តំណាងរាស្ត្រគណបក្សសង្គ្រោះជាតិ លើកឡើងថា មេដឹកនាំបក្សកាន់អំណាច លោក ហ៊ុន សែន នឹងមិនលើកយកករណីកោះគុតប្តឹងថៃ ទៅតុលាការអន្តរជាតិ ដើម្បីទាមទារទឹកដីខ្មែរពីប្រទេសថៃ វិញទេ។
កាលពីថ្ងៃទី១០ ខែកុម្ភៈ ឆ្នាំ២០២៥ សារសំឡេងបែកធ្លាយរបស់មេដឹកនាំបក្សកាន់អំណាច លោក ហ៊ុន សែន ប្រវែងជាង ២នាទី ដែលបាននិយាយទៅកាន់យុវជនខ្មែរម្នាក់ឈ្មោះ សិទ្ធី ជាពលករនៅប្រទេសជប៉ុន ដែលបានលើកឡើងបញ្ហាកោះគុត។ ក្នុងសារសំឡេងនោះ លោក ហ៊ុន សែន បានណែនាំឱ្យយុវជនរូបនោះបញ្ឈប់នូវការលើកឡើងពីបញ្ហាកោះគុតបន្តទៀត និងប្រាប់ឱ្យរូបគេត្រូវតែជឿលើរដ្ឋាភិបាល ជាជាងការញុះញង់របស់ក្រុមប្រឆាំង។
លោកថា ការលើកឡើងពីបញ្ហាកោះគុត នឹងធ្វើឱ្យធ្លាក់ចូលទៅក្នុងបំណងរបស់ក្រុមប្រឆាំងដែលមានលោក អ៊ុំ សំអាន និងលោក សម រង្ស៊ី ជាដើម កំពុងទាមទារឱ្យយកបញ្ហានេះប្តឹងទៅតុលាការអន្តរជាតិក្រុងឡាអេ រហូតមកនោះ។
លោក ហ៊ុន សែន បញ្ជាក់ថា រដ្ឋាភិបាលបានចរចាជាមួយថៃ អស់រយៈពេលជាង ២០ឆ្នាំមកហើយ ផ្ទុយទៅវិញបើដកការចរចានេះ ហើយបែរជាប្តឹងថៃ ទៅតុលាការអន្តរជាតិ នោះនឹងនាំឱ្យផ្ទុះសង្គ្រាមរវាងប្រទេសទាំងពីរជាមិនខាន ខណៈកម្ពុជាក៏នឹងរងនូវការស្ដីបន្ទោសចំពោះបញ្ហានេះដែរ ដូច្នេះរឿងនេះមានតែទុកឱ្យរដ្ឋាភិបាលជាអ្នកដោះស្រាយប៉ុណ្ណោះ ដើម្បីចៀសវាងនូវសង្គ្រាមជាមួយប្រទេសជិតខាង។
មន្ត្រីជាន់ខ្ពស់បក្សប្រឆាំង លោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី១១ កុម្ភៈ នេះថា តាមរយៈសារសំឡេងបែកធ្លាយនៅពេលនេះអាចបញ្ជាក់យ៉ាងច្បាស់ថា លោក ហ៊ុន សែន ប្រាកដជាមិនលើកយកករណីកោះគុតប្តឹងប្រទេសថៃ ទៅតុលាការអន្តរជាតិទីក្រុងឡាអេ ដើម្បីទាមទារយកទឹកដីកម្ពុជាដែលថៃ បានរំលោភបំពាន យកត្រឡប់មកវិញតាមការចង់បានរបស់ពលរដ្ឋខ្មែរទេ។
លោក អ៊ុំ សំអាន អះអាងថា លោក ហ៊ុន សែន បានសម្រេចចិត្តប្រឆាំងនឹងឆន្ទៈរបស់ពលរដ្ឋខ្មែរ ដោយយកករណីកោះគុតនេះទៅចរចាជាលក្ខណៈទ្វេភាគីជាមួយនឹងប្រទេសថៃ ប៉ុន្តែការចរចាបែបនេះ នឹងធ្វើឱ្យប្រទេសកម្ពុជាបាត់បង់កោះគុតជាមិនខាន។
ជុំវិញបញ្ហានេះ ចលនាក្រៅស្រុកជាច្រើន រួមមានចលនាខ្មែរដើម្បីប្រជាធិបតេយ្យ បណ្ដាញយុវជនសកល និងអង្គការខ្មែរដើម្បីប្រជាធិបតេយ្យ ជាដើម នឹងប្រារព្ធកម្មវិធី សមាជពលរដ្ឋខ្មែរអូស្ត្រាលី-ញូវហ្សេឡេន ស្តីអំពីដំណោះស្រាយបញ្ហាកម្ពុជាដែលពាក់ព័ន្ធនឹងការរំលោភសិទ្ធិមនុស្ស អំពើអយុត្តិធម៌សង្គម ការបំផ្លាញប្រជាធិបតេយ្យ អធិបតេយ្យជាតិ បូរណភាពទឹកដី និងបញ្ហាកោះគុតផងដែរ នៅចុងខែកុម្ភៈ ឆ្នាំ២០២៥ នេះ។
ជុំវិញបញ្ហាកោះគុតនេះ គេសម្គាល់ឃើញថា នាយករដ្ឋមន្ត្រីកម្ពុជា លោក ហ៊ុន ម៉ាណែត និងមេដឹកនាំបក្សកាន់អំណាច លោក ហ៊ុន សែន នៅតែមិនទាន់បញ្ជាក់ទៅកាន់ពលរដ្ឋខ្មែរនៅឡើយទេថា កម្ពុជាមានចំណែកគ្រប់គ្រងលើកោះគុត ឬក៏អត់នោះ។
ដោយឡែកភាគីថៃ បានចេញមុខបញ្ជាក់ច្បាស់ៗទៅកាន់ពលរដ្ឋរបស់គេថា កោះគុតជាកម្មសិទ្ធិរបស់ថៃ តែមួយគត់ ហើយគ្មានប្រទេសណាអាចដណ្ដើមកាន់កាប់កោះនេះបានដាច់ខាត៕
© 2025, ឌឹ ខេមបូឌា ដេលី. All rights reserved.