អតីតមេដឹកនាំបក្សប្រឆាំង លោក សម រង្ស៊ី លើកឡើងថា របបដឹកនាំផ្ដាច់ការនៅកម្ពុជានឹងដួលរលំដូចរបបដឹកនាំផ្ដាច់ការនៅប្រទេសបង់ក្លាដេស ក្នុងពេលឆាប់ៗនេះ ប្រសិនបើពលរដ្ឋខ្មែររួបរួមគ្នាជាកម្លាំងតែមួយ។
អតីតប្រធានគណបក្សសង្គ្រោះជាតិ លោក សម រង្ស៊ី បានសរសេរនៅលើទំព័រហ្វេសប៊ុករបស់លោកនៅថ្ងៃទី២២ តុលា នេះថា សាលាក្ដីឧក្រិដ្ឋកម្មអន្តរជាតិបង់ក្លាដេស បានចេញដីកាចាប់ខ្លួនអ្នកស្រី ហាស់ ស៊ីណា នៅពេលនេះ បន្ទាប់ពីពលរដ្ឋបង់ក្លាដេស បាតុកម្មទម្លាក់ពីអំណាចក្នុងករណីសម្លាប់រង្គាលក្រោមអំណាចដឹកនាំរបស់គាត់ ដូច្នេះនៅពេលដែលពលរដ្ឋខ្មែររួបរួមគ្នាជាធ្លុងមួយ ក៏អាចទាមទារឱ្យរដ្ឋាភិបាលកម្ពុជាគោរពសិទ្ធិសេរីភាពដូចដែលមានចែងនៅក្នុងរដ្ឋធម្មនុញ្ញ និងកិច្ចព្រមព្រៀងទីក្រុងប៉ារីសដែរ។
លោក សម រង្ស៊ី លើកឡើងថា ចលនាតវ៉ានៅក្រៅប្រទេសនៅពេលនេះកំពុងផ្ទុះឡើងយ៉ាងខ្លាំង ហើយក្នុងពេលឆាប់ៗនេះ ប្រជាជនខ្មែរទាំងអស់នឹងបញ្ចប់របបផ្ដាច់ការត្រកូលហ៊ុនជាមិនខាន ហើយពេលនោះ ពលរដ្ឋខ្មែរទាំងអស់នឹងទទួលបានយុត្តិធម៌គ្រប់ៗគ្នា។
លោកបន្តថា របបផ្ដាច់ការមិនអាចនៅស្ថិតស្ថេរបានទេ ខណៈមេដឹកនាំផ្ដាច់ការទាំងអស់ក៏នឹងដួលរលំដែរ។ លោកថា មិនសំខាន់ថាជនផ្ដាច់ការខ្លាំង និងមានអំណាចធំប៉ុនណាទេ ព្រោះជនផ្ដាច់ការមិនអាចយកឈ្នះអំណាចរបស់ពលរដ្ឋបានឡើយ។
អតីតមេដឹកនាំបក្សប្រឆាំងរូបនេះបញ្ជាក់ថា នៅពេលដែលពលរដ្ឋខ្មែររួមគ្នារឹងមាំ ប្រាកដជាអាចការពារប្រទេសជាតិបាន និងអាចដោះស្រាយបញ្ហាទឹកដីរបស់ខ្លួនបាន រួមទាំងអាចដោះស្រាយបញ្ហាបំណុល ហើយនឹងអាចប្រយុទ្ធប្រឆាំងនឹងអំពើពុករលួយ ដែលជាឫសគល់ដ៏កខ្វក់ក្នុងសង្គមជាតិរបស់ខ្លួនបានដូចគ្នាដែរជាមិនខានឡើយ។
កាលពីថ្ងៃទី១៧ តុលា សាលាក្ដីឧក្រិដ្ឋកម្មអន្តរជាតិនៃប្រទេសបង់ក្លាដេស បានចេញដីកាចាប់ខ្លួនអ្នកស្រី ហ្សេក ហាស់ ស៊ីណា អតីតនាយករដ្ឋមន្ត្រីបង់ក្លាដេស ក្រោមបទចោទពាក់ព័ន្ធនឹងការសម្លាប់រង្គាលទៅលើចលនានិស្សិត និងយុវជនបង់ក្លាដេស អំឡុងការបះបោរនយោបាយដ៏ហិង្សាមួយនៅដើមខែសីហា ដែលកម្លាំងមហាជនបានរុញស្ត្រីក្រាញអំណាចម្នាក់នេះធ្លាក់ពីអំណាច។
ទាក់ទិននឹងបញ្ហានេះ ក្នុងកម្មវិធីទទួលទានអាហារជាមួយសមាគមឧកញ៉ាកាលពីពេលកន្លងទៅ នាយករដ្ឋមន្ត្រីកម្ពុជា លោក ហ៊ុន ម៉ាណែត ព្រមានថា ប្រសិនបើពលរដ្ឋខ្មែរហ៊ានចេញធ្វើបាតុកម្មនៅទីក្រុងភ្នំពេញ ដើម្បីប្រឆាំងនឹងការដឹកនាំរបស់លោក នោះច្បាស់ជាប្រឈមនឹងការបាត់បង់ជីវិតមនុស្សយ៉ាងច្រើនដូចនៅប្រទេសបង់ក្លាដេស (Bangladesh) ដែរ។
យ៉ាងណាក៏ដោយ អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ ធ្លាប់បានលើកឡើងកាលពីពេលថ្មីៗនេះថា រដ្ឋាភិបាលកម្ពុជាសព្វថ្ងៃនេះបានធ្វើទុក្ខបុកម្នេញពលរដ្ឋដើម្បីការពារអំណាចក្នុងគ្រួសាររបស់ខ្លួនដូចគ្នាទៅនឹងការដឹកនាំរបស់អតីតនាយករដ្ឋមន្ត្រីបង់ក្លាដេស ដែរ ដែលខុសទៅនឹងខ្លឹមសារធម្មនុញ្ញរបស់កម្ពុជាយ៉ាងធ្ងន់ធ្ងរ។
ចំណែកអ្នកជំនាញភូមិសាស្ត្រនយោបាយក្នុងតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី បានលើកឡើងថា នៅពេលដែលការទាមទាររបស់ពលរដ្ឋឈរលើភាពត្រឹមត្រូវ និងប្រើប្រាស់វិធីសាស្ត្រអហិង្សា ការប្ដេជ្ញាចិត្តមិនងាករេ និងមិនរាថយ នោះការទាមទាររបស់ពួកគេច្បាស់ជាអាចបង្ខំឱ្យមេដឹកនាំផ្ដាច់ការរឹងមាំបំផុត ចុះចេញពីតំណែង ឬរត់ចេញពីប្រទេសដោយភាពអាម៉ាស់ជាមិនខាន៕
© 2024, ឌឹ ខេមបូឌា ដេលី. All rights reserved.