ពន្ធអាហរ័ណ-នីហរ័ណអាមេរិកលើប្រទេសជុំវិញពិភពលោក កំពុងធ្វើឱ្យក្រុមហ៊ុនផលិតកម្មវិលមុខ

រឿងដំឡើងពន្ធ មិនដំឡើងពន្ធ ពន្យារពេលដំឡើងពន្ធទំនិញនាំចូល-នាំចេញ ហៅថា អាហរ័ណ-នីហរ័ណដោយរដ្ឋការប្រធានាធិបតី ដូណាល់ ត្រាំ (Donald Trump) ធ្វើឲ្យអ្នកវិភាគសេដ្ឋកិច្ច អ្នកគ្រប់គ្រងក្រុមហ៊ុនផលិតកម្ម ម្ចាស់ហាងទំនិញលក់ដុំ-លក់រាយ កសិករទីផ្សារសន្និធិ ឬផ្សារហ៊ុន និងផ្សារឥណទេយ្យប័ណ្ណស្ទើរតែទូទាំងសកលលោក ជ្រួលច្របល់ វិលមុខ ហើយអធិប្បាយខុសៗគ្នា។ រឿងពន្ធលើប្រទេសកម្ពុជា ក៏វិលមុខដែរ។

អ្នកឃ្លាំមើលសង្គមលើកឡើងថា រាជរដ្ឋាភិបាលគួរតែដឹងអំពីបំណងរបស់សហរដ្ឋអាមេរិក ដែលមិនមែនត្រឹមតែភាពស្មើគ្នានៃជញ្ជីងពាណិជ្ជកម្មជុំវិញការកំណត់ពន្ធរបស់ខ្លួនលើប្រទេសកម្ពុជានោះទេ ដែលទាមទារឲ្យរដ្ឋាភិបាលលោក ហ៊ុន ម៉ាណែត បង្ហាញជំហរអព្យាក្រឹត្យរបស់ខ្លួនដូចមានចែងក្នុងរដ្ឋធម្មនុញ្ញ។

ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី១០ មេសា នេះថា ការកំណត់ពន្ធរបស់សហរដ្ឋអាមេរិកលើប្រទេសកម្ពុជា មិនមែនគ្រាន់តែរឿងពាណិជ្ជកម្មតែមួយមុខទេ ដូច្នេះប្រទេសកម្ពុជាត្រូវដឹងដែរថា តើអ្វីដែលមហាអំណាចសហរដ្ឋអាមេរិកចង់បានលើសពីនេះ។

លោកបន្តថា បើតាមការកំណត់ពន្ធរបស់សហរដ្ឋអាមេរិកលើប្រទេសចិន ១២៥% នៅពេលនេះ បង្ហាញថា ក្រុងវ៉ាស៊ីនតុន កំពុងប្រកាសសង្គ្រាមពាណិជ្ជកម្មជាមួយប្រទេសចិន រួចទៅហើយ ដូច្នេះសហរដ្ឋអាមេរិកក៏ទំនងជាមិនចង់ឱ្យប្រទេសតូចមួយកេងផលប្រយោជន៍ពីសហរដ្ឋអាមេរិក ដើម្បីបម្រើផលប្រយោជន៍ឱ្យចិន ដែរ។ ឧទាហរណ៍ជាក់ស្តែង ដូចជា ការបដិសេធមិនបញ្ចុះពន្ធឱ្យប្រទេសវៀតណាម ជាដើម។

លោក ម៉ែន ណាត លើកឡើងថា ក្នុងការចរចានេះ ពិតតែមានការលើកឡើងពីផលប្រយោជន៍ពាណិជ្ជកម្ម តែមិនអាចកាត់ផ្ដាច់ចេញពីផលប្រយោជន៍ភូមិសាស្ត្រនយោបាយបានដែរ ដូច្នេះប្រទេសកម្ពុជាគួរតែបង្ហាញជំហរអព្យាក្រឹត្យរបស់ខ្លួនដូចមានចែងក្នុងរដ្ឋធម្មនុញ្ញ ចៀសវាងបង្ហាញជំហរលម្អៀងទៅរកចិន ផ្គើននឹងសហរដ្ឋអាមេរិកដូចដែលខ្លួនធ្លាប់ធ្វើកន្លងមកនោះ។

