ប្រធានព្រឹទ្ធសភាកម្ពុជា លោក ហ៊ុន សែន បញ្ជាក់ថា អ្វីដែលកម្ពុជាចង់បាន គឺស្ថានការណ៍នៅតាមព្រំដែនវិលត្រឡប់ទៅសភាពដើមវិញ ប៉ុន្តែកម្ពុជាក៏បានត្រៀមសំណាញ់មេឃរួចជាស្រេចដែរ ដើម្បីការពារអធិបតេយ្យជាតិ និងបូរណភាពទឹកដីពីការឈ្លានពានរបស់បរទេសជិតខាង។
មេដឹកនាំបក្សកាន់អំណាច លោក ហ៊ុន សែន ថ្លែងសារពិសេសពាក់ព័ន្ធរឿងព្រំដែនកម្ពុជា-ថៃ នៅព្រឹកថ្ងៃទី២៩ ខែឧសភា ឆ្នាំ២០២៥ នេះថា សព្វាវុធ និងកងទ័ពដែលបញ្ជូនទៅកាន់ព្រំដែន មិនមែនដើម្បីទៅធ្វើសង្គ្រាមទេ ប៉ុន្តែគឺជាការត្រៀមបម្រុងទុកសម្រាប់យថាហេតុអាក្រក់ណាមួយដែលភាគីថៃ បំពានតែប៉ុណ្ណោះ ព្រោះនេះគឺជាសិទ្ធិការពារខ្លួនរបស់កម្ពុជា។
លោក ហ៊ុន សែន សង្ឃឹមថា សភាពការណ៍ផ្ទុះជម្លោះនៅតំបន់មុំបី នឹងមិនរីករាលដាលទៅកាន់តំបន់ផ្សេងៗទៀតទេ ដូចជានៅតំបន់ប្រាសាទព្រះវិហារ ប្រាសាទតាមាន់ និងប្រាសាទតាក្របី ជាពិសេសនៅតាមបន្ទាត់ព្រំដែនកម្ពុជា-ថៃ តែម្ដង។ ជាងនេះទៀត លោកក៏សង្ឃឹមថា សភាពការណ៍នេះក៏នឹងមិនប៉ះពាល់ដល់កិច្ចសហប្រតិបត្តិការលើវិស័យផ្សេងទៀតរវាងប្រទេសទាំងពីរដែរ ដូចជា សេដ្ឋកិច្ច ពាណិជ្ជកម្ម វិនិយោគ ទេសចរណ៍ កីឡា ឬគ្រប់ផ្នែកដែលកម្ពុជា-ថៃ មានកិច្ចសហប្រតិបត្តិការជាមួយគ្នា រាប់ទាំងផ្នែកកិច្ចសហប្រតិបត្តិការផ្នែកយោធាថែមទៀត។
មេដឹកនាំបក្សកាន់អំណាចរូបនេះ អំពាវនាវឱ្យពលរដ្ឋកុំរុញបញ្ហានេះឱ្យមានការស្អប់ជាតិសាសន៍ និងការប្រើប្រាស់ពាក្យពេចន៍មិនសមរម្យ ប៉ុន្តែត្រូវរកវិធីដោះស្រាយដើម្បីសម្រាលសភាពការណ៍នេះមករកភាពដើមវិញ និងបង្កើននូវជំនឿទុកចិត្តគ្នាទៅវិញទៅមកក្នុងការទាញយកផលប្រយោជន៍នៃកិច្ចសហប្រតិបត្តិការរវាងប្រទេសទាំងពីរទៅថ្ងៃមុខ។
ទោះជាយ៉ាងណាក៏ដោយ អ្នកសង្កេតការណ៍ខ្លះនិយាយថា សំណាញ់មេឃរបស់លោក ហ៊ុន សែន ទុកគ្រាន់តែធ្វើបាបខ្មែរគ្នាឯងប៉ុណ្ណោះ។ ជាក់ស្តែង លោក ហ៊ុន សែន ធ្លាប់គំរាមដោយប្រើ BM-21 បាញ់ទៅលើក្រុមបក្សប្រឆាំងកាលពីអំឡុងឆ្នាំ២០១៨។
អ្នកវិភាគខ្លះនិយាយថា វិស័យការពារជាតិកម្ពុជាទុកគ្រាន់តែដើម្បីការពារអំណាចគ្រួសារត្រកូលហ៊ុនប៉ុណ្ណោះ ហើយធ្វើមិនដឹងមិនឮចំពោះជីវភាពរបស់កងទ័ព និងគ្រួសារកងទ័ព។ គ្រួសារកងទ័ពជួរមុខដែលការពារព្រំដែនខ្លះអះអាងថា ពួកគេរកតែអង្ករច្រកឆ្នាំងពុំបាន រីឯអាហាររបស់កងទ័ពមានតែមីកញ្ចប់ ផឹកទឹកដងអូរប៉ុណ្ណោះ។ ទាហានខ្លះរាងកាយស្គមស្គាំង ខ្វះអាហារដែលមានសារធាតុចិញ្ចឹម។ បើនិយាយពីប្រាក់ខែវិញ ទាហានខ្លះមិនទាន់ទទួលជាច្រើនខែមកហើយ។
