថា អ្នកស្រី Harris មានការកើនឡើងការគាំទ្រពី ៤៨ភាគរយទៅ ៤៩ភាគរយ។ ចំណែកលោក ដូណាល់ ត្រាំ មានការគាំទ្រពី ៤៥ភាគរយទៅ ៤៦ភាគរយ។ តែអ្នកវិភាគថាភាពឈ្នះ និងចាញ់រវាងគូប្រជែងទាំងពីរ អាចមានពី ២% ទៅ ៣% នៅក្នុងថ្ងៃបោះឆ្នោតនាថ្ងៃទី៥ ខែវិច្ឆិកា ឆ្នាំ២០២៤៕
© 2024, ឌឹ ខេមបូឌា ដេលី. All rights reserved.