ប្រធានក្រុមប្រឹក្សាឃ្លាំមើលកម្ពុជារូបនេះបញ្ជាក់ថា ការរក្សាទំនាក់ទំនងជាមួយប្រទេសជាមិត្ត ជាពិសេសមហាអំណាចដោយអព្យាក្រឹត្យដូចការប្ដេជ្ញាចិត្តរបស់ខ្លួនក្នុងច្បាប់កំពូលនៃប្រទេសជាតិ គឺជាមធ្យោបាយយូរអង្វែងដ៏ល្អបំផុតសម្រាប់ប្រទេសកម្ពុជា។

លោកបន្ថែមថា ការធ្វើបែបនេះ គឺជាការបង្ហាញថាប្រទេសកម្ពុជាមិនឆ្លៀតកេងចំណេញផលប្រយោជន៍ពីប្រទេសមួយទៅជួយប្រទេសមួយទៀតផង ហើយក៏បង្ហាញថាប្រទេសកម្ពុជាមិនកេងចំណេញពីផលប្រយោជន៍ភូមិសាស្ត្រនយោបាយពីប្រទេសមួយទៅឱ្យប្រទេសមួយទៀតដែរ។

លោក ម៉ែន ណាត ផ្តាំឱ្យរដ្ឋាភិបាលកម្ពុជារៀនគិតឡើងវិញពីជំហរនយោបាយរេតាមខ្យល់ដែលខ្លួនធ្លាប់អនុវត្តកន្លងមក ដែលប្រាសចាកពីរដ្ឋធម្មនុញ្ញរបស់ខ្លួន ព្រោះផលប្រយោជន៍សេដ្ឋកិច្ចពាណិជ្ជកម្មនៃប្រទេសកម្ពុជា ដូចជា ការអនុគ្រោះពន្ធ GSP ពីសហរដ្ឋអាមេរិក និង EBA ពីសហភាពអឺរ៉ុប សុទ្ធតែត្រូវបានរាជរដ្ឋាភិបាលប្រទេសកម្ពុជាបំផ្លាញចោលទាំងអស់។

កាលពីថ្ងៃទី០៩ ខែមេសា ប្រធានាធិបតីអាមេរិក លោក ដូណាល់ ត្រាំ អះអាងថា សហរដ្ឋអាមេរិកនឹងមិនអនុវត្តអត្រាពន្ធថ្មីសម្រាប់ប្រទេសទាំងជិត ២០០ នោះទេ (១៨៥) លើកលែងតែចិន សម្រាប់រយៈពេល ៩០ថ្ងៃ ដោយគិតពីថ្ងៃទី១០ ខែមេសា តទៅ។

លោក ដូណាល់ ត្រាំ បញ្ជាក់ថា សហរដ្ឋអាមេរិកនឹងកាត់បន្ថយអត្រាពន្ធ ១០% ក្នុងអំឡុងពេល ៩០ថ្ងៃនេះ ហើយថានឹងចាប់អនុវត្តភ្លាមៗផងដែរ។ ការផ្លាស់ប្ដូរជំហរភ្លាមៗរវាងពេលយប់ និងពេលថ្ងៃរសៀលនោះ សូម្បីតែតំណាងពាណិជ្ជកម្មអាមេរិកាំង លោក Jamieson Greer ក៏មិនបានដឹងផង ខណៈលោកកំពុងឆ្លើយសំណួរសមាជិកសភាអំពីបញ្ហាដំឡើងពន្ធទំនិញនោះ។

លោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លើកឡើងដែរថា ប្រទេសកម្ពុជាមិនទាន់អស់ផ្លូវដើរនៅឡើយទេ ទោះជាជាប់ពន្ធអាមេរិកាំងខ្ពស់កប់ពពករហូតដល់ ៤៩% ក្នុងពេលនេះក៏ដោយ ព្រោះប្រទេសកម្ពុជានៅមានប្រព័ន្ធអនុគ្រោះពន្ធពីសហភាពអឺរ៉ុប (EBA = Everything But Arms) ចំនួន ៨០% ទៀត។

នាយកប្រតិបត្តិអង្គការសង់ត្រាល់រូបនេះលើកឡើងថា កម្ពុជាគួរពិចារណាអនុសាសន៍របស់សហភាពអឺរ៉ុបកន្លងមក ក្នុងករណីអាមេរិកមិនបញ្ចុះពន្ធនាំចេញរបស់កម្ពុជាទេ កម្ពុជានៅតែអាចមានទីផ្សារអឺរ៉ុប និងបណ្តាប្រទេសមួយចំនួនទៀត ដូចជា កាណាដា និងចក្រភពអង់គ្លេស ជាដើម ប៉ុន្តែកម្ពុជាត្រូវគោរពតាមគោលការណ៍ស្ដារប្រជាធិបតេយ្យ និងសិទ្ធិមនុស្សឡើងវិញដាច់ខាត។

ទោះជាយ៉ាងណាក៏ដោយ ការបកស្រាយពីអ្នកវិភាគខ្លះ គឺមកពីមើលឃើញមួយជ្រុងនៃបញ្ហា។

លោកប្រធានាធិបតី ត្រាំ បានប្រកាសអំពីគោលនយោបាយសេដ្ឋកិច្ចសម្រាប់បក្សលោកដោយនិយាយថា ធ្វើឲ្យសហរដ្ឋអាមេរិកអស្ចារ្យជាថ្មី (Make America Great Again (MAGA))។ លោកចង់ធ្វើយ៉ាងណាឲ្យក្រុមហ៊ុនអាមេរិកាំងផង ក្រុមហ៊ុនបរទេសផង បើករោងចក្រ ឧស្សាហកម្ម ផលិតកម្ម រោងកម្មន្តសាលនៅលើទឹកដីសហរដ្ឋអាមេរិកឲ្យបានច្រើន ដើម្បីផ្តល់ការងារដល់ពលរដ្ឋអាមេរិកាំងតាមរយៈការដំឡើងពន្ធនាំចូល។

អ្វីដែលលោកគិតមិនដល់នោះ គឺរោងចក្រជាច្រើនប្រភេទ ទាំងម្ចាស់អាមេរិកាំង ទាំងម្ចាស់បរទេស មិនអាចបើករោងចក្រលើទឹកដីសហរដ្ឋអាមេរិកទាំងស្រុងបានឡើយ ពីព្រោះតម្លៃពលកម្មការងារខ្ពស់ ហើយប្រឈមនឹងច្បាប់ទម្លាប់ច្រើនបែបផង។

អ្នកវិភាគសេដ្ឋកិច្ច ប្រាប់ទូរទស្សន៍អាមេរិកាំង CNBC កាលពីថ្ងៃទី៨ ខែមេសា កន្លងទៅនេះថា៖ ក្រុមហ៊ុនអាមេរិកាំងមួយចំនួនធំដែលធ្វើពាណិជ្ជកម្មជាមួយប្រទេសកម្ពុជា នឹងមិនវិលមកសហរដ្ឋអាមេរិកបានឡើយ ជាពិសេសខាងវិស័យកាត់ដេរតែម្តង។ CNBC ផ្សាយថា ក្រុមហ៊ុននាំផលិតផលពីរោងចក្រនៅស្រុកខ្មែរមានឈ្មោះ៖

Under Armour,
Rawlings Sporting Goods,
Lululemon,
Black & Decker,
Hugo Boss,
Hearth & Home,
Eddie Bauer,
Dollar General,
Diageo,
Asics,
Adidas and Bass Pro Shops។

