 នៅឆ្នាំ២០២៥ ខាងមុខនេះ ដើម្បីបំពេញតម្រូវការចំណាយចរន្តក្នុងស្ថានភាពដែលប្រភពចំណូលក្នុងប្រទេសមានការថយចុះ។){kind=link}
រាជរដ្ឋាភិបាលកម្ពុជា គ្រោងខ្ចីថវិកាពីដៃគូអភិវឌ្ឍន៍ប្រមាណ ២,៧ពាន់លានដុល្លារសហរដ្ឋអាមេរិក (ឬស្មើនឹង ២០០០លានអេសដេអ៊ែរ SDR) នៅឆ្នាំ២០២៥ ខាងមុខនេះ ដើម្បីបំពេញតម្រូវការចំណាយចរន្តក្នុងស្ថានភាពដែលប្រភពចំណូលក្នុងប្រទេសមានការថយចុះ។
SDR ប្រែថា សិទ្ធិដកពិសេស ដែលសំដៅទៅលើធនធាន ឬទ្រព្យបម្រុង បង្កើតឡើងដោយមូលនិធិរូបិយវត្ថុអន្តរជាតិនៅឆ្នាំ១៩៦៩ សម្រាប់ចងការឲ្យប្រទេសជាសមាជិក។
ប៉ុន្មានថ្ងៃមុននេះ ក្រសួងកសិកម្ម ក៏បានសុំថវិកាជំនួយឥតសំណងពីប្រទេសកូរ៉េខាងត្បូង ចំនួន ១២លានដុល្លារ ដើម្បីយកទៅពង្រីកវិស័យកសិកម្មដែរ។
រាជរដ្ឋាភិបាលកម្ពុជាបានចេញសេចក្តីថ្លែងការណ៍អំពីសេចក្តីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៥ ដែលត្រូវបានផ្សព្វផ្សាយនៅថ្ងៃទី២៧ ធ្នូ នេះថា ថវិកាដែលប្រទេសកម្ពុជាគ្រោងខ្ចីពីដៃគូអភិវឌ្ឍន៍ដើម្បីអភិវឌ្ឍគម្រោងលើវិស័យសំខាន់ៗមួយចំនួននាពេលនេះ គឺជាឥណទានមានកម្រិតសម្បទានខ្ពស់ ចំណែកឯស្ថានភាពបំណុលសាធារណៈសម្រាប់ប្រទេសកម្ពុជាសព្វថ្ងៃនេះ គឺនៅតែមាន «ចីរភាព» និងមាន «ហានិភ័យក្នុងកម្រិតទាប» ដដែល។
ប្រភពដដែលលើកឡើងថា ថវិកាទាំងនេះនឹងត្រូវប្រើប្រាស់សម្រាប់កម្មវិធី ឬគម្រោងអភិវឌ្ឍន៍សំខាន់ៗជាច្រើន ដូចជា វិស័យថាមពល វិស័យទឹកស្អាត វិស័យធារាសាស្ត្រ វិស័យហេដ្ឋារចនាសម្ព័ន្ធ វិស័យអប់រំ និងបណ្តុះបណ្តាលវិជ្ជាជីវៈ វិស័យសុខាភិបាល វិស័យកសិកម្ម និងវិស័យផ្សេងទៀតផងដែរ។ រាជរដ្ឋាភិបាលបញ្ជាក់ថា ការខ្ចីថវិកាពីក្រៅប្រទេសក្នុងទំហំទឹកប្រាក់ ២,៧ពាន់លានដុល្លារនេះ នឹងមិនបង្កើតជាបន្ទុកបំណុលវ័ណ្ឌកដល់កម្ពុជាទេ។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី២៧ ធ្នូ នេះថា គម្រោងខ្ចីថវិកាពីដៃគូអភិវឌ្ឍន៍ គឺបញ្ជាក់យ៉ាងច្បាស់ថា ចិនបានបដិសេធមិនឲ្យប្រទេសកម្ពុជាខ្ចីថែមយ៉ាងពិតប្រាកដ ក្នុងដំណើរទស្សនកិច្ចទៅប្រទេសចិន របស់លោក ហ៊ុន សែន កាលពីដើមខែធ្នូ កន្លងទៅនេះ។
លោកថា រដ្ឋាភិបាលគំនិតរាក់មួយនេះគ្មានទស្សនវិស័យក្នុងការអភិវឌ្ឍប្រទេសឱ្យរីកចម្រើនទេ ផ្ទុយទៅវិញបើលើកផែនការអភិវឌ្ឍន៍វិញ គឺមានតែដើរខ្ចីបំណុលគេប៉ុណ្ណោះ ហើយបើខ្ចីបំណុលគេបានយកទៅអភិវឌ្ឍ ក៏នាំគ្នាប្រព្រឹត្តអំពើពុករលួយលើលុយបំណុលនោះដែរ។
ប្រធានក្រុមប្រឹក្សាឃ្លាំមើលកម្ពុជារូបនេះបញ្ជាក់ថា វិធីមានតែមួយគត់សម្រាប់រដ្ឋាភិបាលបក្សកាន់អំណាចដែលចង់ចាកចេញពីបំណុលទៅជាប្រទេសអ្នកមាន គឺត្រូវតែធានាឱ្យបាននូវការគោរពសិទ្ធិមនុស្ស និងលទ្ធិប្រជាធិបតេយ្យ នោះជំនួយពីបណ្តាប្រទេសនានានឹងហូរចូលទៅកម្ពុជាជាបន្តបន្ទាប់ ដែលមិនចាំបាច់បន្តខ្ចីបុលបរទេសជិតខាងទាំងត្រដាបត្រដួសដូចពេលនេះ។
ទាក់ទិននឹងបញ្ហានេះ ក្រោយដំណើរទស្សនកិច្ចរបស់លោក ហ៊ុន សែន ទៅកាន់ប្រទេសចិន សារព័ត៌មានអន្តរជាតិ Reuters បានចុះផ្សាយកាលពីថ្ងៃទី១១ ខែធ្នូ ថា រដ្ឋាភិបាលចិន មិនបានអនុម័តប្រាក់កម្ចីសម្រាប់គម្រោងណាមួយតាមការស្នើសុំរបស់កម្ពុជាទេ ប៉ុន្តែភាគីរដ្ឋាភិបាលបដិសេធថាជាការចុះផ្សាយនេះមិនពិត។
កាលពីចុងខែកក្កដា ឆ្នាំ២០២៤ ក្រសួងសេដ្ឋកិច្ច និងហិរញ្ញវត្ថុ បានចេញផ្សាយព្រឹត្តិបត្រស្ថិតិបំណុលសាធារណៈ ថាគិតត្រឹមត្រីមាសទី១ ឆ្នាំ២០២៤ នេះ ប្រទេសកម្ពុជាជំពាក់បំណុលសាធារណៈសរុបចំនួនជិត ១២ពាន់លានដុល្លារសហរដ្ឋអាមេរិក ក្នុងនោះ ៩៩,១២% ជាបំណុលសាធារណៈក្រៅប្រទេស និងជិត ១% (០,៨៨%) ជាបំណុលសាធារណៈក្នុងប្រទេស ខណៈចិន នៅតែជាម្ចាស់បំណុលធំជាងគេដែលមានទឹកប្រាក់ប្រមាណជិត ៤ពាន់លានដុល្លារសហរដ្ឋអាមេរិក (៣,៩៩ពាន់លានដុល្លារ) ដែលស្មើនឹងជិត ៤០% (៣៦%) នៃបំណុលសរុប៕
© 2024, ឌឹ ខេមបូឌា ដេលី. All rights reserved.