តម្លៃប្រេងឆៅហក់ឡើងថ្លៃភ្លាមៗ ខណៈអ៊ីស្រាអែលត្រៀមវាយប្រហារទីតាំងនុយក្លេអ៊ែរនិងប្រេងរបស់អ៊ីរ៉ង់

បណ្ដាញផ្សាយព័ត៌មាន MSN បានផ្សាយឲ្យដឹងកាលពីថ្ងៃទី២១ ឧសភា ថា ខណៈនេះតម្លៃប្រេងឆៅបានឡើងគួរឱ្យកត់សម្គាល់ បន្ទាប់ពីចារកម្មសហរដ្ឋអាមេរិកបញ្ចេញសេចក្តីរាយការណ៍ថា អ៊ីស្រាអែល កំពុងត្រៀមខ្លួនរៀបចំផែនការវាយប្រហារលើទីតាំងនុយក្លេអ៊ែរ និងទីតាំងប្រេងក្នុងប្រទេសអ៊ីរ៉ង់ ដែលដំណឹងនេះបានបង្កឱ្យមានការកើនឡើងនូវភាពតានតឹងភូមិសាស្ត្រនយោបាយ សេដ្ឋកិច្ច បណ្ដាលឱ្យតម្លៃប្រេងឆៅនៅលើទីផ្សារអន្តរជាតិហក់ឡើងភ្លាម។

តាមលោក Robert Rennie សេដ្ឋវិទូ និងជាប្រធានផ្នែកសាជីវកម្ម Westpac Banking Corp បានលើកឡើងថា ការហក់ឡើងនៃតម្លៃប្រេងឆៅនេះ គឺជាសញ្ញាព្រមានយ៉ាងច្បាស់ថា ភាគហ៊ុននៅលើទីផ្សារមានអស្ថិរភាព ការដែលអ៊ីស្រាអែល ត្រៀមវាយប្រហារអ៊ីរ៉ង់ បាននាំឱ្យមានការព្រួយបារម្ភភ័យខ្លាចពីការទាញទៅរកសង្គ្រាមដ៏គ្រោះថ្នាក់នៅតំបន់មជ្ឈិមបូព៌ា ដែលខណៈភាពតានតឹងយ៉ាងខ្លាំងរួចទៅហើយ ព្រោះតែអ៊ីស្រាអែល កំពុងធ្វើសង្គ្រាមវាយលុកកាន់កាប់តំបន់ហ្កាហ្សា នៃដែនដីប៉ាឡេស្ទីន។

ទូរទស្សន៍អាមេរិកាំង MSNBC ផ្សាយកាលពីថ្ងៃពុធ ទី២១ ឧសភា ប្រធានាធិបតី ដូណាល់ ត្រាំ និងនាយករដ្ឋមន្ត្រី ណាថាន់ ញ៉ាហ៊ូ គិតត្រូវគ្នាថានឹងជម្លៀសជនជាតិប៉ាឡេស្ទីន ពីខេត្តភាគខាងជើងទៅដាក់ខេត្តភាគខាងត្បូង ហើយយកតំបន់កណ្តាលជាប់មាត់សមុទ្រធ្វើជាតំបន់អភិវឌ្ឍន៍ទេសចរណ៍ សង់សណ្ឋាគារ កន្លែងដើរលេងកម្សាន្ត បនល្បែងជាមួយនឹងកូនប្រសាប្រធានាធិបតីសហរដ្ឋអាមេរិក។

អ្នកជំនាញខាងច្បាប់ និយាយថា អំពើ និងទង្វើបែបនោះ ជាការរំលោភច្បាប់អន្តរជាតិ។

កាលពីសប្ដាហ៍មុន ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយថា នឹងព្យាយាមទាញឱ្យក្រុងតេហេរ៉ង់ ឈានដល់កិច្ចព្រមព្រៀងកម្មវិធីអាវុធនុយក្លេអ៊ែរជាមួយក្រុងវ៉ាស៊ីនតោន ប៉ុន្តែលោក ត្រាំ ព្រមានថា បើគ្មានកិច្ចព្រមព្រៀងឈានដល់ការរំសាយកម្មវិធីនុយក្លេអ៊ែររបស់អ៊ីរ៉ង់ បានទេ ទីតាំងនុយក្លេអ៊ែររបស់អ៊ីរ៉ង់ អាចនឹងរងការវាយប្រហារ ហើយសាធារណរដ្ឋឥស្លាមមួយនេះ នឹងជួបរឿងអាក្រក់។

