ឥណ្ឌា ជាប្រទេសសេដ្ឋកិច្ចដ៏ធំមួយក្នុងចំណោមប្រទេសសមាជិកនៃសហប្រតិបត្តិការសេដ្ឋកិច្ច BRICS មាន ៥ប្រទេស ដូចជា ប្រេស៊ីល រុស្ស៊ី ឥណ្ឌា ចិន និងប្រទេសអាហ្វ្រិកខាងត្បូង។
ប្រទេសដៃគូរបស់ BRICS មាន Egypt, Ethiopia, Iran, United Arab Emirates និងឥណ្ឌូនេស៊ី ចុងក្រោយគេដែលទើបត្រូវបានក្រុមប្រឹក្សានាយករបស់ BRICS អនុម័តទទួលយកជាសមាជិកពេញសិទ្ធិរបស់ខ្លួន។
កាលពីប៉ុន្មានថ្ងៃមកនេះ រដ្ឋាភិបាលឥណ្ឌា បានចេញសេចក្ដីថ្លែងការណ៍ទាត់ចោលផែនការរបស់ប្រទេសចិន និងរុស្ស៊ី ដែលកំពុងកំណត់យុទ្ធសាស្ត្ររួមគ្នាឈានដល់ការបង្កើតរូបិយប័ណ្ណអន្តរជាតិរួមគ្នាប្រើប្រាស់សម្រាប់ប្រទេស BRICS និងប្រទេសដៃគូ សំដៅកាត់បន្ថយភាពពេញនិយមនៃក្រដាសប្រាក់ដុល្លារអាមេរិកដែលកំពុងធ្វើចរាចរនៅទូទាំងពិភពលោក។
សេចក្ដីថ្លែងការណ៍របស់រដ្ឋាភិបាលឥណ្ឌា បានបញ្ជាក់ថា៖ ឥណ្ឌាមិនអាចចូលរួមកំណត់យុទ្ធសាស្ត្ររបស់ BRICS ទប់ស្កាត់ ឬកាត់បន្ថយការប្រើប្រាស់ក្រដាសប្រាក់ដុល្លារអាមេរិកលើទីផ្សាររបស់ឥណ្ឌា ទាំងក្នុងប្រទេស និងក្រៅប្រទេសបានឡើយ។ ឥណ្ឌា មិនចង់ធ្វើឱ្យមានជម្លោះលើទិដ្ឋភាពនយោបាយហិរញ្ញវត្ថុនឹងសហរដ្ឋអាមេរិកឡើយ។
ក្រុងញូវដេលី ដឹងច្បាស់ថា ពុំមានអ្វីដែលអាចបញ្ចប់ការធ្វើចរាចររូបិយប័ណ្ណដុល្លារអាមេរិកបាន ទោះរយៈពេលយូរទៅមុខទៀតក្ដី។ ក្រុងញូវដេលី នៅតែពឹងផ្អែកខ្លាំងលើការធ្វើជំនួញពាណិជ្ជកម្មជាមួយនឹងប្រព័ន្ធចរន្តនៃផ្ទេរប្រាក់អន្តរជាតិមួយនេះ។
ក្រុងញូវដេលី បានជំទាស់ដាច់ខាតគំនិតផ្ដួចផ្ដើមរបស់ចិន និងរុស្ស៊ី ដែលព្យាយាមកាត់បន្ថយការធ្វើចរាចរក្រដាសប្រាក់ដុល្លារអាមេរិកលើទីផ្សារអន្តរជាតិ ដែលក្រុងញូវដេលី យល់ឃើញថា វាមិនមានប្រសិទ្ធភាពឡើយ។ មិនតែប៉ុណ្ណោះ អាចនឹងប៉ះពាល់ដល់តម្លៃជំនួញលើមុខទំនិញផ្សេងៗដល់ផលិតផលប្រទេសឥណ្ឌា ទៀតផង។
ឥណ្ឌា ជឿថា ចិនជាមេគំនិតជាងរុស្ស៊ី ទៅទៀត ព្រោះក្រុងប៉េកាំង គិតថាទំនិញរបស់ចិន ដែលមានអនុភាពលើទីផ្សារអន្តរជាតិ ចាំបាច់ត្រូវប្រើរូបិយប័ណ្ណដាច់ដោយឡែកពីរូបិយប័ណ្ណប្រាក់ដុល្លារអាមេរិក។
រដ្ឋមន្ត្រីការបរទេសឥណ្ឌា លោក Jaishankar សង្កត់ធ្ងន់ថា ប្រទេសឥណ្ឌា មិនចាប់អារម្មណ៍ក្នុងយុទ្ធសាស្ត្រដណ្ដើមឥទ្ធិពលនៃការធ្វើចរាចររូបិយប័ណ្ណថ្មីណាមួយឡើយ។ បើតាមលោកប្រមុខការទូតឥណ្ឌារូបនេះ អះអាងថា វាគ្មានផលប្រយោជន៍ដែលឥណ្ឌា ត្រូវចូលរួមផ្លាស់ប្ដូរគំនិតរបស់ឥណ្ឌា ប្រឆាំងនឹងអាមេរិកនោះ។
