នាយករដ្ឋមន្ត្រីខ្មែរ លោក ហ៊ុន ម៉ាណែត ប្រតិកម្មទៅនាយករដ្ឋមន្ត្រី ថៃ អ្នកស្រី ផែថងថាន ស៊ីណាវ៉ាត់ ថាពេលមេដឹកនាំខ្មែរមិនតបត ខាងថៃ តាមជាន់ តែពេលកម្ពុជាឆ្លើយបកទៅវិញ បែរជាចោទកម្ពុជាថាធ្វើការគ្មានជំនាញ ទាំងដែលថៃ លាបពណ៌ និងគំរាមកម្ពុជាជាបន្តបន្ទាប់ឥតឈប់ឈរ។
លោក ហ៊ុន ម៉ាណែត លើកឡើងនៅក្នុងពិធីបិទមហាសន្និបាតវិសាមញ្ញកាយរឹទ្ធិជាតិកម្ពុជា នៅថ្ងៃទី១៧ ខែមិថុនា ឆ្នាំ២០២៥ នេះថា ថៃ តែងចោទថាកម្ពុជាអាក្រក់ ហើយអួតខ្លួនឯងថាល្អឥតខ្ចោះ ប៉ុន្តែខំបិទបាំងអំពើអាក្រក់របស់ខ្លួន ដោយព្យាយាមទម្លាក់អំពើអាក្រក់ទាំងនោះមកលើកម្ពុជា។
លោកថា ក្នុងរយៈពេលកន្លងមកនេះ កម្ពុជាអត់ធ្មត់ខ្លាំងបំផុត ទោះមានការលាបពណ៌ ឬគំរាមកាត់ផ្តាច់អគ្គិសនី កាត់ផ្ដាច់អ៊ីនធឺណិត និងការគំរាមផ្សេងទៀតក៏ដោយ ក៏កម្ពុជាមិនឆ្លើយតបទៅវិញដែរ ព្រោះកម្ពុជាមិនចង់ឱ្យមានទំនាស់ក្នុងនាមជាប្រទេសជិតខាង។
នាយករដ្ឋមន្ត្រីខ្មែររូបនេះលើកឡើងថា ថៃ ចោទកម្ពុជាគ្រប់រូបភាព ប៉ុន្តែថៃ ខ្លួនឯង ចល័តទ័ព កែលេណដ្ឋាន ឬត្រង់សេ និងចល័តកាំភ្លើងធំតាមព្រំដែនរាល់ថ្ងៃ ទោះកិច្ចប្រជុំគណៈកម្មការចម្រុះព្រំដែន (JBC) បានបញ្ចប់ហើយក៏ដោយ។
លោក ហ៊ុន ម៉ាណែត សួរទៅកាន់នាយករដ្ឋមន្ត្រីថៃ អ្នកស្រី ផែថងថាន ស៊ីណាវ៉ាត់ ថា តើការគំរាមកម្ពុជាជាបន្តបន្ទាប់មកនេះ ជាទង្វើដែលមានជំនាញ ឬ Professional ឬយ៉ាងណា ព្រោះវិធានការដែលកម្ពុជាដាក់ចេញនៅពេលនេះ គឺធ្វើតាមពីក្រោយថៃ និងស្ថិតក្នុងព្រំដែនរបស់ខ្លួនប៉ុណ្ណោះ។
កាលពីថ្ងៃទី១៦ ខែមិថុនា ប្រធានព្រឹទ្ធសភា លោក ហ៊ុន សែន បានលើកឡើងក្នុងកិច្ចប្រជុំព្រឹទ្ធសភាថា លោកគ្រោងនឹងប្រកាសបិទព្រំដែនបញ្ឈប់ការនាំបន្លែផ្លែឈើចូលមកកម្ពុជាភ្លាមៗនៅថ្ងៃទី១៦ ខែមិថុនា ប៉ុន្តែក្រោយរូបលោក និងលោក ហ៊ុន ម៉ាណែត ពិភាក្សាជាមួយនាយករដ្ឋមន្ត្រីថៃ ក៏សម្រេចទុកពេល ២៤ម៉ោង ដើម្បីឱ្យថៃ បើកព្រំដែនដូចមុនឡើងវិញ។
យ៉ាងណាក៏ដោយ ក្រោយការព្រមានរបស់លោក ហ៊ុន សែន សារព័ត៌មាន ខៅស៊ុត (Khaosod) បានផ្សព្វផ្សាយវីដេអូឃ្លីបមួយដែលនាយករដ្ឋមន្ត្រីថៃ អ្នកស្រី ផែថងថាន ស៊ីណាវ៉ាត់ រិះគន់ចំណាត់ការលោក ហ៊ុន សែន និងលោក ហ៊ុន ម៉ាណែត ថាធ្វើការគ្មានវិជ្ជាជីវៈ (Un Professional) និងរញ៉េរញ៉ៃ។
ជុំវិញបញ្ហានេះ ប្រធានគណបក្សជំនាន់ថ្មី លោក មាជ សុវណ្ណារ៉ា លើកឡើងថា ការលើកឡើងរបស់នាយករដ្ឋមន្ត្រីថៃ បង្ហាញពីការមាក់ងាយកម្ពុជា និងប្រមាថនាយករដ្ឋមន្ត្រីខ្មែរយ៉ាងធ្ងន់ធ្ងរ ទាំងដែលភាគីថៃ គឺជាអ្នកបង្កកំហុសឡើងដោយខ្លួនឯងនោះ៕
© 2025, ឌឹ ខេមបូឌា ដេលី. All rights reserved.