តែយ៉ាងណា មេដឹកនាំកំពូលបំផុតនៃរបបសាធារណរដ្ឋឥស្លាម Ayatollah Ali Khamenei ក៏ព្រមានដែរថា ការចរចាជាមួយក្រុងវ៉ាស៊ីនតោន ទាក់ទងនឹងកម្មវិធីនុយក្លេអ៊ែររបស់អ៊ីរ៉ង់ អាចនឹងមិនឈានដល់កិច្ចព្រមព្រៀងនោះទេ បើក្រុងវ៉ាស៊ីនតោន នៅតែមិនព្រមផ្ដល់សិទ្ធិឱ្យក្រុងតេហេរ៉ង់ មានសិទ្ធិថាមពលនុយក្លេអ៊ែរស៊ីវិល ដែលអ៊ីរ៉ង់ ត្រូវការចម្រាញ់សារធាតុអ៊ុយរ៉ាញ៉ូម។

កំពូលមេដឹកនាំអ៊ីរ៉ង់ រូបនេះ ចាត់ទុកការចរចាជាមួយសហរដ្ឋអាមេរិកកាលពីថ្ងៃទី១២ មេសា ពុំមានសញ្ញាវិជ្ជមាន ហើយការចរចាខាងមុខទៀត ពិតជាគ្មានលទ្ធផលសម្រាប់ផលប្រយោជន៍អ៊ីរ៉ង់ឡើយ។

លោក Ayatollah Ali Khamenei ព្រមានវិញថា អ៊ីរ៉ង់ត្រូវប្រថុយទទួលសង្គ្រាម បើលោក ត្រាំ សម្រេចឱ្យវាយប្រហារទីតាំងនុយក្លេអ៊ែររបស់អ៊ីរ៉ង់។

ជាមួយគ្នានេះ បើយោងតាមប្រភពចារកម្មអាមេរិក អ៊ីស្រាអែល អាចមិនរង់ចាំសហរដ្ឋអាមេរិក និងអ៊ីរ៉ង់ មានកិច្ចព្រមព្រៀង ឬមិនមាននោះទេ គឺអ៊ីស្រាអែល អាចនឹងវាយប្រហារទៅលើទីតាំងនុយក្លេអ៊ែរ និងទីតាំងចម្រាញ់ប្រេងរបស់ប្រទេសអ៊ីរ៉ង់ ទៀតផង។

ក្នុងស្ថានភាពរំជើបរំជួលនៅលើទីផ្សារប្រេងអន្តរជាតិ បាននាំឱ្យតម្លៃប្រេងឆៅហក់ឡើងជាថ្មីប្រហែល ១៥ភាគរយ តាំងពីដើមខែឧសភា នេះមក ដែលនាំឱ្យមានការព្រួយបារម្ភអំពីស្ថិរភាពសេដ្ឋកិច្ចពិភពលោក។

កាលពីថ្ងៃចន្ទក្នុងសប្តាហ៍នេះ ភាគហ៊ុននៅអាស៊ីភាគច្រើន បានហក់ឡើងគួរឱ្យកត់សម្គាល់ ដូចជា នៅទីក្រុងហុងកុង សៀងហៃ ស៊ីដនី សិង្ហបុរី សេអ៊ូល វែលលីងតុន តៃប៉ិ ម៉ានីល បុមបៃ និងបាងកក តូក្យូ ប៉ុន្តែភាគហ៊ុននៅទីផ្សារភាគហ៊ុនទីក្រុងឡុងដ៍នៃចក្រភពអង់គ្លេស បានធ្លាក់ចុះបន្តិច ហើយប្រាក់ផោនអង់គ្លេស មានតុល្យភាពនឹងប្រាក់ដុល្លាររបស់អាមេរិក បន្ទាប់ពីចក្រភពអង់គ្លេស ទទួលបានទិន្នន័យអតិផរណាដ៏ល្អប្រសើរ លើសពីការព្យាករកាលពីក្នុងខែមេសា នេះ។

តែជាមួយគ្នានេះ ប្រាក់ដុល្លារក៏បានបាត់បង់តុល្យភាពនឹងប្រាក់អឺរ៉ូ និងប្រាក់យ៉េន មុនពេលកិច្ចប្រជុំនៃរដ្ឋមន្ត្រីហិរញ្ញវត្ថុ G7 ត្រូវបានគេរំពឹងថានឹងធ្វើឡើងនៅក្នុងសប្តាហ៍នេះ ជាមួយនឹងការជឿជាក់ថា លោក ត្រាំ នឹងបើកភ្លើងបៃតងខាងសេដ្ឋកិច្ច ដើម្បីជួយដល់ប្រទេសមួយចំនួនដែលនាំទំនិញចូលទៅទីផ្សារសហរដ្ឋអាមេរិក។