លោក Jaishankar ប្រាប់ទៅប្រទេសក្នុង BRICS ថា ក្រុងញូវដេលី នៅតែបន្តប្រើប្រាស់រូបិយប័ណ្ណដុល្លារអាមេរិករហូតម្ចាស់រូបិយប័ណ្ណអន្តរជាតិមួយដោះដូរទម្រង់រូបិយប័ណ្ណថ្មី។
លោករដ្ឋមន្ត្រីការបរទេសឥណ្ឌា បានបញ្ជាក់ដូចនេះថា៖ សេដ្ឋកិច្ចឥណ្ឌាកំពុងតែរីកលូតលាស់ខ្លាំងក៏វាអាស្រ័យលើការប្រើប្រាស់ប្រព័ន្ធផ្ទេរប្រាក់នៃចរន្តអេឡិចត្រូនិក Swift code របស់អាមេរិក។ លោកបន្តថា ប្រទេសក្នុងសម្ព័ន្ធភាព BRICS ខ្លះកំពុងសាកល្បងកាត់បន្ថយចរាចររូបិយប័ណ្ណប្រាក់ដុល្លារអាមេរិកនៅលើទីផ្សាររបស់ខ្លួនជាមួយដៃគូ តែនៅតែមិនអាចបោះបង់ចោលប្រព័ន្ធផ្ទេរប្រាក់នៃចរន្តអេឡិចត្រូនិក Swift code របស់សហរដ្ឋអាមេរិកបានឡើយ។ ដូចនេះ វាពុំមែនជាគោលនយោបាយយុទ្ធសាស្ត្រសម្រាប់សេដ្ឋកិច្ចឥណ្ឌា ឡើយ។
ជារួមទៅ រដ្ឋមន្ត្រីការបរទេស Jaishankar ជូនជាដំណឹងថា ឥណ្ឌាបានសម្រេចដកខ្លួនពីគំនិតប្រឆាំងការធ្វើចរាចរក្រដាសប្រាក់ដុល្លារអាមេរិកលើទីផ្សារអន្តរជាតិ ទោះមានប្រព័ន្ធចរន្តផ្ទេរប្រាក់ថ្មីណាមួយក៏ដោយ។ លោក Jaishankar បន្ថែមថា ក្រុងញូវដេលី មិនចង់ធ្វើឱ្យសេដ្ឋកិច្ចរបស់ឥណ្ឌា រងការឈឺចាប់ឡើយ។
ឥណ្ឌា នៅតែសន្យាប្រើប្រាស់ក្រដាសប្រាក់ដុល្លារអាមេរិកជាមួយនឹងការដោះដូរទំនិញរបស់ឥណ្ឌា និងក្រដាសប្រាក់របស់ឥណ្ឌា នៅគ្រប់ធនាគារទាំងអស់របស់ឥណ្ឌា ទាំងនៅក្នុងប្រទេស និងក្រៅប្រទេស។
ហេតុអ្វីបានជាឥណ្ឌា ទាត់ចោលផែនការរបស់ចិន និងរុស្ស៊ី បង្កើតរូបិយប័ណ្ណរួមរបស់ BRICS?
លោក ដូណាល់ ត្រាំ ព្រមានក្រុមប្រទេស BRICS ថា លោកនឹងទាមទារថា ក្រុមនេះនឹងមិនធ្វើកិច្ចការឆ្ពោះទៅរកការបង្កើតរូបិយប័ណ្ណថ្មីជំនួសឱ្យការប្រើប្រាស់ប្រាក់ដុល្លារអាមេរិកឡើយ។
សំណេរក្នុងបណ្ដាញសង្គម Truth Social លោក ត្រាំ ព្រមានដូចនេះថា៖ អាមេរិកទាមទារឱ្យមានការប្ដេជ្ញាចិត្តពីប្រទេសទាំងនេះថា ពួកគេនឹងមិនបង្កើតរូបិយប័ណ្ណ BRICS ថ្មី ឬគាំទ្ររូបិយប័ណ្ណផ្សេងទៀតឱ្យជំនួសប្រាក់ដុល្លារអាមេរិកទេ បើមិនដូច្នេះទេ ពួកគេនឹងប្រឈមនឹងការបង្កើនពន្ធគយ ១០០% ហើយមិនអាចលក់ទំនិញមកកាន់ទីផ្សារសហរដ្ឋអាមេរិកបានឡើយ។
លោក ត្រាំ បញ្ជាក់ថា៖ គ្មានឱកាសទេដែលក្រុមប្រទេស BRICS នឹងជំនួសប្រាក់ដុល្លារអាមេរិកក្នុងពាណិជ្ជកម្មអន្តរជាតិ ហើយប្រាក់ដុល្លារអាមេរិកនៅតែជារូបិយប័ណ្ណបម្រុងរបស់ពិភពលោក។ នេះបើយោងតាមបណ្ដាញផ្សាយព័ត៌មាន Bloomberg។
