នាយករដ្ឋមន្ត្រីកម្ពុជា លោក ហ៊ុន ម៉ាណែត អះអាងថា រដ្ឋាភិបាលមិនត្រឹមតែមិនអស់លុយទេ ថែមទាំងមានលទ្ធភាពបង្កើនបៀវត្សរ៍ជូនមន្ត្រីរាជការ និងបង្កើនថវិកាជួយពលរដ្ឋតាមប្រព័ន្ធគាំពារសង្គមថែមទៀតសម្រាប់ឆ្នាំ២០២៥ នេះ។
នាយករដ្ឋមន្ត្រីខ្មែរលោក ហ៊ុន ម៉ាណែត លើកឡើងក្នុងពិធីប្រកាសបើកកម្មវិធី «សប្តាហ៍គាំពារសង្គមកម្ពុជាឆ្នាំ២០២៥» និងប្រកាសដាក់ឱ្យអនុវត្តជាផ្លូវការនូវ «ក្របខ័ណ្ឌគោលនយោបាយជាតិគាំពារសង្គមឆ្នាំ២០២៤-២០៣៥» នៅថ្ងៃទី២០ ខែកុម្ភៈ ឆ្នាំ២០២៥ ថា រដ្ឋាភិបាលនៅតែមានលទ្ធភាពដំឡើងប្រាក់បៀវត្សរ៍មន្ត្រីរាជការ កម្លាំងប្រដាប់អាវុធ និងសម្រាប់ផ្តល់សេវាគាំពារសង្គម ទោះថវិកាជាតិបានហើមប៉ោងដោយសារតែកំណើនរបស់ប្រជាជន ការលើកស្ទួយជីវភាពពលរដ្ឋ និងការដំឡើងបៀវត្សរ៍មន្ត្រីរាជការកន្លងមកក៏ដោយ។
នាយករដ្ឋមន្ត្រីខ្មែររូបនេះលើកឡើងថា ចំនួនប្រជាពលរដ្ឋកើនឡើងរាប់លាននាក់ ដែលត្រូវការការជួយបន្ថែម មិនមែនប៉ោងដោយសារយកលុយទៅទិញនាវាចម្បាំង ឬក៏យន្តហោះចម្បាំងអ្វីនោះទេ។ លោកថាលុយទាំងនោះគឺធ្លាក់ទៅលើពលរដ្ឋទាំងអស់។
លោក ហ៊ុន ម៉ាណែត បញ្ជាក់ថាការដែលចំណូលជាតិថយចុះ ក៏ព្រោះតែសេដ្ឋកិច្ចកម្ពុជាមិនមានកំណើនដូចកាលពីមុនជំងឺកូវីដ-១៩ នោះទេ។ បន្ថែមពីនេះ រដ្ឋាភិបាលបានបន្ធូរបន្ថយទៅលើការអនុគ្រោះពន្ធសម្រាប់ពលរដ្ឋជាច្រើន ដូចជា ខាងវិស័យអប់រំ វិស័យកសិកម្ម និងវិស័យទេសចរណ៍ ជាដើម។
អ្នកវិភាគនយោបាយ លោក គឹម សុខ ប្រាប់សារព័ត៌មាន The Cambodia Daily ថា រដ្ឋាភិបាលគ្មានចំណូលគ្រប់គ្រាន់ដើម្បីទ្រទ្រង់កម្មវិធីគាំពារសង្គមបន្ថែមទៀតនោះទេ ព្រោះប្រមូលពន្ធក៏បានតិច ហើយខ្ចីបរទេសក៏មិនបាន ជំនួយបរទេសក៏គ្មាន ចំណែកឯដំណើរការវិនិយោគរបស់រដ្ឋក៏ដំណើរការមិនល្អ ដោយសារប្រឈមនឹងកង្វះប្រព័ន្ធអនុគ្រោះពន្ធពីអាមេរិក និងអឺរ៉ុប ដូច្នេះមានតែប្រើលុយបោះពុម្ពថ្មីប៉ុណ្ណោះ។
លោក គឹម សុខ អះអាងថា រដ្ឋាភិបាលទំនងជាប្រើឱកាសនេះចរាចរក្រដាសប្រាក់បោះពុម្ពថ្មីឲ្យរីកសុះសាយ ពីព្រោះការចរាចរក្រដាសប្រាក់បោះពុម្ពថ្មីពេលផ្ដល់ការគាំពារសង្គមបែបនេះ អាចកាត់បន្ថយការរិះគន់ខ្លះ ប៉ុន្តែទោះបីជារដ្ឋាភិបាលលោក ហ៊ុន ម៉ាណែត ប្រឹងបំភ័ន្តភ្នែកពលរដ្ឋបែបនេះក៏ដោយ ក៏មិនអាចបិទបាំងការធ្លាក់ចុះនៃសេដ្ឋកិច្ច និងការហើមប៉ោងនៃរូបិយប័ណ្ណប្រាក់រៀលបានដែរ។
កាលពីថ្ងៃទី១៦ ខែតុលា ឆ្នាំ២០២៤ រដ្ឋាភិបាលកម្ពុជាបានចេញអនុក្រឹត្យអនុញ្ញាតបោះពុម្ពក្រដាសប្រាក់ប្រភេទ ២សែនរៀល (២០០០០០រៀល) ចំនួន ២០លានសន្លឹក ប្រមាណជា ១ពាន់លានដុល្លារអាមេរិក ខណៈចំនួនថវិកានេះ គឺមានតួលេខប្រហាក់ប្រហែលគ្នានឹងចំនួនលុយដែលរដ្ឋាភិបាលកំពុងខ្វះខាតសម្រាប់គម្រោងចំណាយក្នុងឆ្នាំ២០២៤ កន្លងទៅ៕
© 2025, ឌឹ ខេមបូឌា ដេលី. All rights reserved.