នេះបើយោងតាម ImportGenius។

ក្រៅពីផលិតផលវាយនភណ្ឌ ក៏មានផលិតផលទោចក្រយាន (កង់) ផលិតផលកសិកម្ម គ្រឿងសង្ហារិម កៅស៊ូកង់ ផ្ទាំងប្រើថាមពលព្រះអាទិត្យ និងថតទូចង្ក្រានបាយ (bicycles, agriculture products, furniture, solar panels, tires and kitchen cabinets)។

យ៉ាងណាមិញ នៅទីបញ្ចប់ សង្គ្រាមពាណិជ្ជកម្មសងសឹករវាងមហាអំណាចសហរដ្ឋអាមេរិក និងចិន បានបន្ថែមបន្ទុកចំណាយលើពលរដ្ឋអាមេរិកាំងយ៉ាងខ្លាំងដែរ។ ប្រទេសចិន ប្រកាសថា បើសហរដ្ឋអាមេរិកដំឡើងពន្ធផលិតផលចិនម្ល៉ឹងៗ គេក៏មិនលក់ទំនិញបញ្ចុះថ្លៃ (discounts) ដល់អ្នកបញ្ជាទិញដុំទៅកាន់សហរដ្ឋអាមេរិកដែរ។

សេដ្ឋវិទូប៉ាន់ប្រមាណថា ពលរដ្ឋអាមេរិកាំងម្នាក់អាចចំណាយបន្ថែមលើទំនិញអាហរ័ណមានអត្រាពន្ធខ្ពស់ដល់ទៅ ៣៨០០ដុល្លារក្នុងមួយឆ្នាំ៕

ពន្ធអាហរ័ណ-នីហរ័ណអាមេរិកលើប្រទេសជុំវិញពិភពលោក កំពុងធ្វើឱ្យក្រុមហ៊ុនផលិតកម្មវិលមុខ

បទវិភាគ

បទវិភាគ៖ ហេតុអ្វីបានជារុស្ស៊ី ខ្លាចមីស៊ីល Tomahawk អាមេរិក? ធ្វើដូចម្ដេចអ៊ុយក្រែន បានអាវុធនេះពីលោក ត្រាំ?

បទវិភាគ៖ ពីឧក្រិដ្ឋជនសង្គ្រាមក្លាយជាភ្ញៀវរបស់អាមេរិក លោក ត្រាំ ទាញលោក ពូទីន ចេញពីភាពឯកា

បទវិភាគព័ត៌មាន៖ មិនអាចប្ដូរមេដឹកនាំផ្ដាច់ការនៅបេឡារូស លើកលែងតែដូចប្រទេសបង់ក្លាដេស

បទវិភាគ៖ របបផ្ដាច់ការនៅប្រទេសស៊ីរី ដល់ពេលត្រូវបាត់បង់ហើយ

បទវិភាគ៖ ប្រទេសមួយក្រោមឥទ្ធិពលចិនខ្លាំង ហើយពីរទៀតក្រោមឥទ្ធិពលវៀតណាមផងចិនផង

បទវិភាគ៖ ផ្លែការ៉ុតនិងដំបងដាក់នៅចំពោះមុខកម្ពុជាក្នុងភូមិសាស្ត្រនយោបាយរវាងអាមេរិកនិងចិន

បទវិភាគ៖ តើប៉ាឡេស្ទីន អាចក្លាយជាសមាជិកពេញសិទ្ធិនៃអង្គការសហប្រជាជាតិបានដែរឬទេ?

