មន្ត្រីជាន់ខ្ពស់គណបក្សកម្លាំងជាតិ លោក រ៉ុង ឈុន នៅតែរក្សាជំហរបង់លុយសងទៅគណៈកម្មាធិការចម្រុះកិច្ចការព្រំដែនចំនួន ១សែនដុល្លារអាមេរិក តាមដីកាបង្គាប់របស់តុលាការ ប៉ុន្តែលោកស្នើសុំបង់លុយទៅតាមដំណាក់កាល ព្រោះការអនុវត្តតាមវិធីនេះ គឺជាជម្រើសចុងក្រោយដែលលោកអាចធ្វើបានចំពោះដីកាបង្គាប់មួយនេះ។
ទីប្រឹក្សាគណបក្សកម្លាំងជាតិ លោក រ៉ុង ឈុន បញ្ជាក់ក្នុងសន្និសីទសារព័ត៌មាននៅថ្ងៃទី១២ មីនា នេះថា ដើម្បីឱ្យលោកអាចបន្តកិច្ចការនយោបាយទៅមុខទៀតបាន មានតែបង់លុយទៅឱ្យគណៈកម្មាធិការព្រំដែនតាមការបង្គាប់បញ្ជារបស់តុលាការប៉ុណ្ណោះ ប៉ុន្តែការស្នើសុំបង់សំណងតាមដំណាក់កាលនេះ មិនទាន់ត្រូវបានតុលាការឆ្លើយតបយ៉ាងណានៅឡើយទេ។
លោក រ៉ុង ឈុន អះអាងថា បន្ទាប់ពីគណបក្សកម្លាំងជាតិ ប្រកាសយុទ្ធនាការរៃអង្គាសថវិកាពីពលរដ្ឋដើម្បីប្រមូលលុយបង់ទៅគណៈកម្មាធិការព្រំដែនចាប់តាំងពីពាក់កណ្តាលខែកុម្ភៈ មក យ៉ាងហោចណាស់មានអ្នកចូលរួមបង់វិភាគទានតាមប្រព័ន្ធអេឡិចត្រូនិក ឬ QR Code ជាង ២ពាន់នាក់ (២១៣៣នាក់) ហើយ។
ចំណែកថវិកាដែលទទួលជាក់ស្តែងនៅពេលនេះ គឺមានចំនួនជាង ២ម៉ឺនដុល្លារអាមេរិក (២១០៣៧,៥៤ដុល្លារ) ចំណែកប្រាក់រៀលទទួលបានជាង ៧លានរៀល (៧៧៤៣៥១០រៀល) ផងដែរ។
មន្ត្រីបក្សប្រឆាំងរូបនេះបញ្ជាក់ថា ពិតមែនតែលោកយល់ព្រមបង់លុយទៅតាមការបង្គាប់របស់តុលាការ ប៉ុន្តែមិនមែនមានន័យថាការសម្រេចរបស់តុលាការជាការកាត់សេចក្តីដែលមានយុត្តិធម៌សម្រាប់រូបលោកនោះទេ ព្រោះពាក្យថាជួសជុលខូចខាតនេះ គឺមិនសក្ដិសមនឹងអ្វីដែលលោកបានធ្វើឡើយ ដែលលោកគ្រាន់តែជិះម៉ូតូទៅទីនោះប៉ុណ្ណោះ។
លោក រ៉ុង ឈុន បញ្ជាក់ថា សូម្បីតែលោកទៅប៉ះពាល់បង្គោលព្រំដែនដោយផ្ទាល់ ក៏មិនដល់ថ្នាក់ខូចខាតបង្គោលនោះរហូតត្រូវផាកពិន័យជាប្រាក់ ១សែនដុល្លារអាមេរិកនោះដែរ ដែលនេះគឺបង្ហាញយ៉ាងច្បាស់ពីភាពអយុត្តិធម៌មកលើរូបលោក។
កាលពីថ្ងៃទី១១ ខែកុម្ភៈ ឆ្នាំ២០២៥ សាលាដំបូងរាជធានីភ្នំពេញ បានបង្គាប់ឱ្យលោក រ៉ុង ឈុន កញ្ញា ស កណិការ និងលោក តុន និមល រួមគ្នាសងសំណងខូចខាតចំនួន ១០ម៉ឺនដុល្លារទៅគណៈកម្មាធិការចម្រុះកិច្ចការព្រំដែន។
តុលាការព្រមានថា ប្រាក់ទាំងនោះត្រូវបង់ទៅឱ្យម្ចាស់បំណុលក្នុងរយៈពេលត្រឹមតែ ១ខែប៉ុណ្ណោះ ដោយគិតចាប់ពីថ្ងៃដែលសាមីខ្លួនបានទទួលលិខិត ប៉ុន្តែបើអ្នកទាំង ៣នាក់នេះគ្មានប្រាក់បង់ទៅឱ្យគណៈកម្មាធិការព្រំដែនតាមចំនួនកំណត់ក្នុងរយៈពេលមួយខែនេះទេ តុលាការនឹងដកហូតទ្រព្យសម្បត្តិរបស់ពួកគេជាថ្នូរជំនួសវិញ ហើយគិតមកទល់ថ្ងៃទី១២ ខែមីនា នេះ គឺមានចំនួន ៣១ថ្ងៃហើយ។
លោក រ៉ុង ឈុន ត្រូវបានតុលាការចោទប្រកាន់ពីបទ «ញុះញង់បង្កឲ្យមានភាពវឹកវរដល់សន្តិសុខសង្គម» បន្ទាប់ពីត្រូវបានសមត្ថកិច្ចចាប់ខ្លួនកាលពីថ្ងៃទី៣១ ខែកក្កដា ឆ្នាំ២០២០ កន្លងទៅ ជុំវិញការចុះទៅពិនិត្យព្រំដែនកម្ពុជា-វៀតណាម ក្នុងស្រុកពញាក្រែក ខេត្តត្បូងឃ្មុំ ត្រង់បង្គោលលេខ ១១៤ ដល់ ១១៩ អំពីភាពមិនប្រក្រតីមួយចំនួននៅពេលនោះ៕
© 2025, ឌឹ ខេមបូឌា ដេលី. All rights reserved.