នៅក្នុងកិច្ចប្រជុំកំពូលមួយនៅក្នុងខែតុលា ឆ្នាំ២០២៣ ក្រុមប្រទេស BRICS បានពិភាក្សាគ្នាអំពីបញ្ហាដុល្លារូបនីយកម្មប្រឆាំងនឹងការគ្របដណ្ដប់របស់ប្រាក់ដុល្លារអាមេរិកលើពាណិជ្ជកម្មពិភពលោកបានកើនឡើងយ៉ាងខ្លាំង នៅឆ្នាំ២០២២ នៅពេលដែលអាមេរិកបានដឹកនាំកិច្ចខិតខំប្រឹងប្រែងដាក់ទណ្ឌកម្មសេដ្ឋកិច្ចលើប្រទេសរុស្ស៊ី ករណីលើកទ័ពធ្វើសង្គ្រាមនៅអ៊ុយក្រែន។
ក្នុងចំណោមប្រទេសនៃក្រុម BRICS ប្រទេសចិន ចេញមុខគេប្រើយុទ្ធសាស្ត្របន្សាបប្រាក់ដុល្លាររបស់សហរដ្ឋអាមេរិក ជាមួយនឹងការប្រើប្រាស់ប្រាក់ yuan របស់ចិន ហើយចំពេលរុស្ស៊ី រងទណ្ឌកម្មយ៉ាងធ្ងន់ធ្ងរពីលោកខាងលិច លោក ពូទីន ក៏មានបំណងកាត់បន្ថយការពឹងផ្អែករបស់រុស្ស៊ី លើប្រាក់ដុល្លារផងដែរ។
ទណ្ឌកម្មដែលរួមបញ្ចូលនូវការបង្កកប្រាក់បម្រុងរូបិយប័ណ្ណបរទេស និងទ្រព្យសកម្មរបស់រុស្ស៊ី នៅក្រៅប្រទេស បានធ្វើឱ្យរុស្ស៊ី មានការលំបាកក្នុងការទូទាត់ផ្នែកពាណិជ្ជកម្ម ជាពិសេសប្រទេសណាដែលមានទំនាក់ទំនងល្អជាមួយរុស្ស៊ី។
ក្នុងឱកាសនៃវេទិកាធុរកិច្ច BRICS ក្រុងមូស្គូ បានបង្ហាញនូវប្រព័ន្ធទូទាត់សកលថ្មីរបស់ពួកគេដែលមានឈ្មោះថា BRICS Pay ដែលជឿថានៅពេល BRICS អាចរំដោះខ្លួនចេញពីឥទ្ធិពលហិរញ្ញវត្ថុរបស់សហរដ្ឋអាមេរិក គឺការបង្កើតប្រព័ន្ធទូទាត់ BRICS Pay អាចរុញឱ្យមានការកំណត់ឡើងវិញនូវច្បាប់ពាណិជ្ជកម្មអន្តរជាតិ។
តែយ៉ាងណា អស់រយៈពេលជាច្រើនឆ្នាំមកហើយ ប្រទេសជាសមាជិកនៃក្រុម BRICS បានខិតខំស្វែងរកជម្រើសជំនួសប្រាក់ដុល្លារអាមេរិកក្នុងពាណិជ្ជកម្មអន្តរជាតិរបស់ពួកគេ។ ការបើកដំណើរការ BRICS Pay គឺជាផ្នែកមួយនៃយុទ្ធសាស្ត្រកាត់បន្ថយការប្រើប្រាស់ប្រាក់ដុល្លារអាមេរិក។
នៅពេលនេះ សហរដ្ឋអាមេរិកមានលោក ដូណាល់ ត្រាំ ជាប្រធានាធិបតី ជាមេដឹកនាំអាមេរិក មានសម្ព័ន្ធភាពខ្លាំងជាមួយមហាសេដ្ឋីគ្រាក់ៗនៅអាមេរិក យ៉ាងហោចណាស់ធ្វើឱ្យក្រុងញូវដេលី ត្រូវតែគិតពីផលវិបាកចំពោះស្ថានភាពសេដ្ឋកិច្ចឥណ្ឌា និងដៃគូសហប្រតិបត្តិការជាមួយក្រុងវ៉ាស៊ីនតោន ដែលក្រុងញូវដេលី មិនចង់ធ្លាក់ក្នុងសង្គ្រាមពាណិជ្ជកម្មជាមួយអាមេរិកឡើយ។
ម្យ៉ាងទៀត ក្រុងញូវដេលី គិតច្បាស់ណាស់ថា មិនអាចរំលាយទម្លាប់នៃការធ្វើចរាចរក្រដាសប្រាក់ដុល្លារអាមេរិកលើទីផ្សារអន្តរជាតិ ហើយក៏គ្មានក្បួនច្បាប់បទដ្ឋានថ្មីណាអាចវាយលុកលើការប្រើប្រាស់ប្រព័ន្ធផ្ទេរប្រាក់ដុល្លារ Swift code របស់អាមេរិកបាននោះទេ ទោះច្រើនទសវត្សរ៍ទៅមុខទៀតក្ដី៕
© 2025, ឌឹ ខេមបូឌា ដេលី. All rights reserved.