 ឡើងវិញ និងបិទបញ្ចប់សង្គ្រាម ទើបអ៊ីរ៉ង់យល់ព្រមបើកកិច្ចចរចានុយក្លេអ៊ែរនៅពេលក្រោយ។){kind=link}
របបសាធារណរដ្ឋឥស្លាមអ៊ីរ៉ង់ បានផ្ដល់សំណើថ្មីមួយទៅកាន់សហរដ្ឋអាមេរិក ដើម្បីបើកច្រកសមុទ្រហ័រមូស (Hormuz) ឡើងវិញ និងបិទបញ្ចប់សង្គ្រាម ទើបអ៊ីរ៉ង់យល់ព្រមបើកកិច្ចចរចានុយក្លេអ៊ែរនៅពេលក្រោយ។
បណ្ដាញផ្សាយព័ត៌មានអាមេរិក Axios កាលពីថ្ងៃអាទិត្យ ទី២៦ ខែមេសា បានឱ្យដឹងថា សំណើថ្មីរបស់អ៊ីរ៉ង់ ដូចនេះ ត្រូវបានបញ្ជូនទៅឱ្យសហរដ្ឋអាមេរិកតាមរយៈប្រទេសប៉ាគីស្ថាន គឺផ្ដោតជាសំខាន់ទៅលើការដោះស្រាយវិបត្តិច្រកសមុទ្រ Hormuz និងការបិទខ្ទប់របស់សហរដ្ឋអាមេរិកជាមុនសិន ទើបអ៊ីរ៉ង់ព្រមចរចាអំពីកម្មវិធីនុយក្លេអ៊ែររបស់អ៊ីរ៉ង់ ប៉ុន្តែក្នុងនោះ ទីក្រុងតេហេរ៉ង់ បញ្ជាក់ថា ការចរចាអំពីការបញ្ចប់សង្គ្រាម ក៏ត្រូវធ្វើឡើងជាមួយគ្នានឹងករណីបើកឡើងវិញច្រកសមុទ្រដែរ។
តាមប្រភពព័ត៌មាន Axios សំណើថ្មីរបស់អ៊ីរ៉ង់ អំពីបទឈប់បាញ់ នឹងត្រូវពន្យារបន្ថែមរយៈពេលវែង ឬមួយភាគីទាំងពីរត្រូវយល់ព្រមលើការបិទបញ្ចប់សង្គ្រាមជាអចិន្ត្រៃយ៍។ ចំណែកកិច្ចចរចានុយក្លេអ៊ែរ អាចធ្វើបានបន្ទាប់ពីច្រកសមុទ្រ Hormuz ត្រូវបានបើកឡើងវិញ ហើយនាវាចម្បាំងអាមេរិកក៏បញ្ឈប់ការដាក់ពង្រាយនៅតំបន់សមុទ្រមជ្ឈិមបូព៌ាដែរ។
បើតាមប្រភពដដែលនេះ សេតវិមានបានទទួលសំណើថ្មីរបស់អ៊ីរ៉ង់ ហើយ តែមិនច្បាស់ថាតើសហរដ្ឋអាមេរិកចាប់អារម្មណ៍នឹងពិចារណាលើសំណើនេះឬក៏យ៉ាងណានោះទេ។
យ៉ាងណា ការចរចាស្វែងរកសន្តិភាពកំពុងជាប់គាំង ដោយសារតែការបិទខ្ទប់ច្រកសមុទ្រ Hormuz និងសំណុំរឿងនុយក្លេអ៊ែររបស់អ៊ីរ៉ង់ បន្ទាប់ពីភាគីសហរដ្ឋអាមេរិកបានសម្រេចលុបចោលការបញ្ជូនប្រតិភូទៅចរចានៅប៉ាគីស្ថាន ព្រោះតែភាគីអ៊ីរ៉ង់ មិនព្រមបើកចរចាផ្ទាល់ជាមួយសហរដ្ឋអាមេរិក។
តែបើតាមប្រធានាធិបតីសហរដ្ឋអាមេរិក លោក ដូណាល់ ត្រាំ អ៊ីរ៉ង់អាចទាក់ទងទៅកាន់សហរដ្ឋអាមេរិកបាន ប្រសិនបើពួកគេចង់ចរចាដើម្បីបញ្ចប់សង្គ្រាមរវាងប្រទេសទាំងពីរ។
នៅក្នុងបទសម្ភាសន៍ជាមួយនឹងបណ្ដាញទូរទស្សន៍ Fox News លោក ត្រាំ បានបង្ហាញពីជំហរបើកចំហសម្រាប់ការចរចា ប្រសិនបើទីក្រុងតេហេរ៉ង់ មានឆន្ទៈក្នុងការស្វែងរកដំណោះស្រាយបញ្ចប់ជម្លោះប្រដាប់អាវុធដែលកំពុងកើតមាន។
ការលើកឡើងរបស់លោក ត្រាំ បន្ទាប់ពីកិច្ចខិតខំប្រឹងប្រែងផ្នែកការទូតដើម្បីស្ដារការចរចាសន្តិភាពកាលពីថ្ងៃចុងសប្ដាហ៍នេះ ស្ថិតក្នុងភាពមិនប្រាកដប្រជា ព្រោះប្រតិភូអ៊ីរ៉ង់ មិនព្រមរង់ចាំចរចាជាមួយភាគីអាមេរិក ដោយប្រមុខការទូតអ៊ីរ៉ង់ លោក Abbas Araghchi ដូចជាឆ្លេឆ្លាបន្តិចធ្វើទៅជួបមេដឹកនាំប្រទេសអូម៉ង់ ខណៈប្រតិភូអាមេរិកកំពុងរៀបចំចេញទៅប៉ាគីស្ថាន។ ក្រោយមកទៀតមានដំណឹងចុះផ្សាយថា លោក Abbas Araghchi ត្រឡប់ទៅប៉ាគីស្ថាន វិញ ដែលបានតែប៉ុន្មាន លោក Abbas Araghchi ឡើងយន្តហោះទៅកាន់ទីក្រុងមូស្គូ។
