 ជំរុញឲ្យប្រទេសម្ចាស់ហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ជួយការពារជោគវាសនាអនាគតរបស់កម្ពុជា និងពលរដ្ឋខ្មែរដែលរងទុក្ខវេទនារាប់សិបឆ្នាំកន្លងមកក្រោមការដឹកនាំរបស់រដ្ឋាភិបាលដែលគ្រប់គ្រងដោយគណបក្សប្រជាជនកម្ពុជា។){kind=link}
ចលនាខ្មែរដើម្បីប្រជាធិបតេយ្យ (KMD) ជំរុញឲ្យប្រទេសម្ចាស់ហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ជួយការពារជោគវាសនាអនាគតរបស់កម្ពុជា និងពលរដ្ឋខ្មែរដែលរងទុក្ខវេទនារាប់សិបឆ្នាំកន្លងមកក្រោមការដឹកនាំរបស់រដ្ឋាភិបាលដែលគ្រប់គ្រងដោយគណបក្សប្រជាជនកម្ពុជា។
ចលនាខ្មែរដើម្បីប្រជាធិបតេយ្យ (Khmer Movement for Democracy) បានចេញប្រកាសព័ត៌មានស្ដីពីការដាក់ញត្តិរបស់ពលរដ្ឋខ្មែរ និងអង្គការសង្គមស៊ីវិលនានា កាលពីថ្ងៃទី៣០ ខែកញ្ញា ឆ្នាំ២០២៤ ដោយអំពាវនាវឱ្យប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ស្ដីពីកម្ពុជា ផ្ដួចផ្ដើមការត្រួតពិនិត្យដោយឯករាជ្យលើការអនុវត្តកិច្ចព្រមព្រៀងមួយនេះឡើងវិញ។
ប្រភពដដែលអះអាងថា កិច្ចព្រមព្រៀងអន្តរជាតិមួយនេះបានបរាជ័យទាំងស្រុងក្រោមស្នាដៃមេដឹកនាំរបស់បក្សកាន់អំណាច លោក ហ៊ុន សែន ដែលគ្រប់គ្រងប្រទេសកម្ពុជាអស់រយៈពេលជាង ៤ទសវត្សរ៍មកនេះ។
ប្រភពដដែលបន្តថា បរាជ័យក្នុងការធានានូវការអនុវត្តសិទ្ធិសម្រេចរបស់ពលរដ្ឋកម្ពុជាតាមរយៈនៃការបោះឆ្នោតដោយសេរី ត្រឹមត្រូវ និងយុត្តិធម៌ រួមទាំងការការពារអធិបតេយ្យ ឯករាជ្យ បូរណភាពទឹកដីជាតិរបស់កម្ពុជាផងដែរ។
KMD លើកឡើងថា ការកម្ទេចលទ្ធិប្រជាធិបតេយ្យតាមរយៈនៃការរំលាយគណបក្សសង្គ្រោះជាតិ ការរំលោភលើអធិបតេយ្យជាតិខ្មែរដោយការពឹងផ្អែកលើប្រទេសចិន ដែលអនុញ្ញាតឱ្យមានមូលដ្ឋានយោធាចិននៅកំពង់ផែរាម។
លើសពីនេះ ក៏មានការដាក់ទឹកដីខ្មែរក្នុងតំបន់ត្រីកោណអភិវឌ្ឍន៍ (CLV-DTA) ដែលជាការគំរាមកំហែងយ៉ាងធ្ងន់ធ្ងរដល់អធិបតេយ្យ និងបូរណភាពទឹកដីរបស់កម្ពុជាពីប្រទេសវៀតណាម។
ចលនាខ្មែរដើម្បីប្រជាធិបតេយ្យ បញ្ជាក់ថា ប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ដូចជាសហរដ្ឋអាមេរិក ចិន រុស្ស៊ី បារាំង ចក្រភពអង់គ្លេស ជប៉ុន ឥណ្ឌូនេស៊ី ឥណ្ឌា និងអូស្ត្រាលី ជាដើម គឺជាប្រទេសដែលមានឥទ្ធិពលគ្រប់គ្រាន់ក្នុងការជំរុញឲ្យអ្នកកាន់អំណាចកំពូលនៅកម្ពុជា បំពេញកាតព្វកិច្ចជាអន្តរជាតិស្របច្បាប់របស់ខ្លួន។
កិច្ចព្រមព្រៀងសន្តិភាពទីក្រុងប៉ារីស (Paris Peace Accords) គឺជាកិច្ចព្រមព្រៀងមួយស្ដីពីដំណោះស្រាយនយោបាយដើម្បីបញ្ចប់ជម្លោះនៅកម្ពុជា ធ្វើឡើងនៅទីក្រុងប៉ារីស ប្រទេសបារាំង កាលពីថ្ងៃទី២៣ ខែតុលា ឆ្នាំ១៩៩១ ក្នុងគោលបំណងឈានទៅរកការរៀបចំឲ្យមានសន្តិភាពឡើងវិញនៅកម្ពុជា និងជំរុញឱ្យរដ្ឋាភិបាលកម្ពុជាដឹកនាំតាមបែបលទ្ធិប្រជាធិបតេយ្យ ដើម្បីការពារអធិបតេយ្យ ឯករាជ្យ បូរណភាពទឹកដី និងឯកភាពជាតិរបស់កម្ពុជាទាំងមូល៕