រដ្ឋមន្ត្រីក្រសួងមហាផ្ទៃ លោក ស សុខា ព្រមានចាត់វិធានការវះកាត់សាច់ស្អុយ ប្រសិនបើរកឃើញមន្ត្រីសមត្ថកិច្ចណាមួយមានជាប់ពាក់ព័ន្ធនឹងបទល្មើសគ្រឿងញៀនខុសច្បាប់ ហើយថាបើមិនមានការពាក់ព័ន្ធនឹងមន្ត្រីអនុវត្តច្បាប់មួយចំនួនទេ បញ្ហានេះក៏មិនរីកធំដូចសព្វថ្ងៃនេះដែរ។
លោក ស សុខា សរសេរលើទំព័រហ្វេសប៊ុករបស់ខ្លួននៅថ្ងៃទី១៣ មីនា នេះដោយលើកឡើងនូវបទបញ្ជាព្រមានផ្ទាល់ទៅកាន់មន្ត្រីនគរបាលក្នុងកិច្ចប្រជុំផ្សព្វផ្សាយយុទ្ធនាការប្រយុទ្ធប្រឆាំងបទល្មើសគ្រឿងញៀនខុសច្បាប់លើកទី១០ កាលពីរសៀលថ្ងៃទី១២ ខែមីនា ថា មន្ត្រីដែលពាក់ព័ន្ធនឹងបទល្មើសគ្រឿងញៀន ត្រូវតែប្រញាប់ដកខ្លួនជាបន្ទាន់ បើមិនចង់ក្លាយជាសាច់ស្អុយ។
លោក ស សុខា អះអាងថា ចាប់ពីពេលនេះទៅ រាជរដ្ឋាភិបាល និងក្រសួងមហាផ្ទៃ មិនអនុវត្តពាក្យស្លោក «ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់» សម្រាប់ការប្រយុទ្ធប្រឆាំងគ្រឿងញៀនខុសច្បាប់នៅកម្ពុជាបន្តទៀតទេ គឺត្រូវតែចាត់វិធានការវះកាត់សាច់ស្អុយចោលតែម្ដង។
លោកព្រមានថា មន្ត្រីនគរបាលដែលពាក់ព័ន្ធនឹងបទល្មើសគ្រឿងញៀន ត្រូវតែដកខ្លួន និងកែប្រែឥរិយាបថជាបន្ទាន់ ហើយមន្ត្រីមានសមត្ថកិច្ចទាំងអស់ត្រូវខិតខំចូលរួមពង្រីកការស្រាវជ្រាវដោយផ្ដោតទាំងមុខសញ្ញាអ្នកដែលប្រព្រឹត្ត និងមុខសញ្ញាដែលពាក់ព័ន្ធជាខ្នងបង្អែកផងដែរ ដើម្បីបង្កើនប្រសិទ្ធភាពនៃការងារប្រយុទ្ធប្រឆាំងគ្រឿងញៀននេះ។
កាលពីថ្ងៃទី១២ ខែកុម្ភៈ ឆ្នាំ២០២៥ លោក ហ៊ុន ម៉ាណែត សារភាពថាស្ថានភាពគ្រឿងញៀនខុសច្បាប់នៅតែស្ថិតក្នុងសភាពប្រឈមធ្ងន់ធ្ងរនៅឡើយ ព្រោះការជួញដូរ ប្រើប្រាស់ ចែកចាយ កែច្នៃ និងផលិតគ្រឿងញៀននៅតែបន្តកើតមាននៅកម្ពុជា។
លោក ហ៊ុន ម៉ាណែត បញ្ជាក់ថា ដើម្បីឆ្លើយតបការប្ដេជ្ញាចិត្តថាកម្ពុជាគឺជាប្រទេសគ្មានគ្រឿងញៀន រដ្ឋាភិបាលសម្រេចដាក់ចេញនូវផែនការស្ដីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់សម្រាប់ឆ្នាំ២០២៥ បន្តទៀត។
រដ្ឋាភិបាលកម្ពុជាបានបង្ហាញរបាយការណ៍របស់ខ្លួនកាលពីពេលថ្មីៗនេះថា អាជ្ញាធរបានបិទទីតាំងអាជីវកម្មចំនួន ៤៨កន្លែង និងចាប់ខ្លួនជនសង្ស័យពាក់ព័ន្ធនឹងគ្រឿងញៀនរាប់ម៉ឺននាក់ រួមទាំងគ្រឿងញៀនគ្រប់ប្រភេទជិត ៤៣តោន (៤២៨៤៨គីឡូក្រាម) និងសារធាតុគីមីផ្សំជិត ៦០០តោន (៥៩៦៣៩៩គីឡូក្រាម) ផងដែរ ចាប់ពីឆ្នាំ២០១៧ ដល់ឆ្នាំ២០២៤ កន្លងទៅនេះ។
ចំណែកអាជ្ញាធរជាតិប្រយុទ្ធប្រឆាំងគ្រឿងញៀន អះអាងថា រយៈពេលពេញ ១ឆ្នាំក្នុងឆ្នាំ២០២៤ កម្ពុជាបានរឹបអូសគ្រឿងញៀនខុសច្បាប់ជិត ១៥តោន (១៤,៧តោន) ខណៈឆ្នាំ២០២៣ អាជ្ញាធរបានរឹបអូសគ្រឿងញៀនជិត ៣តោន (២៩៨៨គីឡូក្រាម) ចំណែកជនសង្ស័យត្រូវបានអាជ្ញាធរឃាត់ខ្លួនជិត ២ម៉ឺន ៦ពាន់នាក់។
ជុំវិញបញ្ហានេះ អតីតមេដឹកនាំបក្សប្រឆាំង លោក សម រង្ស៊ី ធ្លាប់លើកឡើងថា បើរដ្ឋាភិបាលកម្ពុជាចង់លុបបំបាត់គ្រឿងញៀនមែន ទាល់តែហ៊ានអនុវត្តច្បាប់ចាប់ខ្លួនបងប្អូនជីដូនមួយលោក ហ៊ុន ម៉ាណែត គឺលោក ហ៊ុន តូ និងឪពុករបស់គាត់ គឺលោក ហ៊ុន សែន ជាមុនសិន។
លោកថា លោក ហ៊ុន តូ ជាមេក្រុមម៉ាហ្វីយ៉ា និងជាមេជួញដូរគ្រឿងញៀនដ៏ធំនៅកម្ពុជាសព្វថ្ងៃនេះ ចំណែកលោក ហ៊ុន សែន ក៏ជាប់ពាក់ព័ន្ធជាមួយនឹងមេឧក្រិដ្ឋជនគ្រឿងញៀនទាំងអស់ដែលកំពុងលាក់ខ្លួននៅស្រុកខ្មែរដែរ តាមរយៈអំពើពុករលួយក្រោមការឃុបឃិតគ្នាជាមួយក្រុមឧក្រិដ្ឋជនទាំងនោះ៕
© 2025, ឌឹ ខេមបូឌា ដេលី. All rights reserved.