ការប៉ះទង្គិចថ្មីៗនេះរវាងចិន និងសហរដ្ឋអាមេរិក បាននាំឱ្យទីផ្សារពិភពលោកមានភាពរង្គោះរង្គើ ខណៈទីក្រុងប៉េកាំង រិះគន់សហរដ្ឋអាមេរិកចំពោះការគាបសង្កត់ និងបង្កការគំរាមកំហែងដល់ការគ្រប់គ្រងការនាំចេញបន្ទះឈីបរបស់ខ្លួន។ ជាមួយគ្នានេះ ចិនក៏បានព្រមានផងដែរថា ក្រុងប៉េកាំង នឹងចាត់វិធានការប្រឆាំងនឹងវិធានការសហរដ្ឋអាមេរិក ដែលមានគោលបំណងរឹតបន្តឹងផលិតផលបន្ទះឈីប semiconductors របស់ចិន។

ប្រធានធនាគារបម្រុងសហព័ន្ធ St. Louis Fed (Federal Reserve Bank of St. Louis) លោក Alberto Musalem ព្រមានថា វិធានការសងសឹកគ្នារវាងសហរដ្ឋអាមេរិក និងចិន អាចនឹងប៉ះពាល់ដល់កំណើនការងារ ទោះបីជាប្រទេសនានាបានស្នើឱ្យប្រធានាធិបតី ត្រាំ ទម្លាក់ពន្ធនាំចូលក៏ដោយក្តី។

ជាមួយគ្នានេះ លោក Robert Rennie សេដ្ឋវិទូ និងជាប្រធានផ្នែកសាជីវកម្មធនាគារ Westpac Banking Corp ក៏បានចេញសារព្រមានថា ក្នុងស្ថានភាពលំនឹងសេដ្ឋកិច្ចសកលកំពុងតែមិនស្ថិតស្ថេរទៅហើយនេះ ប្រសិនបើមានការផ្ទុះការវាយប្រហារទៅលើទីតាំងផលិតប្រេងរបស់អ៊ីរ៉ង់ វានឹងនាំទៅរកសង្គ្រាមទ្រង់ទ្រាយធំអាចនឹងធ្វើឱ្យពិភពលោកជួបវិបត្តិសេដ្ឋកិច្ចជាថ្មីម្ដងទៀត ខណៈពិភពលោកជួបវិបត្តិប្រេងឥន្ធនៈពីរុស្ស៊ី រួចទៅហើយ ព្រោះតែឧស្សាហកម្មប្រេងនៅប្រទេសរុស្ស៊ី កំពុងធ្លាក់ក្នុងទណ្ឌកម្មពីសហភាពអឺរ៉ុប និងសហរដ្ឋអាមេរិក ដែលបណ្ដាលមកពីរុស្ស៊ី បង្កសង្គ្រាមទៅលើប្រទេសអ៊ុយក្រែន៕

តម្លៃប្រេងឆៅហក់ឡើងថ្លៃភ្លាមៗ ខណៈអ៊ីស្រាអែលត្រៀមវាយប្រហារទីតាំងនុយក្លេអ៊ែរនិងប្រេងរបស់អ៊ីរ៉ង់

បទវិភាគ

បទវិភាគ៖ ហេតុអ្វីបានជារុស្ស៊ី ខ្លាចមីស៊ីល Tomahawk អាមេរិក? ធ្វើដូចម្ដេចអ៊ុយក្រែន បានអាវុធនេះពីលោក ត្រាំ?

បទវិភាគ៖ ពីឧក្រិដ្ឋជនសង្គ្រាមក្លាយជាភ្ញៀវរបស់អាមេរិក លោក ត្រាំ ទាញលោក ពូទីន ចេញពីភាពឯកា

បទវិភាគព័ត៌មាន៖ មិនអាចប្ដូរមេដឹកនាំផ្ដាច់ការនៅបេឡារូស លើកលែងតែដូចប្រទេសបង់ក្លាដេស

បទវិភាគ៖ របបផ្ដាច់ការនៅប្រទេសស៊ីរី ដល់ពេលត្រូវបាត់បង់ហើយ

បទវិភាគ៖ ប្រទេសមួយក្រោមឥទ្ធិពលចិនខ្លាំង ហើយពីរទៀតក្រោមឥទ្ធិពលវៀតណាមផងចិនផង

បទវិភាគ៖ ផ្លែការ៉ុតនិងដំបងដាក់នៅចំពោះមុខកម្ពុជាក្នុងភូមិសាស្ត្រនយោបាយរវាងអាមេរិកនិងចិន

បទវិភាគ៖ តើប៉ាឡេស្ទីន អាចក្លាយជាសមាជិកពេញសិទ្ធិនៃអង្គការសហប្រជាជាតិបានដែរឬទេ?

