អ្នកនាំពាក្យក្រុមអ្នកតស៊ូមតិកម្ពុជា ចាត់ទុកការចុះផ្សាយរបស់កាសែតឥណ្ឌា The Sunday Guardian ដែលថាសហរដ្ឋអាមេរិកក្រោមរដ្ឋបាលរបស់ប្រធានាធិបតី ចូ បៃដិន នៅពីក្រោយគម្រោងបង្កើតបដិវត្តន៍ពណ៌នៅកម្ពុជា គឺជាការចុះផ្សាយក្នុងចេតនាប្រឌិតលាបពណ៌អាមេរិកប៉ុណ្ណោះ។
អ្នកនាំពាក្យក្រុមអ្នកតស៊ូមតិកម្ពុជា លោក មួង ណារ៉េត សរសេរលើគណនីហ្វេសប៊ុករបស់ខ្លួនកាលពីថ្ងៃទី១៣ វិច្ឆិកា នេះថា សារព័ត៌មានពិភពលោកទាំងអស់គ្មានសារព័ត៌មានមួយណាដែលបានចុះផ្សាយថាមានបដិវត្តន៍ពណ៌នៅកម្ពុជាឡើយ ហើយសារព័ត៌មានទាំងនោះក៏មិនដែលចុះផ្សាយថាអាមេរិកនៅពីក្រោយបដិវត្តន៍ពណ៌នៅកម្ពុជាណាមួយដែរ។
លោកថា ទើបតែពេលនេះ កាសែតឥណ្ឌា The Sunday Guardian បែរជាចុះផ្សាយអត្ថបទបែបប្រឌិតដែលមានចរិតលាបពណ៌សហរដ្ឋអាមេរិក ដោយខ្វះមូលដ្ឋានវិជ្ជាជីវៈសារព័ត៌មានស្របពេលដែលលោក ដូណាល់ ត្រាំ ជាប់ឆ្នោតជាប្រធានាធិបតីថ្មីរបស់សហរដ្ឋអាមេរិកទៅវិញ។
លោក មួង ណារ៉េត លើកឡើងថា ខ្លឹមសារអត្ថបទរបស់កាសែតឥណ្ឌា មួយនេះ គឺជាការលាបពណ៌បំភ័យក្រុមអ្នកតស៊ូមតិយ៉ាងធ្ងន់ធ្ងរ ហើយក៏ជាអាវុធមួយបម្រើឱ្យរដ្ឋាភិបាលកម្ពុជាសម្រាប់ចាប់ខ្លួនសកម្មជននានាដាក់គុកបន្តទៀត ដោយសារការសរសេរបែបប្រឌិតក្នុងរឿងនេះដែរ។
សកម្មជនក្នុងសហគមន៍ខ្មែររូបនេះបញ្ជាក់ថា រឿងដែលគ្រោះថ្នាក់សម្រាប់កម្ពុជាបំផុតនោះ គឺការលាបពណ៌ថារដ្ឋាភិបាលអាមេរិកនៅពីក្រោយការធ្វើបដិវត្តន៍ពណ៌នៅកម្ពុជានេះតែម្តង ខណៈរដ្ឋាភិបាលគណបក្សប្រជាជនកម្ពុជា ក៏តែងតែចោទប្រកាន់សកម្មជនបរិស្ថាន សកម្មជននយោបាយ និងបក្សប្រឆាំងកន្លងមកបែបនេះដែរ ស្របពេលដែលកម្ពុជាគ្មានបដិវត្តន៍ពណ៌ណាមួយបានកើតឡើងផងនោះ។
កាលពីថ្ងៃទី១០ ខែវិច្ឆិកា ឆ្នាំ២០២៤ កាសែតឥណ្ឌា The Sunday Guardian បានចុះផ្សាយអត្ថបទមួយដោយអះអាងថា រដ្ឋបាលលោក ចូ បៃដិន របស់សហរដ្ឋអាមេរិក នៅពីក្រោយគម្រោងការណ៍បង្កើតបដិវត្តន៍ពណ៌នៅកម្ពុជា។
កាសែតដដែលនេះអះអាងថា គម្រោងផែនការធ្វើរដ្ឋប្រហារនៅកម្ពុជា បានកើតឡើងតាមរយៈមូលនិធិរបស់លោក George Soros និងអង្គការ Open Society Foundations(OSF) ដោយផ្អែកលើខ្លឹមសារដែលផ្ញើសារតាមអ៊ីមែលរបស់សកម្មជនអតីតគណបក្សប្រឆាំង ជាពិសេសសកម្មភាពរបស់អង្គការសង្គមស៊ីវិលដែលមានទំនាក់ទំនងនឹងមន្ត្រីរដ្ឋបាលលោក ចូ បៃដិន នៅតំបន់អាស៊ីប៉ាស៊ីហ្វិក និងសកម្មភាពដោយប្រយោលនានាទៀតនៃមូលនិធិរបស់លោក George Soros និងអង្គការ Open Society Foundation(OSF) នៅក្នុងការផ្តល់ថវិកាក្រោមរូបភាពគម្រោងនានា ជាពិសេសគម្រោងស្ដារលទ្ធិប្រជាធិបតេយ្យនៅតំបន់អាស៊ីនាពេលកន្លងមក។
ជុំវិញការចុះផ្សាយរបស់កាសែតឥណ្ឌា នេះ សារព័ត៌មានដែលស្និទ្ធនឹងបក្សកាន់អំណាច Fresh News មន្ត្រីរដ្ឋាភិបាលកម្ពុជា រួមទាំងលោក ហ៊ុន សែន ដែលជាមេដឹកនាំបក្សកាន់អំណាចផង បាននាំគ្នាផ្សព្វផ្សាយពីខ្លឹមសារនៃអត្ថបទកាសែតនេះព្រោងព្រាត។
ទាក់ទិននឹងបញ្ហានេះ សកម្មជនគណបក្សសង្គ្រោះជាតិ លោក អ៊ុយ ដាឡេ បានលើកឡើងថា ប្រសិនបើសហរដ្ឋអាមេរិកនៅពីក្រោយគណបក្សប្រឆាំង ឬអង្គការក្រៅរដ្ឋាភិបាលណាមួយដើម្បីគាំទ្រឱ្យមានបដិវត្តន៍ពណ៌នៅកម្ពុជាមែន នោះរបបក្រុងភ្នំពេញនឹងដួលរលំយ៉ាងឆាប់ជាទីបំផុត គឺមិនអាចដឹកនាំកម្ពុជាដល់សព្វថ្ងៃនេះទេ។
លោក អ៊ុយ ដាឡេ អះអាងថា ប្រជាពលរដ្ឋខ្មែរនឹងសប្បាយចិត្ត បើមានអាមេរិកនៅពីក្រោយបដិវត្តន៍ដែលពួកគេងើបឡើងដើម្បីផ្លាស់ប្ដូររបបដឹកនាំក្រុងភ្នំពេញមែននោះ ព្រោះថាមុននឹងឈានដល់ការធ្វើបដិវត្តន៍ គឺមានន័យថាពលរដ្ឋខ្មែរបានទទួលរងនូវការឈឺចាប់ឆ្អែតឆ្អន់ហើយពីការដឹកនាំរបស់លោក ហ៊ុន សែន ទើបពួកគេសម្រេចចិត្តធ្វើបែបនេះ៕
© 2024, ឌឹ ខេមបូឌា ដេលី. All rights reserved.