អនុប្រធានាធិបតីសហរដ្ឋអាមេរិក អ្នកស្រី កាម៉ាឡា ហារីស បានថ្លែងទទួលស្គាល់បរាជ័យរបស់អ្នកស្រីដែលចាញ់ឆ្នោតអតីតប្រធានាធិបតី លោក ដូណាល់ ត្រាំ ជាមួយនឹងការលើកទឹកចិត្តក្រុមអ្នកគាំទ្រក្នុងយុទ្ធនាការឃោសនាបោះឆ្នោតរបស់អ្នកស្រី ឱ្យទទួលស្គាល់បរាជ័យ និងទទួលស្គាល់ជ័យជម្នះរបស់លោក ដូណាល់ ត្រាំ។
ក្នុងទឹកមុខញញឹម និងពោរពេញដោយមោទនភាព អ្នកស្រី ហារីស ថ្លែងទៅកាន់អ្នកគាំទ្រដែលមានអ្នកខ្លះសម្រក់ទឹកភ្នែកសោកស្ដាយដែលជ័យជម្នះមិនគួរបានទៅលោក ដូណាល់ ត្រាំ។ អ្នកស្រី ហារីស ចាប់យកទីកន្លែងមួយក្នុងសាកលវិទ្យាល័យ Howard ក្នុងទីក្រុងវ៉ាស៊ីនតោន ជាទីដែលអ្នកស្រីថ្លែងអរគុណអ្នកគាំទ្រ និងក្រុមយុទ្ធនាការបោះឆ្នោតរបស់អ្នកស្រី និងបក្សប្រជាធិបតេយ្យ។
អ្នកស្រី ហារីស បានថ្លែងថា បើទោះអ្នកស្រីទទួលស្គាល់បរាជ័យក្នុងការបោះឆ្នោត តែអ្នកស្រីមិនបោះបង់ចោលការប្រយុទ្ធតស៊ូដែលបានជំរុញយុទ្ធនាការឃោសនាបោះឆ្នោតឈានមកដល់ទីប្រកួតនោះទេ។ ជាមួយគ្នានេះ អ្នកស្រី ហារីស សន្យាបន្តតស៊ូដើម្បីសិទ្ធិសេរីភាពរបស់ស្ត្រី សេរីភាពប្រជាពលរដ្ឋអាមេរិកាំង ប្រឆាំងនឹងអំពើហិង្សាដោយកាំភ្លើង ហើយនឹងប្រយុទ្ធតស៊ូដើម្បីភាពថ្លៃថ្នូរសម្រាប់មនុស្សជាតិទាំងអស់។
អ្នកស្រីបានបញ្ជាក់ថា នៅពេលយើងចាញ់ឆ្នោត យើងត្រូវទទួលស្គាល់លទ្ធផលបោះឆ្នោត ហើយយើងត្រូវមានមោទនភាពដែលយើងបានឈានជើងដល់ទីផ្ដាច់ព្រ័ត្រ។
សាររបស់អ្នកស្រី ហារីស បានទាញអារម្មណ៍អ្នកគាំទ្រដោយផ្ដោតទៅលើការបោះឆ្នោតនៅខែវិច្ឆិកា ឆ្នាំ២០២០ ដែលលោក ត្រាំ ចាញ់ឆ្នោតក្នុងការប្រកួតជាមួយលោក បៃដិន គឺនៅពេលនោះ លោក ត្រាំ មិនត្រឹមតែមិនបានទៅចូលរួមផ្ទេរអំណាចទៅលោក បៃដិន បែរលោកត្រូវបានជាប់ចោទថាជាមេខ្លោងនៅពីក្រោយការបញ្ឆេះកុបកម្មតវ៉ាប្រឆាំងនឹងលទ្ធផលបោះឆ្នោត រហូតដល់កុបករសម្រុកចូលវាយកម្ទេចវិមានសភាជាតិ ហៅថា Capitol។
អ្នកស្រី ហារីស ក៏បានឱ្យដឹងថា អ្នកស្រីបានហៅទូរសព្ទទៅកាន់លោក ដូណាល់ ត្រាំ ដើម្បីសម្ដែងការអបអរសាទរ ជូនពរ ហើយសន្យាថានឹងចូលរួមក្នុងការផ្ទេរអំណាចដោយសន្តិវិធី។ នេះបើតាមការចុះផ្សាយក្នុងសារព័ត៌មាន USA Today នៅថ្ងៃទី៧ ខែវិច្ឆិកា។