បទវិភាគ៖ អាហ្វ្រិកខាងត្បូងអូសអ៊ីស្រាអែលឡើង ICC តែផ្ដល់ឱកាសឱ្យរុស្ស៊ីបន្តវិនាសកម្មនៅអ៊ុយក្រែន

អត្ថបទទាក់ទង

រដ្ឋាភិបាលបញ្ចូលសាច់ញាតិយុទ្ធជនពលី និងរបួសធ្ងន់ ៤១នាក់ក្នុងក្របខ័ណ្ឌកងទ័ព

មន្រ្តីបក្សកាន់អំណាចថា ការងារស្វែងរកការដោះលែង លោក កឹម សុខា បានចំណាយពេលអស់ជិត៣ឆ្នាំ

ប្រមុខរដ្ឋស្តីទី លោក ហ៊ុន សែន លើកលែងទោស អតីតមេបក្សប្រឆាំង លោក កឹម សុខា ប៉ុន្តែចាក់សោនយោបាយ

ព្រឹទ្ធសភាកម្ពុជា អនុម័តទាំងស្រុងសេចក្តីព្រាងច្បាប់ស្តីពី «កាតព្វកិច្ចយោធា»

អត្ថបទអានច្រើន

និស្សិតភូមា យករូបមេដឹកនាំកម្ពុជាលោក ហ៊ុន សែន ទៅជាន់ឈ្លីនិងដុតចោលតាមទីសាធារណៈ

លោក ហ៊ុន សែន គំរាមមិនឱ្យលោក ស ខេង ឈរជាបេក្ខភាពនាយករដ្ឋមន្ត្រីបន្ទាប់ពីលោកជាដាច់ខាត

អតិថិជនទិញអចលនទ្រព្យពីអ្នកឧកញ៉ា ឡេង ណាវ៉ាត្រា ទាមទារផ្ទះតាមកិច្ចសន្យា

អតិថិជនទិញផ្ទះល្វែងពីបុរីពិភពថ្មីកំបូលខកចិត្តនឹងគុណភាពសំណង់ផ្ទះល្វែង និងសេវាមួយចំនួនរបស់ក្រុមហ៊ុននេះ

លោក ជា សុផារ៉ា រងការចោទប្រកាន់ថាប្រព្រឹត្តអំពើពុករលួយក្នុងជួរបក្សកាន់អំណាចរបស់ខ្លួន

លោក សម រង្ស៊ី ប្រកាសរកការរួបរួមជាមួយបក្សកាន់អំណាចរបស់លោក ហ៊ុន សែន ដើម្បីជាតិខ្មែររុងរឿង

សេចក្ដីរាយការណ៍ពិសេស

លោក ចេន ហ្ស៊ី បាត់មុខពីកម្ពុជា ស្របពេលអាមេរិកលាតត្រដាងអំពើឆបោកនិងលាងលុយកខ្វក់ក្នុងប្រព័ន្ធគ្រីបតូ

តើព្រះសង្ឃ និងមេដឹកនាំខ្មែរ បានធ្វើអ្វីខ្លះដើម្បីជាប្រយោជន៍ដល់ព្រះពុទ្ធសាសនា និងសង្គមជាតិរបស់ខ្លួន?

តើកាកបាទក្រហមកម្ពុជាទទួលអំណោយសប្បុរសដោយកុសលកម្ម ឬអកុសលកម្មបថ?

លោក ហេង សិទ្ធី អំពាវនាវឱ្យពលរដ្ឋខ្មែរចូលរួមរំដោះប្រទេសចេញពីអំណាចប្រមូលផ្ដុំគ្រួសារតែមួយ

មេធាវី៖ ការចាប់ខ្លួនលោក ហេង សិទ្ធី ដោយសារដឹងអំពីផែនការបង្កើតបក្សនយោបាយប្រឆាំងត្រកូលហ៊ុន

ពន្ធ​អាហរ័ណ-នីហរ័ណ​អាមេរិក​លើ​ប្រទេស​ជុំវិញ​ពិភពលោក កំពុង​ធ្វើ​ឱ្យ​ក្រុមហ៊ុន​ផលិតកម្ម​វិលមុខ

បទវិភាគ

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស

ពន្ធអាហរ័ណ-នីហរ័ណអាមេរិកលើប្រទេសជុំវិញពិភពលោក កំពុងធ្វើឱ្យក្រុមហ៊ុនផលិតកម្មវិលមុខ