ក្រុមអ្នកតាមដានសង្គមអះអាងថា អាមេរិកដែលតែងទទូចឲ្យដោះលែងលោក កឹម សុខា ប្រធានអតីតគណបក្សសង្គ្រោះជាតិ កន្លងមក នឹងមិនបោះបង់ជំហររបស់ខ្លួនឡើយនៅក្នុងតំណែងប្រធានាធិបតីអាមេរិកជាលើកទីពីររបស់លោក ដូណាល់ ត្រាំ ដោយសារអាមេរិកចាត់ទុកថាសំណុំរឿងនេះគឺជារឿងនយោបាយ។
សកម្មជនក្នុងសហគមន៍ខ្មែរនៅទីក្រុងឡងប៊ិច លោក មួង ណារ៉េត បានប្រាប់សារព័ត៌មាន The Cambodia Daily នៅថ្ងៃទី៣០ មករា នេះថា អាមេរិកតែងទទូចឲ្យដោះលែងលោក កឹម សុខា និងធ្លាប់បដិសេធថា អាមេរិកមិននៅពីក្រោយលោក កឹម សុខា ឬអតីតគណបក្សប្រឆាំង ដើម្បីផ្តួលរំលំរដ្ឋាភិបាលកម្ពុជានោះទេ។ លោកថា ជំហរអាមេរិករឿងលោក កឹម សុខា នេះ មិនដែលប្រែប្រួលទេគឺអាមេរិកចាត់ទុកថាសំណុំរឿងនេះជារឿងនយោបាយ និងតែងតែទាមទារឱ្យរដ្ឋាភិបាលកម្ពុជាដោះលែងលោក កឹម សុខា ឱ្យមានសេរីភាពពេញលេញវិញ។
ប្រភពដដែលបានអះអាងថា បាល់នៅជើងកម្ពុជា មិនមែនអាមេរិកទេ។ លោកថា កម្ពុជាខ្លួនឯងទេដែលស្ថិតក្រោមសម្ពាធនៃទណ្ឌកម្មនៃការឈប់បន្តប្រព័ន្ធអនុគ្រោះពន្ធ GSP បើកម្ពុជានៅតែមិនព្រមស្ដារសិទ្ធិមនុស្ស និងប្រជាធិបតេយ្យឡើងវិញ។ កម្ពុជាមិនមានជម្រើសច្រើនទេក្នុងពេលនេះ។ ចិន ដែលខ្លួនធ្លាប់ពឹងបាន ក៏មានបញ្ហាសេដ្ឋកិច្ចដែរ។
លោក មួង ណារ៉េត អះអាងបន្តថា ចំណែកឯវត្តមានសមាជិកព្រឹទ្ធសភាមកពីគណបក្សសាធារណរដ្ឋ លោក ម៉ាកូ រ៉ូប៊ីអូ (Marco Rubio) ជារដ្ឋមន្ត្រីការបរទេសក្នុងរដ្ឋបាលប្រធានាធិបតីថ្មីរបស់អាមេរិកនេះ មិនមែនជាពរជ័យសម្រាប់កម្ពុជាទេ តែជាបណ្ដាសា ដ្បិតគាត់ធ្លាប់ចូលរួមស្នើច្បាប់នៅព្រឹទ្ធសភាចំនួន ៥លើក ដើម្បីដាក់ទណ្ឌកម្មកម្ពុជា និងមន្ត្រីរដ្ឋាភិបាលកម្ពុជារឿងរំលោភសិទ្ធិមនុស្ស និងបំផ្លាញប្រជាធិបតេយ្យ។
កន្លងមក កម្ពុជា និងអាមេរិក ធ្លាប់ល្អក់កករជាមួយគ្នាតិចតួច ចាប់តាំងពីលោក កឹម សុខា ប្រធានអតីតគណបក្សសង្គ្រោះជាតិ ត្រូវបានចាប់ខ្លួនកាលពីអំឡុងខែកញ្ញា ឆ្នាំ២០១៧ ដោយសារតែរដ្ឋាភិបាលកម្ពុជាសង្ស័យថាលោកលួចទៅសហការជាមួយបរទេស ពិសេសអាមេរិក ដើម្បីផ្តួលរំលំរដ្ឋាភិបាលកម្ពុជា។
ក្នុងសំណុំរឿងនេះ លោក កឹម សុខា ត្រូវបានតុលាការសម្រេចផ្ដន្ទាទោសឲ្យជាប់ពន្ធនាគាររយៈពេល ២៧ឆ្នាំ ដោយឃុំខ្លួននៅក្នុងផ្ទះ និងមិនអនុញ្ញាតឱ្យជួបជាមួយអ្នកដទៃក្រៅពីសាច់ញាតិឡើយ ព្រមទាំងត្រូវដកហូតសិទ្ធិមិនឲ្យធ្វើនយោបាយអស់មួយជីវិតថែមទៀត។
កាលពីឆ្នាំ២០១៩ លោក ដូណាល់ ត្រាំ ផ្ញើលិខិតជូនលោកនាយករដ្ឋមន្ត្រី ហ៊ុន សែន ដោយបានសរសេរសង្កត់ធ្ងន់ថា សហរដ្ឋអាមេរិកគោរពឆន្ទៈអធិបតេយ្យរបស់ប្រជាជនកម្ពុជា ហើយសហរដ្ឋអាមេរិកមិនស្វែងរកឱ្យមានការប្តូររបបនោះទេ។
ទាក់ទិននឹងបញ្ហានេះ ឯកអគ្គរដ្ឋទូតថ្មីរបស់សហរដ្ឋអាមេរិក ដែលគ្រោងនឹងទៅប្រចាំការនៅកម្ពុជា លោក រ៉ូបើត ហ្វតដេន (Robert Forden) ធ្លាប់ចេញសេចក្តីថ្លែងការណ៍មួយកាលពីដើមខែមីនា ឆ្នាំ២០២៤ ថា ការកាត់ទោសពីបទ «ក្បត់ជាតិ» លើមេដឹកនាំគណបក្សប្រឆាំងនយោបាយលោក កឹម សុខា គឺជាមូលហេតុដែលធ្វើឱ្យប្រជាធិបតេយ្យនៅកម្ពុជាដើរថយក្រោយ។
ជុំវិញបញ្ហានេះ មេដឹកនាំបក្សកាន់អំណាច លោក ហ៊ុន សែន ធ្លាប់បានលើកឡើងកាលពីពេលកន្លងទៅថា ការដែលលោក កឹម សុខា ជាប់ឃុំយូរបែបនេះ គឺដោយសារតែប្រទេសមួយចំនួនស្រឡាញ់លោក កឹម សុខា ពេក។ លោក ហ៊ុន សែន បញ្ជាក់ថា ការដែលតំណាងប្រទេសខ្លួនទៅជួបលោកហើយ តែបែរជានាំគ្នាទៅជួបលោក កឹម សុខា ទៀតនោះ គឺលោកចាត់ទុកថាជាទំនាក់ទំនងមិនស្មោះត្រង់ ឬទំនាក់ទំនងចាប់ដៃជាន់ជើងលើរដ្ឋាភិបាលកម្ពុជា៕
© 2025, ឌឹ ខេមបូឌា ដេលី. All rights reserved.