ប្រធានព្រឹទ្ធសភា លោក ហ៊ុន សែន អះអាងថា កម្ពុជាទុកពេល ២៤ម៉ោងឲ្យទាហានថៃ បើកព្រំដែនរបស់ខ្លួនឡើងវិញ បើសិនយោធាថៃ មិនព្រមបើកច្រកព្រំដែនជាមួយកម្ពុជាឲ្យដូចមុនថ្ងៃទី៧ ខែមិថុនា នោះទេ កម្ពុជានឹងបិទខ្ទប់ការនាំចូលបន្លែផ្លែឈើពីថៃ ទាំងអស់នៅថ្ងៃទី១៧ មិថុនា នេះ។
ថ្លែងនៅក្នុងកិច្ចប្រជុំព្រឹទ្ធសភា នៅថ្ងៃចន្ទនេះ លោក ហ៊ុន សែន បានថ្លែងថា នៅពេលថៃ បិទព្រំដែនជាមួយកម្ពុជានាពេលថ្មីៗនេះ គឺទាហានថៃ ធ្វើឡើងជាឯកតោភាគី ដូច្នេះបើចង់ឲ្យកម្ពុជាបើកឡើងវិញ គឺទាល់តែទាហានថៃ បើកឡើងវិញជាមុនសិន។
ប្រធានគណបក្សប្រជាជនកម្ពុជា លោក ហ៊ុន សែន ថ្លែងថា កម្ពុជាទុកពេល ២៤ម៉ោង ឲ្យទាហានថៃ បើកព្រំដែនរបស់ខ្លួនឡើងវិញ បើពុំបើកវិញក្នុងអំឡុងពេលនេះទេ កម្ពុជានឹងបិទការនាំចូលបន្លែផ្លែឈើទាំងអស់ពីប្រទេសថៃ នៅថ្ងៃអង្គារ ទី១៧ ខែមិថុនា។
លោក ហ៊ុន សែន បន្ថែមថា កម្ពុជានឹងបិទច្រកដែលជាចំណុចនៃការដឹកជញ្ជូនបន្លែផ្លែឈើពីប្រទេសថៃ ដោយឆ្លងកាត់ទឹកដីកម្ពុជា រួចយកទៅចែកចាយនៅវៀតណាម។ លោកថា សប្បុរសជនកម្ពុជាត្រូវខិតខំប្រមូលទិញកសិផលរបស់កសិករខ្មែរ ដើម្បីចែកជូនកងទ័ព មណ្ឌលកុមារកំព្រា ឬក៏មណ្ឌលហ្វឹកហាត់របស់កងកម្លាំងប្រដាប់អាវុធ។
នាយកដ្ឋានពាណិជ្ជកម្មបរទេសនៃក្រសួងពាណិជ្ជកម្មរបស់ថៃ បានឱ្យដឹងថា ក្នុងរយៈពេល ៤ឆ្នាំចុងក្រោយនេះ គឺពីឆ្នាំ២០២០-២០២៤ ពាណិជ្ជកម្មឆ្លងដែនកម្ពុជា-ថៃ បានកើនឡើងដល់ ៥ពាន់លានដុល្លារអាមេរិកក្នុងមួយឆ្នាំៗ។
ទិន្នន័យដដែលបង្ហាញទៀតថា នៅឆ្នាំ២០២៤ ពាណិជ្ជកម្មឆ្លងព្រំដែនកម្ពុជា-ថៃ មានទំហំជាង ៥,៤ពាន់លានដុល្លារអាម៉េរិក ដោយការនាំចេញរបស់ថៃ មានចំណែកគ្របដណ្ដប់រហូតដល់ទៅជាង ៤ពាន់លានដុល្លារអាមេរិក ហើយការនាំចូលពីកម្ពុជា មានទំហំត្រឹមតែជាង ១ពាន់លានដុល្លារអាម៉េរិកតិចតួចប៉ុណ្ណោះ។
ប្រទេសថៃ នាំចេញភាគច្រើនមកកាន់ទីផ្សារកម្ពុជា គឺភេសជ្ជៈ គ្រឿងបន្លាស់រថយន្ត ម៉ាស៊ីន និងគ្រឿងចក្រកសិកម្មដែលមានចំណែកគ្របដណ្ដប់រហូតដល់ទៅជាង ៣០% នៃការនាំចេញទាំងអស់។ ដោយឡែកការនាំចូលសំខាន់ៗពីកម្ពុជា រួមមានដំឡូងមី ដែកអេតចាយ និងខ្សែភ្លើងដែលមានសារសំខាន់សម្រាប់ឧស្សាហកម្មថៃ ដូចជាផលិតចំណីសត្វ ការកែច្នៃ និងគ្រឿងអេឡិចត្រូនិក។
ភាគីថៃ បានសម្រេចជាឯកតោភាគីបិទច្រកទ្វារតំបន់ និងច្រកទ្វារអន្តរជាតិមួយចំនួនជាមួយកម្ពុជា កាលពីថ្ងៃទី៧ ខែមិថុនា នៅពេលកម្ពុជាមិនចរចាទ្វេភាគីលើជម្លោះព្រំដែននៅតំបន់ចំនួន៤ គឺប្រាសាទតាមាន់តូច និងប្រាសាទតាមាន់ធំ ប្រាសាទតាក្របី និងតំបន់មុំបី។
ភាគីថៃ ក៏បានស្នើឱ្យមានការដោះស្រាយបញ្ហាព្រំដែននេះតាមរយៈគណៈកម្មការចម្រុះខណ្ឌសីមា និងបោះបង្គោលព្រំដែនគោក (JBC) កម្ពុជា-ថៃ គឺមិនព្រមដឹកដៃកម្ពុជា ទៅដោះស្រាយវិវាទព្រំដែននេះនៅតុលាការយុត្តិធម៌អន្តរជាតិ (ICJ) ឡើយ៕
© 2025, ឌឹ ខេមបូឌា ដេលី. All rights reserved.