តាមបណ្ដាញផ្សាយព័ត៌មាន Aljazeera រដ្ឋមន្ត្រីការបរទេសអ៊ីរ៉ង់ លោក Abbas Araghchi បានធ្វើដំណើរមកដល់ប្រទេសរុស្ស៊ី ជាទីដែលរូបលោកនឹងជួបពិភាក្សាជាមួយប្រធានាធិបតីលោក វ្ល៉ាឌីមៀ ពូទីន អំពីសង្គ្រាមនៅអ៊ីរ៉ង់ ផ្ដើមដោយសហរដ្ឋអាមេរិក និងអ៊ីស្រាអែល។
លោក Araghchi បានធ្វើដំណើរមកដល់ទីក្រុង St Petersburg នៅថ្ងៃចន្ទ ទី២៧ ខែមេសា នេះ បន្ទាប់ពីបានបំពេញទស្សនកិច្ចកាលពីចុងសប្តាហ៍នៅឯប្រទេសប៉ាគីស្ថាន និងអូម៉ង់ ដែលជាប្រទេសជួយសម្រុះសម្រួលការចរចាអ៊ីរ៉ង់-អាមេរិក។
ភ្លាមៗពេលទៅដល់ទីក្រុងមូស្គូ កំពូលអ្នកការទូតអ៊ីរ៉ង់ រូបនេះ បាននិយាយថា លោកធ្វើដំណើរមករុស្ស៊ី នាពេលនេះ គឺក្រោមគោលបំណងបន្តកិច្ចពិគ្រោះយោបល់រវាងទីក្រុងតេហេរ៉ង់ និងទីក្រុងមូស្គូ ស្ដីពីបញ្ហាក្នុងតំបន់ និងអន្តរជាតិ។
តាមលោក Araghchi ជំនួបរបស់លោកជាមួយលោកប្រធានាធិបតីរុស្ស៊ី គឺជាឱកាសល្អមួយ ដោយផ្ដោតខ្លាំងអំពីស្ថានការណ៍ចុងក្រោយនៃសង្គ្រាមអាមេរិកនៅអ៊ីរ៉ង់។
ចំណែកប្រទេសប៉ាគីស្ថាន ដែលដើរតួជាអ្នកសម្របសម្រួល បានអះអាងថា បេសកកម្មរបស់ខ្លួនកំពុងបង្រួញគម្លាតនៃការខ្វែងគំនិតគ្នារវាងសហរដ្ឋអាមេរិក និងអ៊ីរ៉ង់ ទោះបីជាកិច្ចចរចាដោយផ្ទាល់មិនអាចធ្វើបានក៏ដោយ។
ស្របពេលដែលក្តីសង្ឃឹមសន្តិភាពកំពុងជាប់គាំង តម្លៃប្រេងឆៅពិភពលោកបានហក់ឡើងប្រមាណ ២,៥ភាគរយ ដល់ ១០៨ដុល្លារក្នុងមួយធុងនាថ្ងៃចន្ទនេះ។ ការបន្តឡើងតម្លៃប្រេងឆៅពិភពលោក ព្រោះតែច្រកសមុទ្រ Hormuz ដែលជាផ្លូវទឹកដ៏សំខាន់មួយនៅតំបន់មជ្ឈិមបូព៌ា នៅតែបន្តរាំងខ្ទប់ដោយនាវាចម្បាំងសហរដ្ឋអាមេរិក។
យោងតាមទីបញ្ជាការកណ្ដាលសហរដ្ឋអាមេរិក កប៉ាល់ដឹកប្រេងឆៅយ៉ាងតិច ៣៧គ្រឿង ត្រូវរុញឱ្យត្រឡប់ទៅកំពង់ផែនៅឆ្នេរសមុទ្រអ៊ីរ៉ង់ វិញ ដែលកប៉ាល់ទាំងនោះត្រូវឆ្លងកាត់ច្រកសមុទ្រ Hormuz ដើម្បីទៅចែកចាយប្រេងនៅតំបន់អាស៊ីប៉ាស៊ីហ្វិក។
អាស៊ីប៉ាស៊ីហ្វិក ជាប្រភពបញ្ជាទិញប្រេងពីអ៊ីរ៉ង់ និងតំបន់មជ្ឈិមបូព៌ាដល់ទៅ ៨០ភាគរយ ក្នុងនោះ ចិនជាប្រទេសនាំប្រេងច្រើនធំជាងគេ បន្ទាប់មកគឺប្រទេសឥណ្ឌា។
តាមទីបញ្ជាការកណ្ដាលសហរដ្ឋអាមេរិក អ៊ីរ៉ង់បាត់បង់ចំណូលពីការបញ្ជូនប្រេងទៅក្រៅប្រទេសក្នុងមួយថ្ងៃពី ៤៣០លានដុល្លារទៅ ៥០០លានដុល្លារអាមេរិក។
លោក ត្រាំ បញ្ជាក់ថា ការឡោមព័ទ្ធច្រកសមុទ្រ Hormuz កំពុងមានប្រសិទ្ធភាពខ្លាំង ព្រោះធ្វើឱ្យរបបសាធារណរដ្ឋឥស្លាមអ៊ីរ៉ង់ ជួបវិបត្តិសេដ្ឋកិច្ចយ៉ាងធ្ងន់ធ្ងរ៕
© 2026, ឌឹ ខេមបូឌា ដេលី. All rights reserved.