ស្របពេលនេះដែរ លោកប្រធានាធិបតី ចូ បៃដិន បានហៅទូរសព្ទទៅកាន់លោក ដូណាល់ ត្រាំ ដើម្បីអបអរសាទរជ័យជម្នះរបស់លោក ត្រាំ និងបានអញ្ជើញលោកប្រធានាធិបតីជាប់ឆ្នោតរូបនេះមកជួបគ្នានៅសេតវិមាន។
មានការធ្វើអត្ថាធិប្បាយជាច្រើនក្នុងបណ្ដាញសារព័ត៌មានឯករាជ្យអាមេរិកាំង ដែលនិយាយថា នេះហើយគេហៅថារបបប្រជាធិបតេយ្យ៖ បើបោះឆ្នោតដោយសេរី ត្រឹមត្រូវ យុត្តិធម៌ និងសុចរិតហើយ គេមិនឡាំប៉ាកើតទុក្ខមិនសុខចិត្តទៅបំបះបំបោរប្រជាពលរដ្ឋ ដើម្បីរក្សាអំណាចមួយជីវិតនោះទេ។
នៅក្នុងសេចក្ដីថ្លែងការណ៍មួយពីសេតវិមានបញ្ជាក់ថា អំឡុងកិច្ចសន្ទនាជាមួយលោក ត្រាំ លោក បៃដិន បានបង្ហាញពីការប្ដេជ្ញាចិត្តរបស់លោកដើម្បីធានាឱ្យបាននូវការផ្ទេរអំណាចដោយរលូន ដែលនាំមកនូវការឯកភាពជាតិ។
សេចក្ដីថ្លែងការណ៍ ក៏បានបញ្ជាក់ថា លោក បៃដិន ក៏បានជជែកគ្នាជាមួយអ្នកស្រី ហារីស និងបានអបអរសាទរដល់អ្នកស្រីអនុប្រធានាធិបតី ចំពោះការធ្វើយុទ្ធនាការឃោសនាបោះឆ្នោតជាប្រវត្តិសាស្ត្រនៃក្រុមយុទ្ធនាការខាងអ្នកស្រី។
នៅក្នុងការបោះឆ្នោតកាលពីថ្ងៃទីអង្គារ ទី៥ វិច្ឆិកា លោក ដូណាល់ ត្រាំ ពីគណបក្សសាធារណរដ្ឋ បានយកឈ្នះអ្នកស្រី ហារីស ពីគណបក្សប្រជាធិបតេយ្យ ដោយទទួលបានអង្គបោះឆ្នោត electoral college ឬតំណាងម្ចាស់ឆ្នោតហៅថា electors ២៩៥នាក់ លើសពីចំនួន ២៧០ ដែលតម្រូវការចាំបាច់តាមច្បាប់បោះឆ្នោតសហរដ្ឋអាមេរិក ទើបបេក្ខជនអាចជាប់ឆ្នោតជាប្រធានាធិបតី។ រីឯអ្នកស្រី ហារីស ទទួលបានអង្គបោះឆ្នោត ២២៦។ ចំពោះសំឡេងឆ្នោតរបស់ប្រជាពលរដ្ឋអាមេរិកាំង ឬ Popular Vote លោក ត្រាំ ទទួលបានសន្លឹកឆ្នោតជិត ៧៣លានសំឡេង ចំណែកឯអ្នកស្រី ហារីស ទទួលបានជិត ៦៨លានសំឡេង។
នៅក្នុងការបោះឆ្នោតនេះ ក៏មានការបោះឆ្នោតជ្រើសរើសសមាជិករដ្ឋសភា ឬសភាតំណាងរាស្ត្រ និងសមាជិកព្រឹទ្ធសភាដែរ។ តាមលទ្ធផល បក្សសាធារណរដ្ឋបានអាសនៈ ៥២ក្នុងអាសនៈសរុប១០០ ដែលនាំឱ្យបក្សសាធារណរដ្ឋ មានសិទ្ធិគ្រប់គ្រងស្ថាប័នព្រឹទ្ធសភាដ៏មានអំណាចនៃប្រទេសមហាអំណាចនេះ។