មជ្ឈដ្ឋានខ្លះនិយាយថា ជីវភាពរបស់ទាហានដែលហ៊ានពលីសាច់ស្រស់ឈាមស្រស់ដើម្បីការពារទឹកដី ផ្ទុយស្រឡះពីជីវភាពរបស់មេទាហាន មេកងពល មេកងអង្គរក្ស មេបញ្ជាការ មេគយ មេប៉ូលិស មេរដ្ឋសភា មេព្រឹទ្ធសភា មេម៉ាហ្វីយ៉ា រដ្ឋមន្ត្រី និងនាយករដ្ឋមន្ត្រី ដូចមេឃហើយនិងដី។
លោក ហ៊ុន ម៉ាណែត បានសរសេរលើទំព័រហ្វេសប៊ុករបស់ខ្លួននៅថ្ងៃទី២៩ ឧសភា នេះថា មេបញ្ជាការកងទ័ពជើងគោកកម្ពុជា និងមេបញ្ជាការកងទ័ពជើងគោកថៃ នឹងជួបពិភាក្សារកដំណោះស្រាយនៅល្ងាចថ្ងៃទី២៩ ខែឧសភា នេះ ហើយលោកសង្ឃឹមថានឹងទទួលបាននូវលទ្ធផលជាវិជ្ជមាន ក្នុងការរក្សាស្ថានភាពឲ្យមានភាពស្ងប់ស្ងាត់ និងការប្រាស្រ័យទាក់ទងគ្នាល្អរវាងកងទ័ពជួរមុខនៃប្រទេសទាំងពីរដូចដែលបានធ្វើកន្លងមក។
សារព័ត៌មានថៃ The Nation បានស្រង់សម្ដីនាយករដ្ឋមន្ត្រីថៃ អ្នកស្រី ផែថងថាន ស៊ីណាវ៉ាត់ កាលពីថ្ងៃទី២៨ ខែឧសភា ថា ក្រោយពីពិភាក្សាជាមួយនាយករដ្ឋមន្ត្រីកម្ពុជា លោក ហ៊ុន ម៉ាណែត ភាគីទាំងពីរបានយល់អំពីស្ថានការណ៍នេះ ហើយព្យាយាមដោះស្រាយបញ្ហានេះឱ្យបានឆាប់ ព្រោះអ្នកស្រីក៏មិនចង់ឱ្យបញ្ហានេះកើនកម្ដៅថែមទៀតដែរ។
ជុំវិញបញ្ហានេះ លទ្ធផលជំនួបចរចារវាងមេបញ្ជាការកងទ័ពជើងគោកកម្ពុជា-ថៃ នារសៀលថ្ងៃព្រហស្បតិ៍នេះ បានចំណាយពេលប្រមាណ ១ម៉ោង និង ២០នាទី ដោយភាគីទាំងពីរបានសម្រេចព្រមព្រៀងគ្នាលើ ៣ចំណុច៖
- ទី១ ភាគីទាំងពីរយល់ព្រមដោះស្រាយបញ្ហានេះតាមរយៈគណៈកម្មការព្រំដែនរួម (JBC) ដែលនឹងរៀបចំឡើងក្នុងរយៈពេល ២-៣សប្តាហ៍ខាងមុខ។
- ទី២ ភាគីទាំងពីរយល់ព្រមឈរជើងនៅចំណុចសមស្របមួយរៀងៗខ្លួន ដើម្បីកាត់បន្ថយការប្រឈមមុខដាក់គ្នានៅតំបន់ព្រំដែន។
- ទី៣ ភាគីទាំងពីរត្រូវរក្សាទំនាក់ទំនងល្អរវាងប្រទេសទាំងពីរ និងអនុវត្តភាពអត់ធ្មត់ខ្ពស់ក្នុងការដោះស្រាយបញ្ហានានា។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត លើកឡើងថា ដើម្បីចៀសវាងការប្រឈមដាក់គ្នាទៅថ្ងៃក្រោយ កម្ពុជាត្រូវតែប្តឹងប្រទេសថៃ ទៅតុលាការអន្តរជាតិនូវសំណុំរឿងប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងកោះគុត ជាដើម៕
© 2025, ឌឹ ខេមបូឌា ដេលី. All rights reserved.