 ដាច់ខាត។){kind=link}
ពលករខ្មែរក្នុងប្រទេសកូរ៉េខាងត្បូង ប្រកាសធ្វើបាតុកម្មអំឡុងពេលមេដឹកនាំបក្សកាន់អំណាចលោក ហ៊ុន សែន មានវត្តមានក្នុងប្រទេសនេះ ដើម្បីបង្ហាញទៅលោក ហ៊ុន សែន និងពិភពលោកថា ពលករខ្មែរដែលរស់នៅប្រទេសកូរ៉េខាងត្បូង មិនគាំទ្រគម្រោងអភិវឌ្ឍន៍ត្រីកោណ (CLV DTA) ដាច់ខាត។
ប្រធានចលនាយុវជនសង្គ្រោះជាតិក្នុងប្រទេសកូរ៉េខាងត្បូង លោក មាស ពិសាល បានលើកឡើងនៅក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី០៩ ខែកញ្ញា ថា លោក ហ៊ុន សែន គឺជាកូនសោគន្លឹះតែមួយគត់ដែលត្រូវដោះស្រាយបញ្ហាគម្រោងអភិវឌ្ឍន៍ត្រីកោណជាមួយវៀតណាម តាមការទាមទាររបស់ពលរដ្ឋខ្មែរ។
លោកអះអាងថា សព្វថ្ងៃនេះពិតមែនតែលោក ហ៊ុន សែន មិនមែនជានាយករដ្ឋមន្ត្រីដែលតែងតាំងដោយព្រះរាជក្រឹត្យ ប៉ុន្តែការសម្រេចរបស់គាត់គ្រប់បែបយ៉ាង គឺនៅតែជានាយករដ្ឋមន្ត្រីដដែល។ ជាងនេះទៅទៀត លោក ហ៊ុន សែន ក៏ជាមនុស្សតែម្នាក់គត់ដែលបានចុះហត្ថលេខាដាក់ខេត្តទាំង៤របស់ខ្មែរ ចូលទៅក្នុងគម្រោងអភិវឌ្ឍន៍ត្រីកោណជាមួយឡាវ និងវៀតណាម ចាប់តាំងពីឆ្នាំ១៩៩៩ មក។
ប្រធានចលនាយុវជនសង្គ្រោះជាតិរូបនេះអះអាងថា ការធ្វើដំណើរទៅប្រទេសកូរ៉េខាងត្បូង របស់លោក ហ៊ុន សែន យ៉ាងតក់ក្រហល់នៅពេលនេះ ទំនងជាខ្លាចការធ្វើបាតុកម្មរបស់ពលករខ្មែរនៅកូរ៉េ ដែរ ព្រោះក្រសួងការបរទេសកម្ពុជាបានជូនដំណឹងពីដំណើររបស់គាត់ទៅកាន់ប្រទេសកូរ៉េ ត្រឹមតែមួយថ្ងៃមុនការចេញដំណើររបស់គាត់ប៉ុណ្ណោះ ដែលការជូនដំណឹងនេះធ្វើឡើងខុសពីសព្វមួយដង ដែលជូនដំណឹងមុនរហូតដល់ទៅ ១អាទិត្យ ឬពីរអាទិត្យមុននឹងគាត់ចេញទៅបរទេសម្តងៗ។
លោកថា តាមច្បាប់នៅប្រទេសកូរ៉េ មុននឹងធ្វើបាតុកម្ម គឺត្រូវជូនដំណឹងទៅអាជ្ញាធរកូរ៉េ ១សប្តាហ៍មុន ប៉ុន្តែដោយសារពេលវេលាខ្លី គឺពិតជាមានការលំបាកខ្លាំងណាស់។ ជាងនេះទៀត វត្តមានរបស់លោក ហ៊ុន សែន នៅប្រទេសកូរ៉េ ម្តងនេះ គឺចំថ្ងៃធ្វើការរបស់ពលករខ្មែរថែមទៀត ដូច្នេះលោកមិនដឹងថាតើពលករដែលចង់ចូលរួមធ្វើបាតុកម្មនេះ អាចមកបានប៉ុន្មាននាក់នោះទេ ដោយសារតែពួកគេជាប់រវល់ធ្វើការងារ។
លោក មាស ពិសាល បញ្ជាក់ថា ការធ្វើបាតុកម្មនៅពេលនេះ គ្រោងធ្វើឡើងនៅទីក្រុងសេអ៊ូល ព្រោះជាទីក្រុងដែលលោក ហ៊ុន សែន មានវត្តមានចូលកម្មវិធីនានា ខណៈទីក្រុងខ្វាងជូ នឹងត្រូវត្រៀមទុកធ្វើបាតុកម្មធំដែលមានមនុស្សចូលរួមប្រមាណជា ៥ម៉ឺននាក់នាពេលខាងមុខនេះ។
កាលថ្ងៃទី០៩ ខែកញ្ញា ឆ្នាំ២០២៤ នេះ មេដឹកនាំបក្សកាន់អំណាចលោក ហ៊ុន សែន បានចាកចេញពីប្រទេសកម្ពុជាទៅកាន់សាធារណរដ្ឋកូរ៉េ ដើម្បីចូលរួមក្នុងវេទិកាចំណេះដឹងពិភពលោកលើកទី២៥ និងដើម្បីទទួលសញ្ញាបត្របណ្ឌិតកិត្តិយស «ភាពជាអ្នកដឹកនាំ និងការកសាងសន្តិភាព» ផងដែរ ដែលគាត់នឹងមានវត្តមាននៅប្រទេសកូរ៉េ រយៈពេល ៥ថ្ងៃ គឺចាប់ថ្ងៃទី៩ រហូតដល់ថ្ងៃទី១៣ ខែកញ្ញា ក្នុងសប្តាហ៍នេះ។
កាលពីថ្ងៃទី១១ ខែសីហា ឆ្នាំ២០២៤ បាតុករក្នុងប្រទេសកូរ៉េខាងត្បូង ប្រមាណជា ៣ម៉ឺននាក់ បានធ្វើបាតុកម្មប្រឆាំងនឹងគម្រោងអភិវឌ្ឍន៍ត្រីកោណម្តងរួចមកហើយ ដើម្បីឱ្យរដ្ឋាភិបាលកម្ពុជាដកខ្លួនចេញពីគម្រោងមួយនេះជាបន្ទាន់ ដោយសារពួកគេបារម្ភពីការបាត់បង់ខេត្តទាំងបួនរបស់កម្ពុជាទៅប្រទេសវៀតណាម នៅថ្ងៃអនាគត ដូចដែលកម្ពុជាធ្លាប់បានបាត់បង់ទឹកដីកម្ពុជាក្រោម កោះត្រល់ និងចង្កោមកោះក្រចកសេះរួចទៅហើយនោះ៕