ដោយឡែកការបោះឆ្នោតសភាតំណាងរាស្ត្រ ឬសភាជាន់ទាប បក្សសាធារណរដ្ឋ កំពុងនាំមុខបក្សប្រជាធិបតេយ្យ ដោយបានអាសនៈ ២០៨ និងបក្សប្រជាធិបតេយ្យ បាន ១៨៩អាសនៈ។ ចំពោះបក្សណាដណ្ដើមបានអាសនៈ ២១៨ ឡើងទៅ បក្សនោះនឹងមានសិទ្ធិគ្រប់គ្រាន់ ពីព្រោះជាសំឡេងភាគច្រើននៅរដ្ឋសភា។
ក្នុងស្ថានភាពនេះ ទំនងបក្សសាធារណរដ្ឋ អាចគ្រប់គ្រងបានប្រធានរដ្ឋសភា ដែលនាំឲ្យបក្សនេះគ្រប់គ្រងបានទាំងស្ថាប័ននីតិប្បញ្ញតិ និងស្ថាប័ននីតិប្រតិបត្តិ។
ព្រឹត្តិការណ៍ធំមួយទៀតនឹងមានម្ដងទៀតនៅថ្ងៃទី២០ ខែមករា ឆ្នាំ២០២៥ ជាថ្ងៃប្រារព្ធពិធីស្បថចូលកាន់តំណែងជាប្រធានាធិបតីសហរដ្ឋអាមេរិកទី៤៧ ដោយលោក ដូណាល់ ត្រាំ ដែលជាពេលវេលានាំលោក ត្រាំ ត្រឡប់ទៅកាន់សេតវិមានម្ដងទៀត ដែលមានរយៈពេល ៤ឆ្នាំនៃអាណត្តិទី២ របស់លោក ត្រាំ។
ការបោះឆ្នោតប្រធានាធិបតីសហរដ្ឋអាមេរិកកាលពីថ្ងៃទី៥ ខែវិច្ឆិកា ឆ្នាំ២០២៤ នេះ ប្រៀបបាននឹងព្រឹត្តិការណ៍ធំបំផុតនៃពិភពលោក ដែលគ្រប់ក្រសែភ្នែកក្នុងពិភពលោកបានតាមដានយ៉ាងខ្លាំងលើដំណើរការរាប់សន្លឹកឆ្នោត ដែលមានគូប្រជែង ២រូប។ ប្រជាពលរដ្ឋអាមេរិកាំងប្រមាណ ១៤០លាននាក់ បានចេញទៅបោះឆ្នោតដោយពុំមានហិង្សា និងគ្មានការចល័តទ័ពដាក់ពង្រាយកងសន្តិសុខ រថពាសដែកតាមដងផ្លូវឡើយ ទោះជាមានការបំភ័យតាមទូរសព្ទឥតការពិតអំពីការដាក់គ្រាប់បែកផ្ទុះនៅក្បែរកន្លែងបោះឆ្នោតតាមរដ្ឋចំនួន ៥ ក្តី។
សិទ្ធិសេរីភាពរបស់ពលរដ្ឋនៃប្រទេសមហាអំណាចនេះ បាននាំឱ្យមេដឹកនាំ និងអ្នកនយោបាយនៅទូទាំងពិភពលោកតាមដាន និងធ្វើការកត់ត្រាទុកក្នុងអារម្មណ៍របស់ពួកគេ។
ទោះជាយ៉ាងណាក៏ដោយ មានអ្នកស្នេហាយុត្តិធម៌ សិទ្ធិសេរីភាព និងប្រជាធិបតេយ្យ វិភាគឃើញថា ពលរដ្ឋមួយចំនួនធំ ទាំងអ្នកមាន ទាំងអ្នកក្រ បារម្ភអំពីគោលនយោបាយថ្មីអាមេរិកាំង ទាំងគោលនយោបាយក្នុងប្រទេស ទាំងគោលនយោបាយក្រៅប្រទេស។ គេថាវាអាចដើរផ្ទុយទិសគ្នារវាងទស្សនវិស័យខាងបក្សប្រជាធិបតេយ្យ និងខាងបក្សសាធារណរដ្ឋ ពីព្រោះអតីតវីរជនអាមេរិកាំងធំៗជាច្រើនរូប ទាំងខាងស៊ីវិល ទាំងយោធា មិនចាត់ទុកលោក ត្រាំ តំណាងឲ្យបក្សសាធារណរដ្ឋពិតៗ ហើយមិនគាំទ្រលោកឡើយ៕
© 2024, ឌឹ ខេមបូឌា ដេលី. All rights reserved.