សាលាដំបូងក្រុងភ្នំពេញ សម្រេចផ្ដន្ទាទោសអតីតប្រធានគណបក្សកម្លាំងជាតិ លោក ស៊ុន ចន្ធី ឱ្យជាប់ពន្ធនាគារ ២ឆ្នាំ ពិន័យប្រាក់ ៤លានរៀល និងដកហូតសិទ្ធិបោះឆ្នោត និងសិទ្ធិឈរឈ្មោះឲ្យគេបោះឆ្នោតអស់មួយជីវិត។
សាលាដំបូងរាជធានីភ្នំពេញ នៅថ្ងៃទី២៦ ខែធ្នូ ឆ្នាំ២០២៤ នេះ បានបើកសវនាការលើសំណុំរឿងអតីតប្រធានគណបក្សកម្លាំងជាតិ លោក ស៊ុន ចន្ធី ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។ តុលាការបានដាក់បម្រាមមិនអនុញ្ញាតឱ្យសាច់ញាតិ សកម្មជន និងមន្ត្រីគណបក្សកម្លាំងជាតិចូលរួមស្តាប់ក្នុងពេលប្រកាសសាលក្រមនេះទេ ខណៈភរិយារបស់លោក ស៊ុន ចន្ធី ដែលកំពុងមានគភ៌ និងទំនងជាសម្រាលកូននៅថ្ងៃនេះ ក៏មិនត្រូវបានអនុញ្ញាតឱ្យចូលរួមដែរ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី២៦ ធ្នូ នេះថា ការផ្ដន្ទាទោសលើលោក ស៊ុន ចន្ធី គឺជាទណ្ឌកម្មហួសហេតុសម្រាប់លោកក្នុងនាមជាអ្នកនយោបាយ ហើយការសម្រេចនេះក៏ប្រាសចាកពីការធានាបាននូវសិទ្ធិនយោបាយដល់ពលរដ្ឋដែលមានចែងក្នុងរដ្ឋធម្មនុញ្ញផងដែរ។
លោក សេក សុជាតិ អះអាងថា ការសម្រេចនេះបានឆ្លុះបញ្ចាំងទៅលើទិដ្ឋភាពនយោបាយ ជាជាងត្រឹមតែការអនុវត្តច្បាប់ដើម្បីធានានូវភាពយុត្តិធម៌ ព្រោះការហាមប្រាមនូវសិទ្ធិបែបនេះ មានន័យថាសិទ្ធិរបស់លោក ស៊ុន ចន្ធី ត្រូវបានកំណត់មិនឱ្យស្មើនឹងពលរដ្ឋសាមញ្ញទូទៅនោះផង។
លោកថា តុលាការ និងស្ថាប័នពាក់ព័ន្ធ គួរពិចារណាឡើងវិញ ព្រោះការសម្រេចដកសិទ្ធិបោះឆ្នោត និងឈរឈ្មោះឱ្យគេបោះឆ្នោត មិនឆ្លើយតបនឹងសង្គមប្រជាធិបតេយ្យដែលប្រកាន់ខ្ជាប់នូវនីតិរដ្ឋនោះឡើយ។
អ្នកប្រឹក្សាយោបល់រូបនេះបញ្ជាក់ថា ការសម្រេចបែបនេះនឹងនាំឱ្យប៉ះពាល់ដល់មុខមាត់ និងសេចក្តីថ្លៃថ្នូរនៃប្រទេសកម្ពុជាយ៉ាងធ្ងន់ធ្ងរ ដែលទទួលបានមកវិញនូវការរិះគន់ពីមជ្ឈដ្ឋានជាតិ និងអន្តរជាតិប៉ុណ្ណោះ ដូច្នេះតុលាការគួរទម្លាក់ចោលនូវបទចោទ និងផ្តល់សិទ្ធិនយោបាយសម្រាប់រូបលោកឡើងវិញ ដោយផ្អែកលើរដ្ឋធម្មនុញ្ញជាគោល។
អតីតប្រធានគណបក្សកម្លាំងជាតិ លោក ស៊ុន ចន្ធី ត្រូវសមត្ថកិច្ចចាប់ខ្លួនកាលពីដើមខែឧសភា ឆ្នាំ២០២៤ បន្ទាប់ពីលោកបានលើកឡើងជុំវិញបញ្ហាការចែកបណ្ណសមធម៌ ឬបណ្ណក្រីក្រ ដែលលោកអះអាងថាការចែកបណ្ណនេះមានការរើសអើងនិន្នាការនយោបាយដោយលម្អៀងទៅបក្សកាន់អំណាច ដែលសព្វថ្ងៃនេះលោកកំពុងត្រូវបានឃុំខ្លួនក្នុងពន្ធនាគារ «ម៤» ក្នុងខេត្តពោធិ៍សាត់។
ទាក់ទិននឹងបញ្ហានេះ មន្ត្រីជាន់ខ្ពស់គណបក្សកម្លាំងជាតិ លោក រ៉ុង ឈុន យល់ថាវាជារឿងដ៏គួរឲ្យសោកស្តាយដែលតុលាការសម្រេចផ្ដន្ទាទោសលោក ស៊ុន ចន្ធី យ៉ាងធ្ងន់ធ្ងរដូច្នេះ។ លោកថារដ្ឋាភិបាលហាក់ដូចជាភិតភ័យពីវត្តមានរបស់លោក ស៊ុន ចន្ធី ក្នុងឆាកនយោបាយ ដោយលោកគ្រាន់តែជាយុវជនមួយរូប។
អង្គការគម្រោងយុត្តិធម៌ពិភពលោក (World Justice Project (WJP)) បានចេញផ្សាយសេចក្តីរាយការណ៍ស្ដីពីនីតិរដ្ឋកាលពីចុងខែតុលា ឆ្នាំ២០២៤ កន្លងទៅ ដោយដាក់ឱ្យប្រទេសកម្ពុជាជាប់ចំណាត់ថ្នាក់លេខរៀងទី១៤១ ក្នុងចំណោមប្រទេសទាំង១៤២ នៅលើពិភពលោកសម្រាប់ឆ្នាំ២០២៤៕
© 2024, ឌឹ ខេមបូឌា ដេលី. All rights reserved.