បទវិភាគ៖ អាហ្វ្រិកខាងត្បូងអូសអ៊ីស្រាអែលឡើង ICC តែផ្ដល់ឱកាសឱ្យរុស្ស៊ីបន្តវិនាសកម្មនៅអ៊ុយក្រែន

អត្ថបទទាក់ទង

មេបញ្ជាការកងទ័ពអាមេរិកបង្ហាញផែនការថ្មីបើកប្រតិបត្តិការវាយប្រហារអ៊ីរ៉ង់លើកទីពីរ

ប្រធានាធិបតីសហរដ្ឋអាមេរិក អះអាងថាអ៊ីរ៉ង់ប្រាប់ថាទីក្រុងតេហេរ៉ង់ នឹងដួលរលំឆាប់ៗ

ច្រកសមុទ្រហ័រមូស នៅតែមិនទាន់មានសេរីភាពធ្វើនាវាចរណ៍សម្រាប់កប៉ាល់ដឹកប្រេងពីមជ្ឈិមបូព៌ា

អ៊ីរ៉ង់បញ្ជូនសំណើបញ្ឈប់ការឡោមព័ទ្ធច្រកសមុទ្រហ័រមូស និងបញ្ចប់សង្គ្រាមទៅកាន់សហរដ្ឋអាមេរិក

លោក ដូណាល់ ត្រាំ ព្រមានពីរលកនៃការវាយប្រហារថ្មី ប្រសិនបើកិច្ចព្រមព្រៀងជាមួយអ៊ីរ៉ង់បរាជ័យ

លោក ត្រាំ ជឿថាការចរចាអាចមានវិញនៅ ៣ថ្ងៃទៀត តែអ៊ីរ៉ង់ថាទាល់តែអាមេរិកបើកផ្លូវសមុទ្រឡើងវិញ

អត្ថបទអានច្រើន

និស្សិតភូមា យករូបមេដឹកនាំកម្ពុជាលោក ហ៊ុន សែន ទៅជាន់ឈ្លីនិងដុតចោលតាមទីសាធារណៈ

លោក ហ៊ុន សែន គំរាមមិនឱ្យលោក ស ខេង ឈរជាបេក្ខភាពនាយករដ្ឋមន្ត្រីបន្ទាប់ពីលោកជាដាច់ខាត

អតិថិជនទិញអចលនទ្រព្យពីអ្នកឧកញ៉ា ឡេង ណាវ៉ាត្រា ទាមទារផ្ទះតាមកិច្ចសន្យា

អតិថិជនទិញផ្ទះល្វែងពីបុរីពិភពថ្មីកំបូលខកចិត្តនឹងគុណភាពសំណង់ផ្ទះល្វែង និងសេវាមួយចំនួនរបស់ក្រុមហ៊ុននេះ

លោក ជា សុផារ៉ា រងការចោទប្រកាន់ថាប្រព្រឹត្តអំពើពុករលួយក្នុងជួរបក្សកាន់អំណាចរបស់ខ្លួន

លោក សម រង្ស៊ី ប្រកាសរកការរួបរួមជាមួយបក្សកាន់អំណាចរបស់លោក ហ៊ុន សែន ដើម្បីជាតិខ្មែររុងរឿង

សេចក្ដីរាយការណ៍ពិសេស

លោក ចេន ហ្ស៊ី បាត់មុខពីកម្ពុជា ស្របពេលអាមេរិកលាតត្រដាងអំពើឆបោកនិងលាងលុយកខ្វក់ក្នុងប្រព័ន្ធគ្រីបតូ

តើព្រះសង្ឃ និងមេដឹកនាំខ្មែរ បានធ្វើអ្វីខ្លះដើម្បីជាប្រយោជន៍ដល់ព្រះពុទ្ធសាសនា និងសង្គមជាតិរបស់ខ្លួន?

តើកាកបាទក្រហមកម្ពុជាទទួលអំណោយសប្បុរសដោយកុសលកម្ម ឬអកុសលកម្មបថ?

លោក ហេង សិទ្ធី អំពាវនាវឱ្យពលរដ្ឋខ្មែរចូលរួមរំដោះប្រទេសចេញពីអំណាចប្រមូលផ្ដុំគ្រួសារតែមួយ

មេធាវី៖ ការចាប់ខ្លួនលោក ហេង សិទ្ធី ដោយសារដឹងអំពីផែនការបង្កើតបក្សនយោបាយប្រឆាំងត្រកូលហ៊ុន